Ko Te Faitohi ʼi Te Kaupā

KOTEĀ koa te meʼa ʼaē ʼe hoko ʼi henī? Neʼe lolotoga fai e te hahaʼi tanatou kaitahi lahi. Neʼe fakaafe e te hau ʼo Papiloni te lauʼi afe hahaʼi maʼuhiga. ʼE nātou fakaʼaogaʼi te ʼu ipu aulo pea mo te ʼu ipu siliva ʼaē neʼe ʼaumai mai te fale lotu ʼo Sehova ʼi Selusalemi. Kae fokifā pe neʼe hā te kauʼi tuhi ʼo he nimaʼi tagata, pea neʼe ina kamata tohi te kaupā. Neʼe matataku ai te hahaʼi fuli.

Ko te hau ʼo te temi ʼaia neʼe ko Pelesasā, te mokopuna ʼo Nepukanesa. Neʼe kalaga ke ʼaumai tana ʼu tagata popoto. Neʼe ʼui age e te hau kia nātou: ‘Ko ʼaē ʼe feala tana lau te meʼa ʼaē neʼe tohi pea mo ina fakamatala mai tona faka ʼuhiga ʼe ʼau foaki anai ki ai te ʼu tuʼuga meʼa ʼofa, pea ʼe ina maʼu anai te tuʼulaga tolu maʼuhiga ʼi te puleʼaga.’ Kae neʼe mole he tahi ʼi te ʼu tagata popoto ʼaia neʼe feala ke ina lau te faitohi ʼi te kaupā, peʼe ko te fakamatala ʼo tona faka ʼuhiga.

Neʼe logo te faʼe ʼa te hau ki te logoaʼa pea neʼe haʼu ia ia ki te kogafale ʼe fai ai te kaitahi. Neʼe ina ʼui age ki te hau, ‘tuku tau mataku. ʼE ʼi ai te tagata ʼi tou puleʼaga ʼe ina ʼiloʼi te ʼu ʼatua maʼoniʼoni. ʼI te temi ʼaē neʼe hau ai tau kui ko Nepukanesa neʼe ina fakanofo te tagata ʼaia ke pule ki tana ʼu tagata poto fuli. ʼE higoa ko Taniela. Fekau ke haʼu, pea ʼe ina fakahā atu anai te faka ʼuhiga ʼo te ʼu meʼa fuli ʼaia.’

ʼI te temi ʼaia neʼe ʼaumai aipe ia Taniela. ʼI tana ʼosi fakafisi ki te ʼu meʼa ʼofa, neʼe kamata fakamatala age e Taniela pe koʼe neʼe toʼo e Sehova te nofoʼaga hau mai tana kui ko Nepukanesa. Neʼe ʼui age e Taniela, ‘neʼe ko he tagata fiatuʼu, pea neʼe fakatūʼa ia ia e Sehova.’

Neʼe ʼui age e Taniela kia Pelesasā, ‘kae ko koe, neʼe ke ʼiloʼi pe ia meʼa fuli ʼaē neʼe hoko ki tau kui, pea neʼe ke fiatuʼu aipe ohage ko Nepukanesa. Neʼe ke fekau ke ʼaumai te ʼu kalise pea mo te ʼu ipu mai te fale lotu ʼo Sehova pea neʼe ke ʼinu ai. Neʼe ke fakavikiviki ki te ʼu ʼatua papa pea mo te ʼu ʼatua maka, pea neʼe mole ke faka maʼuhigaʼi totatou Tupuʼaga Lahi. Ko te tupuʼaga la ʼaia ʼo te fekauʼi mai e te ʼAtua he nima ke ina tohi te ʼu palalau ʼaenī.’

Neʼe ʼui fēnei e Taniela: ‘Koʼeni te meʼa ʼaē neʼe tohi: “MEʹNE, MEʹNE, TEʹKEL pea mo PARʹSIN.” ’

Ko te kupu ‘MEʹNE ko tona faka ʼuhiga, neʼe lau e te ʼAtua te ʼu ʼaho ʼo tou puleʼaga pea kua ina fakagata. TEʹKEL ko tona faka ʼuhiga, neʼe fua koe ʼi te meʼa fua pea neʼe fakatokagaʼi ʼe mole ke agalelei. PARʹSIN ko tona faka ʼuhiga, ko tou puleʼaga ʼe foaki anai ki te kau Metia pea mo te kau Pelesia.’

Lolotoga te palalau ʼa Taniela, neʼe kamata tauʼi e te kau Metia pea mo te kau Pelesia ia Papiloni. Neʼe nātou maʼu te kolo pea neʼe nātou matehi ia Pelesasā. Ko te faitohi ʼaē neʼe tuʼu ʼi te kaupā neʼe hoko moʼoni ia ʼi te po pe ʼaia! Kae koteā koa te meʼa ʼaē ka hoko anai ʼi te temi ʼaia ki te kau Iselaelite? ʼE tou vakaʼi anai te faʼahi ʼaia, kae tou vakaʼi muʼa pe koteā te meʼa ʼaē neʼe hoko kia Taniela.