Kapite 3
Koutou Pipiki Maʼu Ki Te Folafola ʼa Te ʼAtua
1. (a) Neʼe feafeaʼi te fakatokagaʼi e te kau Iselaele te moʼoni ʼo te Folafola ʼa te ʼAtua? (b) He koʼe ʼe ʼaoga kia tatou ʼi te temi nei?
“ ʼE KOUTOU ʼiloʼi lelei pe ʼi tokotou loto katoa pea mo tokotou nefesi katoa, ʼe mole ʼi ai he folafola ʼi te ʼu folafola lelei fuli ʼaē neʼe ʼui atu e Sehova, tokotou ʼAtua neʼe mole heʼeki hoko.” Ko te ʼu palalau ʼaenī neʼe fai age e Sosue ko he fakamanatu ki te ʼu tagata ʼāfea ʼo Iselaele ʼi tanatou kua ʼosi nonofo ʼi te Kele ʼo te fakapapau. Kae ʼi te ʼu taʼu neʼe hoko atu kiai neʼe mole tokaga lelei ia Iselaele pea mo mulimuli ki te Folafola ʼa te ʼAtua. Koteā tona fua? ʼE fakahā lelei mai e te Tohi-Tapu kapau neʼe hoko moʼoni ia te ʼu fakapapau ʼaē neʼe fai e Sehova ʼo ʼuhiga mo te ʼu tapuakina, koia, neʼe ina toe fakahoko foki ki te kau Iselaele te ʼu fua ʼo tanatou talagataʼa. (Sos. 23:14-16) Ko te fakamatala ʼaia, pea mo te Tohi-Tapu katoa, neʼe taupau lelei moʼo akoʼi ʼo tatou, koteʼuhi “ke tou maʼu te ʼamanaki” pea ke ʼaua naʼa tou fai he meʼa ʼe feala ke ina pulihi ia tatou te ʼamanaki ʼaia.—Lom. 15:4.
2. (a) Koteā te faka ʼuhiga ʼo te ʼui ʼaē ko te Tohi-Tapu ʼe “haʼu mai te ʼAtua?” (b) ʼI tatatou ʼiloʼi te faʼahi ʼaia, koteā te meʼa ʼaē ʼe tonu ke tou fai?
2 Logope la neʼe fakaʼaogaʼi e Sehova te toko fāgofulu “tagata faitohi” moʼo tohi ʼo te Tohi-Tapu, kae ʼe ko ia totonu tona Tupuʼaga. Ko tona faka ʼuhiga koa neʼe ina takitaki totonu te tohi ʼo te ʼu meʼa fuli ʼaē ʼe tuʼu ʼi loto? Ei. Ohage pe ko tona tohi fēnei e te ʼapositolo ko Paulo, “ko te Tohi-Tapu katoa ʼe haʼu ia mai te ʼAtua.” ʼI tamatou tui papau ki te manatu ʼaia, ʼe mātou tokoni mālohi ki te hahaʼi, ʼi te potu fuli pe, ke nātou tokagaʼi te Tohi-Tapu pea mo nātou mulimuli kiai, ohage pe ko tatatou faiga.—2 Tim. 3:16; 1 Tes. 2:13.
Koteā ʼAē Ka Tokoni Anai Ki Te Hahaʼi Ke Nātou Leleiʼia Te Tohi-Tapu?
3. Koteā te puleʼaki lelei moʼo tokoni ki te tokolahi ʼaē ʼe mole nātou faka tui ko te Tohi-Tapu ʼe ko te Folafola ʼa te ʼAtua?
3 ʼE mahino ia, ʼe tokolahi te hahaʼi ʼaē ʼe palalau mo tatou, ʼe mole nātou faka tui ohage ko tatou ko te Tohi-Tapu ʼe ko te Folafola moʼoni ʼa te ʼAtua. E feafeaʼi hatatou tokoni kia nātou? Ko he faʼahiga puleʼaki lelei ko te fakahāhā age kia nātou te ʼu meʼa ʼaē ʼe tuʼu ʼi loto. “Ko te folafola ʼa te ʼAtua ʼe maʼuli pea ʼe ina fakalogoʼi tana gāue, pea ʼe māsila ake ia ʼi he heletā ʼe matalua . . . pea ʼe feala ia ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.” (Hep. 4:12) Ko te kupu “folafola ʼa te ʼAtua” ʼe faka ʼuhiga ia ki tana fakapapau ʼaē ʼe tuʼu ʼi te Tohi-Tapu. ʼE mole mate, ohage ko he hisitolia ʼāfea, kae ʼe maʼuli ia, pea ʼe ʼalu ia ki tona fakahoko. ʼI te potu ʼaia, ko nātou ʼaē kua nātou ʼiloʼi te Tohi-Tapu, ʼe hā lelei mai ki tuʼa te ʼu meʼa moʼoni ʼaē ʼi tonatou ʼu loto mokā ʼe nātou mulimuli ki te ʼu maʼua tāfito ʼaē ʼe fakatuʼutuʼu e te ʼAtua. Ko te mālohi ʼo te Folafola ʼa te ʼAtua ʼe mālohi age ia ʼi te meʼa fuli pe ʼe feala ke tou talanoa kiai.
4. Koteā te ʼu fakamahino faigafua ʼo te ʼu moʼoni ʼo te Tohi-Tapu neʼe tupu ai leva te fetogi ʼa ʼihi hahaʼi ʼo ʼuhiga mo te Tohi-Tapu? Koteā tona tupuʼaga?
4 Ki te tokolahi, ko tanatou maʼu pe ʼaē ʼo te huafa ʼo te ʼAtua ʼi te Tohi-Tapu neʼe maʼuhiga tāfito. Ko ʼihi neʼe nātou fia ako te Tohi-Tapu ʼi tatatou fakahā age ʼaē kia nātou tana talanoa ʼaē ʼo ʼuhiga mo te ikuʼaga ʼo te maʼuli peʼe ko tatatou fakamahino age ʼaē kia nātou pe koʼe ʼe fakagafua e te ʼAtua te agakovi, mo te faka ʼuhiga ʼo te ʼu meʼa ʼe hoko ʼi te temi nei peʼe ko te ʼamanaki moʼoni ʼaē ki te Puleʼaga ʼo te ʼAtua. ʼI te ʼu fenua ʼaē, ʼe tautau gaohi koviʼi ai te hahaʼi e te ʼu laumālie kovi ʼuhi ko te ʼu meʼa faka lotu ʼaē ʼe fai māhani, ko te fakamatala ʼaē ʼe fakahā e te Tohi-Tapu ki te tupuʼaga ʼo te ʼu meʼa ʼaia pea mo te faʼahiga hāofaki ʼo kita mai ai, neʼe uga ai te tokolahi ke nātou fia logo ki te moʼoni. He koʼe neʼe lahi tanatou punamaʼuli ʼi te ʼu meʼa ʼaē ʼe talanoa ki ai te Tohi-Tapu? Koteʼuhi he ko ia tokotahi pe ʼe ina fai he ʼu fakamatala ʼe feala hatatou falala kiai ʼo ʼuhiga mo he ʼu fehuʼi maʼuhiga tāfito ohage ko te ʼu fehuʼi ʼaenī.—Pes. 119:130.
5. Kapau ʼe ʼui mai e he tahi ʼe mole faka tui ia ki te Tohi-Tapu, koteā ʼapē tona tupuʼaga? E feafeaʼi he tokoni ki ai?
5 Kae koteā anai te meʼa ka tou fai mo kapau ʼe ʼui mai e he tahi ʼe mole tui ia ki te Tohi-Tapu? ʼE tonu koa ke gata aipe te fai palalau? Kailoa, ʼe feala pe ke hoko atu mo kapau ʼe lotolelei ia ke ina fakakaukauʼi te ʼu meʼa ʼaē ʼe tou palalau age kiai. ʼE tonu ke mahino kia tatou ia totatou maʼua ʼaē ko te talanoa ʼo ʼuhiga mo te Folafola ʼa te ʼAtua ʼaki tatatou tui. E lagi ʼe ina faka ʼuhiga ia te Tohi-Tapu, ohage pe ko he tohi neʼe faʼu e te Keletiate ʼaē ʼe fakaʼiloga tona hisitolia ʼaki te malualoi, mo tana kau ki te ʼu meʼa faka politike pea mo te kole falā tuʼumaʼu. E lagi ko te tupuʼaga la ʼaia ʼo tana mole tali lelei ia te Tohi-Tapu. He koʼe ʼe mole fehuʼi fakalelei age ki ai pe ko tana manatu la ʼaia? Ko te ʼu vaega ʼo te Tohi-Tapu ʼaē ʼe nātou tauteaʼi ia te aga ʼa te Keletiate ʼo ʼuhiga mo te malamanei peʼe nātou fakahā te ʼu meʼa ʼe kehekehe ai te Keletiate pea mo te Lotu Faka Kilisitiano, ʼe feala anai ke nātou uga ia tana fia logo.—Vakaʼi ia Mateo 15:7-9; Sake 4:4; Mikea 3:11, 12.
6. (a) Koteā ʼaē ʼe koutou faka tui takitokotahi ai ko te Tohi-Tapu ko te Folafola ia ʼa te ʼAtua? (b) Koteā te tahi ʼu fakamoʼoni e feala ke tou fakaʼaogaʼi moʼo tokoni ki niʼihi hahaʼi ke nātou faka tui ko te Tohi-Tapu ʼe haʼu moʼoni mai te ʼAtua?
6 Ki ʼihi hahaʼi, ʼe ʼaoga ʼaupito anai ke fai he palalau fakahagatonu ki te ʼu fakamoʼoni ʼaē ko te Tohi-Tapu ʼe haʼu mai te ʼAtua. He koʼe ʼe ke faka tui ko te Tohi-Tapu ʼe haʼu moʼoni mai te ʼAtua? ʼE fakamoʼoni koa e te Tohi-Tapu ʼe haʼu totonu ia mai te ʼAtua? (2 Tim. 3:16, 17; Fkhā. 1:1) Peʼe lagi ʼe ke faka tui la, ʼuhi ko te matala lelei ʼo tona ʼu ʼatu lea faka polofeta, ʼaē ʼe mahino ia ʼe haʼu mai he matapuna māʼoluga? (2 Pe. 1:20, 21; Is. 42:9) Peʼe lagi ko te felogoi tahi ʼo te Tohi-Tapu ʼaē neʼe tohi e te tokolahi ia taʼu e 1 610. Peʼe ko tona kehekehe ʼapē ʼaē ʼi ʼihi ʼu tohi ʼo tona temi ʼo ʼuhiga mo tona totonu ʼi te ʼu meʼa fakapoto? Peʼe ko te palalau fakahagatonu ʼa nātou ʼaē neʼe nātou tohi te Tohi-Tapu? Peʼe ko tona taupau fakalelei ʼo aʼu mai ki te temi ʼaenī logope la te ʼu meʼa kovi ʼaē neʼe fai mo ʼona pulihi? Tatau aipe, pe koteā he faʼahiga fakamoʼoni ʼe koutou fakafuafua ʼe maʼuhiga, koutou haga ʼo fakaʼaogaʼi moʼo tokoni ʼo niʼihi.
Ko Tatatou Lau Takitokotahi Te Tohi-Tapu
7, 8. (a) Koteā te meʼa ʼaē ʼe tonu ke tou fai takitokotahi? (b) ʼO mole gata pe ʼi tatatou lau takitokotahi te Tohi-Tapu, koteā te tahi meʼa ʼe toe ʼaoga kia tatou, pea ʼe fakahā feafeaʼi mai e te Tohi-Tapu ia te faʼahi ʼaia? (c) Neʼe feafeaʼi tatatou maʼu takitokotahi te mālama lelei ʼo ʼuhiga mo te ʼu fakatuʼutuʼu ʼa Sehova?
7 ʼE mole tonu ke gata ʼaki pe tatatou tokoni ki niʼihi ke nātou tui ki te Tohi-Tapu, kae ʼe toe maʼua foki ke ʼi ai hotatou temi ke tou lau tuʼumaʼu ai te Tohi-Tapu. ʼE tou fai koa te meʼa ʼaia? ʼI te ʼu tohi fuli ʼaē kua tā, ko te Tohi-Tapu ʼaē ʼe maʼuhiga ʼaupito. ʼE mahino ia, ʼe mole ʼui leva mokā ʼe tou lau takitokotahi te Tohi-Tapu ʼe mole ʼaoga kia tatou he tahi age meʼa. ʼE fakatokaga mai te Tohi-Tapu ke ʼaua naʼa kita falala pe kia kita totonu, ʼaki te manatu ʼaē, ʼe feala pe ke kita mahino ʼi takita ʼu kumi takitokotahi pea mo faʼitaliha. Ko te ako takitokotahi ʼo te Tohi-Tapu pea mo tatatou kau tuʼumaʼu ki te ʼu fono ʼe ʼaoga mokā ʼe tou fia liliu ko ni kau Kilisitiano fakapotopoto.—Taag. 18:1; Hep. 10:24, 25.
8 Moʼo akoʼi ʼo tatou, ʼe talanoa te Tohi-Tapu ki te tagata gāue faka puleʼaga Etiopea ʼaē neʼe taki ki ai e te ʼaselo ia Filipo ko te tagata fai faka mafola evaselio, ʼi tana lolotoga lau te lea faka polofeta ʼa Isaia. Neʼe fehuʼi age e Filipo ki ai: “ ʼE ke mahino koa la ki te meʼa ʼaē ʼe ke lau?” ʼAki te agavaivai neʼe tali age e te Etiopea: “E feafeaʼi koa la haku mahino mo kapau ʼe mole takitaki ʼau e he tahi?” Pea neʼe ina kole ai kia Filipo ke ina fakamahinohino age te koga tohi ʼaia. Kae ko Filipo neʼe mole ko he tagata pe ʼe ina lau ʼāteaina te Tohi-Tapu, ʼaē neʼe feala ai ke ina tuku age tana manatu tokotahi ʼi te lakaga ʼaia ʼo ʼuhiga mo te Tohi-Tapu. Kailoa, ʼe fakahā mai e te hisitolia kia tatou neʼe felogoi lelei ia ia mo te kau ʼapositolo ʼo te kokelekasio ʼi Selusalemi pea neʼe kau ia ki te kautahi fakahāhā ʼa Sehova. Koia, neʼe feala ai tana tokoni ki te Etiopea ʼaia ke ʼaoga ki ai te akonaki ʼaē ʼe tuku mai e Sehova ʼaki tana kautahi ʼaia. (Gāue 6:5, 6; 8:5, 14, 15, 26-35) ʼE toe feiā aipe ia ʼaho nei. Ko ai ʼaē ia tatou kua ina maʼu he mālama lelei pea mo totonu ki te ʼu fakatuʼutuʼu ʼa Sehova ʼi hana faiga tokotahi pe? Ko te tokoni ʼaē ʼe foaki fakaʼofa mai e Sehova ʼaki tana kautahi fakahāhā neʼe ʼaoga kia tatou, pea ʼe kei ʼaoga tuʼumaʼu pe kia tatou.
9. Ko te ʼu polokalama lau Tohi-Tapu fea ʼaē ʼe feala ke tou maʼu ai he ʼu tapuakina?
9 Ko te kautahi ʼa Sehova ʼe tokoni kia tatou ke tou fakaʼaoga pea ke tou mahino ki te Tohi-Tapu ʼo ina tuku mai kia tatou te ʼu akonaki faka Tohi-Tapu lelei ʼi Te Tule Leʼo pea mo ʼihi ʼatu ʼu tohi. Tahi ʼaē meʼa, ʼe fakatuʼutuʼu te polokalama lau Tohi-Tapu ʼi te vāhaʼa fuli ʼi te Ako ʼo te minisitelio faka teokalatike ʼi te ʼu kokelekasio takitokotahi ʼa te kau Fakamoʼoni ʼa Sehova. ʼO hilifaki ki te polokalama ʼaia, ko te kau Fakamoʼoni ʼa Sehova ʼe nātou fakatuʼutuʼu ke nātou lau te Tohi-Tapu ʼi te ʼaho fuli. ʼE lahi te ʼu tapuakina e kita maʼu mo kapau e kita fakatuʼutuʼu he temi moʼo lau ʼo te Tohi-Tapu. (Pes. 1:1-3; 19:7, 8) Kua koutou lau koa te Tohi-Tapu katoa? Kapau ʼe mole heʼeki koutou fai, koutou fai he faiga makehe ke koutou haga lau ai te Tohi-Tapu. Tatau aipe, peʼe mole koutou mahino katoa ki te ʼu meʼa fuli, kae ʼe koutou maʼu anai hakotou faʼahiga fakasiosio ki te Tohi-Tapu, ʼe ko he meʼa maʼuhiga ʼaupito. Kapau ʼe koutou lau pe ni ʼu pasina e fā peʼe nima ʼi te ʼaho, ʼe lagi feala anai ke taʼu katoa takotou lau te Tohi-Tapu.
10. (a) Ko te temi fea ʼaē ʼe koutou fakatuʼutuʼu kiai takotou lau ʼo te Tohi-Tapu? (b) He koʼe ʼe maʼuhiga tona lau tuʼumaʼu?
10 Ko te temi fea ʼaē ʼe feala ai takotou lau te Tohi-Tapu? Kapau ʼe koutou fakaʼaogaʼi ni minuta pe e 10 peʼe 15 ʼi te ʼaho, ʼe koutou maʼu anai te ʼu tapuakina lahi. Kapau ʼe mole feala, pea koutou fakatuʼutuʼu he kiʼi temi ʼi te vāhaʼa ke feala ai hakotou lau tuʼa lahi te Tohi-Tapu, pea ke koutou mulimuli ki te polokalama ʼaia. Ko te lau ʼo te Tohi-Tapu ʼe tonu anai ke liliu ko he faʼahi māhani ʼi te maʼuli katoa, ohage pe ko te kai. Kua koutou ʼiloʼi pe foki, kapau ko he tahi ʼe mole ina fakamāmāhani ʼo kai fakalelei, ʼe feala anai ke fua kovi ki tona maʼuli. ʼE toe feiā aipe mo te maʼuli fakalaumālie. Ko totatou maʼuli ʼe fakalogo ki tatatou agamāhani ʼaē ko te kai tuʼumaʼu ki te “folafola fuli pe ʼe haʼu mai te gutu ʼo Sehova.”—Mat. 4:4.
11. Koteā te meʼa ʼe tonu ke tou faiga ki ai mokā tou lau te Tohi-Tapu?
11 Koteā ʼaē ʼe tou faiga kiai mokā tou lau te Tohi-Tapu? ʼE ko he faihala anai mokā ʼe tou fakatuʼutuʼu ke tou lau he ʼu tuʼuga pasina ke feala ai hatatou maʼu ia te maʼuli heʼegata. Ke tou maʼu he ʼu tapuakina loaloaga, ʼe tonu ke ia tatou he ʼu manatu ʼe māʼoluga age: ohage ko te ʼofa ki te ʼAtua, mo te holi ʼaē ke tou ʼiloʼi lelei ia ia, te fia mahino ki tona finegalo pea mo foaki kia te ia he tauhi ʼe ina leleiʼia. (Soane 5:39-42) ʼE tonu ke tatau tatatou manatu mo te tagata fai pesalemo ʼaē neʼe ina ʼui fēnei: “Fakahā mai kia te ʼau tou ʼu ala, Ê Sehova! Ako mai kia te ʼau tou ʼu ala foufou.”—Pes. 25:4.
12. (a) He koʼe ʼe ʼaoga ke tou maʼu te “mālama totonu,” pea koteā te faiga mālohi ʼe tonu ke tou fai mokā tou lau te Tohi-Tapu ke tou maʼu ai te mālama totonu ʼaia? (b) Ohage ko tona fakahā mai ʼi te pasina 27, koteā te ʼu faʼahiga manatu ʼe feala ke tou fakaʼaogaʼi moʼo fakakaukauʼi ʼo te meʼa ʼaē ʼe tou lau ke tou maʼu ai he ʼu tapuakina lahi? (c) Koutou fakamahinohino te ʼu manatu ʼaia e nima ʼo koutou fakaʼaogaʼi te ʼu fehuʼi ʼe tuʼu ʼi te fakaʼosi ʼo te palakalafe. Koutou tokaga ʼo fakaʼaogaʼi te Tohi-Tapu.
12 Mokā ʼe tou maʼu te ako ʼaia, ʼe tonu ke tou holi ke tou maʼu ia te “mālama totonu.” ʼE feafeaʼi anai hatatou taupau fakaleleiʼi te Folafola ʼa te ʼAtua ʼi totatou maʼuli, pe ko hona fakamatalatala fakaleleiʼi ki he tahi, mo kapau ʼe mole tou maʼu te mālama totonu ʼaia? (Kol. 3:10; 2 Tim. 2:15) Moʼo maʼu ʼo te mālama totonu ʼaia, ʼe ʼaoga ke tou lau fakaleleiʼi te Tohi-Tapu pea kapau ʼe loloto te kogaʼi tohi, ʼe lagi tonu anai ke tou lau liuliuga ke tou mahino lelei ki tona faka ʼuhiga. ʼE toe ʼaoga foki ke tou maʼu he temi moʼo metitasio ki te meʼa ʼaē kua tou lau, pea mo tou fakakaukau ki tona ʼu faʼahi kehekehe. Ko te pasina 27 ʼe ina fakahā lelei mai te ʼu faʼahi ʼe nima moʼo fakakaukauʼi ʼo te ʼu meʼa ʼaē ʼe tou lau. ʼE lahi te ʼu koga ʼo te Tohi-Tapu ʼe feala ke sivisivi leleiʼi ʼi he faʼahi e tahi peʼe laka atu ʼo mulimuli ki te ʼu faʼahi ʼaia, pea ʼe tou maʼu anai he ʼu tapuakina lahi. ʼE koutou vakaʼi anai peʼe feafeaʼi hona fai ʼi takotou tali ki te ʼu fehuʼi ʼaenā ʼe muli mai.
(1) Ko te koga ʼo te Tohi-Tapu ʼaē ʼe koutou lolotoga lau ʼe ina tautau fakahā mai te ʼu faʼahiga meʼa ʼo ʼuhiga mo te natula ʼo Sehova.
ʼI te temi ʼaē ʼe tou metitasio ai ʼaki he loto fakafetaʼi ki te meʼa ʼaē ʼe talanoa kiai te Tohi-Tapu ʼo ʼuhiga mo te ʼu gāue ʼaē neʼe fai e Sehova, koteā tona faka ʼuhiga ki tatatou aga ʼaē kia te ia? (Pes. 139:13, 14; ia Sopo ʼu kapite 38 ki te 42, koutou fakatokagaʼi tāfito ia te kapite 38:1, 2; 40:2, 8; 42:1-6.)
ʼAki te meʼa ʼaē neʼe palalau kiai ia Sesu ia Soane 14:9, 10, koteā te meʼa ʼe feala ke tou ʼui ʼo ʼuhiga mo Sehova mokā ʼe tou lau te ʼu fakamatala ohage la ko te fakamatala ʼaē ʼe tuʼu ia Luka 5:12, 13?
(2) Koutou fakakaukauʼi te fakamatala ʼaē ʼe koutou lau, ki tona pikipikiga mo te fakamatalatala ʼo te kupu tāfito ʼo te Tohi-Tapu, ʼaē ko te faka lakatonuʼi ʼo te huafa ʼo Sehova ʼaki te Puleʼaga ʼaē ʼe taki e Sesu Kilisito, te Hāko ʼaē neʼe Fakapapauʼi mai.
Koteā te pikipikiga ʼo te ʼu tautea ʼo Esipito pea mo te kupu tāfito ʼo te Tohi-Tapu? (Vakaʼi ia Ekesote 5:2; 9:16; 12:12.)
Koteā te ʼui ki te hisitolia fakaʼofaʼofa ʼo Lute ko te Moapite? (Lute 4:13-17; Mat. 1:1, 5)
Koteā te pikipikiga ʼo te ʼu palalau ʼa te ʼaselo ko Kapeliele ʼaē neʼe ina fai kia Malia ʼo ʼuhiga mo te ʼamanaki tupu ʼo Sesu, pea mo te kupu tāfito ʼaia? (Luka 1:26-33)
He koʼe neʼe maʼuhiga te fakanofo ʼo te kau tisipulo ʼa Sesu ʼaki te laumālie maʼoniʼoni ʼi te Penikosite? (Gāue 2:1-4; 1 Petelo 2:4, 5, 9; 2 Petelo 1:10, 11)
(3) Ko te faka ʼuhiga ʼo he vaega ʼe fakalogo ki te ʼu ʼuluaki vaega pea te ʼu vaega ʼaē ʼe hoa mai ki ai.
Ko te ʼu palalau ʼaē ʼe tuʼu ia Loma 5:1 pea mo 8:16 ʼe fai kia ai? (Vakaʼi ia Loma 1:7.)
ʼO mulimuli ki te ʼu ʼuluaki vaega pea mo te ʼu vaega ʼaē ʼe hoa mai, ʼe palalau koa ia 1 Kolonito 2:9 ki te maʼuli ʼi te kele ʼi te tuʼu foʼou ʼaē neʼe fakapapau mai e te ʼAtua? ʼI tona tuʼu mai ʼi te ʼu vaega 6 ki te 8, ko te ʼu mata pea mo te ʼu taliga ʼo ai ʼaē neʼe mole mahino ki te ʼu meʼa ʼaē neʼe tohi e Paulo?
(4) Koutou fakakaukauʼi peʼe feafeaʼi hakotou fakaʼaogaʼi kia koutou takitokotahi te meʼa ʼaē ʼe koutou lau.
Ko te fakamatala ʼo te fakapogi ʼo Apele e Kaino ʼe gata ʼaki pe koa tona ʼaoga ki te faʼahi faka hisitolia peʼe tou maʼu ai koa he akonaki ʼe ʼaoga kia tatou? (Sen. 4:3-12; 1 Soane 3:10-15; Hep. 11:4.) Mokā ʼe tou lau (mai te Ekesote ki te Teutalonome) te ʼu meʼa ʼaē neʼe hoko ki te kau Iselaele ʼi tanatou nonofo ʼaē ʼi te toafa, koteā tona fakaʼaoga ʼe tonu ke tou fai takitokotahi? (1 Kolonito 10:6-11)
Ko te ʼu tokoni ʼaē neʼe fai ki te kau Kilisitiano fakanofo ʼo ʼuhiga mo tanatou aga, ʼe toe ʼaoga koa ki te kau Kilisitiano ʼaē ʼe ʼamanaki ki te maʼuli heʼegata ʼi te kele? (Vakaʼi ia Faka au 15:16; Soane 10:16.)
Tatau aipe peʼe leleiʼia tatou ʼi te kokelekasio faka Kilisitiano, ʼe ʼaoga koa ke tou fakakaukauʼi peʼe feafeaʼi anai tatatou fakaʼaogaʼi fakalelei te ʼu tokoni ʼaē kua tou ʼosi ʼiloʼi? (2 Ko. 13:5; 1 Tes. 4:1)
(5) Koutou fakakaukauʼi pe ʼe feafeaʼi anai hakotou fakaʼaogaʼi te meʼa ʼaē ʼe koutou lolotoga lau moʼo tokoni ki niʼihi.
Ko ai ʼaē ʼe feala ke tou tokoni ki ai mokā ʼe tou fakaʼaogaʼi te ʼu vaega ʼaē ʼe talanoa ki te fakatuʼuake ʼo te ʼofafine ʼo Sailusi? (Luka 8:41, 42, 49-56)
13. Koteā te ʼu fua ʼe feala ke tou ʼamanaki kiai mo kapau ʼe ʼi ai tuʼumaʼu hatatou polokalama lau Tohi-Tapu pea mo tou ako mo te kautahi ʼa Sehova?
13 Ko te lau ʼo te Tohi-Tapu ʼe liliu ia ʼo maʼuhiga kia tatou mo kapau ʼe tou lau feiā! ʼE mahino ia, ko te lau ʼo te Tohi-Tapu ʼe mole ko he meʼa faigafua, kae ko he fakatuʼutuʼu ʼe fua manuʼia kia tatou, e lagi feala ke tou gāue kiai ʼi totatou maʼuli katoa. Kae kapau ʼe tou fai feiā, pea ʼe tou ʼāsili mālohi anai ʼi te faʼahi fakalaumālie. Ko totatou vāhaʼa pea mo Sehova totatou Tāmai ʼofa ʼe toe ʼāsili lelei age anai, ʼo toe feiā aipe pea mo ʼotatou ʼu tēhina faka Kilisitiano. Ko te faʼahi ʼaia ʼe faigafua anai kia tatou ke tou mulimuli ki te palalau fakaloto mālohi ʼa Paulo ʼaē ‘ke tou pipiki maʼu ki te folafola ʼo te maʼuli.’—Filp. 2:16.
Toe Fakamanatu
● He koʼe neʼe tohi te Tohi-Tapu pea mo taupau ʼo kaku mai ki te temi nei?
● E feafeaʼi hatatou tokoni ki niʼihi ke nātou leleiʼia te Tohi-Tapu?
● He koʼe ko te lau takitokotahi ʼo te Tohi-Tapu ʼo fai tuʼumaʼu ʼe ko he meʼa lelei? Koteā te ʼu faʼahiga manatu e nima ʼe feala hatatou fakaʼaogaʼi moʼo fakakaukauʼi ʼo te meʼa ʼaē ʼe tou lau ke ʼi ai hona ʼaoga kia tatou?
[Talanoa]
Ka Koutou Lau Te Tohi-Tapu, Koutou Fakakaukauʼi
Pe koteā te ʼu meʼa ʼe akoʼi atu e te koga tohi ʼaē ʼe koutou lau ʼo ʼuhiga mo te natula ʼo Sehova.
Koteā tona pikipikiga mo te kupu tāfito ʼo te Tohi-Tapu.
Koteā te meʼa ʼaē ʼe fakahā mai e te ʼu ʼuluaki vaega pea mo te ʼu vaega ʼaē ʼe hoa mai kiai ki te faka ʼuhiga ʼo te koga tohi ʼaia.
Koteā tona ikuʼaga ki tokotou maʼuli.
Peʼe feafeaʼi takotou fakaʼaogaʼi moʼo tokoni ki niʼihi.