Te Moʼoni ʼo ʼUhiga Mo Te Tāmai, Mo Te ʼAlo, Pea Mo Te Laumālie Maʼoniʼoni

KO TE hahaʼi ʼaē ʼe tui ki te Tahitolu ʼe nātou ʼui ko te ʼAtua ʼe ko ʼipotasi e tolu​—te Tāmai, mo te ʼAlo, pea mo te Laumālie Maʼoniʼoni. ʼE nātou ʼui ko te ʼu ʼipotasi ʼaia e tolu ʼe nātou tatau, ʼe nātou māfimāfi pea ʼe mole honatou kamataʼaga. Koia ʼi te Tahitolu, ʼe ʼui ko te Tāmai ʼe ʼAtua, ko te ʼAlo ʼe ʼAtua, pea ko te Laumālie Maʼoniʼoni ʼe ʼAtua, kae ko te ʼAtua pe e tahi.

Ko te tokolahi ʼaē ʼe nātou tui ki te Tahitolu, ʼe nātou ʼui fakahagatonu ʼe mole nātou lava fakamahino te akonaki ʼaia. Kae maʼa nātou ʼe tuʼu te akonaki ʼaia ʼi te Tohi-Tapu. ʼE tonu ke tou ʼiloʼi ko te kupu “Tahitolu” ʼe mole tuʼu ʼi te Tohi-Tapu. Kae ʼe maʼu koa ʼi te Tohi-Tapu ia te manatu ʼo ʼuhiga mo he Tahitolu? Moʼo tali ki te fehuʼi ʼaia, tou vakaʼi age muʼa te vaega ʼe tautau fakaʼaogaʼi moʼo lagolago ki te Tahitolu.

“KO TE FOLAFOLA NEE ATUA”

ʼE ʼui iā Soane 1:1: “I te kamataʼaga nee i ai te folafola pea nee [“nofo,” MN ] te folafola [“mo,” MN ] te Atua, pea nee Atua te folafola.” ʼI te tahi vaega ʼo te kapite pe ʼaia, ʼe fakahā lelei e te ʼapositolo ko Soane ko “te Folafola” ʼe ko Sesu. (Soane 1:14) Kae kapau ʼe fakahigoaʼi te Folafola ko te ʼAtua, ʼe manatu anai ʼihi ko te ʼAlo pea mo te Tāmai ʼe ko te ʼAtua pe e tahi.

Tou manatuʼi ko te vaega Tohi-Tapu ʼaenī neʼe fakaliliu mai te lea faka Keleka. Ki muli age, neʼe fakaliliu te ʼu tohi faka Keleka ki te tahi age ʼu lea. Kae tokolahi te kau fai fakaliliu Tohi-Tapu neʼe mole nātou fakaʼaogaʼi te ʼu kupuʼi palalau “nee Atua te folafola.” He koʼe neʼe mole nātou fakaliliu feiā? ʼI tanatou mahino ki te lea faka Keleka ʼaē neʼe tohi ai te Tohi-Tapu, neʼe manatu ia te kau fai fakaliliu ʼaia ko te kupusiga palalau “nee Atua te folafola” ʼe tonu ke fetogi tona fakaliliu. Neʼe nātou fetogi feafeaʼi tona fakaliliu? Koʼeni tona ʼu faʼahiga fakaliliu: “Ko te Folafola neʼe nātula ʼatua.” (La Sainte Bible [1908], L. Segond et H. Oltramare) “Ko te Folafola neʼe ko he ʼatua.” (Traduction du monde nouveau) “Ko te Folafola neʼe nofo mo te ʼAtua, pea neʼe tatau tonā nātula.” (The Translator’s New Testament) ʼI te ʼu Tohi-Tapu ʼaia, ko te Folafola ʼe mole ko te ʼAtua totonu.a Kae ʼuhi ko tona māʼoluga age ʼi te ʼu fakatupu fuli ʼa Sehova, koia ʼaē ʼe ʼui ai ko te Folafola ʼe ko “he ʼatua.” ʼI henī ko te kupu “ ʼatua” ko tona faka ʼuhiga “ko he tahi ʼe mālohi.”

TE TAHI ʼU FAKAMOʼONI

Ko te tokolahi ʼe mole nātou lau te lea Faka Keleka ʼaē neʼe tohi ʼaki ia te Tohi-Tapu. Koia e feafeaʼi hakotou ʼiloʼi ia te ʼuhiga totonu ʼo te ʼu palalau ʼa te ʼapositolo ko Soane? Tou toʼo te faʼifaʼitaki ʼaenī: Ko he tagata faiako ʼe ina fakamahino he meʼa ki tana kau ako, pea ʼe mole tatau fuli te mahino ʼa te kau ako. Koteā ʼaē ʼe tonu ke nātou fai ke feala hanatou mahino tatau? ʼE nātou lava kole ki te tagata faiako ke ina toe fakamahinohino lelei age. ʼE mahino ia, ʼaki te ʼu fakamahinohino ʼaia ʼe feala anai ki te kau ako ke nātou mahino lelei age. ʼO feiā mo te koga tohi ʼo Soane 1:​1, ʼe koutou maʼu anai ʼi te Evaselio ʼo Soane he tahi ʼu fakamahinohino ʼo ʼuhiga mo te tuʼulaga ʼo Sesu pea ʼe koutou mahino lelei ai anai ki tona tuʼulaga.

Ohage la, koutou lau te ʼu palalau ʼaē neʼe tohi e Soane ʼi te vaega 18 ʼo te kapite 1: “Heeki he tahi kua [sio] ki te Atua [te Māfimāfi].” Kae ko te hahaʼi neʼe kua nātou sio kiā Sesu te ʼAlo, he neʼe ʼui e Soane: “Nee tupu o kakano te Folafola [ia Sesu], pea nee nofo ia mo matou, pea nee matou [sio] ki tona kololia.” (Soane 1:14) Koia e feafeaʼi ki te ʼAlo hana ʼAtua Māfimāfi? ʼE toe ʼui e Soane ko te Folafola neʼe ‘nofo mo te ʼAtua.’ E lava feafeaʼi ki he tahi hana nofo mo he tahi pea ʼui leva ʼe ko te tokotahi? Tahi ʼaē meʼa, iā Soane 17:​3, ʼe ʼui lelei e Sesu ʼe kehekehe ia ia mo tana Tāmai ʼaē ʼe ʼi selo. ʼE ina higoaʼi tana Tāmai ko “te Atua e tahi mo mooni.” Pea ʼi te fakaʼosi ʼo tona Evaselio, ʼe ina fakamahino fakanounou fēnei: “Kua tohi ia mea aeni ke koutou tui ko Sesu e ko Kilisito, te Alo o te Atua.” (Soane 20:31) Koutou fakatokagaʼi ʼe ʼui ʼi te vaega ʼaenī ko Sesu ʼe ko te ʼAlo ʼo te ʼAtua kae ʼe mole ko te ʼAtua. Ko te tahi fakamahino ʼaia ʼe tou maʼu ʼi te Evaselio ʼa Soane ke feala hatatou maʼu ia te mahino totonu ki te koga tohi ʼo Soane 1:1. Ko Sesu, ʼaē ko te Folafola, ʼe ko “he ʼatua” heʼe ina maʼu te tuʼulaga māʼoluga, kae ʼe mole tatau ia mo te ʼAtua Māfimāfi.

TONA ʼU FAKAMOʼONI

Tou toe toʼo te faʼifaʼitaki ʼa te tagata faiako pea mo tana ʼu kau ako. Logola neʼe logo ʼihi kau ako ki te tahi ʼu fakamahinohino ʼaē neʼe tuku age e te tagata faiako, kae lagi kei nātou lotolotolua ʼo ʼuhiga mo te faʼahi ʼaia. Koteā ʼaē ʼe nātou lava fai? ʼE feala ke nātou ʼolo ʼo kumi he tahi ʼu fakamahinohino ki he tahi tagata faiako. Kapau ko te lua tagata faiako ʼaia ʼe fakamoʼoni ki te ʼu fakamahinohino ʼa te ʼuluaki tagata faiako, pea ʼe mahino ia ʼe mole toe lotolotolua anai ia te kau ako. ʼO toe feiā pe, kapau ʼe mole koutou mahino lelei ki te faka ʼuhiga ʼa te ʼu palalau ʼa te tagata faitohi ko Soane ʼo ʼuhiga mo Sesu pea mo te ʼAtua Māfimāfi, ʼe feala ke koutou vakaʼi ʼi te Tohi-Tapu he fakamatala ʼa he tahi tagata faitohi ʼo te Tohi-Tapu. Ohage la, koutou lau te tohi ʼo Mateo. “O uhiga leva mo te aho alâ pea mo te hola, e mole iloi e he tahi, e mole iloi e te kau aselo i Selo pea mo te Alo, gata tahipe ki te Tamai.” (Mateo 24:36) ʼE ʼasi feafeaʼi mai ʼi te vaega ʼaenī ko Sesu ʼe mole ko te ʼAtua Māfimāfi?

ʼE ʼui e Sesu ʼe lahi age te ʼu meʼa ʼaē ʼe ʼiloʼi e te Tāmai ʼi te ʼAlo. Kanapaula ko Sesu neʼe ko te ʼAtua Māfimāfi, ʼe ina ʼiloʼi anai te ʼu meʼa ʼaē ʼe ʼiloʼi e tana Tāmai. Kae ʼe mahino mai ko te ʼAlo pea mo te Tāmai ʼe nā kehekehe. Kae ʼe ʼui anai e ʼihi: ‘Ko Sesu neʼe nātula lua. ʼI te vaega ʼaenī ʼe palalau ia Sesu ʼi tona nātula tagata.’ Kae tatau aipe peʼe nātula lua, kae e feafeaʼi ki te laumālie maʼoniʼoni? Kapau ko te laumālie maʼoniʼoni ʼe ʼAtua ohage ko te Tāmai, he koʼe ʼe mole ʼui e Sesu ʼe ʼiloʼi e te laumālie maʼoniʼoni ia te ʼu meʼa ʼaē ʼe ʼiloʼi e te Tāmai?

Kapau ʼe koutou haga ako ia te Tohi-Tapu, ʼe koutou ʼiloʼi anai he tahi ʼu vaega faka Tohi-Tapu moʼo talanoa ki te Tahitolu. ʼE nātou fakahā ia te moʼoni ʼo ʼuhiga mo te Tāmai, mo te ʼAlo, pea mo te laumālie maʼoniʼoni.​—Pesalemo 90:2; Gaue 7:55; Kolose 1:15.