Sanualio

Neʼe “sio” ia Sesu ki te tagi ʼa te faʼe ʼaia, pea “neʼe ʼofa mamahi ai.” (Luka 7:13) Kae neʼe iloga tona manavaʼofa ʼi tana palalau ʼae ki ai, ʼo ina ui fenei age: “Tuku tau tagi.” Pea neʼe ina fai leva he meʼa moʼo tokoni ki ai, neʼe ina fakamaʼuli ake tana tama pea neʼe ina tuku age ki tana faʼe. (Luka 7:14, 15) Kotea ʼae ʼe tou ako mai te milakulo ʼae neʼe fai e Sesu maʼa te fafine vitua ʼo Naini? ʼE tou ako mai ai te maʼua ʼae ke tou fakaha te manavaʼofa kia natou ʼae ʼe putu. Ohage ko Sesu, ʼe feala ke tou fakasiosio lelei pea mo tokagaʼi ni aluʼaga ʼe feala ai ke tou fakaha te manavaʼofa kia natou ʼae neʼe mate he tahi neʼe natou ʼoʼofa ai. ʼE feala ke tou olo ʼo faipalalau mo natou, peʼe tou fai he meʼa moʼo tokoni peʼe moʼo fakafimalieʼi natou. (Taag. 17:17; 2 Ko. 1:3, 4; 1 Pet. 3:8) ʼE mole ʼaoga ni tuʼuga palalau peʼe ke tou fai he ʼu gaue lalahi. w23.04 5-6 ¶13-15

Logo la ʼe iloʼi e Sesu kua mate tona kaumeʼa ko Lasalo, neʼe faifagona ia Sesu ia ʼaho ʼe lua ki Petania. Koia ʼi te tau ʼa Sesu ki te kolo, neʼe kua ʼaho fa te kua mate ʼa Lasalo. ʼE fai anai e Sesu he meʼa moʼo tokoni ki ʼona kaumeʼa pea mo fakakololiaʼi ai te ʼAtua. (Soa. 11:6, 11, 17) ʼE tou maʼu he ako maʼuhiga mai te fakamatala ʼaia ʼo ʼuhiga mo te fakakaumeʼa. Neʼe mole kole age e Maleta mo Malia ke alu age ia Sesu ki Petania. Neʼe nā fakaha age pe kia Sesu te logo ʼae kua mahaki tona kaumeʼa. (Soa. 11:3) ʼI te kua mate ʼa Lasalo neʼe feala pe ke fakatuʼuake e Sesu ia ia mai te potu ʼae neʼe nofo ai. Kae neʼe mole ko te faʼahi ʼaia neʼe ina fai. Neʼe fia alu ki Petania ke fakatahi ai mo ʼona kaumeʼa ia Maleta mo Malia. ʼE ʼi ai koa hou kaumeʼa ʼe fia tokoni atu logo la neʼe mole ke kole age? Koia ʼe ke iloʼi papau ʼe tokoni atu anai ʼi “te ʼu temi mamahi.” (Taag. 17:17) Ohage ko Sesu, tou fakakaumeʼa moʼoni mo ʼotatou tehina mo tuagaʼane. w23.04 10 ¶10-11

Ka tou tau mo he faigataʼaʼia, ʼe feala ke tou manatu ʼe mole hoko mai anai te malama foʼou. Ko tona fakaʼuhiga koa kua vaivai tatatou tui? Kailoa ia. Tou toʼo he faʼifaʼitaki. Ka ʼua lolotoga ni vahaʼa, ʼe feala ke tou manatu ʼe mole toe laʼa anai ʼi he ʼaho. Kae ki muli age, ʼe toe laʼa pe. ʼO toe feia pe, ka lahi tatatou lotovaivai, ʼe feala ke tou manatu ʼe mole hoko mai anai te malama foʼou. Kae kapau ʼe malohi tatatou tui, ʼe tou iloʼi ʼe fakahoko pe anai e Sehova ʼana fakapapau. (Pes. 94:3, 14, 15; Hep. 6:17-19) Pea ʼuhi ko tatatou tui papau ʼaia, ʼe tou haga fakamuʼamuʼa aipe tatatou tauhi kia Sehova ʼi totatou maʼuli. Tou vakaʼi he tahi faʼahi ʼe ʼaoga ai he tui ʼe malohi: te faifakamafola. Tokolahi ʼe natou manatu ko te “logo lelei” ʼo ʼuhiga mo te malama foʼou, ʼe mole moʼoni ia. (Mat. 24:14; Esk. 33:32) ʼE tonu ke tou nofo tokaga ke mole tou liliu ʼo mahalohalo ohage ko natou ʼaia. Ke mole hoko te faʼahi ʼaia, ʼe tonu ke tou fakamalohi tuʼumaʼu tatatou tui. w23.04 27 ¶6-7; 28 ¶14

ʼE ke manatu koa ʼi ʼihi temi, ʼe mole tali atu Sehova ki ʼau faikole? Kapau koia, ʼe mole ko koe tokotahi pe. Tokolahi te ʼu tehina mo tuagaʼane neʼe natou manatu feia, tafito la moka natou lolotoga tau mo he aluʼaga faigataʼa. Ka tou mamahi, ʼe lagi faigataʼa tatatou mahino ʼae ʼe tali mai ia Sehova ki ʼatatou faikole. He koʼe ʼe feala ke tou tui ʼe tali mai Sehova ki te ʼu faikole ʼa ʼana kaugana? ʼE ui lelei mai ʼi te Tohi-Tapu ʼe ʼofa mamahi ia Sehova ia tatou pea ʼe tou maʼuhiga kia te ia. (Ake. 2:7; 1 Soa. 4:10) Koia ʼe loto ai e Sehova ke tou kole tokoni age kia te ia. (1 Pet. 5:6, 7) ʼE fia tokoni mai ke tou nofo ovi kia te ia pea ke tou lava katakiʼi ʼotatou faigataʼaʼia. ʼE lahi te ʼu fakamatala ʼi te Tohi-Tapu ʼe ha ai ʼe tali Sehova te ʼu faikole ʼa ʼana kaugana. ʼE ʼi ai he faʼifaʼitaki ʼe ke manatu ki ai? w23.05 8 ¶1-4

Neʼe felogoi lelei ia Malia pea mo Sehova. Neʼe tokaga ke malohi tuʼumaʼu tana tui. Neʼe ina iloʼi lelei te ʼu Tohi Taputapu. Neʼe ina toe toʼo he temi ke metitasio ai. (Luka 2:19, 51) ʼE mahino papau ia, neʼe ko he fafine ʼohoana lelei ʼuhi ko tana ʼu felogoi lelei ʼaia mo Sehova. Ia ʼaho nei, tokolahi te ʼu fafine ʼohoana ʼe natou faiga ke natou faʼifaʼitakiʼi ia Malia. Ohage la, ʼe ui e te tuagaʼane ʼe higoa ko Emiko: “ ʼI taku kei selipatea, neʼe au mulimuli ki taku polokalama fakalaumalie. Kae ʼi taku kua ʼosi ʼohoana leva, neʼe ko toku ʼohoana ʼae neʼe faikole maʼa maua, mo fai te koga tohi ʼo te ʼaho pea mo tamā ako fakafamili. Neʼe au tokagaʼi neʼe kua au falala pe au ki toku ʼohoana ʼo ʼuhiga mo te ʼu faʼahi fakalaumalie. Kae neʼe au mahino leva, neʼe tonu pe foki mo au ke au taupau ke malohi ʼaku felogoi mo Sehova. Koia ʼi te temi nei, kua au toʼo ai he temi ke au felogoi mo toku ʼAtua, ʼo au faikole, mo lau te Tohi-Tapu pea mo metitasio ki te ʼu manatu ʼa te ʼAtua.” (Kal. 6:5) Fafine ʼohoana, ka ke haga fakamalohi ʼau felogoi mo Sehova, ʼe toe lahi age anai te fia fakavikiviki ʼo koe e tou ʼohoana, pea mo ʼasili ai tona ʼofa kia koe.—Taag. 31:30. w23.05 22 ¶6

ʼE mole tou tutupu ake mo te manavasiʼi ʼae kia Sehova. ʼE tonu ke tou ako te manavasiʼi ʼaia. ʼE feala ke tou ako ke tou manavasiʼi kia Sehova ʼaki tatatou mamata ki tana fakatupu. Kapau ʼe tou tokagaʼi ʼi te ʼu meʼa ʼae neʼe fakatupu e Sehova ia tona poto, tona malohi pea mo tona ʼofa, ʼe toe lahi age anai tatatou fakaʼapaʼapa pea mo ʼofa kia te ia. (Loma 1:20) ʼE feala ke tou toe ako ke tou manavasiʼi ki te ʼAtua moka tou faikole tuʼumaʼu. Ka lahi tatatou faikole, ʼe tou toe iloʼi lelei age ia ia. ʼI te ʼu temi ʼae ʼe tou kole age tona malohi ke tou ʼutakiʼi he faigataʼaʼia, ʼe tou manatuʼi ai tona mafimafi. Ka tou fakafetaʼi kia Sehova ʼuhi ko tana foaki mai tona ʼAlo, ʼe tou manatuʼi ai tona ʼofa kia tatou. Pea ka tou kole ke tokoni mai moʼo fakatokatoka he fihifihia, ʼe tou manatuʼi ai ko he ʼAtua poto. Ko te ʼu faikole ʼaia ʼe fakamalohi ai tatatou fakaʼapaʼapa kia Sehova. Pea ʼe toe malohi ai tatatou fakatotonu ʼae ke mole tou fai he meʼa ʼe feala ke fua kovi ki tatatou felogoi mo ia. w23.06 15 ¶6-7

ʼE foaki tuʼumaʼu e Sehova ki tana hahaʼi he ʼu lao ʼe tasilo lelei. Ohage la, ʼi te temi ʼo te ʼu ʼuluaki Kilisitiano, neʼe fakaha lelei e te Kolesi Pule te ʼu aluʼaga ʼe tolu neʼe tonu ke tutuʼu malohi ai te kau Kilisitiano: (1) ke natou liʼaki te tauhi tamapua kae natou tauhi ʼateaina pe kia Sehova, (2) ke natou fakaʼapaʼapa ki te ʼuhiga taputapu ʼo te toto, pea (3) ke natou fakalogo ki te lao ʼa Sehova ʼae ke fakamamaʼo mai te ʼu felaveʼi fakasino heʼe ʼaoga. (Gaue 15:28, 29) ʼE fakaha feafeaʼi e te kau Kilisitiano ia ʼaho nei tanatou fakalogo ki te ʼu aluʼaga ʼaia ʼe tolu? ʼE tou liʼaki te tauhi tamapua, kae ʼe tou tauhi ʼateaina pe kia Sehova. Neʼe fakatotonu e Sehova ki te kau Iselaele ke natou pipiki ʼateaina pe kia te ia. (Tet. 5:6-10) Pea ʼi te fakahalaʼi e te Tevolo ia Sesu, neʼe fakaha lelei ai e Sesu ʼe tonu ke tou atolasio ʼateaina pe kia Sehova. (Mat. 4:8-10) Koia, ʼe mole tou atolasio ai ki ni fakatata. Pea ʼe mole tou ʼatua ki ni tagata, ohage la ko he takitaki lotu, peʼe ko he tagata faipolitike, faigaoʼi peʼe faimaholo. ʼE tou atolasio ʼateaina pe kia Sehova, ʼae ‘neʼe ina fakatupu ia meʼa fuli.’—Fkha. 4:11. w23.07 14-15 ¶3-4

ʼE holi fakavale te hahaʼi ʼo te malama ʼa Satana ki te ʼu aga heʼe ʼaoga pea mo te ʼu ʼata kovi. (Efe. 4:19) Koia, ʼe tonu ke tou manavasiʼi ki te ʼAtua pea mo tou maliu kehe mai te kovi. ʼI te kapite 9 ʼo Taʼaga Lea, ʼae ʼe palalau ai kia fafine ʼe lua. ʼE fakata e te tahi te poto pea fakata e te tahi age te agavale. ʼE tahi fai e naua he fakaafe kia natou ʼae ʼe mole aga fakapotopoto. ʼE hage pe ʼe nā tahi ui: “ ʼOmai ki toku ʼapi ʼo kakai.” (Taag. 9:1, 4-6) Kae ko te meʼa ʼae ʼe hoko kia natou ʼae ʼe natou tali te fakaafe ʼo te ʼu fafine ʼaia ʼe lua, ʼe kehekehe ʼaupito. Lau te fakaafe ʼae ʼe fai e “te fafine agavale.” (Taag. 9:13-18) ʼE mole fakameʼameʼa tana fakaafe ia natou ʼae ʼe mole aga fakapotopoto ke natou ʼomai ki tona ʼapi ʼo fakafiafia mo ia. Kotea ʼae ʼe hoko kia natou? “Ko te potu ʼaia ʼe maʼu ai ia natou ʼae ʼe mole kei honatou malohi ʼi te mate.” Ohage la, ʼe fakapotoʼi tatou ke tou tokaga ki “te fafine faiaga” pea mo “te fafine . . . aga heʼe ʼaoga.” ʼE ui ai: “Ko te hifo ki tona ʼapi ʼe hage ko te hifo ki te mate.” (Taag. 2:11-19) Pea ia Taʼaga Lea 5:3-10 ʼe fakapotoʼi ai tatou ke tou tokakaga ki “te fafine faiaga” ʼae “ ʼe hifo ʼona vaʼe ki te mate.” w23.06 21-22 ¶6-7

ʼE tonu ke fakapotopoto te ʼu tagata ʼafeā pea ke natou tuku he faʼifaʼitaki ʼi te faʼahi ʼaia. (1 Tim. 3:2, 3) Ohage la, ʼe mole ʼamanaki anai he tagata ʼafeā ʼe tali tuʼumaʼu pe anai ʼana manatu ʼuhi he ʼe ʼulu matuʼa age ʼi te ʼu tagata ʼafeā ʼae. ʼE mahino kia ia, ʼe feala ke uga e te laumalie maʼoniʼoni he tahi pe ʼi te ʼu tagata ʼafeā ke ina fakaha he manatu ʼe tokoni anai ke natou fai he tonu ʼe lelei. Pea kapau ʼe ʼio te ʼu tagata fuli ʼae ki he tonu ʼe mole fakafeagai ki te Tohi-Tapu, ko te tagata ʼafeā ʼae ʼe fakapotopoto ʼe lagolago anai ki ai, tatau aipe pe mole ina leleiʼia. ʼE lahi te ʼu fua lelei ʼe tou maʼu moka tou fakapotopoto. ʼE lelei age ʼatatou felogoi mo ʼotatou tehina mo tuagaʼane, pea ʼe maʼu te tokalelei ʼi te kokelekasio. ʼE tou fiafia ʼi te sio ki te hahaʼi mo ʼanatou agaʼi fenua kehekehe ʼi te hahaʼi ʼa Sehova. Pea logo la ʼotatou kehekehe ʼaia, kae ʼe tou tauhi kia te ia ohage ko he foʼi famili. Pea ko te fua lelei ʼae ʼe lahi age, ko tatatou iloʼi ʼae ʼe tou faʼifaʼitakiʼi totatou ʼAtua ko Sehova ʼae ʼe fakapotopoto. w23.07 25 ¶16-17

Neʼe ʼi ai te tupuʼaga lelei ʼo te ako e Taniela te ʼu lea fakapolofeta. Neʼe ina fia iloʼi te moʼoni. Neʼe agavaivai. Neʼe mahino kia ia ʼe foaki anai e Sehova te fakasiosio poto kia natou ʼe natou kumi ke natou iloʼi ia ia pea mo fakalogo ki ʼana fakatotonu. (Tan. 2:27, 28) Neʼe fakaha e Taniela tana agavaivai he neʼe ina kole tuʼumaʼu te tokoni ʼa Sehova. (Tan. 2:18) Neʼe ako fakalelei ia Taniela, ʼo ina fai ni fekumi ʼi te ʼu koga Tohi-Tapu ʼae neʼe kua maʼu ʼi tona temi. (Sel. 25:11, 12; Tan. 9:2) ʼE feafeaʼi hau faʼifaʼitakiʼi ia Taniela? Vakaʼi te tupuʼaga ʼo tau fia ako te ʼu lea fakapolofeta. ʼE ke ako koa he ʼe ke fia iloʼi ia te moʼoni? Kapau ʼe koia, pea ʼe tokoni atu anai ia Sehova. (Soa. 4:23, 24; 14:16, 17) ʼE lagi fakaʼamu ʼihi ke natou maʼu ai he ʼu fakamoʼoni ʼe mole haʼu te Tohi-Tapu mai te ʼAtua. ʼE feala ai anai ke natou filifili ʼe natou totonu te meʼa ʼae ʼe lelei mo ʼae ʼe kovi pea mo mulimuli ki ai ʼi tonatou maʼuli. Kae ka tou ako, ʼe tonu ke tou fai ʼaki he tupuʼaga lelei. w23.08 9 ¶7-8

ʼE tou maʼu he ʼu fakaʼamu ʼe mole fakapotopoto moka tou kamata fakatatau ki ʼihi, pea ʼe liliu ai ko he kavega mamafa. (Kal. 6:4) Koia ka tou fai feia, ʼe feala ke tou liliu ʼo maheka pea mo maʼu he ʼu manatu fakataupiepie. (Kal. 5:26) Pea ka ke fia fai ohage ko ʼihi kae mole ke lavaʼi, ʼe ke mamahi anai. Pea ke toe fakakaukauʼi te faʼahi ʼaeni: ʼE ui ʼi te Tohi-Tapu ʼe fakalotovaivai moka mole hoko vave mai he fakaʼamu. Pea ʼe feafeaʼi age la moka ko he fakaʼamu ʼe mole hoko anai ʼi he ʼaho? (Taag. 13:12) ʼE feala ke tou gaʼegaʼe ai pea mo talolo ai tatatou lele ki te maʼuli heʼe gata. ʼAua naʼa ke fakaʼamu ki he ʼu meʼa ʼe mole kole atu e Sehova ke ke fai. ʼE mole ina kole atu anai ʼi he temi ke ke foaki age he meʼa ʼe mole ke maʼu. (2 Ko. 8:12) Ke ke tui papau ʼe mole fakatatau e Sehova te ʼu gaue ʼae ʼe ke fai mo ʼae ʼa ʼihi. (Mat. 25:20-23) Ko te ʼu faʼahi ʼae ʼe maʼuhiga kia te ia ʼe ko tau tauhi mo tou loto katoa, tau nofo agatonu, pea mo tau faʼa kataki. w23.08 29 ¶10-11

Neʼe tali e Sehova ki te pauʼi ʼa Samisoni ke tokoni age. Neʼe ina fai he milakulo ʼo ina foaki age he moʼi vai. ʼI tana ʼosi inu, neʼe “toe malohi ai mo lototoʼa” ia Samisoni. (Tfm. 15:19) Hili ki ai ni taʼu, ʼi te temi ʼae neʼe tohi ai e Samuele te tohi ʼo Tuʼi Fakamau, neʼe kei tuʼu pe te vai keli ʼaia. ʼI te sisio ʼa te kau Iselaele ki te matapuna vai ʼaia neʼe lagi natou manatuʼi ai ʼe feala ke falala te ʼu kaugana ʼa Sehova kia te ia ʼi te ʼu temi faigataʼa. ʼE tonu foki mo tatou ke tou kole tokoni kia Sehova, tatau aipe he ʼu faiva ʼe tou maʼu peʼe ko te ʼu gaue kua tou fai ʼi tatatou tauhi kia te ia. ʼE tonu ke tou agavaivai pea ke tou iloʼi ʼe feala pe anai ke to lelei te ʼu gaue ʼe kole mai e Sehova moka ʼe tou falala kia te ia. Ohage pe ko Samisoni ʼae neʼe ina toe maʼu te malohi ʼuhi ko te vai ʼae neʼe foaki age e Sehova, ʼe tou malolohi anai ʼi te faʼahi fakalaumalie moka ʼe tou fakaʼaogaʼi lelei te ʼu meʼa fuli ʼe foaki mai e Sehova.—Mat. 11:28. w23.09 4 ¶8-10

Kotea ʼae ʼe feala ke tou fai ohage la moka laukoviʼi e he tahi te huafa ʼo totatou ʼAtua peʼe manukinuki ki te Tohi-Tapu? ʼE tonu ke tou kole kia Sehova tona laumalie maʼoniʼoni pea mo tona poto ke tou tali mo he agamalū. Pea ʼe feafeaʼi mo kapau ki muli age ʼe tou tokagaʼi neʼe mole faʼa lelei tatatou faʼahiga tali? Tou toe faikole ʼo ʼuhiga mo te aluʼaga ʼaia pea mo vakaʼi he ʼu fetogi ʼe tonu ke tou fai ke lelei age tatatou tali moka toe hoko he aluʼaga feia. ʼE foaki mai anai e Sehova tona laumalie maʼoniʼoni ke tou lava lolomi totatou ita pea ke tou agamalū. ʼE feala ke tokoni mai ʼihi vaega Tohi-Tapu moka faigataʼa hakita palalau mo he agamalū. Pea ʼe feala ke fakamanatuʼi mai e te laumalie ʼo te ʼAtua te ʼu vaega ʼaia. (Soa. 14:26) Ohage la, ko te ʼu tokoni ʼae ʼe tuʼu ʼi te tohi ʼo Taʼaga Lea ʼe uga ai tatou ke tou agamalū. (Taag. 15:18) ʼE toe fakaha ʼi te tohi ʼaia te ʼu fua lelei moka tou lotololomi ʼi he ʼu aluʼaga faigataʼa.—Taag. 10:19; 17:27; 21:23; 25:15. w23.09 15 ¶6-7

Neʼe tauhi agatonu kia Sehova te apositolo ko Petelo lolotoga ni taʼu. Neʼe faifakamafola fakatahi mo Sesu, mo ina kamata te faifakamafola ki te hahaʼi ʼae neʼe mole Sutea, pea neʼe kau ki muli age ʼi te kolesi pule. ʼI te temi fakaʼosi ʼo tona maʼuli, neʼe foaki e Sehova kia Petelo he tahi gaue. ʼI te teitei taʼu 62-64 H.T.S. neʼe ina tohi ʼaki te takitaki ʼa te laumalie maʼoniʼoni he ʼu tohi ʼe lua, te tohi ʼo 1 Petelo mo 2 Petelo. (2 Pet. 1:12-15) Neʼe fai e Petelo tana ʼu tohi ʼi te temi ʼae neʼe “mamahi” ai ʼona tehina mo tuagaʼane ʼuhi ko “ni ʼahiʼahi kehekehe.” (1 Pet. 1:6) Neʼe fakahu e ni hahaʼi agakovi ni akonaki loi mo ni aga heʼe ʼaoga ki te loto kokelekasio. (2 Pet. 2:1, 2, 14) Pea neʼe vave sisio te kau Kilisitiano ʼae neʼe nonofo ʼi Selusalemi ki “te fakaʼosi ʼo te ʼu meʼa fuli,” te temi ʼae ka maumauʼi ai te kolo ʼaia mo tona fale lotu e te ʼu kautau Loma. (1 Pet. 4:7) ʼE mahino ia neʼe tokoni te ʼu tohi ʼae neʼe fai e Petelo ke nonofo agatonu te kau Kilisitiano ʼaia logo la te ʼu faigataʼaʼia pea mo teuteuʼi natou ki te ʼu faigataʼaʼia ka ʼamanaki hoko. w23.09 26 ¶1-2

Ohage ko Sesu, ʼe tou ako te fakalogo ʼi he ʼu aluʼaga faigataʼa ʼe tou tau mo ia. Ohage la, ʼi te kamata ʼo te taʼi mahaki COVID-19 neʼe kole mai ke mole tou toe fakatahi ʼi te ʼu Fale Fono pea ke mole tou toe olo ʼo faifakamafola ʼi te ʼu ʼapi. Neʼe faigataʼa koa hau fakalogo? Kua lagi ke mahino, ʼi tau fakalogo neʼe puipui ai koe, mo taupau ai te logo tahi ʼo te kokelekasio pea neʼe fiafia ai ia Sehova. Kua feala ai kia tatou fuli ke tou fakalogo ki te ʼu tuʼutuʼuni ʼae ka foaki mai anai lolotoga te mamahi lahi. ʼE fakalogo anai totatou haofaki ki tatatou fakalogo. (Sopo 36:11) Neʼe tou fakalogo kia Sehova tafito he ʼe tou ʼoʼofa ia te ia pea ʼe tou fia fakafiafiaʼi tona loto. (1 Soa. 5:3) ʼE mole feala anai ke tou liufaki age te ʼu meʼa fuli ʼae neʼe ina fai maʼa tatou. (Pes. 116:12) Kae ʼe feala ke tou fakalogo kia te ia pea mo natou ʼae neʼe ina foaki ki ai he faʼahiga pule. Kapau ʼe tou fakalogo, ʼe tou fakaha ai ʼe tou aga fakapotopoto. Pea ka tou aga fakapotopoto, ʼe tou fakafiafiaʼi ai te loto ʼo Sehova.—Taag. 27:11. w23.10 11 ¶18-19

Kapau ʼe palalau atu ia he ʼaselo, ʼe ke fakalogo lelei anai koa ki ai? Ia ʼaho nei, ʼe palalau he ʼaselo “ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.” Pea kotea ʼae ʼe ina ui? ʼE ina ui fenei: “Kotou manavasiʼi ki te ʼAtua pea mo fakakololiaʼi ia ia, . . . kotou atolasio kia Ia ʼae neʼe ina fakatupu te lagi, mo te kele.” (Fkha. 14:6, 7) ʼEi, ko Sehova tokotahi pe ʼae ʼe tonu ke atolasio ki ai te hahaʼi. Koia, ʼe tou fakamalo lahi ki te fakafealagia mai e te ʼAtua ke tou atolasio kia te ia ʼi tona fale lotu lahi fakalaumalie! Kae kotea te fale lotu fakalaumalie ʼaia, pea ʼe tou maʼu ʼifea ni fakamahino? Ko te fale lotu fakalaumalie ʼe mole ko he fale moʼoni. ʼE fakaʼuhiga ia ki te fakatuʼutuʼu ʼae neʼe fai e Sehova ke tou atolasio ai kia te ia pea ʼe feala ʼaki te sakilifisio ʼa Sesu. ʼE fakamahino e te apositolo ko Paulo te fakatuʼutuʼu ʼaia ʼi te tohi ʼae neʼe ina fai ki te kau Kilisitiano Hepeleo ʼi Sutea. w23.10 24 ¶1-2

ʼI te taʼu 522 I.M.T.S., neʼe tapuʼi e te ʼu fili ʼo te kau Sutea te toe laga ʼo te fale lotu ʼa Sehova. Kae neʼe ui e Sakalia ki te kau Sutea ʼe fakaʼaogaʼi anai e Sehova ia Tona laumalie malohi moʼo pulihi te ʼu fakafeagai fuli. Koia, ʼi te taʼu 520 I.M.T.S. neʼe fakagafua leva e te Hau ko Taliusi ke toe hoko atu te ʼu gaue ʼo te fale lotu. Neʼe ina toe foaki pe la he falā moʼo tokoni ki ai pea mo ina fakatotonu ki te ʼu kovana ʼo te potu fenua ʼaia ke natou tokoni ki te kau Sutea. (Eset. 6:1, 6-10) Neʼe fakapapauʼi e Sehova ki tana hahaʼi ʼe tokoni anai kia natou mo kapau ʼe natou fakamuʼamuʼa te toe laga ʼo te fale lotu. (Ake. 1:8, 13, 14; Sakl. 1:3, 16) Neʼe fakalotomalohiʼi ia te kau Sutea e te ʼu palalau ʼaia ʼa te ʼu polofeta, pea neʼe natou hoko atu te gaue ʼi te taʼu 520 I.M.T.S. Hili teitei taʼu ʼe nima, neʼe ʼosi ai te laga ʼo te fale lotu. Logo la ʼonatou faigataʼaʼia, kae neʼe fakamuʼamuʼa pe e te kau Sutea te fai ʼo te finegalo ʼo te ʼAtua. Pea neʼe tokoni ia Sehova kia natou ʼo ina foaki te ʼu meʼa ʼae neʼe ʼaoga kia natou ʼi te faʼahi fakasino mo fakalaumalie. Neʼe natou tauhi fakafiafia ai kia Sehova.—Eset. 6:14-16, 22. w23.11 15 ¶6-7

Tokolahi te hahaʼi kua natou logo fakamatala ʼo ʼuhiga mo Apalahamo, kae ko ʼihi ʼe mole natou iloʼi lelei ia ia. Kae ko koe, ʼe ke iloʼi lelei ia Apalahamo. Ohage la, ʼe ke iloʼi ʼe ui ʼi te Tohi-Tapu ko Apalahamo “ko te tamai ʼa natou fuli ʼae neʼe tui.” (Loma 4:11) Kae ʼe lagi ke feʼekeʼaki fenei: “ ʼE feala koa ke au maʼu he tui ʼe malohi ohage ko Apalahamo?” ʼEi, ʼe feala pe ia. ʼE feala ke tou maʼu he tui ʼe malohi ohage ko Apalahamo moka ʼe tou vakavakaʼi lelei tana faʼifaʼitaki. Neʼe fakalogo ia Apalahamo ki te ʼAtua ʼo mavae ʼo alu ki he fenua mamaʼo. Neʼe maʼuli fualoa ʼi te ʼu fale la, pea ka neʼe mole taʼofi la ia ia e he ʼaselo, neʼe ina sakilifisioʼi tona foha ʼofaina ko Isaake. Neʼe ha te malohi ʼo te tui ʼa Apalahamo ʼi te ʼu gaue ʼaia neʼe ina fai. Neʼe leleiʼia ai e te ʼAtua ia Apalahamo mo kaumeʼa mo ia he neʼe ina fakaha tana tui ʼaki ʼana gaue. (Sakp. 2:22, 23) ʼE loto e Sehova ke tou maʼu e tatou fuli, ʼo feia mo koe, te ʼu tapuakina ʼaia. Koia la ʼae neʼe ina takitaki ai ia Paulo mo Sakopo ke nā palalau ki te faʼifaʼitaki ʼa Apalahamo ʼi tanā ʼu tohi ʼae ʼi te Tohi-Tapu. w23.12 2 ¶1-2

ʼU tuagaʼane, kotou popoto ʼi te fagono pea mo palalau lelei. ʼE maʼuhiga te faʼahi ʼaia ki te kau Kilisitiano. ʼE fai mai e te tisipulo ko Sakopo te tokoni lelei ʼaeni ʼi te u palalau ʼae ʼe tuʼu ʼi ʼoluga. Ka ke fagono lelei ki he tahi, ʼe ha tau “kaugā mamahi” mo ia. (1 Pet. 3:8) Kapau ʼe mole ke mahino lelei ki te ʼu meʼa ʼae ʼe ina ui atu pe ʼe kotea ʼae ʼi tona loto, fai age he tahi ʼu fehuʼi. Pea ke toʼo leva he temi ke ke fakakaukau ʼi muʼa ʼo hau palalau. (Taag. 15:28, kiʼi nota.) Fai te ʼu fehuʼi ʼaeni: “ ʼE moʼoni koa ia te ʼu palalau ka au fai pea mo fakalotomalohi? ʼE fakaʼapaʼapa koa pea mo ha ai taku tokagaʼi tona aluʼaga?” Faʼifaʼitakiʼi te ʼu tuagaʼane ʼae ʼe fagono pea mo palalau lelei ki te ʼu tehina mo tuagaʼane. (Taag. 31:26) Sio pe ʼe feafeaʼi tanatou palalau. Kapau ʼe ke faiga ke lelei age tau fagono pea mo tau palalau, ʼe ke felogoi lelei anai mo te hahaʼi. w23.12 21 ¶12

ʼI te temi nei ʼe toe fakaʼaogaʼi e Sehova totatou famili, ʼotatou kaumeʼa mo te ʼu tagata ʼafeā moʼo tokoni kia tatou. Kae ka tou lotomamahi ʼe mahino ia ʼe feala pe ke tou fia nofo tokotahi. Kae kotea ʼae ʼe tonu ke tou fai ke tou maʼu te tokoni ʼa Sehova? Faiga ke mole ke nofo tokotahi. Ka nofo tokotahi he tahi ʼe mole kei manatu ki he tahi age meʼa kae kua manatu pe ia kia ia totonu pea mo ʼona fihifihia. ʼUhi ko te faʼahi ʼaia ʼe feala ke mole kei tou fai ni tonu ʼe lelei. ʼE mahino ia ʼi ʼihi temi ʼe ʼaoga ai leva he kiʼi temi ke tou nonofo tokotahi moka tou tau mo he aluʼaga faigataʼa. Kae kapau ʼe fualoa tatatou nofo tokotahi ʼe feala ke tou fakafisi ki te ʼu hahaʼi ʼae ʼe fakaʼaogaʼi e Sehova moʼo tokoni kia tatou. Koia, ʼofa ʼo tali te tokoni ʼo tou famili mo ʼou kaumeʼa pea mo te ʼu tagata ʼafeā. Fakaʼuhigaʼi natou ohage ko he tokoni ʼe foaki atu e Sehova.—Taag. 17:17; Esa. 32:1, 2. w24.01 24 ¶12-13

Ko te kau Nasilea neʼe mole tonu ke kosi ʼonatou fuluʼi ʼulu. ʼAki te faʼahi ʼaia neʼe fakaha tanatou fakalogo ʼae kia Sehova. Meʼa fakaʼofaʼofa he ʼi te temi ʼo te kau Iselaele neʼe ʼi ai he lakaga neʼe fehiʼaʼinaʼi te kau Nasilea. Pea ʼi ʼihi temi neʼe tonu ke lototoʼa he Nasilea ke fakaʼapaʼapa ki tana fakapapau pea mo fakaha ia tona kehekehe. (Amo. 2:12) ʼI tatatou filifili ʼae ke tou fakalogo kia Sehova ʼe tou toe fakaha ai ʼe tou kehekehe mo te hahaʼi ʼo te malama. ʼI te fale gaue peʼe ʼi te fale ako ʼe ʼaoga ai ke tou lototoʼa ʼo fakaha ko tatou ko te ʼu Fakamoʼoni ʼa Sehova. Kae ʼuhi ko te ʼaʼasili kovi age ʼo te ʼu faʼahiga manatu pea mo te ʼu aga ʼa te hahaʼi ʼe faigataʼa ai hatatou maʼuliʼi te ʼu pelesepeto Fakatohi-tapu pea mo te tala ʼo te logo lelei. (2 Tim. 1:8; 3:13) Kae ʼaua naʼa galo kia tatou kapau ʼe tou haga fakaha ʼe tou kehekehe mo te hahaʼi ʼae ʼe mole tauhi kia Sehova ʼe tou ‘fakafiafiaʼi ai tona loto.’—Taag. 27:11; Mala. 3:18. w24.02 16 ¶7; 17 ¶9

Neʼe maʼu ʼi te kokelekasio ʼo Loma he kau Suta neʼe natou fakaʼapaʼapa ki te lao ʼa Moisese, pea ko ʼihi neʼe mole ko he kau Sutea, neʼe kehe age tanatou agaʼi fenua. Ko ʼihi neʼe ko he ʼu kaugana kae ko ʼihi leva neʼe natou ʼateaina. Neʼe lagi maʼu pe la e ʼihi Kilisitiano hanatou ʼu kaugana. Neʼe feafeaʼi ki te ʼu Kilisitiano ʼaia hanatou feʼofaʼaki logo la tonatou kehekehe? Neʼe fakalotomalohiʼi natou e te apositolo ko Paulo ke natou “fefakatalitaliʼaki.” Kotea tona fakaʼuhiga? Ko te kupu “fakatalitali” ko tona fakaʼuhiga ke fakatalitali he tahi ʼaki he agalelei peʼe ke fakaha te tali kaiga. Ohage la ko hakita fakatalitali lelei he tahi ki tokita ʼapi peʼe ke liliu ko hokita kaumeʼa. Neʼe faitohi te apositolo ko Paulo kia Filemone ʼo fakaha age pe neʼe tonu ke feafeaʼi tana fakatalitali ia Onesimo. Neʼe ina ui fenei: “Fakatalitali lelei ia ia.” (Flm. 17) Pea ko Akila mo Pilisila neʼe nā fakatalitali ia Apolose, ʼo nā tokoni age ke mahino lelei age ki te lotu Fakakilisitiano pea mo “nā toʼo ia ia” mo naua. (Gaue 18:26) Neʼe mole tuku e te kau Kilisitiano ʼaia ke natou fetokakoviʼaki ʼuhi ko tonatou kehekehe kae neʼe natou fefakatalitali lelei ʼaki. w23.07 6 ¶13

Kapau ʼe ke foaki tou maʼuli kia Sehova, koteʼuhi ʼe ke ʼofa ia te ia. Pea ʼe mole fakatafito pe tou ʼofa ki he ʼu meʼa ʼe ke logoʼi. Kae ʼe fakatafito ia ki “te ʼatamai malama totonu” pea mo te “mahino fakalaumalie” ʼae neʼe ke maʼu ʼo ʼuhiga mo tona finegalo. Ko tona fakaʼuhiga, ko te ʼu meʼa ʼae neʼe ke ako ʼo ʼuhiga mo te ʼAtua. ʼE ko te ʼu aluʼaga ʼaia, neʼe tupu ai ia te malohi ʼo tou ʼofa ʼae kia te ia. (Kol. 1:9) ʼI tau ako te Tohi-Tapu neʼe ke tui papau ai, (1) ʼe maʼuli moʼoni ia Sehova, (2) ko te Tohi-Tapu ʼe ko tana Folafola, pea (3) ʼe ina fakaʼaogaʼi tana kautahi moʼo fakahoko tona finegalo. Ko he tahi ʼe ina foaki tona maʼuli kia Sehova, ʼe tonu ke ina iloʼi te ʼu akonaki tafito ʼo tana Folafola pea mo maʼuliʼi ʼana lao. ʼE palalau ki tana tui ki ʼihi moka ko he aluʼaga ʼe feala. (Mat. 28:19, 20) Neʼe tuputupu tona ʼofa ʼae kia Sehova pea ʼe ko ia tokotahi pe ʼae ʼe fia tauhi ki ai. ʼE toe feia koa mo koe? w24.03 4-5 ¶6-8

Neʼe ʼohoana ia Apikaile mo Napale. ʼE ui ʼi te Tohi-Tapu neʼe ko he tagata neʼe agafefeka mo agakovi. (1 Sam. 25:3) ʼE mahino ia, neʼe mole faigafua kia ia tona maʼuli mo he tagata feia. Neʼe maʼu koa e Apikaile he ʼu faigamalie ke mavete ai mo tona ʼohoana? ʼEi, neʼe ina maʼu te faigamalie ʼaia ʼi te temi ʼae neʼe fia matehi ai e Tavite, ʼae ka hau anai ki Iselaele, ia tona ʼohoana, he neʼe ina laukoviʼi ia ia pea mo ʼana tagata. (1 Sam. 25:9-13) Neʼe feala pe ke hola kae ʼe ina tuku ia Tavite ke ina fakahoko tana fakatuʼutuʼu. Kae, neʼe mole ina fai te fahaʼi ʼaia. Neʼe ina fakalotoʼi ia ia ke ʼaua naʼa ina matehi tona ʼohoana. (1 Sam. 25:23-27) Kotea ʼae neʼe ina uga ia ia ke ina fai ia te fahaʼi ʼaia? Neʼe ʼofa ia Apikaile ia Sehova pea mo fakaʼapaʼapa ki ʼana lao ʼo ʼuhiga mo te ʼohoana. Neʼe mahino kia ia ko te ʼohoana neʼe taputapu kia Sehova. Neʼe ina fia fakafiafiaʼi te loto ʼo tona ʼAtua. Koia neʼe ina fai ai ia meʼa fuli ʼe ina lavaʼi moʼo haofaki tona famili, mo ʼana kaugana, ʼo feia pe mo tona ʼohoana. Neʼe foimo alu atu aipe ʼo taʼofi ia Tavite ke ʼaua naʼa ina matehi ia ia. w24.03 16-17 ¶9-10

ʼE faiga koa niʼihi ʼo tau kokelekasio ke natou maʼuli fakafeʼauga ke feala ai ke lahi age ʼanatou gaue ʼae maʼa Sehova? ʼE ke iloʼi koa he ʼu tupulaga ʼe natou fakaha ʼaki he lototoʼa ʼe natou kehekehe mo ʼonatou kaumeʼa maʼia tona faigataʼa? Pea kotea te ui kia natou ʼae ʼe natou faiga malohi ke nonofo agatonu logo la te fakafeagai ʼo ʼonatou famili? Ke ke fakatotonu ke ke fai ia meʼa fuli ʼae ʼe ke lavaʼi moʼo fakalotomalohiʼi ia natou ʼaia pea mo ui age ʼe tou leleiʼia tanatou lototoʼa mo ʼanatou ʼu gaue ʼae maʼa Sehova. (Flm. 4, 5, 7) ʼE tui papau ia Sehova ki tatatou loto ʼae ke ina leleiʼia tatou pea mo fai ni sakilifisio moʼo fakahoko tatatou fakapapau ʼae ke tou tauhi kia te ia ʼi totatou maʼuli katoa. Pea ʼe ina fakamaʼuhigaʼi tatou ʼi tana foaki mai te fealagia ʼae ke tou filifili te faʼahiga fakaha ʼo totatou ʼofa. (Taag. 23:15, 16) Koia ke ke fakatotonu ke ke haga tauhi kia Sehova ʼo foaki kia te ia ʼaki he lotolelei te meʼa ʼae ʼe lelei tukupau. w24.02 18 ¶14; 19 ¶16

Fakakaukauʼi age muʼa te aluʼaga ʼaeni neʼe hoko ʼi te taʼu 29 H.T.S. ʼi te kamata e Sesu tana minisitelio. Neʼe fakaafe ia ia, ʼo feia mo Malia tana faʼe ki te kaitahi ʼo he ʼohoana neʼe fai ʼi Kana. Neʼe lagi tokaga Malia ki te kau fakaafe. Kae lolotoga te kaitahi, neʼe hoko te fihifihia, neʼe mole kei ʼi ai he vino. Neʼe alu atu aipe ia Malia ki tana tama, ʼo ui age: “ ʼE mole kei ʼi ai hanatou vino.” (Soa. 2:1-3) Kotea ʼae neʼe fai e Sesu? Neʼe ina fetogi fakamilakulo te vai ko he vino ʼe huʼa lelei. (Soa. 2:9, 10) Neʼe fai e Sesu te tahi ʼu milakulo lolotoga tana minisitelio. Neʼe ina fakaʼaogaʼi tona malohi ke ina fai ni milakulo moʼo tokoni ki ni hahaʼi tokolahi. Ohage la, neʼe ina fafaga te toko 5 000 pea ki muli age te toko 4 000. Kae kapau ʼe hilifaki ki ai te hahaʼi fafine mo te tamaliki, neʼe ko te toko 27 000 tupu ʼae neʼe ina fafaga ʼi te ʼu milakulo ʼaia ʼe lua. (Mat. 14:15-21; 15:32-38) Pea ʼi te ʼu aluʼaga ʼaia, neʼe toe fakamalolo e Sesu ni hahaʼi tokolahi neʼe mahahaki.—Mat. 14:14; 15:30, 31. w23.04 2 ¶1-2

Hili he aluʼaga fakamataku ʼe feala pe ʼi ʼihi ʼaho ke tou gaʼegaʼe ʼi te faʼahi fakasino pea mo te fakakaukau. Ohage ko Elia ʼe hage kia tatou ʼe faigataʼa tatatou tutuʼu ake ʼi te uhu. Kei tou fia momoe pe tatou. (1 Hau 19:5-7) ʼE tonu ke ʼaoga mai he tokoni ke tou faʼafai ʼi tatatou tauhi ʼae kia Sehova. Kapau koia, ʼe ui mai e Sehova ʼe tokoni mai anai ʼaki te ʼu palalau ʼo te koga tohi ʼo te ʼaho nei. Neʼe hoko te faʼahi ʼaia ki te hau ko Tavite. ʼI te lahi ʼo ʼona fihifihia peʼe ko tona tauʼi e ʼona fili neʼe ina ui kia Sehova: “ ʼE lagolago tou nima mataʼu kia au.” (Pes. 18:35) ʼE fakaʼaogaʼi tuʼumaʼu e Sehova ʼihi hahaʼi moʼo tokoni kia tatou. Ohage la, ʼi te lotovaivai ʼa Tavite neʼe alu ia Sonatane ʼo fakalotomalohiʼi ia ia. (1 Sam. 23:16, 17) ʼO toe feia pe neʼe fakaʼaogaʼi e Sehova ia Eliseo ke alu ʼo tokoni kia Elia.—1 Hau 19:16, 21; 2 Hau 2:2. w24.01 23-24 ¶10-12

ʼE tou ako mai te fafine ʼae ʼe ina fakata “te poto moʼoni” ia Taʼaga Lea kapite 9, ko Sehova ʼe lotofoaki pea ʼe ina foaki mai he ʼu meʼa ʼe lelei. ʼE ui ʼi te ʼu vaega ʼaia, ko te fafine fakata ʼaia kua ina teuteuʼi lelei tana moʼi pipi, mo huʼi tana vino, pea kua ina fakatoka tona laupapa. (Taag. 9:2) Pea ohage ko tona fakaha ʼi te ʼu vaega 4 mo 5: “ ʼE ui e te fafine ʼaia [ʼae ʼe ina fakata te poto moʼoni] kia natou ʼae ʼe mole aga fakapotopoto: ‘Kotou ʼomai ʼo kai taku pane.’” He koʼe ʼe tonu ke tou tali te fakaafe ʼa te fafine ʼaia? ʼE loto e Sehova ke aga fakapotopoto ʼana fanau pea ke puipui natou. ʼE mole ina loto ke tou fai ni hala ʼe tou lotomamahi ai anai. Koia la ʼae “ ʼe ina taupau fakalelei te aga fakapotopoto maʼa te hahaʼi faitotonu.” (Taag. 2:7) Ka tou manavasiʼi kia Sehova, ʼe tou fia fakafiafiaʼi tona loto. ʼE tou logo ki ʼana tokoni poto, pea ʼe tou fiafia ʼi te mulimuli ki ai.—Sakp. 1:25. w23.06 23 ¶14-15

Tatau aipe pe ʼe tou manatu ʼe mole lahi te ʼu gaue ʼae ʼe tou fai maʼa Sehova, kae ʼe feala ke tou tui papau ʼe maʼuhiga kia Sehova ʼatatou faiga ʼae ke tou fakafiafiaʼi tona loto. ʼE tou iloʼi feafeaʼi te faʼahi ʼaia? ʼI te temi ʼo Sakalia, neʼe kole e Sehova ki tana polofeta ke ina faʼu he pale ʼaki te aulo mo te siliva ʼae neʼe momoli age e te kau Sutea ʼae neʼe nonofo ʼi Papiloni. (Sakl. 6:11) ʼE fakamanatuʼi e “te pale” ʼaia tanatou lotofoaki lahi. (Sakl. 6:14) ʼE feala ke tou falala ʼe mole galoʼi anai e Sehova ʼatatou faiga ʼae ke tou tauhi fakamalotoloto kia te ia ʼi te ʼu temi faigataʼa. ʼE tou iloʼi ʼe hoko atu pe anai tatatou tau mo ni aluʼaga faigataʼa ʼi te ʼu ʼaho fakamuli ʼaeni, pea ʼe ʼaʼasili kovi age anai. (2 Tim. 3:1, 13) Kae ʼe mole tonu leva ke tou tuʼania fau. Manatuʼi te ʼu palalau ʼaeni neʼe fai e Sehova ki tana hahaʼi ʼi te temi ʼo Akeseo: “ ʼE au nofo mo koutou . . . ʼAua naʼa kotou matataku.” (Ake. 2:4, 5) ʼE feala ke tou tui papau ʼe nofo anai ia Sehova mo tatou mo kapau ʼe tou fai ia meʼa fuli ʼe tou lavaʼi moʼo fakahoko tona finegalo. w23.11 19 ¶20-21

Neʼe feala pe ke mole tuʼu te ʼu vaivaiʼaga ʼo te apositolo ko Petelo ʼi te Tohi-Tapu. Kae neʼe tohi ai ke feala hatatou taʼofi mai ai ni ako. (2 Tim. 3:16, 17) Ko te ʼu vaivaiʼaga ʼo te tagata ʼaia mo te ʼu meʼa ʼae neʼe ina logoʼi ʼe hage pe ko tatou. Koia ʼe feala ai ke tou mahino ʼe mole fakamaʼua mai e Sehova ke tou haohaoa. ʼE ina loto ke tou faʼa kataki, ʼo haga tauhi agatonu kia te ia logo la ʼotatou vaivaiʼaga. He koʼe ʼe tonu ke tou faʼa kataki? Ka tou manatu kua tou lava tauʼi he vaivaiʼaga, ʼe toe feala pe ke tou toe to ki ai. ʼE tou tuku anai koa ʼatatou faiga? Kailoa. Ko tatou fuli ʼe tou fai ni palalau mo ni aga ʼe tou fakahemala ai ki muli age. Kae kapau ʼe hoko atu ʼatatou faiga, ʼe tokoni mai anai ia Sehova ke tou fetogi. (1 Pet. 5:10) Ko te manavaʼofa ʼo Sesu kia Petelo logo la ʼana lakahala, ʼe ina uga ai tatou ke tou haga tauhi agatonu kia Sehova. w23.09 20-21 ¶2-3

Neʼe feala pe ke haga ia Sesu ʼo fakamalolo ia Lasalo, ohage ko tona ui e Maleta ʼi te koga tohi ʼo te ʼaho nei. Kae neʼe fia fai ia Sesu he meʼa fakaofoofo. Neʼe ina fakapapauʼi age kia Maleta: “ ʼE toe maʼuli ake anai tou tokolua.” Pea neʼe ina toe ui age: “Ko au te fakatuʼuake pea mo te maʼuli.” (Soa. 11:23, 25) ʼEi, neʼe foaki e te ʼAtua kia Sesu te malohi ʼae ke ina fakatuʼuake te kau mate. ʼI muʼa atu, neʼe kua fakatuʼuake e Sesu te kiʼi taʼahine neʼe heʼeki faʼa fualoa tana mate pea mo he tama neʼe hoki mate pe. (Luka 7:11-15; 8:49-55) Kae neʼe feala koa ke ina fakatuʼuake he tahi neʼe kua ʼaho fa tana mate pea kua kamata pala tona sino? Neʼe toe alu mo Malia ʼo fakafelaveʼi kia Sesu pea neʼe ina toe ui age pe te ʼu palalau ʼae neʼe fai age e Maleta: “ ʼAliki, ka na neʼe ke ʼi heni la, neʼe mole mate toku tokolua.” (Soa. 11:32) ʼI tana sio mo logo ki tanatou fetagihi neʼe toe lotomamahi ʼaupito ia Sesu. ʼI tona ʼofa mamahi ki tona ʼu kaumeʼa, neʼe toe tagi mo ia. Neʼe mahino ia Sesu ki te toe lotomamahi moka mate he tahi. Pea neʼe fakaʼamu ke ina pulihi te tupuʼaga ʼo tanatou fetagihi! w23.04 10-11 ¶12-13