Ko Sesu Kilisito​—Te Mesia ʼAē Neʼe Fakapapauʼi Mai

KE FEALA hatatou ʼiloʼi peʼe ko ai ia te Mesia, neʼe fakahā e Sehova ʼAtua ki te ʼu polofeta ia te ʼu faʼahi kehekehe ʼo ʼuhiga mo te tupu, mo te minisitelio, pea mo te mate ʼo ia ʼaē neʼe fakapapauʼi mai moʼo hāofaki ia te malamanei. Pea neʼe fakahoko fuli te ʼu lea faka polofeta faka Tohi-Tapu ʼaia e Sesu Kilisito. ʼI hona ʼaluʼaga fakaofoofo, ʼe moʼoni te ʼu lea faka polofeta ʼaia, pea ʼe lahi te ʼu faʼahi kehekehe ʼe fakamatalatala ai ʼo ʼuhiga mo te Mesia. Tou vakaʼi age muʼa te ʼu lea faka polofeta ʼaē neʼe nātou fakakikite te ʼu meʼa ʼaē ka hoko ʼi te tupu ʼa te Mesia pea mo tana kei veliveli.

Neʼe fakakikite e te polofeta ko Isaia ko te Mesia ʼe haʼu anai mai te hōloga ʼo te Hau ko Tavite. (Isaia 9:7) Pea neʼe tupu moʼoni ia Sesu mai te hōloga ʼo Tavite.​—Mateo 1:​1, 6-17.

Ko te tahi polofeta ʼa te ʼAtua ko Mikea, neʼe ina fakakikite ko te tamasiʼi ʼaia ʼe liliu anai ko te pule pea ʼe tupu anai ʼi “Petelehemi ʼo Efalata.” (Mikea 5:2) ʼI te temi ʼaē neʼe tupu ai Sesu, neʼe ʼi ai te ʼu kolo e lua ʼi Iselaele neʼe higoa ko Petelehemi. Ko te tahi kolo neʼe tuʼu ōvi ki Nasaleti ʼi te potu noleto ʼo te fenua, pea ko te tahi age neʼe tuʼu ōvi ia ki Selusalemi ʼi Suta. Ki muʼa atu, ko Petelehemi ʼaē neʼe tuʼu ōvi ki Selusalemi, neʼe fakahigoaʼi ko Efalata. Neʼe tupu ia Sesu ʼi te kolo ʼaia, ohage pe ko tona fakakikite ʼi te lea faka polofeta!​—Mateo 2:1.

Neʼe fakakikite ʼi te tahi lea faka polofeta faka Tohi-Tapu ko te ʼAlo ʼo te ʼAtua ʼe pāui anai “mai Esipito.” Ko Sesu, ʼi tana kei tamasiʼi, neʼe ʼave ki Esipito, pea ʼi te ʼosi mate ʼo Helote, neʼe toe ʼaumai mai Esipito ki tona fenua, ohage pe ko tona ʼui ʼi te lea faka polofeta.​—Osea 11:1; Mateo 2:15.

ʼI te fakamatala ʼaē ʼe ʼātakai ʼo te pasina 200, ko te ʼu vaega Tohi-Tapu ʼaē ʼe tuʼu ʼi lalo ʼo te kupu tāfito “Te ʼu Lea Faka Polofeta” ʼe talanoa ai ʼo ʼuhiga mo te Mesia. Koutou fakatatau te ʼu vaega ʼaia mo te ʼu vaega ʼaē ʼe tuʼu ʼi lalo ʼo te kupu tāfito “Tona Fakahoko.” ʼE toe mālohi ai anai takotou tui ki te moʼoni ʼaē ʼo te Folafola ʼa te ʼAtua.

ʼI takotou lolotoga vakaʼi te ʼu vaega ʼaia, koutou manatuʼi neʼe tohi te ʼu lea faka polofeta ʼaia ia taʼu e teau ʼi muʼa ʼo te tupu ʼa Sesu. Neʼe ʼui e Sesu: “Nee maua ke [“hoko,” MN ] ia meafuape o uhiga mo au nee tohi i te lao a Moisese mo te kau polofeta pea mo te u pesalemo.” (Luka 24:44) ʼE fakahā lelei ʼi te Tohi-Tapu neʼe hoko fuli te ʼu lea faka polofeta ʼaia!