Te Huafa ʼo Te ʼAtua​—Tona Fakaʼaogaʼi Pea Mo Tona Faka ʼUhiga

ʼI TAKOTOU Tohi-Tapu, ʼe fakaliliu feafeaʼi ia te Pesalemo 83:18? Ko te Tohi-Tapu Les Saintes Écritures ​— Traduction du monde nouveau, ʼe ina fakaliliu fēnei ia te vaega ʼaia: “Ke nātou ʼiloʼi ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele kātoa.” ʼE lahi te ʼu Tohi-Tapu ʼe nātou fakaliliu feiā te vaega ʼaia. Kae ʼe lahi te ʼu Tohi-Tapu ʼe mole nātou fakaʼaogaʼi te huafa ʼaē ko Sehova, heʼe nātou fetogi ʼaki te ʼu higoa faka tuʼulaga ohage ko te “ ʼAliki” peʼe ko te “Eteleno.” Koteā ʼaē ʼe tonu ke fakaʼaogaʼi ʼi te vaega ʼaia? Ko he higoa faka tuʼulaga peʼe ko te huafa ʼaē ko Sehova?

Ko te vaega ʼaia ʼe talanoa ʼo ʼuhiga mo he huafa. ʼE tuʼu te huafa ʼaē ko Sehova ʼi te lea faka Hepeleo ʼaē neʼe fakaʼaogaʼi tāfito moʼo tohi ia te Tohi-Tapu. ʼE tohi ʼaki te ʼu mataʼi tohi faka Hepeleo ʼaenī יהוה (YHWH). ʼI te Fakaʼuvea, ko te fakalilu ʼo te huafa ʼaia ʼe ko “Sehova.” Ko te vaega faka Tohi-Tapu pe koa ʼaia ʼe tuʼu ai te huafa ʼaia? Kailoa. ʼE teitei fakaʼaogaʼi tuʼa 7 000 te huafa ʼaia ʼi te ʼu Tohi Faka Hepeleo!

He koʼe ʼe maʼuhiga ia te huafa ʼo te ʼAtua? Tou vakaʼi te faikole ʼaē neʼe tuku mai e Sesu Kilisito ke tou faʼifaʼitaki kiai. ʼE kamata fēnei te faikole ʼaia: “Ko tamatou Tamai e i Selo, Ke tapuha tou Huafa.” (Mateo 6:9) Ki muli age, neʼe faikole fēnei ia Sesu ki te ʼAtua: “Tamai fakakololiaʼi tou huafa.” Pea moʼo tali ki tana faikole ʼaia, neʼe ʼui fēnei e te ʼAtua mai te lagi: “Kuʼau fakakololia ia pea e au toe fakakololiaʼi anai ia.” (Soane 12:28) ʼE hā mai, ʼe maʼuhiga ʼaupito ia te huafa ʼo te ʼAtua. He koʼe leva ko ʼihi Tohi-Tapu ʼe mole nātou fakaʼaogaʼi te huafa ʼaia kae nātou fetogi ʼaki he ʼu higoa faka tuʼulaga?

ʼE ʼi ai tona ʼu tupuʼaga tāfito e lua. ʼUluaki, tokolahi ʼe nātou ʼui ʼe mole tonu ke fakaʼaogaʼi heʼe mole iloʼi te puʼaki totonu ʼo te huafa ʼaia ʼi te temi nei. Neʼe mole tohi te ʼu vuaiele ʼi te faitohi faka Hepeleo ʼāfea. Koia, ʼe mole he tahi ia ʼaho nei ʼe ina ʼiloʼi papau peʼe neʼe puaki feafeaʼi e te hahaʼi ʼo te temi muʼa ia te ʼu mataʼi tohi YHWH. Kae ʼe ko he takuʼaki koa ke mole fakaʼaogaʼi te huafa ʼo te ʼAtua? ʼI te temi muʼa, ko te higoa ʼo Sesu neʼe lagi puʼaki ko Esua peʼe ko Esosua​—heʼe mole ʼiloʼi papau tona puʼaki totonu. Kae ko te hahaʼi ʼo te temi nei ʼe nātou puʼaki te higoa ʼaē ko Sesu, ʼo mulimuli pe ki tanatou lea. ʼE nātou fakaʼaogaʼi anai te higoa ʼaia tatau aipe peʼe mole nātou ʼiloʼi pe neʼe feafeaʼi tona puʼaki ʼi te ʼuluaki sēkulō. Ohage la, kapau ʼe koutou folau ki he tahi fenua, ko te hahaʼi ʼo te fenua ʼaia ʼe lagi mole nātou puʼaki fakalelei anai tokotou higoa heʼe mole nātou lea tahi mo koutou. Koia, ʼe mole ko he takuʼaki lelei ke mole kita puʼaki te huafa ʼo te ʼAtua ʼuhi pe heʼe mole kita ʼiloʼi peʼe neʼe feafeaʼi tona puʼaki ʼi te temi muʼa.

Ko te tahi tupuʼaga ʼaē ʼe tautau molehi ai ia te huafa ʼo te ʼAtua ʼi te Tohi-Tapu, heʼe ko te ʼu talitasio ʼa te kau Sutea. Tokolahi ia nātou ʼe nātou ʼui ʼe mole tonu ke puʼaki ia te huafa ʼo te ʼAtua. Ko te akonaki ʼaia ʼe fakatafito ki te mahino hala ʼo ʼuhiga mo te lao ʼaenī ʼi te Tohi-Tapu: “ ʼAua naʼa ke toʼo te huafa ʼo Sehova, tou ʼAtua, ʼo takua noaʼi, koteʼuhi ʼe tauteaʼi anai e Sehova ia ia ʼaē ʼe ina takua noaʼi anai tona huafa.”​—Ekesote 20:7.

Ko te lao ʼaia ʼe ina tapuʼi te fakaʼaogaʼi kovi ʼo te huafa ʼo te ʼAtua. Kae ʼe ina tapuʼi koa te fakaʼaogaʼi fakaʼapaʼapa ʼo tona huafa? Kailoa. Ko te ʼu tagata faitohi ʼo te ʼu Tohi Faka Hepeleo (te “Tauhi ʼĀfea”) neʼe ko te ʼu tagata agatonu fuli, pea neʼe nātou fakalogo ki te Lao ʼaē neʼe foaki age e te ʼAtua ki te kau Iselaele ʼo te temi muʼa, kae ʼi te temi fuli neʼe nātou fakaʼaogaʼi te huafa ʼo te ʼAtua. Ohage la, ʼi te ʼu Pesalemo neʼe lahi te ʼu hiva neʼe fakaʼaogaʼi ai te huafa ʼaia e nātou. Neʼe toe fakamahino foki e Sehova ʼAtua ki tana kau atolasio, ke nātou fetapā ki tona huafa, pea neʼe fakalogo kiai tana kau atolasio agatonu. (Soele 2:32; Gaue 2:21) Koia ohage ko Sesu, ko te kau Kilisitiano ʼo te temi nei ʼe nātou fakaʼaogaʼi te huafa ʼo te ʼAtua ʼaki he aga fakaʼapaʼapa.​—Soane 17:26.

ʼE ko he agahala mamafa ʼa te kau fakaliliu Tohi-Tapu, tanatou fetogi te huafa ʼo te ʼAtua ʼaki te ʼu higoa faka tuʼulaga. ʼI tanatou molehi te huafa ʼo te ʼAtua ʼi te Tohi-Tapu, neʼe nātou fakamamaʼo te ʼAtua ʼi te hahaʼi, kae ʼe ʼui ʼi te Tohi-Tapu ʼe tonu ki te hahaʼi ke nātou “kaumeʼa mo Sehova.” (Pesalemo 25:14) Koutou fakakaukauʼi age muʼa ki hokotou kaumeʼa lelei. E feafeaʼi hakotou felogoi mo ia mo kapau la ʼe mole koutou ʼiloʼi tona higoa? ʼO feiā pe, kapau ʼe mole ʼiloʼi e te hahaʼi ko te ʼAtua ʼe higoa ko Sehova, pea ʼe feafeaʼi anai hanatou fakaōvi kiā te ia? Tahi ʼaē, kapau ʼe mole fakaʼaogaʼi e te hahaʼi ia te huafa ʼo te ʼAtua, ʼe mole nātou mahino anai ki te faka ʼuhiga taulekaleka ʼo tona huafa. Koteā te faka ʼuhiga ʼo te huafa taputapu ʼaia?

Neʼe fakahā e te ʼAtua totonu te ʼuhiga moʼoni ʼo tona huafa ki tana tagata kaugana agatonu ko Moisese. ʼI te temi ʼaē neʼe fia ʼiloʼi ai e Moisese te ʼuhiga ʼo te huafa ʼo te ʼAtua, neʼe ʼui age e Sehova: “ ʼE au fakahā anai pe ko ai au.” (Ekesote 3:14) Ko te Tohi-Tapu ʼa Rotherham ʼe ina fakaliliu fēnei ia te ʼu palalau ʼaia: “ ʼE au Iiliu anai ko meʼa fuli ʼe au leleiʼia.” Koia ko Sehova ʼe feala ke liliu ko meʼa fuli moʼo fakahoko ia tana ʼu fakatuʼutuʼu.

Kapau la ʼe koutou lava fai he ʼu gāue kehekehe, koteā anai te meʼa ka koutou fai maʼa tokotou ʼu kaumeʼa? Kapau la ko he tahi ia nātou ʼe mahaki kovi, ʼe koutou liliu anai ko he tōketā faiva ʼe ina fai hona faitoʼo. Kapau ko he tahi ʼe mole kei ʼi ai hana gāue, ʼe feala ke koutou tokoni ki ai ʼi te ʼaluʼaga faka paʼaga, moʼo huʼi tona ʼu maʼua. Kae ʼi tona fakahagatonu, ʼe tou tahi nofo fuli mo tona ʼu tuʼakoi. Kapau ʼe koutou ako ia te Tohi-Tapu, ʼe koutou punamaʼuli anai ʼi takotou mahino ko Sehova ʼe feala ke liliu ko meʼa fuli moʼo fakahoko tana ʼu fakapapau. Pea ʼe ina fia fakaʼaogaʼi tona mālohi moʼo tokoni kiā nātou ʼaē ʼe ʼoʼofa kiā te ia. (2 Fakamatala 16:9) Ko te ʼu kalitātē taulekaleka ʼaia ʼo te ʼulugaaga ʼa Sehova, ʼe mole feala ke mahino kiai te hahaʼi ʼaē ʼe mole nātou ʼiloʼi tona huafa.

ʼE hā mai ko te huafa ʼaē ko Sehova ʼe tonu ke tohi ki te Tohi-Tapu. Ko te ʼiloʼi ʼo te ʼuhiga ʼo te huafa ʼaia pea mo tona fakaʼaogaʼi faʼifaʼitaliha ʼi tatatou tauhi, ʼe ko he ʼu tokoni mālohi ke tou fakaōvi ki tatatou Tāmai ʼaē ʼe ʼi selo, ko Sehova.a