ʼE Maʼuli Te Folafola ʼa Sehova
Ko He ʼu Puani ʼAoga ʼo Te Nima Koga ʼo Te ʼu Pesalemo
ʼE FEALA ke ʼui fēnei e te ʼu tagata maʼu koloā: “ ʼE hage ko he ʼu kiʼi uho totatou ʼu foha ʼi tanatou tuputupu ake ʼi tonatou temi tūpulaga, ʼe hage totatou ʼu ʼofafine ko he ʼu fakatātā togi ʼi he ʼu fale hau, ʼe tapuke te meʼa kai ʼi totatou ʼu fale tānaki, . . . ʼe tuputupu tatatou ʼu faga manu ʼo lauʼi afe.” Tahi ʼaē, ʼe feala ki te hahaʼi maʼu koloā ke nātou ʼui: “Fiafia te hahaʼi ʼaē ʼe feiā tonatou maʼuli!” Kae ko te tagata fai pesalemo ʼe ina ʼui ia: “Fiafia te hahaʼi ʼaē ko tonatou ʼAtua ʼe ko Sehova!” (Pesalemo 144:12-15) ʼE moʼoni ko te hahaʼi ʼa Sehova ʼe nātou maʼuli fiafia, heʼe ko ia te ʼAtua fiafia, pea ko tona kalitātē ʼaia ʼe maʼu e nātou ʼaē ʼe tauhi age kiā te ia. (1 Timoteo 1:11) ʼE hā te faʼahi ʼaia ʼi te koga fakaʼosi ʼo te ʼu hiva ʼaē neʼe takitaki e te laumālie maʼoniʼoni, ʼo kamata mai te Pesalemo 107 ki te Pesalemo 150.
ʼI te Nima Koga ʼo Te ʼu Pesalemo, ʼe toe faka maʼuhiga ai te ʼu kalitātē māʼoluga ʼo Sehova, ia tona lotoʼofa, mo tana agatonu, pea mo tana agalelei. Kapau ʼe loloto tatatou mahino ki te ʼulugaaga ʼo te ʼAtua, pea ko totatou ʼofa pea mo tatatou manavasiʼi ʼaē kiā te ia, ʼe lahi age anai. Ko he faʼahi ʼe ina fakatupu ai tatatou loto fiafia. ʼI logo maʼuhiga ʼe tou maʼu ʼi te Nima Koga ʼo Te ʼu Pesalemo!—Hepeleo 4:12.
ʼE TOU FIAFIA ʼUHI KO TE LOTOʼOFA ʼO SEHOVA
Neʼe hiva fēnei ia te kau Sutea ʼaunofo ʼi tanatou liliu mai Papiloni: “Ê! Ke tou fakafetaʼi kiā Sehova ʼuhi ko tona lotoʼofa pea mo tana ʼu gāue fakaofoofo ki te ʼu foha ʼo te tagata.” (Pesalemo 107:8, 15, 21, 31) Pea ko Tavite moʼo fakavikiviki ki te ʼAtua, neʼe hiva fēnei: “ ʼE aʼu tau agatonu ki te ʼu ʼao ʼo te lagi.” (Pesalemo 108:4) ʼI te kātiko ʼo te kapite 109, ʼe faikole fēnei: “Tokoni mai, Ê Sehova toku ʼAtua; hāofaki au ʼo mulimuli ki tou lotoʼofa.” (Pesalemo 109:18, 19, 26) Ko te Pesalemo 110, ʼe ina fakakikite ia te pule ʼa te Mesia. ʼE ʼui fēnei ʼi te Pesalemo 111:10: “Ko te manavasiʼi kiā Sehova ʼe ko te kamataʼaga ʼo te poto.” ʼI te Pesalemo ʼaē ʼe hoa mai, ʼe ʼui fēnei: “Fiafia te tagata ʼaē ʼe manavasiʼi kiā Sehova.”—Pesalemo 112:1.
ʼE ʼui ko te Hallel ia te ʼu Pesalemo 113 ki te Pesalemo 118, ʼe fakahigoaʼi feiā ʼuhi heʼe liuliuga te fakaʼaogaʼi ʼo te kupu “Aleluia,” peʼe “Fakavikiviki ia Sah!” ʼI te Mishna—ko te tohi neʼe tā ʼi te tolu sēkulō pea ʼe fakamatala ai te ʼu ʼuluaki talatisio ʼaē neʼe tala gutu—ko te ʼu kātiko ʼaia neʼe hivaʼi ʼi te Pāsikate pea mo te ʼu ʼaho lalahi e tolu ʼa te kau Sutea ʼaē neʼe fai ʼi te taʼu fuli. ʼI te ʼu pesalemo fuli pea mo te ʼu kapite fuli ʼo te Tohi-Tapu, ʼe ko te Pesalemo 119 ʼaē ʼe loaloaga, pea ʼe faka maʼuhigaʼi ai te folafola peʼe ko te logo ʼaē neʼe fakahā e Sehova.
Te ʼu Tali Ki Te ʼu Fehuʼi Faka Tohi-Tapu:
109:23—Koteā te faka ʼuhiga ʼo te ʼui ʼaē e Tavite: “ ʼE tonu ke au puli ohage ko te malu ʼo te afiafi”? Neʼe fai e Tavite te ʼu palalau fakatuketuke ʼi tana logoʼi ʼaē kua ōvi mai tona temi mate.—Pesalemo 102:11.
110:1, 2—Koteā ʼaē neʼe fai e te “ ʼAliki [ʼo Tavite]” ko Sesu Kilisito, ʼi te temi ʼaē neʼe heka ai ʼi te toʼomataʼu ʼo te ʼAtua? ʼI tona ʼosi fakatuʼuake, neʼe hake ia Sesu ki selo pea neʼe fakatalitali ʼi te toʼomataʼu ʼo te ʼAtua ʼo aʼu ki te 1914 ʼaē neʼe kamata ai tana ʼafio Hau. ʼI te temi ʼaia, neʼe pule ia Sesu ki tana kau tisipulo fakanofo, ʼo ina takitaki tanatou fai faka mafola pea mo tanatou fai ʼo ni ʼu tisipulo, pea mo teuteuʼi nātou ki tanatou gāue ʼaē ko te kaugā hau mo ia ʼi tona Puleʼaga.—Mateo 24:14; 28:18-20; Luka 22:28-30.
110:4—Koteā ʼaē neʼe ‘fakapapau kiai Sehova pea neʼe mole fakahemala ia’? Ko te fakapapau ʼaia ʼe ko te fuakava ʼaē neʼe fai e Sehova mo Sesu Kilisito, ke liliu ʼo Hau pea mo Pelepitelo Lahi.—Luka 22:29.
113:3—E feafeaʼi ia te fakavikiviki ʼo te huafa ʼo Sehova “mai te hopo ki te tō ʼo te laʼā”? ʼE faka ʼuhiga te ʼu kupusiga palalau ʼaia ki he kaugamālie ʼe nātou atolasio ki te ʼAtua ʼi te ʼaho fuli. ʼI te hopo ake ʼo te laʼā mai te potu esite ʼo aʼu ki tana tō ʼi te potu uesite, ʼe mālamagia ia te kele kātoa. ʼO feiā mo Sehova, ʼe tonu ke vikiʼi ʼi te kele kātoa. ʼE hoki hoko he fakavikiviki feiā, mo kapau ʼe ko he tokolahi ʼaē ʼe nātou fakahoko ia te koga ʼaia. ʼI totatou ʼuhiga kau Fakamoʼoni ʼa Sehova, ʼe tou maʼu ia te pilivilesio lahi ʼaē ke tou vikiʼi ia te ʼAtua pea mo lagolago ʼaupito ki te faka mafola ʼo te Puleʼaga.
116:15—ʼE ‘maʼuhiga feafeaʼi kiā mata ʼo Sehova ia te mate ʼo tana ʼu kaugana agatonu’? Kiā Sehova ʼe maʼuhiga ʼaupito tana ʼu kaugana, koia maʼa ia ʼe nātou hage ko he sino, peʼe ko he kūtuga, ʼe ina puipui fakalelei ke mole pulihi nātou. Kapau ʼe ina tali ke matehi ia tana kautahi, pea ʼe faka ʼuhiga anai ko tona ʼu fili ʼe mālohi age iā te ia. Tahi ʼaē meʼa, ʼe mole ʼi ai anai he tahi ʼi te kele moʼo fakatafito ia te mālama foʼou.
119:71—Koteā ʼaē ʼe feala ke fua lelei ʼuhi ko te mamahi? Ka hoko ni ʼu fakataga kiā tatou, pea ʼe feala ke lahi age tatatou falala ʼaē kiā Sehova, pea mo fakamalotoloto age tatatou ʼu faikole ʼaē kiā te ia, pea mo lahi age tatatou ako ia te Tohi-Tapu pea mo maʼuliʼi te ʼu meʼa ʼaē ʼe tou ako. Tahi ʼaē, ʼe tou fakahā ʼi tatatou ʼutakiʼi ʼaē ʼo totatou ʼu mamahi, ʼe feala ke tou lolomi totatou ʼuhiga agahala. Kapau ʼe tou maʼu he ako mai te ʼu mamahi ʼaē ʼe tau mo tatou, pea ʼe mole liliu anai ko he faʼahi ʼe fakatupu mafasia kiā tatou.
119:96—Koteā te faka ʼuhiga ʼo te ʼui ʼaē ‘ ʼe ʼi ai te gataʼaga ʼo te ʼu meʼa fuli ʼaē ʼe kātoa’? ʼE palalau te tagata fai pesalemo ʼo ʼuhiga mo te manatu ʼaē ʼe maʼu e he tagata ki he meʼa ʼe kātoa. Lagi neʼe ina ʼiloʼi ko te meʼa ʼaē ʼe kātoa ki te tagata ʼe faka tuʼakoi. Kae ko te fakatotonu ʼa te ʼAtua ʼe mole feiā ia. Ko tana takitaki ʼe ʼaoga kiā tatou ʼi te ʼu faʼahi fuli ʼo totatou maʼuli. ʼE ʼui fēnei ʼi te New International Version: “ ʼE au sio ʼe tuʼakoi te ʼu gāue fuli ʼaē ʼe ʼui ʼe kātoa, kae ko tau ʼu folafola ʼe mole hona gataʼaga.”
119:164—Koteā te faka ʼuhiga ʼo te ʼui ʼaē ke fakavikiviki ki te ʼAtua “tuʼa fitu ʼi te ʼaho”? ʼI te agamāhani, ko te numelo fitu ʼe faka ʼuhiga ki he meʼa ʼe kātoa. Koia, ʼe ʼui e te tagata fai pesalemo ʼe tāu mo Sehova ia te ʼu fakavikiviki fuli.
Te ʼu Puani ʼe Tou Lava Tāʼofi:
107:27-31. ʼE maveuveu anai ia te poto ʼo te malamanei mokā hoko mai Halamaketone. (Apokalipesi 16:14, 16) ʼE mole ina lava hāofaki he tahi mai te fakaʼauha. ʼE hāofaki pe anai e Sehova ia nātou ʼaē ka haga kiā te ia , pea ʼe nātou māʼuʼuli anai moʼo “fakafetaʼi kiā [te ia] ʼuhi ko tona loto lotoʼofa.”
109:30, 31; 110:5. ʼI te agamāhani ʼe puke e te tagata solia ia tana heletā ʼi tona nima mataʼu, pea ko tona nima ʼaia ʼe mole puipui heʼe puke te meʼa tali tau ʼi tona nima hema. ʼE feiā mo Sehova, ʼe nofo ia “ ʼi te toʼomataʼu” ʼo tana ʼu kaugana, ʼo tau maʼa nātou. Koia, ʼe ina puipui pea mo tokoni kiā nātou—ko he faʼahi ke tou “fakafetaʼi ʼaupito [kiā te ia].”
113:4-9. ʼI te māʼoluga fau ʼo Sehova ʼe tonu ke fakamālalo ifo ʼo “sio mai te lagi” ki te kele. Kae logola te faʼahi ʼaia, ʼe manavaʼofa ia ki ʼaē ʼe veliveli, mo ʼaē ʼe masiva, pea mo te fafine paʼa. Ko te Tuʼi ʼAliki ko Sehova ʼe agavaivai pea ʼe loto ia ke toe feiā mo tana ʼu kaugana.—Sakopo 4:6.
114:3-7. ʼE tonu ke malave ki ʼotatou loto tatatou ʼiloʼi ʼaē te ʼu gāue taulekaleka ʼaē neʼe fai e Sehova maʼa tana ʼu kaugana ʼi te Tai Kula, ʼi te Vaitafe ʼo Solotane, pea ʼi te Moʼuga ʼo Sinai. Ko te malamanei ʼaē ʼe fakatātā e te “kele,” ʼe tonu ke ina ʼiloʼi “ ʼi te ʼu temi mamahi” ia te faʼahi ʼaia —ʼuhi ko te ʼAliki.
119:97-101. ʼE tou hāo mai te tuʼutāmaki fakalaumālie, mo kapau ʼe tou maʼu ia te poto, mo te fakasiosio tonu, pea mo te ʼatamai mālama ʼaē ʼi te Folafola ʼa te ʼAtua.
119:105. Ka tou tau mo he ʼu fihifihia, ʼe liliu ia te Folafola ʼa te ʼAtua ʼe ko he mālama ki totatou ʼu vaʼe. ʼE ina toe inaina totatou ala, koteʼuhi ʼe ina fakahā fakatomuʼa mai te fakatuʼutuʼu ʼa te ʼAtua ʼo ʼuhiga mo te ka haʼu.
ʼE TOU FIAFIA LOGOLA TE ʼU FIHIFIHIA
E feafeaʼi hatatou tauʼi te ʼu fihifihia pea mo hāo mai te ʼu fakafeagai? ʼE tou maʼu te tali ki te fehuʼi ʼaia, ʼi te Pesalemo 120 ki te Pesalemo 134. Kapau ʼe tou kumi tokoni kiā Sehova, pea ʼe tou hāo anai ʼi te fakataga, pea mo tou maʼuli fiafia. Ko te ʼu pesalemo ʼaia, ʼe higoaʼi ko te ʼu Kātiko ʼo te ʼu Hake, lagi neʼe hivaʼi e te kau Iselaele ʼi tanatou hake ki Selusalemi, ʼo kau ki te ʼu ʼaho lalahi e tolu ʼaē neʼe fai ʼi te taʼu fuli.
ʼI te Pesalemo 135 ki te Pesalemo 136, ʼe talanoa ai kiā Sehova ʼe ina fai ia meʼa fuli ʼe loto kiai, ʼo mole tatau ia mo te ʼu tamapua ʼaē ʼe mole lava tokoni mai kiā tatou. Ko te Pesalemo 136 ʼe ko he tali ʼe hivaʼi, pea ko te fakaʼosi ʼo te ʼu vaega fuli ʼe hivaʼi moʼo tali ki te kamata. Ko te Pesalemo 137 ʼe talanoa ki te ʼaluʼaga fakaʼofaʼofa ʼa te kau Sutea ʼi Papiloni, ʼaē neʼe nātou fia tauhi kiā Sehova ʼi Sione. Neʼe ko Tavite ʼaē neʼe ina tohi te ʼu Pesalemo 138 ki te 145. Neʼe fia ‘fakafetaʼi kiā Sehova mo tona loto kātoa.’ Koteā tona tupuʼaga? ʼE ina ʼui fēnei: “Heʼe fakamanavahe pea mo fakaofoofo toku faʼu.” (Pesalemo 138:1; 139:14) ʼI te ʼu kapite e nima ʼaē ʼe hoa mai, ʼe kole e Tavite ke puipui ia ia mai te hahaʼi agakovi, ke fai age he ʼu fakatotonu faitotonu, ke hāofaki ia ia mai te hahaʼi fakataga, pea ke takitaki ia ia. ʼE ina fakahā te fiafia ʼa te ʼu kaugana ʼa Sehova. (Pesalemo 144:15) ʼI te kua mahino leva ʼa Tavite ki te māʼoluga pea mo te agalelei ʼa te ʼAtua, ʼe ina ʼui fēnei: “Ko toku gutu ʼe fakavikiviki anai kiā Sehova; pea ke tapuakinaʼi e te kakano fuli tona huafa maʼoniʼoni ʼo aʼu ki he ʼu temi ʼe mole ʼiloʼi hona gataʼaga, ei ʼo talu ai.”—Pesalemo 145:21.
Te ʼu Tali Ki Te ʼu Fehuʼi Faka Tohi-Tapu:
122:3—ʼE faka ʼuhiga feafeaʼi te ʼui ʼaē ko Selusalemi ʼe ko he kolo neʼe “nonoʼo fakatahi ʼi te logo tahi”? ʼI te temi muʼa ʼi te ʼu kolo, neʼe ko he agamāhani te fakatuʼu feōvi ʼo te ʼu fale ʼi Selusalemi. Neʼe māʼopoʼopo ai te kolo pea neʼe faigafua tona puipui. Tahi ʼaē, ʼi te tuʼu feōvi ʼo te ʼu fale neʼe faigafua ai ki te hahaʼi ʼo te kolo hanatou fetokoniʼaki pea mo hanatou fepuipuiʼaki. ʼE ko he faʼahi, ʼe tou mahino ai leva ki te logo tahi fakalaumālie ʼaē neʼe maʼu e te ʼu telepi e 12 ʼo Iselaele ʼi te temi ʼaē neʼe nātou fakatahi ai moʼo tauhi kiā Sehova.
123:2—Koteā te puani tāfito ʼaē ʼe tou maʼu ʼi te lea fakatā ʼo ʼuhiga mo te ʼu mata ʼa te ʼu kaugana? Ko te ʼu kaugana pea mo te hahaʼi faifekau ʼe nātou haga ki he pule peʼe ko he fafine pule ʼuhi ko faʼahi e lua: ʼuluaki ke nātou ʼiloʼi te meʼa ʼaē ʼe loto kiai tonatou ʼu pule, pea lua ke puipui ia nātou pea ke foaki age tonatou meʼa maʼuli. ʼO toe feiā mo tatou, ʼe tou haga kiā Sehova ke tou ʼiloʼi tona finegalo pea mo maʼu ia tona ʼofa.
131:1-3—Neʼe feafeaʼi te ‘fīmālie pea mo te fakatokatoka ʼo te nefesi ʼo Tavite ohage ko he tamasiʼi kua fakagata tana kai e tana faʼē’? Ohage ko te fīmālie pea mo te fiafia ʼa he tamasiʼi vavae ʼi te ʼu nima ʼo tana faʼē, neʼe maʼu e Tavite ia te fīmālie pea mo te tokalelei “ohage ko he tamasiʼi vavae e tana faʼē.” ʼO feafeaʼi? Neʼe mole fiatuʼu tona loto pea mo fia ʼaliki tona ʼu mata, neʼe mole faiga ia ki he ʼu meʼa ʼe lahi fau maʼa ia. Neʼe mole kumi tuʼulaga ia Tavite, kae ʼi te temi fuli pe neʼe ina ʼiloʼi tona ʼu vaivaiʼaga pea mo fakahā te agavaivai. Mo tatou foki, ʼe tonu ke tou muliʼi tana faʼifaʼitaki, tāfito la mokā tou maʼu ni ʼu pilivilesio ʼi te kokelekasio.
Te ʼu Puani ʼe Tou Lava Tāʼofi:
120:1, 2, 6, 7. ʼE feala ki he fasituʼu pea mo he palalau fakakinakina ke fakatupu lotomamahi ki niʼihi. Tou lolomi totatou gutu ke ina fakahā “te tokalelei.”
120:3, 4. Kapau ʼe tonu ke tou kātakiʼi he tahi ʼe “ ʼalelo kākā,” ʼe tou fiafia anai heʼe ko Sehova ʼe ina fakatokatoka anai ia te faʼahi ʼaia ʼi tona temi totonu. Ko te kau fasituʼu ʼe nātou mamahi anai ʼi te nima ʼo “te tagata mālohi.” ʼE nātou liliu anai ko he ʼu ipu ʼo te tautea lahi ʼa Sehova ʼaē neʼe fakatā e te “mamala kei kakaha ʼo te sene.”
127:1, 2. ʼI te ʼu gāue fuli ʼaē ʼe tou fai, ʼe tonu anai ke tou kumi ia te takitaki ʼa Sehova.
133:1-3. Ko te logo tahi ʼa te ʼu kaugana ʼa Sehova ʼe fīmālie, mo maʼa, pea mo fiafia. ʼE mole tonu ke maveuveu totatou maʼuli ʼi he ʼu fatufatu, mo he ʼu kē, mo he ʼu lāuga.
137:1, 5, 6. Ko te kau atolasio ʼaunofo ʼa Sehova neʼe nātou pipiki ki Sione—ʼaē neʼe ina fakatātā ia te kautahi ʼa te ʼAtua. E feafeaʼi kiā tatou? ʼE tou pipiki agatonu koa ki te kautahi ʼaē ʼe fakaʼaogaʼi e Sehova iā ʼaho nei?
138:2. Ko Sehova ʼe ina ‘fakatuputupu tana folafola ʼo māʼoluga age ʼi tona huafa’ ke hoko fuli te ʼu meʼa ʼaē neʼe ina fakapapau ʼaki tona huafa. ʼIo, ʼi te ka haʼu ʼe ʼi ai anai te ʼu ʼamanaki lahi.
139:1-6, 15, 16. Ko Sehova ʼe ina ʼiloʼi tatatou ʼu gāue, mo tatatou ʼu manatu, pea mo te ʼu meʼa ʼaē ka tou fia palalau kiai. ʼE ina ʼiloʼi tatou talu mai te temi ʼaē neʼe faʼu ai tatou ʼi te fatu ʼo tata faʼē, ʼi muʼa ʼo te kātoa ʼo te ʼu koga kehekehe ʼo tota sino. Ko te ʼiloʼi ʼaē e te ʼAtua ia tatou takitokotahi ʼe “fakaofoofo fau” ke tou mahino kiai. ʼI meʼa fakafiafia hata ʼiloʼi ʼe mole gata pe te sio ʼa Sehova ki te ʼu fihifihia ʼaē ʼe tau mo tatou, kae ʼe toe mahino ki te malave ʼo te ʼu fihifihia ʼaia kiā tatou!
139:7-12. ʼE mole he faʼahi ʼe tou nonofo ai, ʼe mamaʼo fau ki te ʼAtua ke mole feala hana fakaloto mālohiʼi tatou.
139:17, 18. ʼE tou leleiʼia koa te ʼatamai mālama ʼaē kua tou maʼu ʼo ʼuhiga mo Sehova? (Tāʼaga Lea 2:10) Kapau ʼe tou fiafia, pea kua tou maʼu te matapuna lahi ʼo te fiafia. Ko te ʼu manatu ʼa Sehova ʼe “laka age ʼi te ʼu fisiʼi ʼone.” ʼI te temi fuli pe, ʼe lahi anai te ʼu meʼa ke tou ako ʼo ʼuhiga mo ia.
139:23, 24. Tou tuku ia Sehova ke ina vakavakaʼi ia totatou loto, ia te ʼu ‘ala ʼaē ʼe kovi’—te ʼu manatu, mo te ʼu fakaʼamu, pea mo te ʼu holi ʼaē ʼe mole lelei—pea ke tokoni mai ke tou taʼaki te ʼu faʼahi kovi ʼaia.
143:4-7. E feafeaʼi hatatou ʼutakiʼi ni ʼu fihifihia ʼe faigataʼa? ʼE tali fēnei e te tagata fai pesalemo: Ke tou metitāsioʼi te ʼu gāue ʼa Sehova, pea mo tou kole tokoni kiā ia.
“Koutou Vikiviki Kiā Sah!”
Ko te ʼu ʼuluaki koga e fā ʼo te ʼu pesalemo, ʼe fakaʼosi takitahi ʼaki te kupu: vikiviki kiā Sehova. (Pesalemo 41:13; 72:19, 20; 89:52; 106:48) ʼE toe fakaʼosi feiā mo te nima koga. ʼE ʼui fēnei iā Pesalemo 150:6: “Ko te ʼu meʼa fuli ʼaē ʼe mānava—ke nātou vikiviki kiā Sah. Koutou vikiviki kiā Sah!” ʼE liliu anai ʼo moʼoni te ʼu palalau ʼaia ʼi te mālama foʼou ʼa te ʼAtua.
Kapau ʼe tou fakaʼamu ki te temi manuʼia ʼaia, pea ʼe ko he tupuʼaga tāfito ʼaia moʼo faka kolōliaʼi te ʼAtua moʼoni pea mo fakavikiviki ki tona huafa. Ka tou fakakaukauʼi te fiafia ʼaē ʼe tou maʼu ʼi tatatou ʼiloʼi ia Sehova pea mo felogoi lelei mo ia, ʼe tou fakafetaʼi anai kiā te ia.
[Paki ʼo te pasina 9]
Ko te ʼu gāue fakaofoofo ʼa Sehova ʼe fakatupu manavasiʼi
[Paki ʼo te pasina 10]
Ko te ʼu manatu ʼa Sehova ʼe “laka age ʼi te ʼu fisiʼi ʼone”