“Ko Ai Koa ʼe Tatau Mo Sehova, Totatou ʼAtua?”
“Ko ai koa ʼe tatau mo Sehova, totatou ʼAtua, ia ia ʼaē ʼe ina fai tona nofoʼaga ʼi ʼoluga?” — Pesalemo 113:5.
1, 2. a) ʼE feafeaʼi te manatu ʼa te kau Fakamoʼoni ʼa Sehova ki te ʼAtua pea mo te Tohi-Tapu? b) Koteā te ʼu fehuʼi ʼaē ʼe tonu ke tokagaʼi?
KO NĀTOU ʼaē neʼe faikole kia Sehova neʼe tapuakiʼi nātou. ʼE ko he pilivilesio, ia te kau ki te toe hahaʼi fiafia ʼaia! ʼE tou tali te ʼu tokoni, te ʼu lao, te ʼu ako, te ʼu fakapapau pea mo te ʼu lea faka polofeta ʼo te Folafola ʼa te ʼAtua ʼaē ko te Tohi-Tapu, heʼe ko tatou, ko tana kau Fakamoʼoni. ʼE tou fiafia ʼi totatou ‘akoʼi e Sehova’ ʼaki te Tohi-Tapu. — Soane 6:45.
2 ʼAki tanatou fakaʼapaʼapa fakamalotoloto ki te ʼAtua, ko te kau Fakamoʼoni ʼa Sehova ʼe feala hanatou fehuʼi fēnei: “Ko ai koa ʼe tatau mo Sehova, totatou ʼAtua?” (Pesalemo 113:5). Ko te ʼu palalau ʼaia ʼa te tagata ʼo te pesalemo ʼe pipiki ki he tui. Kae, he koʼe koa ʼe maʼu e te kau Fakamoʼoni te tui feiā ki te ʼAtua? Pea koteā te ʼu tupuʼaga ʼaē ʼo tanatou faikole kia Sehova?
Ko te tui pea mo te faikole ʼe ʼaoga
3. Koteā koa te ʼu Pesalemo ʼa Hallel, pea he koʼe koa neʼe nātou fakahigoaʼi feiā?
3 Ko te tui ʼaē kia Sehova ʼe ko he meʼa moʼoni heʼe ko ia ko te ʼAtua e tahi. Ko te meʼa ʼaia ʼe fakamatala ia Pesalemo 113 ki te 115, ko he koga ʼo te ʼu pesalemo e ono ʼo Hallel. ʼO ʼuhiga mo te Faleako ʼa te kau Lapi ʼa Hillel, ko te ʼu pesalemo 113 pea mo 114 neʼe hivaʼi ʼi te Pāsikate ʼa te kau Sutea ʼi te ligi tuʼa lua ʼo te vino ki te kalise pea mo fakamatala te ʼuhiga ʼo te ʼaho ʼaia. Ko te ʼu pesalemo 115 ki te 118 neʼe hivaʼi ʼi te ligi tuʼa fā ʼo te vino ki te kalise (Vakaʼi ia Mateo 26:30). Neʼe fakahigoaʼi ko te ʼu “Pesalemo ʼo Hallel”, heʼe liuliuga tanatou fakaʼaoga te kupu ʼaē ko te Aleluia! — “Vikiviki kia Sehova!”
4. Koteā te faka ʼuhiga ʼo te kupu ʼaē ko te “Aleluia”, pea ʼe feafeaʼi tona tau fakaʼaoga ʼi te Tohi-Tapu?
4 “Aleluia!” ko te hiki ʼaia mai te kupu faka hepeleo ʼaē ʼe fakaʼaoga tuʼa 24 ʼi te ʼu tohi ʼo Pesalemo. ʼE tou toe maʼu tuʼa fā ʼi tona kupu faka keleka ʼi te tohi ʼo te Fakahā 19:1-6, ʼaē ʼe talanoa ki te fiafia ʼe maʼu ʼi te faka ʼauha ʼo te Papiloni Lahi, te puleʼaga faka malamanei ʼo te lotu hāla, pea mo te kamataʼaga ʼo te pule ʼa Sehova ʼAtua ʼi tona ʼuhiga hau. Ka ʼe tou vakaʼi te ʼu Pesalemo e tolu ʼo Hallel, ʼe tonu ke tou fakakaukau lelei ʼe hage ko hatatou hiva ʼo fakavikiviki kia Sehova.
Koutou vikiviki kia Sehova!
5. Ko te fehuʼi fea koa ʼaē ʼe tali ki ai te Pesalemo 113, pea ʼe ʼaoga tāfito koa kia ai te fakatotonu ʼaē ia Pesalemo 113:1, 2?
5 ʼE tali e te Pesalemo 113 ki te fehuʼi ʼaenī, koteā te tupuʼaga ʼo te vikiviki kia Sehova? ʼE kamata fēnei te fakatotonu: “Koutou vikiviki kia Sehova! Koutou fai he ʼu fakavikiviki, ê kaugana ʼa Sehova, koutou vikiviki te huafa ʼo Sehova. Ke manuʼia te huafa ʼo Sehova ʼi te temi nei pea ki he temi ʼe mole ʼiloi hona gataʼaga!” (Pesalemo 113:1, 2). “Aleluia!” Ei, “Koutou vikiviki kia Sehova!” ʼE fai tāfito te fakatotonu ʼaia ki te hahaʼi ʼa te ʼAtua ʼi te ʼu “temi fakaʼosi”. (Taniela 12:4.) ʼE maʼuhiga ʼaupito ʼi te temi nei, ke kalagaʼi te huafa ʼo Sehova ʼi te kele katoa. ʼE tala e tana kau Fakamoʼoni ko Sehova ko te ʼAtua, ko Kilisito ko te Hau, pea ko te Puleʼaga kua fakatuʼu ʼi selo. Ko Satana te Tevolo pea mo tana kautahi ʼe mole feala ke nātou tāʼofi te vikiviki ʼaia kia Sehova.
6. Neʼe feafeaʼi koa te vikiʼi ʼo Sehova ‘mai te hopo ki te to ʼo te laʼā’?
6 Ko te hiva fakavikiviki ʼe fai anai ʼo aʼu ki te temi ʼaē ka ʼiloʼi katoa ai ia Sehova ʼi te kele. “Mai te hopo ki te to ʼo te laʼā ko te huafa ʼo Sehova ʼe tonu ke vikiʼi.” (Pesalemo 113:3). Ko tona ʼuhiga ʼaē ʼe maʼuhiga age ia ʼi he tauhi ʼi te ʼaho fuli pe ʼe ʼihi ʼi te kele. Ko te laʼā ʼe hopo ʼi te potu hahake pea ʼe to ʼi te potu hihifo, ʼo ina ʼaofi te kele katoa. ʼI te potu fuli ʼaē ʼe gigila ai te laʼā, ko te huafa ʼo Sehova ka vave anai tona vikiʼi e te hahaʼi ʼaē neʼe faka ʼāteaina ʼi tanatou ʼaunofo ʼi te lotu hāla pea mo te kautahi ʼa Satana. ʼIo, ko te hiva ʼaia ʼe mole gata anai ia, ʼe lolotoga hivaʼi nei e te kau Fakamoʼoni fakanofo ʼa Sehova pea mo nātou ʼaē ko te fānau kelekele anai ʼo tona Hau ʼaē ko Sesu Kilisito. ʼE ko he pilivilesio ia hanatou hiva fakavikiviki kia Sehova!
Ko Sehova ʼe māʼoluga tokotahi
7. Koteā koa te ʼu agaaga e lua ʼo te Tuʼi ʼAliki ko Sehova ʼe tonu ke fakatokagaʼi ia Pesalemo 113:4?
7 ʼE toe ʼui fēnei e te tagata tohi pesalemo: “Ko Sehova kua māʼoluga ʼi te ʼu puleʼaga fuli; mo tona kolōlia ʼe māʼoluga ia ʼi te lagi.” (Pesalemo 113:4). ʼE ʼiloga ko te ʼu agaaga e lua ʼa te Tuʼi ʼAliki ʼo te ʼAtua: 1) Kia Sehova te Tuʼi ʼAliki, ʼaē ʼe “māʼoluga ʼi te ʼu puleʼaga fuli”, ʼe nātou hage ko he toʼi ʼi he pākete pea ko he kiʼi efu ʼi he meʼa fua (Isaia 40:15; Taniela 7:18); 2) ko tona kolōlia ʼe mamaʼo age ia ʼi te lagi, he ko te kau ʼaselo ʼe nātou fai tana finegalo faʼitaliha. — Pesalemo 19:1, 2; 103:20, 21.
8. He koʼe koa ʼe fiamālalo ia Sehova ʼo tokagaʼi te ʼu meʼa ʼaē ʼi selo pea mo te kele, pea ʼe feafeaʼi tana fai ʼo te meʼa ʼaia?
8 ʼAki te mālohi ʼo te ʼAtua, neʼe ʼui fēnei e te tagata tohi pesalemo: “Ko ai koa ʼe tatau mo Sehova, totatou ʼAtua, ia ia ʼaē ʼe ina fai tona nofoʼaga ʼi ʼoluga? ʼE fiamālalo ke ina sio ki te lagi pea mo te kele.” (Pesalemo 113:5, 6). Koia ʼe tonu ai ke hikihiki te ʼAtua he neʼe fiamālalo ʼo ʼuhiga mo te ʼu meʼa ʼaē ʼo te lagi pea mo te kele. Ko Sehova ʼe mole mālalo ʼi he tahi peʼe mo fakalogo ki niʼihi, kae ʼe ina fakahā te agavaivai ʼi tana manavaʼofa aipe ki te kau agahala agavaivai. ʼI tana foaki ʼaē ʼo tona ʼAlo ko Sesu Kilisito ko te “sakilifisio faifakalelei” maʼa te kau kilisitiano fakanofo pea mo te hahaʼi ʼo te malamanei, ʼe ko he fakahā ʼaia ʼo te agavaivai ʼa Sehova. — 1 Soane 2:1, 2.
Ko Sehova ʼe manavaʼofa
9, 10. ʼE feafeaʼi koa te haga ʼa te ʼAtua ʼo ‘hiki te tagata masiva ke nātou fakatahi mo te ʼu hahaʼi ʼaliki’?
9 Moʼo fakaʼiloga te manavaʼofa ʼa te ʼAtua, neʼe toe ʼui e te tagata tohi pesalemo, ko Sehova “ ʼe ina fakatuʼu te veliveli mai te efu; mai he luo lefulefu ʼe ina hiki te tagata masiva, moʼo fakatahiʼi mo te ʼu hahaʼi ʼaliki, ko te kau hahaʼi ʼaliki ʼi tana hahaʼi. ʼE ina fakanofo te fafine paʼa ʼi he fale, ke fiafia ʼi ai ohage ko he faʼe maʼu foha. Koutou fakavikiviki kia Sehova!” (Pesalemo 113:7-9). Ko te hahaʼi ʼa Sehova ʼe nātou tui ko Sehova ʼe feala ke ina hāofaki ia te hahaʼi masisiva faitotonu, pea mo tokoniʼi nātou ʼo ʼuhiga mo te ʼaluʼaga ʼo tonatou maʼuli, pea mo fakafimālie te ʼu meʼa ʼaē ʼe ʼaoga kia nātou feiā aipe mo te ʼu meʼa ʼaē ʼe nātou loloto kiai. ‘Ko Ia ʼaē ʼe tauʼaluga pea mo māʼoluga ʼe ina fakaloto mālohiʼi te loto ʼo ʼaē ʼe mamahi.’ — Isaia 57:15.
10 ʼE feafeaʼi te haga ʼa Sehova ʼo ‘hiki te tagata masiva, moʼo fakatahiʼi ia ia mo te ʼu hahaʼi ʼaliki’? Ko te finegalo ʼa te ʼAtua, ke tuʼulaga tatau pe tana ʼu kaugana mo nātou ʼaē ʼe ʼaliki. Neʼe ina fakahoko te meʼa ʼaia ʼo ʼuhiga mo Sosefo, ʼaē neʼe ko te tagata pule ʼo te meʼa kai ʼi Esipito (Senesi 41:37-49). ʼI Iselaele, ko te heka fakatahi mo he kau ʼaliki, peʼe ko he kau takitaki pule ʼi te lotolotoiga ʼo te hahaʼi ʼa Sehova, neʼe ko he pilivilesio ia ke taupau fakalelei. Ohage ko te kau tagata ʼāfea kilisitiano ʼo te temi nei, ko te ʼu tagata ʼaia ʼe nātou maʼu te tokoni pea mo te tapuaki ʼa te ʼAtua.
11. He koʼe ʼe feala ke tou ʼui ko te meʼa ʼaē ʼe talanoa kiai ia Pesalemo 113:7-9 ʼe faka ʼuhiga tāfito ki te hahaʼi ʼa Sehova ʼo te temi nei?
11 Koteā leva te ʼui ʼo ʼuhiga ‘mo te fakanofo ʼo te fafine paʼa ko he faʼe fiafia’? Neʼe foaki e te ʼAtua te tama ki te fafine paʼa ʼaē ko Ana — ko Samuele, ʼaē neʼe ina foaki ke gāue maʼa te ʼAtua (1 Samuele 1:20-28). Ko te tahi age meʼa maʼuhiga, ʼo kamata atu ia Sesu pea mo te hifo ʼo te laumālie maʼoniʼoni ki tana kau tisipulo ʼi te Penikosite ʼo te taʼu 33 ʼo totatou temi, ko nātou ʼaia ko te fafine ʼohoana fakatā ʼa te ʼAtua, ko te Sione faka selo, ʼaē neʼe ina kamata fakatupu te ʼu tamaliki fakalaumālie (Isaia 54:1-10, 13; Gāue 2:1-4). Ohage pe ko te haga ʼaē ʼa te ʼAtua ʼo tuku te kau Sutea ki tonatou fenua ʼi tanatou ʼosi ʼaunofo ʼi Papiloni, neʼe toe feiā aipe mo te taʼu 1919 neʼe ina faka ʼāteaina te toe ʼo te kau fakanofo ʼo te “Iselaele ʼo te ʼAtua” ʼi tanatou ʼaunofo ʼi te Papiloni pea mo lahi te ʼu tapuaki fakalaumālie neʼe nātou maʼu ohage ko te ʼu palalau ʼaē ia Pesalemo 113:7-9 ʼe faka ʼuhiga kia nātou (Kalate 6:16). ʼI tonatou ʼuhiga Fakamoʼoni ʼa Sehova, ko te toe ʼo te Iselaele fakalaumālie pea mo tonatou ʼu kaugā gāue ʼaē ʼe falala ke nātou maʼuʼuli ʼi te kele, ʼe nātou tali ʼaki te loto katoa ki te ʼu palalau fakaʼosi ʼaē ia Pesalemo 113: “Koutou fakavikiviki kia Sehova!”
Te fakamoʼoni ʼo te natula māʼoluga ʼa Sehova
12. ʼE ʼiloga feafeaʼi ia Pesalemo 114 te natula māʼoluga ʼo Sehova?
12 Ko te Pesalemo 114 ʼe ina fakahā te natula māʼoluga ʼo Sehova ʼi tana tala te ʼu meʼa fakatalakitupua ʼaē neʼe kau ai te hahaʼi ʼo Iselaele. ʼE fēnei te hiva ʼo te tagata tohi pesalemo: “ ʼI te mavae ʼa Iselaele mai Esipito, ʼi te mavae ʼo te ʼapi ʼo Sakopo mai te hahaʼi ʼe mole māhino tanatou lea, neʼe liliu ia Suta ko tana koga meʼa taputapu, ko Iselaele tona nofoʼaga taulekaleka.” (Pesalemo 114:1, 2). Neʼe hāofaki e te ʼAtua ia Iselaele mai te popūla ʼa te kau Esipito, ko he hahaʼi neʼe faikehe tanatou lea ki ʼonatou ʼu taliga. Ko te fakahāo ʼo te hahaʼi ʼa Sehova, ʼaē ʼe toʼo fakatuketuke kia Suta pea mo Iselaele, ʼe ʼiloga mai ko te ʼAtua ʼe feala tana fakahāo tana ʼu kaugana ʼo te temi nei.
13. ʼE ʼiloga feafeaʼi ia Pesalemo 114:3-6 te tuʼi ʼaliki ʼa Sehova pea mo tona ʼaoga ʼaē ki te ʼu meʼa neʼe hoko ʼi te Iselaele ʼāfea?
13 ʼE ʼiloga te tuʼi faʼitaliha ʼa Sehova ki te meʼa fuli ʼi te ʼu palalau ʼaenī: “Neʼe mamata te tai pea mo hola; kae ki te Solotane, neʼe maliu ʼo homuli. Neʼe mafisi te ʼu moʼuga ohage ko he ʼu matuʼaʼi akeno, ko te ʼu fuga sia ohage ko he ʼu akeno. Koteā ʼaē neʼe hoko kia koe, ê tai, ʼaē neʼe ke hola ai, e Solotane, ke ke maliu ʼo homuli? E moʼuga, ʼi takotou mafisi ohage ko he ʼu matuʼaʼi akeno, e fuga sia, ohage ko he akeno?” (Pesalemo 114:3-6). Ko te tai Kula neʼe “hola” ʼi te avahi ʼaē e te ʼAtua te ala maʼa tana hahaʼi. ʼO mamata ai leva ia Iselaele ki te nima mālohi ʼo Sehova ʼaē ki te kau Esipito neʼe mamate malemo ʼi te mapeʼe ʼo te vai kia nātou (Ekesote 14:21-31). ʼAki he mālohi fakaʼatua feiā, ko te vai ʼo te Solotane neʼe “maliu ʼo homuli”, ʼo faka fealagia ai ki te kau Iselaele hanatou hu ki Kanaane (Sosue 3:14-16). ‘Neʼe mafisi te ʼu moʼuga ohage ko he ʼu matuʼaʼi akeno’ ʼi te temi ʼaē neʼe kohu pea mo galugalu ai te Moʼuga ʼo Sinaï ʼi te temi ʼaē neʼe fakatuʼu ai te fuakava ʼo te Lao (Ekesote 19:7-18). ʼI te fakaʼosi ʼo tana hiva, ko te tagata pesalemo ʼe ina faʼufaʼu te ʼu meʼa ohage ko he ʼu fehuʼi, lagi moʼo fakahā te manavahe ʼaē ʼo te tai, ʼo te liʼua, ʼo te ʼu moʼuga pea mo te ʼu fuga sia ʼi te ʼu gāue mālohi ʼa Sehova.
14. Koteā ʼaē neʼe hoko ʼi Melipa pea mo Katesi ʼaki te mālohi ʼa Sehova, pea ʼe tonu koa ke lave feafeaʼi ki te kau kaugana ʼa Sehova ʼo te temi nei?
14 ʼI tana toe talanoa aipe ki te mālohi ʼa Sehova, ʼe fēnei te hiva ʼa te tagata tohi pesalemo: “ ʼUhi ko te ʼAliki, ke ke maʼu te ʼu mamahi mālohi, ê kele, ʼuhi ko te ʼAtua ʼo Sakopo, ʼaē ʼe ina fetogi te maka ko he matavai ʼe kahoʼia, ʼo fakaliliu te maka fefeka ko he matapuna vai.” (Pesalemo 114:7, 8). ʼE fakahā e te tagata tohi pesalemo ʼaki he talanoa fakatā ko te malamanei ʼe tonu anai ke nātou manavasiʼi kia Sehova, ʼaē ko te ʼAliki pea mo te Pule ʼo te ʼAtulaulau ʼo te kele katoa. Ko ia ko te “ ʼAtua ʼo Sakopo”, feiā aipe ki te hahaʼi Iselaele fakalaumālie pea mo tonatou ʼu kaumeʼa ʼaē ʼe falala ke nātou maʼuʼuli ʼi te kele. ʼI te toafa ʼo Melipa pea mo Katesi, neʼe fakahā e Sehova tona mālohi ʼi tana foaki faka milakulo te vai ki te kau Iselaele, ʼo ina “fakaliliu te maka fefeka ko he matapuna vai”. (Ekesote 17:1-7; Faka au 20:1-11.) Ko he ʼu fakamanatu feiā ʼo ʼuhiga mo te mālohi fakaofoofo ʼa Sehova feiā aipe mo tana tokaga ʼaē ki tana kau Fakamoʼoni, ko he ʼu tupuʼaga mālohi ʼaia ke maʼu he tui katoa kia te ia.
ʼE mole tatau mo te ʼu ʼatua tamapua
15. ʼE feafeaʼi koa te faʼahiga hiva ʼo te Pesalemo 115?
15 Ko te Pesalemo 115 ʼe ina uga tatou ke tou faikole pea mo falala kia Sehova. ʼE tapuakiʼi e te Pesalemo ʼaia ia Sehova pea mo lagolago tana fai pule, pea mo fakahā ko te ʼu tamapua ko te ʼu meʼa noa. ʼE feala ke fakahoahoa te hiva ʼo te pesalemo ʼaia. Koia ʼaē ʼe feala ki he tokotahi ke ina hiva fēnei: “Ko koutou ʼaē ʼe manavasiʼi kia Sehova, koutou tuku takotou falala kia Sehova.” ʼO feala ke tali fēnei e te kokelekasio: “Ko ia ko tonatou tokoni pea mo tonatou lago tau.” — Pesalemo 115:11.
16. Koteā ʼaē ʼe kehekehe ai ia Sehova pea mo te ʼu tamapua ʼa te kau puleʼaga?
16 ʼE mole tonu anai ke haʼu te kolōlia kia tatou kae ki te huafa ʼa Sehova, ko te ʼAtua lotoʼofa, pea mo fakahagatonu pea mo moʼoni (Pesalemo 115:1). ʼE feala pe ke fehuʼi fakamanukinuki fēnei te kau fili: “ ʼE ʼifea koa tonatou ʼAtua?” ʼE feala ke toe tali fēnei e te hahaʼi ʼa Sehova: ‘Ko tomatou ʼAtua ʼe nofo ʼi selo; ko meʼa fuli ʼe ina fia fai, ʼe ina fai.’ (ʼU vaega 2, 3). Kae ko te ʼu tamapua ʼa te kau puleʼaga ʼe mole feala ke nātou fai hanatou gāue, heʼe ko te ʼu fakatātā neʼe fai ʼaki te siliva pea mo te aulo. Māʼia pe la te ʼu gutu, te ʼu mata pea mo te ʼu taliga ʼaē ʼe nātou maʼu, ʼe mole nātou palalau, ʼe mole nātou sisio pea ʼe nātou mamate. ʼE ʼi ai tonatou ʼu ihu kae ʼe mole nātou mamanu ki he meʼa, ʼe ʼi ai tonatou ʼu vaʼe kae ʼe mole feala hanatou haʼele, pea ʼe ʼi ai tonatou ʼu kia kae ʼe mole he leʼo ʼe haʼu mai ai. Ko nātou ʼaē neʼe nātou faʼu te ʼu tamapua ʼaia feiā aipe mo nātou ʼaē ʼe nātou falala kiai, ʼe nātou liliu anai ohage ko nātou. — ʼU vaega 4-8.
17. ʼUhi ko te mate ʼe mole feala hana fakavikiviki kia Sehova, koteā koa te meʼa ʼe tou fai anai, pea ʼaki te ʼu fakatuʼutuʼu feafeaʼi?
17 ʼE foaki tāfito te tokoni ʼaia koteʼuhi ke falala kia Sehova ko te tokoni pea mo te taupauʼaga ʼo Iselaele, te ʼapi faka pelepitelo ʼo Alone, pea mo nātou fuli ʼaē ʼe manavasiʼi ki te ʼAtua (Pesalemo 115:9-11). Ohage ko nātou ʼaia neʼe manavasiʼi kia Sehova, ʼe tonu ke tou maʼu he fakaʼapaʼapa fakamalotoloto ki te ʼAtua pea mo tou matataku naʼa tou fai he meʼa ʼe mole ina leleiʼia. ʼE tonu ke tou toe tui ko te “Pule ʼo selo pea mo te kele” ʼe ina tapuaki tana kau ʼatolasio agatonu (ʼu vaega 12-15). Ko te lagi ko tona ʼafioʼaga ʼaia, kae ʼe tuku e te ʼAtua te kele ko te koga meʼa heʼegata maʼa te hahaʼi agatonu pea mo fakalogo. ʼUhi ko te mate ʼe mole ina ʼiloʼi he meʼa, ʼe mole feala hana fakavikiviki kia Sehova, kae ko tatou ʼaē kei maʼuʼuli, ʼe feala anai hatatou fai te meʼa ʼaia ʼaki te agatonu (Tagata Tānaki 9:5). Ko nātou pe ʼaē ka fakavikiviki kia Sehova ʼaē ʼe nātou maʼu anai te maʼuli heʼegata feiā mo te “tapuaki ʼa Sehova”, ʼo palalau lelei ʼo ʼuhiga mo ia “ki he temi ʼe mole ʼiloʼi hona gataʼaga”. Koia, tou fakatahi mo nātou ʼaē ʼe nātou tokagaʼi te tokoni ʼaenī: “Koutou fakavikiviki kia Sehova!” — Pesalemo 115:16-18.
Te ʼu kalitate taulekaleka ʼo Sehova
18, 19. Ko te ʼu faʼahi fea koa ʼaē ko te ʼu kalitate ʼo Sehova ʼe nātou fakakeheʼi ai ia ia ʼi te ʼu ʼatua hāla?
18 ʼE kehekehe ia Sehova mo te ʼu tamapua ʼaē ʼe mole maʼuʼuli, he ko ia Sehova, ʼe ko te ʼAtua maʼuli, ʼe ina maʼu te ʼu kalitate taulekaleka. Ko ia ko te natula ʼo te ʼofa pea ʼe “agaʼofa pea mo fakamolemole gafua, tuai ʼi te ʼita pea mahu ʼi te lotoʼofa”. (Ekesote 34:6; 1 Soane 4:8.) ʼE mole tatau ia mo te ʼatua fekai ʼa te kau Kananeane ko Moleke, ʼaē ʼe nātou sakilifisioʼi kia ia tanatou ʼu fānau! Neʼe ʼui ko te ʼatua ʼaia neʼe sinoʼi tagata pea neʼe ʼuluʼi pipi. ʼE ʼui foki ko te tamapua ʼaia neʼe vevela ʼaupito, pea neʼe lī te ʼu tamaliki ki tona ʼu nima ʼo ʼina tuku ifo nātou ki te ʼafi kakaha. Kae ko Sehova ʼaē ʼe ʼofa pea mo manavaʼofa ʼe ko he meʼa ia neʼe mole heʼeki “hake ia ʼi [tona] loto”. — Selemia 7:31.
19 ʼE toe kau foki ki te ʼu kalitate tāfito ʼo Sehova te faitotonu haohaoa, te poto heʼegata, pea mo te mālohi māfimāfi (Teutalonome 32:4; Sopo 12:13; Isaia 40:26). Koteā te ʼui ʼo ʼuhiga mo te ʼu ʼatua faka mitolosia? ʼE mole ʼui ke nātou gāue ʼaki te faitotonu, ko te ʼu ʼatua ʼa te kau Papilone pea mo tanatou ʼu ʼatua fafine neʼe nātou lagavaka. Ko te ʼu ʼatua ʼa te kau Esipito neʼe mole ko he ʼu faʼifaʼitaki poto kae neʼe nātou maʼu te ʼu vaivaiʼaga fakatagata. ʼE mole fakapuna’maʼuli te meʼa ʼaia, he ko te ʼu ʼatua hāla feiā mo te ʼu ʼatua fafine neʼe fakatupu nātou e te ʼu tagata “vaiga”, ʼe nātou ʼui ʼe nātou popoto (Loma 1:21-23). Ko te ʼu ʼatua ʼa te kau Keleka ʼe toe ʼui pe foki neʼe nātou fonofono ki te tahi ʼatua. Ohage la, ʼi te ʼu fagana, ʼaki te mālohi ʼo Zeus neʼe ina fakahifo tana tāmai, ko Cronus, ʼaē mo ia pe foki neʼe ina fakahifo tana tāmai, ko Uranus. ʼE ko he tapuaki te gāue pea mo te faikole kia Sehova, ko te ʼAtua ʼe maʼuli mo moʼoni, pea mo ina tuku te ʼofa, te faitotonu, te poto pea mo te mālohi haohaoa!
Ko Sehova ʼe tau mo te fakavikiviki heʼegata
20. Koteā te ʼu tupuʼaga ʼo te fakavikiviki ʼa Tavite ki te huafa ʼo Sehova?
20 Ohage ko tona fakahā e te ʼu Pesalemo ʼa Hallel, ʼe tau mo Sehova ia te fakavikiviki heʼegata. Ohage la ʼi te temi ʼaē neʼe kau ai Tavite pea mo tana kaugā fagona Iselaele ki te laga ʼo te fale lotu, neʼe fēnei tana ʼui ʼi muʼa ʼo te kokelekasio: “Fakafetaʼi kia koe, ê Sehova, ʼAtua ʼo Iselaele, tamatou tāmai, talu mai he ʼu temi ʼe mole ʼiloʼi pea mo he ʼu temi heʼegata! ʼE ke maʼu, ê Sehova, te lahi, pea mo te mālohi, pea mo te matalelei, pea mo te takimuʼa, pea mo te ʼalikiʼaga; he ko meʼa fuli, ʼi te lagi pea mo te kele, ʼa koe. ʼE ke maʼu te puleʼaga, ê Sehova, ia koe ʼaē ʼe toe māʼoluga ko te pule ʼi te meʼa fuli pe. Ko te koloā pea mo te kolōlia ʼe hifo mai ia koe, pea ʼe ke pule ki te ʼu meʼa fuli pe; pea ʼe maʼu ʼi tou nima te mālohi, pea ʼi tou nima ʼe nofo ai te mālohi ʼo te fai ʼo he meʼa lahi pea mo foaki te mālohi kia meʼa fuli. Pea ʼi te temi nei, ê ʼAtua, ʼe mātou fakafetaʼi kia te koe pea mo mātou fakavikiviki ki tou huafa taulekaleka.” — 1 Fakamatala 29:10-13.
21. Ko te fakamoʼoni fea koa ʼaē ʼe tuku ia Fakahā 19:1-6 ʼe vikiʼi Sehova ʼe he tokolahi ʼi selo?
21 ʼE toe fakafetaʼi pea mo fakavikiviki heʼegata anai foki ia Sehova ʼi te lagi. Neʼe fagono te ʼapositolo ko Soane ki te “toe hahaʼi lahi ʼi selo” ʼe ʼui fēnei: “Koutou fakavikiviki kia Sehova! Ko te fakamaʼuli pea mo te kolōlia pea mo te mālohi ʼa totatou ʼAtua, koteʼuhi ko tana ʼu fakamāu ʼe moʼoni pea mo faitotonu. He neʼe ina fai tana fakamāu ki te paomutu lahi [Papiloni Lahi] ʼaē ʼe ina fakahehema te kele ʼi tana folonikasio, pea ko ia neʼe ina lagavaka ʼi tona nima [ʼa ia] te toto ʼo tana ʼu kaugana.” ʼE ina toe ʼui: “Koutou fakavikiviki kia Sehova!” Ko te meʼa ʼaia neʼe fai e te “toko ʼuafulu-ma-fā tagata ʼāfea pea mo te toko fā meʼa maʼuʼuli”. Neʼe fēnei te ʼui ʼa te leʼo mai te ʼafioʼaga: “Koutou fakavikiviki ki totatou ʼAtua, koutou fulifuli ko tana kau kaugana, ko nātou ʼaē ʼe manavasiʼi kia ia, te kau liliki pea mo te kau lalahi!” Pea toe ʼui fēnei e Soane: “Neʼe ʼau fagono ko he leʼo ʼa he toe hahaʼi tokolahi pea ko he gugulu ʼa he ʼu vai lahi, pea mo he gugulu ʼa he ʼu mana lahi. ʼE fēnei tanatou ʼui: ‘Koutou fakavikiviki kia Sehova, heʼe ko Sehova totatou ʼAtua, te Māfimāfi, kua kamata tana pule.’ ” — Fakahā 19:1-6.
22. ʼE feafeaʼi anai te vikiʼi ʼo Sehova ʼi te mālama foʼou ʼaē neʼe ina fakapapau?
22 ʼE ko he meʼa lelei he fakavikiviki ʼa he tokolahi ʼi selo kia Sehova! Kua ōvi pe tona mālama foʼou, mo nātou foki ʼaē ka fakatuʼuake ʼi te mate ʼe nātou kau fakatahi anai mo nātou ʼaē ka maʼuʼuli ʼi te tuʼu fakaʼosi ʼo fakavikiviki kia Sehova. Ko te ʼu moʼuga māʼoluga ʼe nātou lagaʼi tonatou ʼu ʼulu ʼo hiva te ʼu fakavikiviki kia Sehova. Te ʼu fuga sia matamatalelei pea mo te ʼu fuʼu ʼakau ʼe nātou hiva anai tana ʼu fakavikiviki. Koia ʼaē ko meʼa fuli ʼe maʼuʼuli ʼe nātou fakavikivikiʼi anai te huafa ʼo Sehova ʼi te hiva lahi ʼaē ʼo te Aleluia (Pesalemo 148)! ʼE logoʼi anai koa tokotou ʼu leʼo ʼi te hahaʼi fiafia ʼaia? ʼE feala anai, mo kapau ʼe koutou tauhi agatonu ia Sehova mo tana hahaʼi. ʼE tonu anai ko takotou fakatuʼutuʼu ʼaia ʼi tokotou maʼuli, koteʼuhi ko ai koa ʼe tatau mo Sehova, totatou ʼAtua?
ʼE feafeaʼi anai takotou tali?
◻ He koʼe ʼe vikiʼi ia Sehova ʼAtua?
◻ Ko te ʼu faʼahi fea koa ʼaē ʼe māʼoluga ai Sehova?
◻ Koteā te fakamoʼoni ʼe tou maʼu ko Sehova ʼe manavaʼofa?
◻ ʼE feafeaʼi koa te kehekehe ʼo Sehova ʼi te ʼu tamapua mamate feiā aipe mo te ʼu ʼatua hāla?
◻ He koʼe koa ʼe feala ke tou ʼui ʼe maʼu anai e Sehova te fakavikiviki heʼegata ʼi selo pea mo te kele?
[Paki ʼo te pasina 9]
Ko te ʼu Pesalemo ʼa Hallel neʼe hivaʼi ʼi te Pāsikate.