ʼUluaki Kolonito

12 ʼU tehina, ʼo ʼuhiga leva mo te ʼu fealagia ʼae ʼe foaki ʼaki te laumalie maʼoniʼoni,+ ʼe au loto ke kotou mahino ki te ʼu faʼahi ʼaia. 2 ʼE kotou iloʼi, ʼi muʼa ʼo takotou liliu ko he kau Kilisitiano, neʼe uga koutou ʼi he ʼu aluʼaga kehekehe ke kotou tauhi ki te ʼu taula ʼatua ʼae ʼe mole palalau.+ 3 Koia ʼe au loto ke kotou iloʼi, moka palalau he tahi ʼaki te laumalie ʼo te ʼAtua, ʼe mole ina ui: “ ʼE malaʼia ia Sesu!” pea ʼe gata pe kia ia ʼae ʼe ina maʼu ia te laumalie maʼoniʼoni ʼe feala ke ina ui: “Ko Sesu te ʼAliki!”+

4 ʼE kehekehe te ʼu fealagia, kae ʼe ko te laumalie pe ʼe tahi.+ 5 ʼE kehekehe te ʼu minisitelio+ kae ʼe ko te ʼAliki pe ʼe tahi. 6 Pea ʼe kehekehe te ʼu gaue, kae ʼe ko te ʼAtua pe ʼe tahi ʼe ina fakahoko te ʼu gaue ʼaia ʼi te hahaʼi fuli.+ 7 Kae ʼe ha te gaue ʼa te laumalie ʼi te hahaʼi takitokotahi ke fua lelei ki ʼihi.+ 8 ʼAki te laumalie ʼe feala ai ki he tahi ke palalau ʼaki te poto, pea ʼaki pe te laumalie ʼaia, ʼe feala ai ki he tahi age ke palalau ʼaki te ʼatamai malama, 9 pea ʼaki pe te laumalie ʼaia, ʼe feala ai ki he tahi age ke ina maʼu te tui,+ pea ki he tahi age ke ina fakamalolo+ te kau mahahaki, 10 ki he tahi age ke ina fai he ʼu milakulo,*+ ki he tahi age ke faifakakikite, ki he tahi age ke fakasiosio tonu ʼo ʼuhiga mo te ʼu folafola ʼae ʼe haʼu mai te ʼAtua,+ ki he tahi age ke palalau ʼi te ʼu lea kehekehe+ pea ki he tahi age leva ke fakahoko lea.+ 11 Kae ʼe fakahoko te ʼu gaue fuli ʼaia ʼaki pe te laumalie ʼe tahi, ʼo ina foaki ki te hahaʼi takitokotahi ʼo mulimuli ki te meʼa ʼae ʼe loto ki ai te laumalie.

12 Koteʼuhi ohage pe ko he sino ʼe tahi ʼe ina maʼu he ʼu koga sino ʼe lahi, pea logo la te lahi ʼo te ʼu koga sino fuli ʼaia, kae ʼe ko he sino pe ʼe tahi,+ pea ʼe toe feia foki mo Kilisito.* 13 Koteʼuhi neʼe papitemaʼi ia tatou fuli ʼaki te laumalie ʼe tahi ke tou faʼu he sino ʼe tahi, pe ʼe tou Sutea peʼe tou Keleka, peʼe tou kaugana peʼe tou ʼateaina, pea neʼe tou maʼu fuli ia te laumalie ʼaia.

14 Koteʼuhi ʼe moʼoni, ko te sino ʼe mole ko he koga sino pe ʼe tahi, kae ʼe faʼufaʼu ia ʼaki he ʼu koga sino ʼe lahi.+ 15 Kapau la ʼe ui e te vaʼe: “ ʼE mole ko au ko he nima, koia ʼe mole au kau au ki te sino,” ʼe fakaʼuhiga ai koa ʼe mole kau ki te sino? 16 Pea kapau la ʼe ui e te taliga: “ ʼE mole ko au ko he foʼi mata, koia ʼe mole au kau au ki te sino,” ʼe fakaʼuhiga ai koa ʼe mole kau ki te sino? 17 Kapau ko te sino katoa neʼe ko he foʼi mata, pea ʼe lava feafeaʼi hana logo? Pea kapau ko te sino katoa neʼe ko he taliga, pea ʼe lava feafeaʼi hana mamanu ki he meʼa? 18 Kae neʼe ʼai e te ʼAtua te ʼu koga sino takitahi ʼi te sino, ʼo mulimuli ki tona loto.

19 Kapau ʼe tatau te ʼu koga sino fuli, ʼe feafeaʼi anai te agaaga ʼo te sino? 20 Koia ʼe lahi te ʼu koga sino kae ʼe ko te sino pe ʼe tahi. 21 ʼE mole feala ke ui e te foʼi mata ki te nima: “ ʼE mole ke ʼaoga mai koe kia au,” peʼe ui e te ʼulu ki te ʼu vaʼe: “ ʼE mole kolua ʼaoga mai koulua kia au.” 22 Kae ko te ʼu koga sino ʼae ʼe hage ʼe vaivai, ʼe natou ʼaoga, 23 pea ʼe tou fakamaʼuhigaʼi lahi age te ʼu koga sino ʼae ʼe tou manatu ʼe mole faʼa maʼuhiga,+ ʼo tou tokakaga lahi age ki te ʼu koga sino ʼae ʼe mole faʼa matalelei. 24 Kae ko ʼotatou koga sino ʼae ʼe matalelei ʼe mole ʼaoga ke tou tokakaga ki ai. Neʼe faʼufaʼu e te ʼAtua ia te sino ʼo ina foaki ia he fakaʼapaʼapa ʼe lahi age ki te koga sino ʼae ʼe mole faʼa maʼuhiga, 25 ke mole ʼi ai he mavetevete ʼi te sino kae ke fetokagaʼaki ʼona koga sino.+ 26 Pea ka mamahi ia he koga sino ʼe tahi, ʼe mamahi fuli ia te ʼu koga sino fakatahi mo ia.+ Pea ka fakakololiaʼi ia he koga sino ʼe tahi, ʼe fakafiafia fuli ia te ʼu koga sino fakatahi mo ia.+

27 Ko koutou ʼe ko te sino ʼo Kilisito+ pea ko koutou takitokotahi ʼe ko ʼona koga sino.+ 28 Pea neʼe fakanofo e te ʼAtua ia natou ʼaeni ki te kokelekasio: ʼuluaki, te kau apositolo,+ lua, te kau polofeta,+ tolu, te kau faiako,+ pea mo natou leva ʼae ʼe faimilakulo,+ mo natou ʼae ʼe natou fakamalolo ia te kau mahahaki,+ mo natou ʼae ʼe tokoni ki ʼihi, mo natou ʼae ʼe takitaki,+ pea mo natou ʼae ʼe palalau ʼi te ʼu lea kehekehe.+ 29 ʼE natou apositolo fuli koa? ʼE natou polofeta fuli koa? ʼE natou faiako fuli koa? ʼE natou faimilakulo fuli koa?* 30 ʼE natou maʼu fuli koa ia te fealagia ʼae ke natou fakamalolo ia te kau mahahaki? ʼE natou palalau fuli koa ʼi te ʼu lea kehekehe?+ ʼE natou fakahoko lea* fuli koa?+ 31 Kotou faiga malohi ke kotou maʼu* ia te ʼu fealagia ʼae ʼe lalahi.+ Kae ʼe au fakaha atu anai ia he ala ʼe lelei tukupau.+