ʼA Ai Te Hala?
KO TE ʼuluaki tagata, ia Atama, ʼaē neʼe ina kamata fai te taʼi aga ʼaia. Hili ʼo tana agahala, neʼe ina ʼui fēnei ki te ʼAtua: “Ko te fafine ʼaē neʼe ke foaki mai ke maʼuli mo ʼau, neʼe ina foaki mai te fua ʼo te fuʼu ʼakau pea neʼe ʼau kai leva foki ʼau.” ʼI tona fakahagatonu, neʼe ina ʼui fēnei: “ ʼE mole ko haku hala!” Neʼe toe fai feiā pe e te ʼuluaki fafine, ia Eva, ʼi tana ʼui fēnei: “Ko te gata—neʼe ina kākāʼi ʼau pea neʼe ʼau kai ai leva.”—Senesi 3:12, 13.
Koia, ko te faʼifaʼitaki neʼe hoko tonu ʼi te ʼōloto ʼo Eteni, pea ko te faʼifaʼitaki ʼaia ko te fakafisi ʼa te ʼu tagata te fua ʼo tanatou ʼu maʼua ʼo ʼuhiga mo te aga ʼaē neʼe nātou fai. Kua koutou lākahala koa ʼi he meʼa feiā? Ka malaga he ʼu fihifihia, ʼe koutou tuku koa te hala ki niʼihi? Peʼe koutou sivisivi muʼa te ʼaluʼaga moʼo vakaʼi peʼe ʼa ai moʼoni koa te hala? ʼI te maʼuli ʼo te ʼaho fuli, ʼe faigafua te tō ki te hele ʼaē ko te tukugakoviʼi ʼo niʼihi ʼo ʼuhiga mo ʼatatou ʼu hala pea mo ʼui, “ ʼe mole ko haku hala!” Tou tuʼu muʼa ʼi he ʼu ʼaluʼaga ʼe tau hoko pea mo vakaʼi te aga ʼe fai māhani e te hahaʼi. Ko te meʼa ʼe maʼuhiga age, ke koutou fakakaukauʼi age te aga neʼe koutou fai anai ʼi he ʼu ʼaluʼaga feiā.
Te Faigataʼaʼia Faka Paʼaga
“ ʼE mole ko haku hala—ko te ekonomi, ko te hahaʼi gaohi koloā ʼe heʼe faitotonu, te totogi kovi ʼo te ʼu meʼa maʼuhiga ki te maʼuli,” ko te meʼa ʼaia ʼe feala ke ʼui e ʼihi mokā nātou tau mo he faigataʼaʼia kovi ʼi te faʼahi faka paʼaga. Kae ʼe tonu koa ke tukugakoviʼi te ʼu meʼa ʼaia? E lagi ko he ʼu faʼahiga ʼaluʼaga ʼaē neʼe nātou taki ia nātou ki he ʼu faʼahiga gāue faka lotolotolua. Ko te meʼa ʼe tau hoko, ʼe ʼuʼufi e te mānumānu te meʼa moʼoni ʼaē ʼe tonu ke hā ki tuʼa, pea ko te hahaʼi ʼe nātou faiga ʼi te ʼu faʼahiga gāue heʼe faitotonu ʼe mole nātou ʼiloʼi, ʼo nātou higa gafua ai ki te hele. ʼE galo ia nātou te taʼaga lea ʼaenī, “Kapau ʼe hage he meʼa ʼe matalelei fau ke feala ai he ʼui ʼe moʼoni, ʼi te agamāhani ʼe mole faʼa lelei ia.” ʼE nātou kumi te tokoni ʼe nātou fia logo kiai, kae ka liliu te ʼu faigataʼaʼia ʼo fakamataku, ʼe nātou kumi he tahi kehe moʼona tukugakoviʼi. Ko he meʼa fakaʼofaʼofa foki, māʼiape la mo te faʼahi ʼaia ʼe hoko ʼi ʼihi temi ʼi te kokelekasio faka Kilisitiano.
Ko ʼihi neʼe nātou tō ki te hele ʼo he ʼu fakatuʼutuʼu faka paʼaga fakavale peʼe mole moʼoni, ohage ko te totogi ʼo he taimani ʼe mole pe la moʼoni, peʼe ko he kau ki te totogi ʼo he polokalama televisio ʼe leleiʼia kae neʼe vave tona puli, peʼe lagolago ki he ʼu tuputupu moʼoni kae kua faillite. Ko he holi ʼe mole fakaʼaluʼalu lelei ʼo ʼuhiga mo te koloā e lagi ina faka hioa tanatou fakakaukau ʼo ʼuhiga mo te manatu faka Tohi-Tapu ʼaenī: “Ko nātou ʼaē ʼe faiga fakamalotoloto ke nātou maʼu koloā ʼe nātou tō ki te fakahala pea mo te hele . . . pea neʼe nātou fehukiʼaki ia nātou totonu ʼaki te ʼu mamahi lahi.”—1 Timoteo 6:9, 10.
Ko te mole kei tatāʼofi te totogi ʼo he ʼu meʼa ʼe feala ai foki ke iku ki te pulinoa ʼi te faʼahi faka paʼaga. Ki ʼihi, ʼe loto e nātou ke nātou hage ko te ʼu hahaʼi ʼe tuʼu ʼi te ʼu nusipepa, ʼe nātou toʼo he ʼu temi mālōlō ʼe totogi kovi, ke nātou kakai ʼi te ʼu fale kai totogi kovi, pea ke nātou toʼo te “kiʼi meʼa gaoʼi” fakamuli maʼa te hahaʼi lalahi—he ʼu motokā gaoʼi, he ʼu vaka, mo he ʼu kamela, mo he ʼu faʼahiga fakatagi musika. ʼIo, ʼaki te temi ʼe feala ki niʼihi ke nātou maʼu fuli te ʼu meʼa ʼaia ʼaki tanatou fai he fakatuʼutuʼu fakapotopoto pea mo nātou hāofaki. Kae ko nātou ʼaē ʼe faiga ki te ʼu meʼa ʼaia ʼaki te fai fakavilivili ʼe nātou huʼi te ʼu maʼua lalahi. Kapau ʼe nātou fai feiā, ʼa ai te hala? ʼE mahino ia ʼe mole nātou ʼiloʼi te tokoni fakapotopoto ʼo te Tāʼaga Lea 13:18: “Ko ʼaē ʼe ina meʼa noaʼi te akonaki ʼe tō ia ki te masiva pea mo te fakalainoa.”
Ko Te Lotomamahi ʼUhi Ko Te Fānau
ʼE feala ke ʼui e ʼihi mātuʼa, “Ko te hala ʼa te kau tagata ʼāfea ʼaē tupu ai te mavae ʼo taku fānau ʼi te moʼoni. Neʼe mole feʼauga tanatou tokakaga ki taku fānau.”
ʼE maʼu e te kau tagata ʼāfea te maʼua ʼaē ko te tauhi pea mo te tokaga ki te faga ōvi, kae e feafeaʼi ki te ʼu mātuʼa? ʼE nātou tuku koa he faʼifaʼitaki ʼo nātou fakahā te ʼu fua ʼo te laumālie ʼi tanatou ʼu felogoi? Neʼe fai tuʼumaʼu koa te ako faka Tohi-Tapu ʼo te famili? ʼE fakahā koa e te ʼu mātuʼa he faiga mālohi ʼi te gāue ʼa Sehova pea mo nātou tokoni ki te fānau ke nātou teuteu kiai? Neʼe nātou tokakaga koa ki te ʼu fakakaugā ʼa tanatou fānau?
ʼO toe feiā aipe, ʼe faigafua ki he tahi ʼi te ʼu mātuʼa hana ʼui ʼo ʼuhiga mo te ʼu meʼa ʼaē ʼe ako ʼi fale: “ ʼE ko te hala ia ʼo te kau fai ako ʼaē ʼe mole lelei ai te ako ʼo taku tamasiʼi tagata. ʼE mole nātou ʼoʼofa ʼi taku tamasiʼi tagata. Pea ʼe mālalo te ako ʼaē ʼe fai ʼi te faleako ʼaia.” Kae neʼe kua felogoi lelei koa te tāmai peʼe ko te faʼe ʼaia mo te faleako? Neʼe kua tokaga koa te tāmai peʼe ko te faʼe ʼaia ki te ʼu meʼa ʼaē ʼe ako pea mo te faʼahiga ako ʼaē ʼe faiga kiai te tamasiʼi? Neʼe ʼi ai koa he polokalama ʼo tana ʼu meʼa ʼaē ʼe ako, pea neʼe ʼavage koa he faʼahiga tokoni ʼi te temi ʼaē neʼe ʼaoga ki ai? Neʼe feala koa ke tupu te fihifihia tāfito mai he faʼahiga aga peʼe ko he fakapikopiko ʼa te tamasiʼi peʼe ko te tāmai peʼe ko te faʼe?
Mole ʼui ke tukugakoviʼi e te ʼu mātuʼa te fakatuʼutuʼu ʼo te ako, ʼe lelei age ia mo kapau ʼe nātou fai he fakatuʼutuʼu lelei ʼo tokakaga peʼe maʼu koa e tanatou ʼu tamaliki te aga ʼaē ʼe tonu ke fai pea mo nātou fakaʼaogaʼi te ʼu fealagia ʼaē ke nātou ako ʼaē ʼe tuku age kia nātou ʼi te faleako.
Ko Te Hala ʼi Te Tuputupu ʼi Te Faʼahi Fakalaumālie
ʼE tou tau logo ki he tahi ʼe ina ʼui fēnei: “Neʼe feala pe ke ʼau mālohi age ʼi te faʼahi fakalaumālie, kae ʼe mole ko haku hala. ʼE mole feʼauga te tokakaga ʼa te kau tagata ʼāfea kia ʼau. ʼE mole ʼi ai hoku ʼu kaumeʼa. Ko te laumālie ʼa Sehova ʼe mole ʼi te kokelekasio ʼaenī.” Kae, ko ʼihi ʼi te kokelekasio ʼe ʼi ai tonatou ʼu kaumeʼa, mo fiafia, pea mo nātou tuputupu ʼi te faʼahi fakalaumālie; pea ko te kokelekasio ʼe tapuakina ʼaki te tuputupu pea mo te koloaʼia ʼi te faʼahi fakalaumālie. Kae he koʼe koa ʼe ʼi ai te ʼu faigataʼaʼia ʼa ʼihi?
Tokosiʼi ia nātou ʼaē ʼe nātou fia fakakaugā mo nātou ʼaē ʼe nātou maʼu te ʼu manatu kovi pea mo aga meomeo. Ko he ʼalelo māsila pea mo he ʼu meo tuʼumaʼu ʼe feala ke fakatupu vaivai ʼaupito. ʼI tanatou mole fia liliu ʼo vaivai ʼi te faʼahi fakalaumālie, ko ʼihi ʼe nātou faka tuʼakoi ʼonatou ʼu fakakaugā mo te ʼu faʼahiga hahaʼi ʼaia. ʼI tana faka ʼuhiga te potu ʼaia ohage ko he fakaʼiloga ʼo te vaivai ʼo te kokelekasio, ʼe feala ki he tahi ke mavae, ʼo ʼalu ʼuluaki ki he kokelekasio, pea hiki ki te tahi, pea hiki age ki te tahi. Ohage ko te ʼu faga manu feʼaluʼaki ʼo te ʼu koga meʼa halafalafa ʼo Afelika ʼe nātou kumi tuʼumaʼu te ʼu koga meʼa ʼe luna, ʼo toe feiā aipe mo te kau Kilisitiano “feʼaluʼaki” ʼaia ʼe nātou kumi tuʼumaʼu te kokelekasio ʼaē ʼe tau tonu mo nātou. Neʼe feala pe ki te ʼu hahaʼi ʼaia ke lahi age tanatou fiafia mo kapau la neʼe nātou kumi te ʼu kalitate ʼi niʼihi pea mo faiga ke lahi age tanatou maʼuliʼi te ʼu fua ʼo te laumālie ʼa te ʼAtua ʼi tonatou maʼuli!—Kalate 5:22, 23.
Ko ʼihi ʼe nātou fai te faʼahi ʼaia ʼaki tanatou fai he faiga makehe ke nātou palalau ki he tahi kehe ʼi te fono fuli ʼi te Fale ʼo te Puleʼaga pea mo viki fakamalotoloto ʼo ʼuhiga mo he puani lelei. ʼE feala pe ko he viki ʼo te fakapotopoto ʼo tana fānau, ko tana kau tuʼumaʼu ʼi te ʼu fono faka Kilisitiano, ko te ʼu tali neʼe lelei tona teuteuʼi ʼi te Ako ʼo Te Tule Leʼo, ko tana agaʼofa ʼo faka fealagia ke fai te Ako Tohi ʼo te Kokelekasio pea mo te ʼu fono gāue ʼi tona ʼapi, ʼo feiā mo ʼihi ʼatu ʼu meʼa. ʼAki takotou faiga ʼaē ke koutou fakatokagaʼi he ʼu kalitate matalelei ʼe ū ʼuhi ko tanatou ʼuhiga heʼe haohaoa, ʼe mahino ia ʼe koutou maʼu anai he ʼu kalitate matalelei ʼi ʼokoutou ʼu tēhina pea mo tuagaʼane fakalaumālie. ʼAki tona fai ʼaia, ʼe ʼofainaʼi anai koutou e nātou, pea ʼe koutou fakatokagaʼi anai ʼe hahaʼi te ʼu kaumeʼa agatonu.
Ko Te Takuʼaki Fakaʼosi
“ ʼE ko te finegalo ia ʼa te ʼAtua.” “Tukugakoviʼi te Tevolo.” ʼE mahino ia ko te tukuʼaki fakamuli ʼaia ʼaē ko te tukugakoviʼi te ʼAtua peʼe ko te Tevolo ki ʼatatou ʼu hala totonu. ʼE moʼoni ko te ʼAtua peʼe ko Satana ʼe ʼi ai tonā pikipikiga ki totatou maʼuli. Kae, ʼe manatu ʼihi ʼo ʼuhiga mo te meʼa fuli, peʼe lelei peʼe kovi, ʼaē ʼe hoko ʼi tonatou maʼuli, ʼe ko te fua ia ʼo te gāue ʼa te ʼAtua peʼe ʼa Satana. Ko tona faka ʼuhiga ka mole hoko he meʼa kia nātou, ko te fua ia ʼa tanatou gāue totonu. “Ka loto e te ʼAtua ke ʼau maʼu te motokā foʼou ʼaia, ʼe ina fai anai he puleʼaki ʼo ʼuhiga mo te faʼahi ʼaia pea ʼe ʼau maʼu anai.”
Ko te maʼuli ʼo te faʼahiga hahaʼi ʼaia ʼe tautau fakaʼaoʼaoganoa, ʼo nātou fai he ʼu puleʼaki faka paʼaga peʼe ko ʼihi ʼatu ʼu faʼahiga puleʼaki ʼaki te manatu ʼaē ʼe hāofaki anai nātou e te ʼAtua. Kapau ko tana aga ʼaē neʼe mole fakakaukauʼi ʼe iku ki he malaʼia, faka ekonomike peʼe ko he tahi ʼatu faʼahiga meʼa, pea ʼe nātou tukugakoviʼi te Tevolo. Ko te hoko fai ʼo he meʼa ʼo mole ʼuluaki ‘lau tona totogi’ pea ki muli age leva ʼo tukugakoviʼi ia Satana, peʼe kovi age ia, ko te fakatalitali ke hoko he gāue ʼa Sehova, ʼe mole gata ʼaki pe anai tona ʼuhiga pauʼu kae ʼe toe fakafeagai foki ia ki te Tohi-Tapu.—Luka 14:28, 29.
Neʼe fakahalaʼi e Satana ia Sesu ke ina maʼu te faʼahiga manatu ʼaia pea ke ʼaua naʼa ina fua te kavega ʼo Tana ʼu gāue. ʼO ʼuhiga mo te lua fakahala, ʼe fakamatala fēnei mai e Mateo 4:5-7: “Pea neʼe ʼave ia e te Tevolo ki te kolo tapu, pea ina tuku ia ki te fuga fale lotu pea ina ʼui age kia te ia: ‘Kapau ko te ʼalo koe ʼo te ʼAtua, fakatō ia koe ki lalo; heʼe tohi fēnei: “ ʼE ina fai anai ki tana kau ʼaselo he ʼu fakatotonu ʼo ʼuhiga mo koe, pea ʼe nātou apai anai koe ʼi ʼonatou nima, ke ʼaua naʼa tūkia tou vaʼe ki he maka.” ’ ” Neʼe mahino kia Sesu ʼe mole feala ia ke fakatalitali ke fai he meʼa e te ʼAtua mo kapau ʼe ina fai he meʼa fakatupu tuʼutāmaki, peʼe ko he fakamate. Koia, neʼe ina tali fēnei age ki ai: “ ʼE tohi fēnei foki: ‘ ʼAua naʼa ke ʼahiʼahiʼi ia Sehova tou ʼAtua.’ ”
Ko nātou ʼaē ʼe ko hanatou agamāhani te tukugakoviʼi ʼo te Tevolo peʼe ko te ʼAtua, ʼe lahi te ʼu potu ʼe nātou tatau mo nātou ʼaē ʼe nātou muliʼi te fakakikite ʼaki te ʼu fetuʼu, ʼaē ʼe nātou fetogi te ʼAtua peʼe ko te Tevolo ʼaki te ʼu fetuʼu. ʼAki tanatou manatu mālohi ʼaē ko te ʼu meʼa fuli ʼaē ʼe hoko ʼe mole feala hanatou puleʼi, ʼe nātou meʼa noaʼi ai te fakatuʼutuʼu ʼaē ʼe tuʼu ia Kalate 6:7: “Ko te meʼa ʼaē ʼe to e te tagata, ko te meʼa pe ʼaia ʼaē ka ina utu.”
Ko Te Tauʼi ʼo Te ʼAluʼaga Moʼoni
ʼE mole anai fakafihiʼi e he tahi ʼe tou maʼuʼuli ʼi te mālama heʼe haohaoa. Ko te ʼu faigataʼaʼia ʼaē ʼe fakamatalatala ʼi henī ʼe ko he ʼu meʼa ʼe hoko moʼoni ʼi te maʼuli. Ko te hahaʼi ʼe nātou maʼu anai he ʼu lelei faka paʼaga ia tatou. Ko ʼihi patolo ʼe nātou heʼe faitotonu anai. Ko te ʼu fakakaugā ʼe feala ke ʼi ai hanatou mafuliʼaga hala ʼi ʼatatou ʼu tamaliki. Ko ʼihi hahaʼi fai ako pea mo te ʼu faleako ʼe ʼaoga ke hikihiki tonatou ʼaluʼaga. ʼI ʼihi temi, ʼe feala ki te kau tagata ʼāfea ke lahi age tonatou agaʼofa pea mo tonatou tokakaga. Kae ʼe tonu ke tou mahino ki te ʼaluʼaga ʼo te heʼe haohaoa pea mo te potu ʼaenī, ohage ko tona fakahā e te Tohi-Tapu, “ko te malamanei katoa ʼe takoto ia ʼi te mālohi ʼo te agakovi.” Koia ʼe mole aga fakapotopoto te manatu ʼaē ko te ʼalu ʼo totatou maʼuli ʼe tokalelei tuʼumaʼu anai.—1 Soane 5:19.
Pea tahi ʼaē meʼa, ʼe tonu ke tou mahino ki ʼotatou ʼu faʼahi ʼe tou tōtō ai pea mo ʼatatou tuʼakoi pea mo mahino ʼe lahi te ʼu fihifihia ʼa tatou ʼe ko te ikuʼaga ʼo tatatou ʼu fakavalevale. Neʼe tokoni fēnei e Paulo ki te kau Kilisitiano ʼo Loma: “ ʼE ʼau ʼui atu kia koutou takitokotahi ke ʼaua naʼa lahi fau te fakafuafua ʼo koutou ʼo fakalaka ʼi te fua māhani.” (Loma 12:3) Ko te tokoni ʼaia ʼe faka ʼuhiga tatau kia tatou ʼi te temi nei. Ka hoko he meʼa ʼe kovi, ʼe mole tou mulimuli anai ki ʼatatou ʼu kui ko Atama mo Eva ʼo ʼui fēnei: “ ʼE mole ko haku hala!” Kae, ʼe tou fai anai te fehuʼi ʼaenī kia tatou totonu, ‘Koteā la he meʼa neʼe feala ke kehe age taku fai ke ʼaua naʼa hoko ai te ikuʼaga fakatupu mamahi ʼaia? Neʼe ʼau maʼu koa he fakafuafua fakalelei ʼi te meʼa ʼaia pea mo ʼau kumi tokoni ʼi he matapuna fakapotopoto? Neʼe ʼau tuku koa kia ia peʼe ko nātou ʼaē neʼe pipiki mai ki te fihi ke nātou lākatonu, ʼo tuku kia nātou te faka maʼuhiga?’
Kapau ʼe tou mulimuli ki te ʼu fakatuʼutuʼu faka Kilisitiano pea mo tou maʼuliʼi te fakafuafua fakalelei, ʼe hahaʼi age anai ʼotatou ʼu kaumeʼa kae siʼisiʼi age ʼatatou ʼu fihifihia. ʼE lahi anai tatatou ʼu fihifihia ʼe mole hona ʼuhiga, ʼe maʼu anai he puleʼaki kiai. ʼE tou fiafia anai ʼi ʼatatou ʼu felogoi mo ʼihi pea, ʼe mole tou hoha anai ki te fehuʼi ʼaenī: “ ʼA ai te hala?”
[Paki ʼo te pasina 28]
ʼE lahi te ʼu meʼa ʼe feala ke fai e te ʼu mātuʼa moʼo tokoni ki tanatou fānau ke nātou tuputupu ʼi te faʼahi fakalaumālie