Ko Te Toe Hahaʼi Tokolahi ʼe Nātou Fai Te Tauhi Fakataputapu
“ ʼE nātou foaki kia te ia te tauhi fakataputapu ʼi te ʼaho mo te po ʼi tona fale lotu.”—Fakahā 7:15.
1. Neʼe koteā te faʼahi maʼuhiga ʼaē neʼe hoko ʼi te 1935 ʼo ʼuhiga mo te mahino ʼi te faʼahi fakalaumālie?
ʼI Te ʼaho 31 ʼo Maio 1935, neʼe fakafiafia ʼaupito te kau telekē ʼo te fakatahi ʼa te kau Fakamoʼoni ʼa Sehova ʼi Washington. Ko te hoki ʼiloʼi ʼaē peʼe ko ai te hahaʼi kaugamālie (peʼe ko te toe hahaʼi tokolahi) ʼo te Fakahā 7:9, ʼo felogoi tahi mo ʼihi vaega ʼo te Tohi-Tapu pea mo te ʼu meʼa ʼaē neʼe kua kamata hoko.
2. Neʼe koteā ʼaē neʼe hā ai ko te hahaʼi tokolahi ʼaē ʼe tuputupu, neʼe kua mahino kia nātou neʼe mole pāui nātou e te ʼAtua ki te maʼuli ʼaē ʼi selo?
2 ʼI te ʼu ʼuluaki vāhaʼa e ono, ʼi te toʼotoʼoga ʼo te Taumafa ʼo te ʼAliki ʼi te ʼu kokelekasio ʼa te kau Fakamoʼoni ʼa Sehova, neʼe ko te toko 10 681 (ʼe fakafuafua ko te 1 ki te 6) neʼe mole kai ki te pane pea mo ʼinu te vino, pea ko te toko 3 688 kau fai faka mafola neʼe nātou fagonogono mālohi te Puleʼaga ʼo te ʼAtua. He koʼe neʼe mole nātou kau ki te kai ʼo te pane pea mo ʼinu te vino? Koteʼuhi ʼe nātou mulimuli pe ki te ʼu meʼa ʼaē neʼe nātou ako ʼi te Tohi-Tapu, ʼe mahino kia nātou ko te ʼAtua neʼe mole ina pāuiʼi nātou ki te maʼuli ʼaē ʼi selo kae ʼe feala ke nātou kau ki te ʼu meʼa ʼofa ʼe foaki e Sehova ʼi te tahi age ʼaluʼaga. Koia ʼi te fakatahi ʼaia, ʼi te temi ʼaē neʼe fehuʼi ai e te tagata fai akonaki: “ ʼE ʼau kole kia nātou ʼaē ʼe ʼamanaki ke nātou maʼuʼuli ʼo heʼegata ʼi te kele ke nātou tutuʼu ake,” koteā te meʼa ʼaē neʼe hoko? Ko te toko lauʼi afe hahaʼi neʼe tutuʼu ki ʼoluga, pea neʼe hoa kiai te pasipasi fualoa ʼa te hahaʼi.
3. He koʼe ko te ʼiloʼi pe ko ai te toe hahaʼi tokolahi neʼe ina foaki te mālohi ki te minisitelio, pea neʼe feafeaʼi te aga ʼa te kau Fakamoʼoni ki te faʼahi ʼaia?
3 Ko te ako ʼaē neʼe maʼu e te kau telekē ʼi te fakatahi ʼaia neʼe ina foaki te mālohi ki tanatou minisitelio. Neʼe kua mahino leva kia nātou ʼi te temi nei, ʼi muʼa ʼo te fakaʼosi ʼo te tuʼu ʼāfea, mole gata pe ki te toko lauʼi afe kae ʼe foaki age anai ki te hahaʼi kaugamālie te fealagia ʼaē ke nātou ʼōmai ʼo kau ki te fakatuʼutuʼu ʼa Sehova ʼuhi ke feala hanatou maʼu te maʼuli, ʼaki te manatu ʼaē ke nātou maʼuʼuli ʼo heʼegata ʼi te palatiso ʼi te kele. ʼE ko he logo fakaloto māfana neʼe fakahā ʼi ai kia nātou ʼaē ʼe ʼoʼofa ki te moʼoni! Neʼe fakamahino ki te kau Fakamoʼoni ʼa Sehova neʼe ʼi ai te toe gāue lahi ʼe tonu ke fai—ko te gāue fakafiafia. ʼI te ʼu taʼu ki muli age, ko John Booth, ʼaē neʼe liliu ko he tahi ʼe kau ki te Kolesi Pule, neʼe ina toe fakamanatuʼi te meʼa ʼaenī: “Ko te fakatahi ʼaia neʼe ina foaki mai kia mātou te toe fiafia lahi.”
4. (a) Neʼe tuputupu feafeaʼi te tānaki ʼo te toe hahaʼi tokolahi talu mai te 1935? (b) Neʼe fakahā feafeaʼi ʼe nātou ʼaē ʼo te toe hahaʼi tokolahi ʼe nātou tui?
4 Lolotoga te ʼu taʼu ʼaē neʼe hoa kiai, neʼe fakaofoofo te tuputupu ʼa te kau Fakamoʼoni ʼa Sehova. Logope la tonatou fakatagaʼi mālohi ʼi te lolotoga ʼo te Lua Tau Faka Malamanei, lolotoga taʼu e hogofulu neʼe teitei fakalaka ʼi te tuʼa tolu tonatou kaugamālie. Pea ko te kau fai faka mafola e toko 56 153 ʼaē neʼe nātou fai faka mafola ʼi te taʼu 1935, kua tuputupu ʼi te 1994 ʼo fakalaka ʼi te toko 4 900 000 kau fai faka mafola ʼo te Puleʼaga ʼi te ʼu fenua e 230 tupu. Tokolahi ʼi te kau fai faka mafola ʼaia ʼe nātou falala ʼaki he ʼamanaki lahi ke nātou kau ia nātou ʼaē ʼe foaki e Sehova te maʼuli haohaoa ʼi te palatiso ʼi te kele. ʼO fakatatau ki te kiʼi faga ōvi, kua nātou liliu moʼoni ko te toe hahaʼi tokolahi. Ko nātou ʼe nātou ʼui ʼe nātou tui pea ʼe ko he faʼahi ʼe nātou fakahā. (Sake 1:22; 2:14-17) Ko nātou fuli ʼe nātou fakahā ki ʼihi te logo lelei ʼo te Puleʼaga ʼo te ʼAtua. ʼE koutou kau koa ki te hahaʼi fiafia ʼaia? Ko he tahi ʼe liliu ko he Fakamoʼoni ʼe gāue fakamalotoloto ʼe ko he fakaʼiloga maʼuhiga ʼaia, kae ʼe ʼi ai te tahi ʼu meʼa ʼe pipiki kiai.
“ ʼE Nātou Tutuʼu ʼi Muʼa ʼo Te Hekaʼaga Faka Hau”
5. Koteā ʼaē ʼe hā ʼaki mai ai ʼi te ʼui ʼaē ko te toe hahaʼi tokolahi ʼe nātou “tutuʼu ʼi muʼa ʼo te hekaʼaga faka hau”?
5 ʼI te meʼa ʼaē neʼe hā ki te ʼapositolo ko Soane, neʼe sio ia kia nātou “ ʼe nātou tutuʼu ʼi muʼa ʼo te hekaʼaga faka hau pea ia muʼa ʼo te Akeno.” (Fakahā 7:9) Ko tanatou tutuʼu ʼi muʼa ʼo te hekaʼaga faka hau ʼo te ʼAtua, ohage ko tona fakamatala ʼi te koga tohi ʼaenī, ʼe hā ʼaki mai ʼe nātou foaki te fakafetaʼi katoa ki te pule faʼitaliha ʼa Sehova. ʼE ʼi ai te tahi ʼu meʼa ʼe pipiki ki te faʼahi ʼaia. Ohage la: (1) ʼE mahino kia nātou ʼe tau mo Sehova ke ina fakatuʼutuʼu maʼa tana kau kaugana pe koteā te meʼa ʼaē ʼe lelei pea mo te meʼa ʼaē ʼe kovi. (Senesi 2:16, 17; Isaia 5:20, 21) (2) ʼE nātou fagono kia Sehova mokā ʼe palalau age kia nātou ʼaki tana Folafola. (Teutalonome 6:1-3; 2 Petelo 1:19-21) (3) ʼE nātou ʼiloʼi te maʼuhiga ʼaē ʼo te fakalogo kia nātou ʼaē neʼe fakanofo e Sehova. (1 Kolonito 11:3; Efesi 5:22, 23; 6:1-3; Hepeleo 13:17) (4) Logope la tanatou heʼe haohaoa, ʼe nātou faiga fakamalotoloto ke nātou muliʼi te takitaki faka teokalatike, ʼo mole fai ʼaki he lotomamahi, kae ʼaki te loto katoa. (Tāʼaga Lea 3:1; Sake 3:17, 18) ʼE nātou ʼi muʼa ʼo te hekaʼaga faka hau moʼo foaki he tauhi taputapu kia Sehova, ʼaē ʼe nātou fakaʼapaʼapa fakamalotoloto ki ai pea mo ʼofa mamahi ki ai. ʼO ʼuhiga mo te toe hahaʼi tokolahi ʼaia, ko tanatou “tutuʼu” ʼi muʼa ʼo te hekaʼaga faka hau ʼe hā ʼaki ai ʼe tali nātou e Ia ʼaē ʼe nofo ʼi te hekaʼaga faka hau. (Vakaʼi ia Fakahā 6:16, 17.) ʼE fakatafito kiteā te ʼofa ʼaia?
“ ʼE Nātou Kofuʼi Te ʼu Kofu Hina”
6. (a) Koteā te faka ʼuhiga ʼo te ʼui ʼaē ʼe “kofuʼi te ʼu kofu hina” e te toe hahaʼi tokolahi? (b) ʼE maʼu feafeaʼi e te toe hahaʼi tokolahi tanatou faitotonu ʼi muʼa ʼo Sehova? (c) E feafeaʼi te lahi ʼo te malave ki te maʼuli ʼo te toe hahaʼi tokolahi te tui ʼaē ki te taʼataʼa ʼo Kilisito?
6 Ko te fakamatala ʼa te ʼapositolo ko Soane ʼo ʼuhiga mo te meʼa ʼaē neʼe sio kiai, ʼe ina ʼui ko nātou ʼaē ʼe kau ki te toe hahaʼi tokolahi ʼe nātou “kofuʼi te ʼu kofu hina.” Ko te ʼu kofu hina ʼaia ʼe nātou fakatātā tonatou ʼuhiga maʼa, tonatou tuʼulaga faitotonu ia muʼa ʼo Sehova. Neʼe nātou maʼu feafeaʼi te tuʼulaga ʼaia? Neʼe kua ʼosi tou vakaʼi ʼi te meʼa ʼaē neʼe hā kia Soane, ʼe nātou tutuʼu “ ʼi muʼa ʼo te Akeno.” ʼE nātou fakamoʼoni ko Sesu Kilisito “te Akeno ʼo te ʼAtua ʼaē ʼe ina toʼo te agahala ʼo te malamanei.” (Soane 1:29) ʼI te meʼa ʼaē neʼe hā kia Soane, ko te tahi ʼi te ʼu tagata ʼāfea, ʼaē neʼe ʼi muʼa ʼo te hekaʼaga faka hau ʼo te ʼAtua, ʼe ina ʼui fēnei: “Neʼe nātou fō ʼonatou ʼu kofu loloa pea mo nātou fakahihina ʼi te taʼataʼa ʼo te Akeno. Koia la ʼaē ʼe nātou tutuʼu ia muʼa ʼo te hekaʼaga faka hau ʼo te ʼAtua.” (Fakahā 7:14, 15) ʼI hona ʼaluʼaga fakatātā, neʼe nātou fō tonatou ʼu kofu ʼaki tanatou tui ʼaē ki te taʼataʼa faitotogi ʼo Kilisito. ʼE mole nātou ʼio pe, ʼaki tonatou ʼatamai ki te akonaki ʼa te Tohi-Tapu ʼo ʼuhiga mo te totogi. ʼI tanatou loto fakafetaʼi ki te faʼahi ʼaia, ʼe malave ki tonatou ʼuhigaʼi tagata takitokotahi; koia, “ ʼaki te loto” ʼe nātou fakahā tanatou tui. (Loma 10:9, 10) Ko te meʼa ʼaia neʼe malave ʼosi ki te faʼahiga fakaʼaogaʼi ʼaē ʼo tonatou maʼuli. ʼAki te tui, ʼe nātou foaki ia nātou totonu kia Sehova ʼo fakatafito ki te sakilifisio ʼo Kilisito, ʼo fakatātā te foaki ʼaia ʼo nātou ʼaki te papitema ʼaē ʼi te vai, ʼo nātou maʼuʼuli moʼoni ʼo mulimuli pe ki tanatou fakapapau ʼaia, pea mo nātou maʼu te felogoi lelei mo te ʼAtua. ʼE ko he pilivilesio lelei—ko he pilivilesio ʼe tonu ke puipui fakalelei!—2 Kolonito 5:14, 15.
7, 8. Neʼe tokoni feafeaʼi te kautahi ʼa Sehova ki te toe hahaʼi tokolahi ke ʼaua naʼa nātou ʼulihi tonatou ʼu kofu?
7 ʼAki te tokaga ʼofa ʼaē ki te fīmālie fualoa ʼo tana hahaʼi, neʼe tuʼa lahi te fakatokagaʼi e te kautahi ʼa Sehova te ʼu agaaga pea mo te ʼu aga ʼaē ʼe feala ke nātou ʼulihi ia nātou, heʼe lagi feala anai ki te Kilisitiano ʼaē ʼe ina ʼui ʼe kau ki te toe hahaʼi tokolahi ke mole tau moʼoni anai mo te fakamatala faka polofeta ʼaē ia Fakahā 7:9, 10. (1 Petelo 1:15, 16) Moʼo lagolago ki te meʼa ʼaē neʼe ʼuluaki tā, ko Te Tule Leʼo ʼo te 1941 pea ki muli age, neʼe tuʼa lahi tana fakahā ʼe mole ko he meʼa lelei anai te fai faka mafola ki niʼihi kae ʼi te temi ʼaē ʼe mole nātou kau ai ki te minisitelio, ʼe nātou fai te folonikasio peʼe ko te tono. (1 Tesalonika 4:3; Hepeleo 13:4) ʼI te 1947, neʼe fakahā fakalelei ko te ʼu lekula faka Kilisitiano ʼa Sehova ʼo ʼuhiga mo te ʼohoana, ʼe ʼaoga ʼi te ʼu fenua fuli; tatau aipe pe koteā te meʼa ʼe tali e te agaʼi fenua, ko nātou ʼaē neʼe hoholo pe tanatou ʼohoana mo he ʼu fafine e tokolahi peʼe ko he ʼu tagata e tokolahi neʼe mole feala ke nātou liliu ko he kau Fakamoʼoni ʼa Sehova.—Mateo 19:4-6; Tito 1:5, 6.
8 ʼI te 1973, neʼe fakahā e te kau Fakamoʼoni ʼa Sehova ʼo te malamanei katoa, ko nātou fuli ʼe tonu ke nātou tokakaga ke ʼaua naʼa nātou fai he ʼu aga ʼe ʼuli ʼaupito ohage ko te fakaʼaogaʼi fakavale ʼo te sikaleti, ʼi he faʼahiga potu pe ʼe nātou ʼi ai—ʼo mole gata ʼaki pe ʼi te Fale ʼo te Puleʼaga peʼe ʼi te fagonogono kae ʼo toe feiā aipe ʼi te gāue fakamālama peʼe ko ʼihi age ʼaluʼaga ʼe mole hā mai ki tuʼa. (2 Kolonito 7:1) ʼI te 1987 ʼi te ʼu fakatahi faka tisitilike ʼa te kau Fakamoʼoni ʼa Sehova, neʼe tokoniʼi fakamālohi te kau Kilisitiano tūpulaga, ke nātou taupau maʼu tonatou ʼuhiga ʼaē ʼi muʼa ʼo te ʼAtua, ʼe tonu ke nātou tokaga ke ʼaua naʼa nātou fai he ʼu faʼahiga aga e lua naʼa puli ai leva tonatou ʼuhiga maʼa. (Pesalemo 26:1, 4) Tuʼumaʼu pe, ko Te Tule Leʼo neʼe ina fakatokagaʼi te ʼu faʼahi kehekehe ʼo te manatu ʼa te mālama koteʼuhi “ko te tauhi ʼaē ʼe maʼa pea mo imakulata ʼi te manatu ʼo totatou ʼAtua pea mo Tāmai” ʼe fakamaʼua ke kita “nofo tokaga ʼo ʼāteaina ʼi te mele fuli pe ʼi te faʼahi ʼo te malamanei.”—Sake 1:27.
9. Ko ai anai ka tali moʼoni ʼi muʼa ʼo te hekaʼaga faka hau ʼo te ʼAtua ʼi te hili ʼo te mamahi lahi?
9 ʼE ko nātou ʼaē ʼe uga e tanatou tui ke nātou maʼuʼuli ʼi he faʼahiga ʼaluʼaga ke nātou nonofo maʼa ʼi te faʼahi fakalaumālie pea mo te faʼahi fakaʼatamai ʼaē ka “tutuʼu [anai] ʼi muʼa ʼo te hekaʼaga faka hau” ohage ko ni ʼu kaugana ʼe kua tali nātou e te ʼAtua ʼi te hili ʼo te mamahi lahi. Ko te ʼu kaugana ʼaia ʼe ko te hahaʼi neʼe mole nātou kamata pe he maʼuli faka Kilisitiano kae ʼe nātou haga nofo agatonu aipe ʼi te maʼuli ʼaia.—Efesi 4:24.
“Te ʼu Pālema ʼi Tonatou ʼu Nima”
10. Koteā ʼaē ʼe faka ʼuhiga kiai te ʼu pālema ʼaē neʼe sio kiai ia Soane ʼi te ʼu nima ʼo te toe hahaʼi tokolahi?
10 ʼI te ʼu meʼa fakaofoofo ʼo ʼuhiga mo te toe hahaʼi tokolahi, ohage ko te meʼa neʼe sio kiai te ʼapositolo ko Soane, “ ʼe ʼi ai te ʼu pālema ʼi tonatou ʼu nima.” Koteā te faka ʼuhiga ʼo te meʼa ʼaia? ʼE mahino ia ko te ʼu pālema ʼaia neʼe fakamanatuʼi kia Soane te lafeti faka Sutea ʼo te ʼu tapenakulo, te toe ʼaho lahi fakafiafia ʼi te kaletalio faka Hepeleo, neʼe fai ʼo mulimuli pe ki te taʼukai ʼo te temi māfana. ʼO mulimuli ki te Lao, ko te ʼu lau ʼo te pālema, pea mo ʼihi ʼu vaʼa ʼakau, neʼe fakaʼaogaʼi moʼo laga te ʼu fale lau ke nātou nonofo ʼi ai ʼi te lolotoga ʼo te lafeti. (Levitike 23:39-40; Nehemia 8:14-18) Neʼe toʼo foki te ʼu lau ʼaia e te kau atolasio ʼi te fale lotu lolotoga te hiva ʼo te Hallel (Pesalemo 113-118). Ko te toʼo ʼo te ʼu pālema e te toe hahaʼi tokolahi ʼe mahino ia ʼe toe fakamanatuʼi foki kia Soane te temi ʼaē neʼe hū ai Sesu ki Selusalemi pea ko te kau atolasio neʼe nātou toʼo fakafiafia ʼi ʼonatou nima te ʼu pālema pea mo kalaga fēnei: “Tapuakiʼi ia ia ʼaē ʼe haʼu ʼi te huafa ʼo Sehova, ʼio te hau ʼo Iselaele!” (Soane 12:12, 13) Koia ko te toʼo ʼo te ʼu pālema ʼe fakahā ʼaki ko te toe hahaʼi tokolahi ʼe nātou kalagaʼi fakafiafia te Puleʼaga ʼo Sehova pea mo tona Hau ʼaē neʼe ina fakanofo.
11. He koʼe koa ko te ʼu kaugana ʼa te ʼAtua ʼe nātou maʼu te fiafia moʼoni ʼi tanatou kaugana kia Sehova?
11 ʼE ko te taʼi fakafiafia ʼaia ʼe fakahā nei e te toe hahaʼi tokolahi ʼi tanatou kaugana kia Sehova. ʼE mole faka ʼuhiga leva ko nātou ʼaia ʼe mole kei nātou felāveʼi mo ni ʼu faigataʼaʼia peʼe ko ni ʼu lotomamahi. Kae ko te fiafia ʼaē ʼe haʼu mai te kaugana pea mo te fia lelei ʼaē kia Sehova ʼe tokoni moʼo tekeʼi te ʼu meʼa ʼaia. Koia, ko te misionea neʼe kaugā gāue mo tona ʼohoana ʼi Kuatemala lolotoga ia taʼu e 45, neʼe ina ʼui ʼo ʼuhiga mo te ʼu ʼuluaki meʼa ʼaē neʼe felāveʼi mo nāua, ko te gāue kinakina pea mo te fagona fakamataku neʼe ko he koga ʼo tonā maʼuli ʼi tanā faiga ʼaē ke nā fakaʼau te logo ʼo te Puleʼaga ki te ʼu kolo ʼo te kau Initia. Neʼe ina fakaʼosi fēnei: “Neʼe ko te temi ʼaia ʼo tomā maʼuli ʼaē neʼe lahi ai tomā fiafia.” Logope la tana logoʼi ʼaē kua finematuʼa pea mo mahaki, ʼi te ʼu palalau fakaʼosi ʼaē ʼi tana kaupepa faitohi neʼe ʼi ai te ʼu kupu ʼaenī: “Neʼe ko he maʼuli lelei, ʼe mahu ʼi te fakapale.” ʼI te kele katoa, ʼe logoʼi e te kau Fakamoʼoni ʼa Sehova te manatu pe ʼaia ʼi tonatou minisitelio.
“Te Tauhi Fakataputapu ʼi Te ʼAho Mo Te Po”
12. Pe ko te ʼaho pe ko te pōʼuli, koteā ʼe sio kiai ia Sehova ʼi te kele?
12 Ko te kau atolasio fiafia ʼaia ʼe nātou foaki kia Sehova “te tauhi fakataputapu ʼi te ʼaho mo te po ʼi tona fale lotu.” (Fakahā 7:15) ʼI te kele katoa, ko te toko miliona ʼe nātou kau ki te tauhi fakataputapu ʼaia. Ka pōʼuli ʼi ʼihi ʼu fenua pea ko te hahaʼi ʼe nātou momoe ʼi te ʼu koga meʼa ʼaia, kae ʼi te tahi ʼu fenua ʼe tuʼu te laʼā pea ʼe fagonogono mālohi ai te kau Fakamoʼoni ʼa Sehova. ʼI te takafoli ʼo te kele, tuʼumaʼu aipe ʼi te ʼaho mo te po, ʼe nātou hiva te ʼu fakavikiviki kia Sehova. (Pesalemo 86:9) Kae ko te tauhi ʼaē ʼe fai ʼi te ʼaho mo te po ʼaē ʼe talanoa kiai ia Fakahā 7:15 ʼe mole gata ʼaki pe ʼi he tagata e tahi.
13. ʼE fakamahino feafeaʼi e te Tohi-Tapu te ʼui ʼaē ʼe nātou tauhi “ ʼi te ʼaho mo te po”?
13 Ko te hahaʼi ʼaē ʼe nātou faʼufaʼu te toe hahaʼi tokolahi ʼe nātou foaki te tauhi fakataputapu ʼi te ʼaho mo te po. ʼE faka ʼuhiga koa ko te ʼu meʼa fuli ʼaē ʼe nātou fai ʼe tonu ke ʼui ʼe ko he tauhi fakataputapu? ʼE moʼoni te ʼui ʼaē tatau aipe pe koteā ʼaē ʼe nātou fai, ʼe nātou ako ke nātou fai ʼi hona ʼaluʼaga ʼaē ʼe fakavikiviki kia Sehova. (1 Kolonito 10:31; Kolose 3:23) Kae, ko te “tauhi fakataputapu” ʼe fakaʼaogaʼi pe ʼo ʼuhiga mo te atolasio ʼo te ʼAtua. Ko te kau ki he gāue ʼi te “ ʼaho mo te po” ʼe faka ʼuhiga ʼe fai hoholo ʼo toe feiā aipe mo ni ʼu faiga fakamalotoloto.—Vakaʼi ia Sosue 1:8; Luka 2:37; Gāue 20:31; 2 Tesalonika 3:8.
14. Koteā te meʼa ʼaē ʼe tou fai anai takitokotahi ʼi tatatou fagonogono moʼo mulimuli ki te fakamatala ʼaē ʼo ʼuhiga mo te tauhi ʼi te “ ʼaho mo te po”?
14 ʼAki tanatou tauhi ʼi te malaʼe kelekele ʼo te fale lotu lahi fakalaumālie ʼa Sehova, ko nātou ʼaē ʼe nātou faʼufaʼu te toe hahaʼi tokolahi ʼe nātou faiga ke hoholo tuʼumaʼu pe tanatou kau ʼaē ki te minisitelio. Tokolahi neʼe nātou fakatuʼutuʼu ke nātou kau ki te fai faka mafola ʼi te vāhaʼa fuli. Ko ʼihi ʼe nātou gāue pionie katoa peʼe vaeluaʼi temi. ʼI te agamāhani ko te kau pionie ʼaia ʼe nātou fagonogono ʼi te ʼu ala pea mo te ʼu fale koloā ʼi te māfoatā. Moʼo mulimuli ki te fia logo ʼa te hahaʼi, ko ʼihi kau Fakamoʼoni ʼe nātou fai te ʼu ako faka Tohi-Tapu ʼi te pōʼuli. ʼE nātou fagonogono mokā nātou faifakatau, mokā nātou folau, lolotoga te ʼu temi kai, pea ʼe nātou fai ʼaki te telefoni.
15. ʼO mole gata ʼaki te minisitelio, koteā ʼaē ʼe pipiki ki tatatou tauhi taputapu?
15 Ko te kau ki te ʼu fono ʼo te kokelekasio ʼe ko he tahi ʼaenā faʼahi ʼo tatatou tauhi taputapu; ʼo toe feiā pe ki te laga fale pea mo te tokaga ki te ʼu koga meʼa ʼo te ʼu fakatahi faka Kilisitiano. Moʼo maʼuli ʼi te tauhi kia Sehova ʼe fakamaʼua te ʼu faiga ʼaē moʼo fakaloto mālohi pea mo tokoni ki te ʼu tēhina pea mo te ʼu tuagaʼane Kilisitiano, ʼi te faʼahi fakalaumālie pea mo te faʼahi fakasino. ʼE fakapipiki kiai te gāue ʼo totatou Comités de liaison hospitaliers. Ko te kaugana ʼi te Petele ʼi te ʼu faʼahiga ʼaluʼaga kehekehe, ʼo toe feiā pe ki te gāue ʼaki he lotolelei ʼi tatatou ʼu fakatahi, ko te ʼu meʼa fuli ʼaia ko te tauhi fakataputapu. ʼIo, ʼi te temi ʼaē ʼe pipiki totatou maʼuli ki tatatou felogoi lelei mo Sehova, ko totatou maʼuli ʼe ina fakahoko te tauhi taputapu. Ohage ko te ʼui ʼa te Tohi-Tapu, ʼe foaki e te hahaʼi ʼa Sehova “te tauhi fakataputapu ʼi te ʼaho mo te po,” pea ʼe nātou maʼu te fiafia lahi ʼi tanatou fai ʼo te meʼa ʼaia.—Gāue 20:35; 1 Timoteo 1:11.
‘Mai Te ʼu Fenua Fuli, Pea Mo Te ʼu Telepi Pea Mo Te ʼu Hahaʼi Pea Mo Te ʼu Lea Fuli’
16. Koteā ʼaē ʼe fakamoʼoni ki te ʼui ʼaē ko te toe hahaʼi tokolahi ʼe ʼōmai “mai te ʼu puleʼaga fuli”?
16 Ko te toe hahaʼi tokolahi, ʼe nātou ʼōmai mai te ʼu fenua fuli. Ko te ʼAtua ʼe mole fakapalatahi, pea ko te totogi ʼaē neʼe fai ʼaki ia Sesu Kilisito ʼe fua manuʼia kia nātou fuli. ʼI te temi ʼaē neʼe ʼuluaki hinoʼi e te Tohi-Tapu te toe hahaʼi tokolahi ʼi te taʼu 1935, neʼe faka mafola fakamalotoloto te kau Fakamoʼoni ʼa Sehova ʼi te ʼu fenua e 115. ʼI te ʼu taʼu 1990, ko te kumi ʼo te hahaʼi ʼaē ʼe hage ko ni ʼu ōvi neʼe kua lahi ʼaupito tana tuputupu ʼi te ʼu fenua kehekehe.—Maleko 13:10.
17. Koteā te meʼa ʼaē neʼe fai moʼo tokoni ki te hahaʼi ʼo te ʼu ‘telepi fuli, te hahaʼi fuli, pea mo te ʼu lea fuli,’ ke kau mo nātou ki te toe hahaʼi tokolahi?
17 ʼAki te hinoʼi ʼo nātou ʼaē ʼo te toe hahaʼi tokolahi, ko te kau Fakamoʼoni ʼa Sehova neʼe mole nātou tokagaʼi pe te ʼu puleʼaga kehekehe kae neʼe nātou toe tokaga foki ki te ʼu telepi pea mo te ʼu hahaʼi pea mo te ʼu kūtuga ʼaē ʼe lea kehekehe. Moʼo aʼu ki te ʼu hahaʼi ʼaia, ko te kau Fakamoʼoni neʼe nātou tā te ʼu tohi faka Tohi-Tapu ia lea e 300 tupu. ʼE fakamaʼua te faʼahi ʼaia ki he ako pea mo he fakatuʼutuʼu ʼo ni ʼu kūtuga fai fakaliliu kua nātou māhani ʼi te faʼahi ʼaia, ʼo foaki ni ʼu olotinatea ke feala ai te fai ʼo te ʼu lea fuli ʼaia, ʼo toe feiā aipe ki tona tā. ʼI te lolotoga ʼo te ʼu taʼu e nima kua hili, ko te ʼu lea e 36, ʼe palalau kiai te toko 98 000 000 hahaʼi, neʼe hilifaki ki te lisi ʼo te ʼu lea ʼaē neʼe fakaliliu. ʼO toe hilifaki atu pe kiai, neʼe faiga te kau Fakamoʼoni ke nātou ʼaʼahi te hahaʼi ʼaia moʼo tokoni kia nātou ke nātou mālama ki te Folafola ʼa te ʼAtua.—Mateo 28:19, 20.
“Mai Te Mamahi Lahi”
18. (a) Ka hoko anai te mamahi lahi, ko ai anai ʼaē ka tonu ke hāofaki? (b) Koteā anai te ʼu kalaga fakafiafia ʼaē ka fai anai?
18 ʼI te temi ʼaē ʼe tuku ifo e te kau ʼaselo te ʼu matagi fakaʼauha e fā ʼaē neʼe talanoa kiai ia Fakahā 7:1, ʼe mole faka tuʼakoi pe anai ki “te ʼu kaugana [fakanofo] ʼa totatou ʼAtua” te hāofaki fakaʼofa ʼa Sehova kae ʼe toe kau aipe foki mo te toe hahaʼi tokolahi ʼaē ʼe fakatahi mo nātou ki te tauhi moʼoni. Ohage ko te ʼui ʼa te ʼapositolo ko Soane, ko nātou ʼaē ʼo te toe hahaʼi tokolahi ʼe nātou “ ʼōmai [anai] mai te mamahi lahi” ko te kau maʼuʼuli. ʼE ko he kalaga fakafetaʼi pea mo fakavikiviki ʼe nātou foaki anai ʼo ʼui maʼa nātou: “Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga faka hau, pea mo te Akeno.” Pea ko te ʼu kaugana agatonu fuli ʼa te ʼAtua ʼaē ʼi selo ʼe nātou kau fakatahi anai mo te toe hahaʼi tokolahi, ʼo ʼui maʼa mātou: “Ameni! Ke foaki ki totatou ʼAtua te tapuakina mo te kolōlia mo te poto mo te fakafetaʼi mo te fakaʼapaʼapa mo te mālohi mo te māʼoluga ʼo talu ai. Ameni.”—Fakahā 7:10-14.
19. Koteā te gāue fakafiafia ʼaē ʼe faiga fakamalotoloto anai ke kau kiai te kau maʼuʼuli?
19 ʼE ko he temi fakafiafia anai! Ko nātou fuli ʼaē ka maʼuʼuli anai ʼe nātou tauhi ʼāteaina pe anai ki te ʼAtua moʼoni! Ko tonatou fiafia lahi ʼe nātou maʼu anai ʼi tanatou tauhi ʼaē kia Sehova. ʼE lahi anai te gāue ʼaē ʼe tonu ke fai—ko te gāue fakafiafia! Ko te kele ʼe tonu ke fakaliliu ko he Palatiso. Ko te kau mate e toko lauʼi miliale ʼe tonu ke toe fakatuʼuake pea mo akoʼi kia nātou te ʼu ala ʼo Sehova. ʼE ko he pilivilesio fakafiafia te kau anai kiai!
Koteā Takotou Tali?
◻ Koteā te ʼu meʼa ʼaē neʼe hoko ʼi te 1935 neʼe malave ki te minisitelio ʼa te kau Fakamoʼoni ʼa Sehova?
◻ Koteā ʼaē ʼe hā ʼaki mai ai ʼi te ʼui ʼaē ko te toe hahaʼi tokolahi “ ʼe nātou tutuʼu ʼi muʼa ʼo te hekaʼaga faka hau”?
◻ ʼE tonu ke malave feafeaʼi te loto fakafetaʼi ʼaē ki te taʼataʼa ʼo te Akeno ki totatou faʼahiga maʼuli?
◻ Koteā te faka ʼuhiga ʼo te ʼui ʼaē ʼe nātou toʼo te ʼu pālema?
◻ E feafeaʼi te foaki e te toe hahaʼi tokolahi te tauhi taputapu ʼi te ʼaho mo te po?
[Paki ʼo te pasina 16, 17]
ʼE fakahā ʼe tanatou tauhi taputapu te faiga hoholo, te faiga mālohi, pea mo te faiga fakamalotoloto