Tou Fakahoko Lelei Tatatou Foaki Ia Tatou “ ʼi Te ʼAho Fuli Pe”
“Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi ʼi te ʼaho fuli pe pea ke mulimuli tuʼumaʼu ia te ʼau.”—Luka 9:23.
1. Koteā te faʼahiga meʼa ʼe feala ai ke tou fakafuafua tatatou lava lelei ʼi totatou ʼuhiga Kilisitiano?
“ ʼE KO tatou koa ko ni ʼu tagata neʼe foaki moʼoni totatou maʼuli?” ʼI te manatu ʼa te 35 Pelesita ʼo te ʼAtu Fenua ʼo Amelika ko John F. Kennedy, ko te tali ki te fehuʼi ʼaia, ʼe ko he meʼa ia moʼo fakafuafua te lava lelei ʼo nātou ʼaē ʼe maʼu tuʼulaga ʼi te puleʼaga. Ko te fehuʼi ʼaia ʼe ʼi ai tona ʼuhiga loloto kia tatou ki tatatou lava lelei ʼi totatou ʼuhiga kau minisi Kilisitiano.
2. E feafeaʼi te fakaliliu e te tikisionalio te kupu ʼaē ko te “foaki ʼo kita”?
2 Kae koteā koa te foaki ʼo kita? ʼE fakaliliu e te Webster’s Ninth New Collegiate Dictionary te kupu ʼaia ohage “ko he gāue peʼe ko he toʼotoʼoga ʼo he foaki ki he meʼa fakaʼatua peʼe ki he gāue taputapu,” “ko he meʼa ʼe foaki peʼe ko he meʼa ʼe tuku keheʼi ki he fakatuʼutuʼu makehe,” “ko he foaki ʼo kita ʼe fai ʼaki he loto faka sakilifisio.” ʼE hā ia neʼe fakaʼaogaʼi e John F. Kennedy te kupu ʼaia moʼo faka ʼuhigaʼi te “foaki ʼo kita ʼaē ʼe fai ʼaki he loto faka sakilifisio.” ʼO ʼuhiga mo he Kilisitiano, ʼe maʼuhiga ʼosi age ki ai te foaki ʼo ia.
3. Koteā te foaki ʼo kita faka Kilisitiano?
3 Neʼe ʼui fēnei e Sesu Kilisito ki tana kau tisipulo: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.” (Mateo 16:24) Ko hakita tuku kehe ʼo kita ki he gāue fakaʼatua ʼe mole faka ʼuhiga pe, ʼe ko he atolasio ʼi te ʼAhotapu peʼe ʼi te temi ʼaē ʼe fai ai he ʼu pelelinasi ki he ʼu koga meʼa tapu. ʼE faka ʼuhiga kiai he faʼahiga maʼuli katoa. Ko te liliu ʼaē ko he Kilisitiano, ʼe faka ʼuhiga ke kita fakafisi kia kita totonu ʼo kita kaugana ki te ʼAtua ʼaē neʼe kaugana ki ai ia Sesu Kilisito, ia Sehova. Pea tahi ʼaē, ko he Kilisitiano ʼe ina toʼo tona “pou fakamamahi” ʼaki tana ʼamo ni ʼu mamahi ʼe feala ke hoko kia te ia ʼuhi ko ia ko te tisipulo ʼa Kilisito.
Ko Te Faʼifaʼitaki Haohaoa
4. Neʼe koteā ʼaē ʼe fakatātā e te papitema ʼo Sesu?
4 ʼI tana kei ʼi te kele, neʼe fakahā e Sesu te ʼuhiga ʼo te foaki ʼo kita voto ʼaē kia Sehova. Neʼe fēnei tana ʼu manatu: “Ko te sakilifisio pea mo te mōlaga neʼe mole ke loto kiai, kaʼe neʼe ke haga ʼo teuteuʼi hoku sino.” Pea neʼe ina toe ʼui fēnei: “Koʼeni ʼe ʼau haʼu (ʼi te takaiga tohi ʼaē ʼe tohi ai ʼo ʼuhiga mo ʼau) moʼo fai tou finegalo, Ê ʼAtua.” (Hepeleo 10:5-7) ʼI tana kau ʼaē ʼi te puleʼaga kua foaki, neʼe kua ʼosi foaki tona maʼuli kia Sehova ʼi tana tupu ake. Koia, ʼi te kamataʼaga ʼo tona minisitelio ʼi te kele, neʼe ina momoli ia ia totonu ʼo papitema ko te fakatātā ʼaia ʼo tana foaki ʼo ia ke ina fai te finegalo ʼo Sehova, pea ʼe faka ʼuhiga anai kia te ia ko hana mōlaga tona maʼuli ohage ko he sakilifisio faitotogi. Koia neʼe ina tuku he faʼifaʼitaki ki te kau Kilisitiano ke nātou fai ia meʼa fuli ʼaē ʼe loto ki ai ia Sehova.
5. Neʼe koteā te faʼifaʼitaki ʼaē neʼe tuku e Sesu ʼo ʼuhiga mo te ʼu meʼa fakamālama?
5 ʼI te ʼosi ʼo tona papitema neʼe muliʼi e Sesu te maʼuli neʼe ina taki ia ia ki he mate faka sakilifisio. Neʼe mole faiga ia ke maʼu koloā peʼe ke maʼuli fīmālie. Kailoa ia, ko tona minisitelio neʼe ko te faʼahi maʼuhiga ʼaia e tahi ʼi tona maʼuli. Neʼe ina tokoniʼi tana kau tisipulo ke nātou “haga kumi muʼa te puleʼaga pea mo tona faitotonu,” pea neʼe ko ia totonu neʼe ina maʼuliʼi te ʼu palalau ʼaia. (Mateo 6:33) Koia, ʼi te tahi ʼaho neʼe ina ʼui fēnei ai: “ ʼE maʼu te ʼu tafu ʼo te ʼu lenato pea mo te ʼu fātaʼi ʼo te ʼu manulele ʼo te lagi, kae mole he potu ʼo te Foha ʼo te tagata ke ʼuluga ai tona ʼulu.” (Mateo 8:20) Neʼe faigafua pe kia ia hana fakaoloolo tana kau tisipulo ʼaki tana ʼu akonaki ke feala ai hana maʼu paʼaga. ʼI tona ʼuhiga tagata tufuga ʼakau neʼe feala ke ina toʼo he temi ʼi tona minisitelio ke ina faʼu he ʼakau matalelei moʼo fakatau ke ina maʼu ai he ʼu kiʼi foʼi piesi siliva. Kae neʼe mole ina fakaʼaogaʼi tona ʼu faiva ke maʼu koloā ai. ʼI totatou ʼuhiga kaugana ʼa te ʼAtua, ʼe tou faʼifaʼitakiʼi koa ia Sesu ʼo tou taupau he manatu fakapotopoto ʼo ʼuhiga mo te ʼu meʼa fakamālama?—Mateo 6:24-34.
6. ʼE lava feafeaʼi ke tou faʼifaʼitakiʼi ia Sesu ʼi he sakilifisioʼi ʼo kita totonu, ʼaē ko te kau kaugana ʼa te ʼAtua?
6 ʼI tana fakamuʼamuʼa ʼo tana gāue ʼaē ki te ʼAtua, neʼe mole kumi e Sesu tana ʼu meʼa ʼaʼana. Ko tona maʼuli ʼi te ʼu taʼu e tolu vaelua ʼo tana minisitelio neʼe ko he maʼuli faka sakilifisio. ʼI te tahi lakaga ʼi te hili ʼo tana gāue ʼaho katoa, ʼo mole ina maʼu he temi ke kai ai, neʼe akoʼi e Sesu ʼaki te lotolelei te hahaʼi ʼaē neʼe hage ko “he faga ōvi ʼe mole honatou tagata tauhi.” (Mateo 9:36; Maleko 6:31-34) Logope la neʼe “gaʼegaʼe ʼi te fagona,” neʼe ina fakatotonu ke fai palalau mo te fafine Samalitana neʼe haʼu ki te vai keli ʼi Sisale ʼo Sakopo. (Soane 4:6, 7, 13-15) Neʼe ina fakamuʼamuʼa tuʼumaʼu pe te fīmālie ʼo te hahaʼi kehe ia te ia totonu. (Soane 11:5-15) ʼE feala ke tou faʼifaʼitakiʼi ia Sesu ʼaki hatatou sakilifisio fakaleleiʼi te ʼu meʼa ʼaē ʼe tou loto ki ai, ʼo tou kaugana ki te ʼAtua pea mo ʼihi. (Soane 6:38) Kapau ʼe tou fakakaukau ki te meʼa ʼaē ʼe feala ke tou fai ke leleiʼia moʼoni tatou e te ʼAtua ka mole tou fakafeauga pe ki te meʼa ʼaē kua tou fai, ʼe tou fakahoko lelei anai tatatou foaki ia tatou.
7. ʼE lava feafeaʼi ke tou faʼifaʼitakiʼi ia Sesu ʼi hatatou faka maʼuhigaʼi tuʼumaʼu ia Sehova?
7 ʼI tana tokoni ki te hahaʼi, neʼe mole faigaʼi e Sesu ke tokagaʼi ia ia. Neʼe ina foaki tona maʼuli ki te ʼAtua ke ina fai Tona finegalo. Pea neʼe tokaga tuʼumaʼu pe ke maʼu katoa te faka kolōlia e Sehova, tana Tāmai, ʼo ʼuhiga mo te ʼu faʼahiga meʼa kehekehe neʼe ina fai. ʼI te temi ʼaē neʼe ʼui age e te pule kia te ia “Faiako agalelei,” ʼo ina fakaʼaogaʼi te kupu “agalelei” ohage ko he tuʼulaga, neʼe fakatonutonuʼi e Sesu ia ia, ʼo ʼui maʼana: “ʼE mole ʼi ai he tahi ʼe agalelei, gata pe ki te tokotahi, ko te ʼAtua.” (Luka 18:18, 19; Soane 5:19, 30) ʼE tou hage koa ko Sesu, ʼo mole tou faka maʼuhigaʼi ia tatou, kae tou faka maʼuhigaʼi ia Sehova?
8. (a) ʼI tana foaki tona maʼuli, neʼe feafeaʼi te fakahā e Sesu ʼe mole kau ki te malamanei? (b) ʼE tonu anai ke tou faʼifaʼitakiʼi feafeaʼi ia ia?
8 ʼI tona maʼuli katoa ʼi te kele, neʼe fakahā e Sesu neʼe kua ina fakatotonu ke ina fai te gāue taputapu. Neʼe ina taupau tona ʼuhiga maʼa ke feala hana mōlagaʼi ia ia ohage “ko he akeno ʼe haohaoa pea heʼe ʼuli” ke liliu ko he sakilifisio faitotogi. (1 Petelo 1:19; Hepeleo 7:26) Neʼe ina fakaʼaogaʼi te ʼu pelesepeto fuli ʼo te Lao Faka Moisese, ʼo ina fakahoko ai te Lao ʼaia. (Mateo 5:17; 2 Kolonito 1:20) Neʼe ina maʼuliʼi te ʼu meʼa ʼaē neʼe akonaki ki ai ʼo ʼuhiga mo te aga ʼaē ʼe tonu ke fai. (Mateo 5:27, 28) Neʼe mole feala ki he tahi ke ina talaʼakiʼi ia ia ʼo ʼuhiga mo ni ʼu manatu ʼe kovi. ʼIo, neʼe “fehiʼa ki te meʼa noaʼi ʼo te lao.” (Hepeleo 1:9) ʼI totatou ʼuhiga kaugana ʼa te ʼAtua, tou faʼifaʼitakiʼi ia Sesu ʼaki hatatou tokaga ke maʼa kia mata ʼo Sehova totatou maʼuli pea mo te ʼu meʼa ʼaē ʼe tou holi kiai.
Ko He ʼu Faʼifaʼitaki ʼe ʼAoga Moʼo Fakatokagaʼi ʼo Tatou
9. Koteā te faʼifaʼitaki moʼo fakatokagaʼi ʼo tatou, ʼaē neʼe talanoa ki ai ia Paulo, pea he koʼe ʼe tonu ke tou fakatokagaʼi te faʼifaʼitaki ʼaia?
9 ʼO mole hage ko te faʼifaʼitaki ʼa Sesu, ʼe tou maʼu te faʼifaʼitaki ʼa te kau Iselaelite, ʼaē ʼe ʼaoga moʼo fakatokagaʼi ʼo tatou. Logope la tanatou ʼui ʼe nātou fai anai ia meʼa fuli ʼaē neʼe ʼui age e Sehova kia nātou ke nātou fai, neʼe mole nātou fai tona finegalo. (Taniela 9:11) Neʼe fakaloto mālohiʼi e te ʼapositolo ko Paulo te kau Kilisitiano ke nātou ako te meʼa ʼaē neʼe hoko ki te kau Iselaelite. Tou vakaʼi age muʼa te ʼu meʼa neʼe hoko neʼe talanoa kiai ia Paulo ʼi tana ʼuluaki tohi ki te kau Kolonito pea mo tou vakaʼi te ʼu hele ʼaē ʼe tonu ke tekeʼi e te kau kaugana ʼa te ʼAtua ʼi totatou temi.—1 Kolonito 10:1-6, 11.
10. (a) Neʼe feafeaʼi ‘te holi [ʼa te kau Iselaelite] ki te ʼu meʼa ʼaē ʼe kovi’? (b) He koʼe neʼe lākahala te kau Iselaelite ʼi tanatou muhumuhu tuʼa lua ʼaē ki te meʼa kai, pea koteā te ako ʼe tou maʼu mai te faʼifaʼitaki ʼaia?
10 ʼUluaki, ʼe fakatokagaʼi tatou e Paulo “ke ʼaua naʼa tou holi ki he ʼu meʼa ʼe kovi.” (1 Kolonito 10:6) Ko te faʼahi ʼaia e lagi feala ke ina fakamanatuʼi kia koutou te temi ʼaē neʼe lāuga ai te kau Iselaelite ʼi tanatou kai tuʼumaʼu pe ia te mane. Neʼe tuku ifo e Sehova kia nātou te ʼu cailles (manulele). Ko te tahi meʼa feiā pe neʼe hoko ʼi te ʼuluaki taʼu ʼaē ʼi te toafa ʼo Sin, ia muʼa ʼo te ʼui ʼaē e te kau Iselaelite kua nātou foaki tonatou maʼuli kia Sehova. (Ekesote 16:1-3, 12, 13) Kae neʼe mole faʼa tatau leva te ʼu ʼaluʼaga. ʼI te ʼuluaki foaki ʼaē e Sehova ʼo te ʼu cailles (manulele), neʼe mole faka lākahalaʼi e Sehova te kau Iselaelite ʼo ʼuhiga mo tanatou muhumuhu. Kae ʼi te temi ʼaia, neʼe kehekehe te ʼu ʼaluʼaga. “ ʼI te kei pipiki ʼo te kanoʼi manu ʼi tonatou ʼu nifo, ʼi muʼa ʼo hana lamu, neʼe vela ai te hāūhāū ʼo Sehova ki te hahaʼi, pea neʼe tāʼi ai e Sehova te hahaʼi ʼaki te fakaʼauha lahi ʼaupito.” (Faka au 11:4-6, 31-34) Koteā ʼaē neʼe fetogi? ʼI tanatou kua liliu ko te fenua kua foaki, neʼe nātou lākahala leva ʼi te moʼi lakaga ʼaia. Ko tanatou mole loto fakafetaʼi ki te ʼu meʼa ʼofa ʼa Sehova, ʼaē neʼe tupu ai tanatou meo ʼo ʼuhiga mo Sehova, logope la tanatou fakapapau age ʼaē ʼe nātou fai anai ia meʼa fuli neʼe talanoa kiai ia Sehova! Ko te lāuga ʼo ʼuhiga mo te laupapa ʼa Sehova ia ʼaho nei ʼe toe tatau aipe. Ko ʼihi ʼe mole nātou loto fakafetaʼi ki te ʼu meʼa ʼofa ʼa Sehova ʼaē ʼe tufa e “te tagata kaugana agatonu mo poto.” (Mateo 24:45-47) Kae ke tou manatuʼi, ko te foaki ʼo totatou maʼuli ʼe ina fakamaʼua kia tatou ke tou manatuʼi ʼaki he loto fakafetaʼi pe koteā te ʼu meʼa neʼe fai e Sehova maʼa tatou pea ke tou tali te meʼa kai fakalaumālie ʼaē ʼe foaki e Sehova.
11. (a) Neʼe feafeaʼi te ʼulihi e te kau Iselaelite tanatou tauhi ʼaē kia Sehova ʼi tanatou tauhi tamapua? (b) ʼE lava feafeaʼi hatatou pikisia ʼi he faʼahiga tauhi tamapua?
11 Ki muli age, neʼe fakatokaga fēnei e Paulo: “ ʼAua naʼa koutou tauhi tamapua ohage ko ʼihi ia nātou ʼaia.” (1 Kolonito 10:7) ʼE mahino ia, ʼi henī neʼe talanoa te ʼapositolo ki te tauhi ʼo te pipi ʼaē neʼe hoko ʼi te ʼosi fai e te kau Iselaelite tanatou fuakava mo Sehova ʼi te Moʼuga ʼo Sinai. ʼE feala ke koutou ʼui fēnei, ‘ ʼI toku ʼuhiga kaugana kia Sehova, ʼE mole ʼau kau anai ki te tauhi tamapua.’ Kae, koutou fakatokagaʼi, ʼi te manatu ʼa te kau Iselaelite, ʼe kei nātou atolasio pe nātou kia Sehova; kae, neʼe nātou fakahū te meʼa ʼo ʼuhiga mo te tauhi ʼo te pipi—ko he meʼa fakalialia ki te ʼAtua. Koteā te meʼa ʼaē ʼe pipiki ki te faʼahiga tauhi ʼaia? Ko te hahaʼi neʼe nātou fai te ʼu sakilifisio ia muʼa ʼo te pipi, pea neʼe “nātou nonofo ki lalo ʼo kakai pea mo ʼiʼinu. Pea nātou tutuʼu ake ʼo fakafiafia.” (Ekesote 32:4-6) ʼI te temi nei, ko ʼihi ʼe feala ke nātou ʼui ʼe nātou tauhi kia Sehova. Kae e lagi nātou fakaʼaogaʼi nātou tonatou maʼuli ki te ʼu meʼa ʼo te mālama ʼaenī, ka mole nātou fakaʼaogaʼi nātou ki te tauhi ʼaē kia Sehova, pea ʼe nātou faiga ke nātou faka ʼalutahi tanatou kaugana ʼaē kia Sehova ʼaki te ʼu meʼa ʼaia. ʼE moʼoni, ʼe mole faka ʼuhiga kovi leva ohage ko te tulolo ki te pipi aulo, kae ʼe mole kehekehe mo te aga ʼaia. Ko te fakaliliu ko he ʼatua te ʼu holi totonu ʼa he tahi, ʼe mamaʼo ʼosi ia ʼi te foaki ʼo kita kia Sehova.—Filipe 3:19.
12. ʼAki te meʼa ʼaē neʼe hoko ki te kau Iselaelite mo Paale ʼo Peole, koteā te meʼa ʼe tou ako ʼo ʼuhiga mo tatatou fakafisi kia tatou totonu?
12 Ko te faʼahiga fakafiafia neʼe toe kau pe foki ki te faʼifaʼitaki ʼaē ʼe ʼaoga moʼo fakatokaga, ʼaē neʼe talanoa kiai ia Paulo. “ ʼAua naʼa tou fai te folonikasio, ohage ko ʼihi ia nātou ʼaē neʼe fai folonikasio, pea neʼe mamate ai te toko ʼuafulu-ma-tolu afe ʼi te ʼaho pe e tahi.” (1 Kolonito 10:8) Ko te kau Iselaelite, ʼaē neʼe fakahalaʼi e te ʼu fakafiafia heʼeʼaoga ʼa te kau finemui ʼo Moape, neʼe taki ai ia nātou ke nātou atolasio kia Paale ʼo Peole ʼi Sitime. (Faka au 25:1-3, 9) Ko hatatou fakafisi kia tatou totonu ke tou fai te finegalo ʼo Sehova, ʼe pipiki ki te tali ʼo tana ʼu lekula ʼo ʼuhiga mo te ʼu aga maʼa ʼaē ʼe tonu ke fai. (Mateo 5:27-30) ʼI te temi maveuveu ʼaenī ʼo te ʼu lekula, ʼe fakamanatuʼi mai kia tatou te ʼaoga ʼaē ke tou nonofo maʼa mai te ʼu faʼahiga aga heʼeʼaoga kehekehe, ʼo fakalogo ki te pule ʼa Sehova ʼo ʼuhiga mo te fakatuʼutuʼu ʼaē pe koteā te meʼa ʼe lelei pea mo te meʼa ʼe kovi.—1 Kolonito 6:9-11.
13. E feafeaʼi te tokoni kia tatou te faʼifaʼitaki ʼa Finease ke tou mahino ki te faka ʼuhiga ʼo te foaki ʼo kita ʼaē ʼe tou fai kia Sehova?
13 Logope la neʼe tokolahi ia nātou ʼaē neʼe tō ki te hele ʼo te folonikasio ʼi Sitime, ko ʼihi neʼe nātou fakaʼapaʼapa ki te foaki fakafenua ʼo nātou ʼaē neʼe fai kia Sehova. Ia nātou ʼaia, neʼe maʼuhiga te faiga fakamalotoloto ʼa Finease. ʼI tana sio ʼaē ki te pule ʼo te telepi neʼe ina ʼaumai te taʼahine Matianite ki tona fale lā, neʼe fā ia Finease ki te tao pea neʼe ina matehi ai ia nāua. Neʼe ʼui e Sehova kia Moisese fēnei: “Ko Finease . . . neʼe ina fakamaliu kehe toku hāūhāū mai te ʼu foha ʼo Iselaele, ʼi tana mole fakagafua ʼi te lotolotoiga ʼo nātou he aga ʼe fakafeagai kia te ʼau, ko te tupuʼaga la ʼaia ʼo taku mole matehi ai te ʼu foha ʼo Iselaele, logope la taku fakamaʼua ʼaē ke ʼau liliu ko he meʼa ʼe nātou pipiki tāfito ki ai.” (Faka au 25:11) ʼE faka ʼuhiga fēnei te foaki ʼo kita—ʼe mole fakagafua ki he meʼa e tahi ke fakafeagai kia Sehova. ʼE mole feala ke tou tuku he meʼa ke ina toʼo te tuʼulaga ʼo te foaki ʼo kita ʼaē kia Sehova, ʼaē ʼe tonu ke nofo ʼi totatou ʼu loto. Ko tatatou gāue fakamalotoloto kia Sehova ʼe ina uga tatou ke tou taupau ke maʼa te kokelekasio ʼo tou fakahā he agahala mamafa ki te ʼu tagata ʼāfea, ʼo mole tou fakagafua ke hoholo te hoko ʼo te meʼa ʼaia.
14. (a) Neʼe feafeaʼi te ʼahiʼahiʼi e te kau Iselaelite ia Sehova? (b) ʼE tokoni feafeaʼi kia tatou te foaki katoa ʼo kita ʼaē kia Sehova ke ʼaua naʼa tou “fiu”?
14 Neʼe talanoa ia Paulo ki te tahi faʼifaʼitaki moʼo fakatokagaʼi ʼo tatou: “ ʼAua naʼa tou ʼahiʼahiʼi foki mo tatou ia Sehova, ohage ko ʼihi ia nātou neʼe nātou ʼahiʼahiʼi ia ia, pea neʼe nātou mamate ai ʼi te ʼu gata.” (1 Kolonito 10:9) Neʼe talanoa ʼi henī ia Paulo ʼo ʼuhiga mo te temi ʼaē neʼe muhumuhu ai te kau Iselaelite kia Moisese ʼo ʼuhiga mo te ʼAtua, ʼi tanatou “kamata gaʼegaʼe ʼuhi ko te ala.” (Faka au 21:4) Neʼe kua koutou manatu feiā koa? ʼI te temi ʼaē neʼe koutou foaki ai tokotou maʼuli kia Sehova, neʼe koutou manatu koa kua vave hoko ia Halamaketone? ʼI takotou manatu, ʼe loaloaga fau koa te lotoʼutaki ʼa te ʼAtua? Tou manatuʼi, neʼe mole tou foaki totatou maʼuli kia Sehova ki he kiʼi temi nounou, pe neʼe tou foaki pe ʼo aʼu ki Halamaketone. Ko tatatou foaki ia tatou ʼe mole ʼi ai hona gataʼaga. Koia “ ʼaua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.”—Kalate 6:9.
15. (a) Ko ai koa ʼaē neʼe muhumuhu ki ai te kau Iselaelite? (b) E feafeaʼi te uga ʼo tatou e te foaki ʼo kita kia Sehova ke tou fakaʼapaʼapa ki te pule faka teokalatike?
15 Moʼo fakaʼosi, neʼe valoki e Paulo tanatou liliu ʼaē ko ni hahaʼi ʼe “muhumuhu” ki te ʼu kaugana ʼaē neʼe fakanofo e Sehova ki te ʼu tuʼulaga. (1 Kolonito 10:10) Neʼe kovi ʼaupito te muhumuhu ʼa te kau Iselaelite kia Moisese pea mo Alone ʼi te temi ʼaē neʼe fai ai te ʼu fakamatala kovi e te ʼu malomu e toko 10 ʼi te ʼu malomu e 12 ʼaē neʼe fekauʼi ke ʼolo ʼo vakaʼi te Fenua ʼo Kanaane. Neʼe nātou talanoa foki ke fetogi ia Moisese ʼi tona ʼuhiga takitaki ʼaē kia nātou pea ke nātou toe liliu ki Esipito. (Faka au 14:1-4) Ia ʼaho nei, ʼe tou tali koa te takitaki ʼaē ʼe foaki mai kia tatou ʼaki te gāue ʼa te laumālie maʼoniʼoni ʼo Sehova? ʼI tatatou sio ki te laupapa ʼaē ʼe fonu ʼaupito ai te meʼa kai fakalaumālie ʼaē ʼe foaki e te kalasi ʼo te tagata kaugana agatonu mo poto, kua mahino kia tatou pe ko ai ʼaē ʼe fakaʼaogaʼi e Sesu moʼo tufa “te meʼa kai ʼi tona temi totonu.” (Mateo 24:45) Ko te foaki ʼo totatou nefesi katoa kia Sehova ʼe ina fakamaʼua ke tou fakahā he fakaʼapaʼapa ki tana ʼu kaugana ʼaē neʼe ina fakanofo. ʼOfa pe ke ʼaua naʼa tou liliu ʼi he temi ko ni hahaʼi ʼe muhumuhu ʼo te temi ʼaenī, kua nātou haga nātou ki he pule foʼou, ʼo nātou toe liliu ki te malamanei.
ʼE ʼAu Faiga Katoa Koa?
16. Koteā te ʼu fehuʼi ʼe feala ke fai takitokotahi e te kau kaugana ʼa te ʼAtua?
16 Neʼe feala ki te kau Iselaelite ke mole nātou fai he ʼu agahala mamafa mo ka na pau la neʼe nātou manatuʼi neʼe kua nātou foaki katoa tonatou maʼuli kia Sehova. ʼO kehekehe mo te kau Iselaelite ʼaē neʼe mole ia nātou te tui, neʼe fakahoko e Sesu Kilisito tana foaki ʼo ia ʼo aʼu ki tana mate. ʼI totatou ʼuhiga kau tisipulo ʼa Kilisito, ʼe tou faʼifaʼitakiʼi tana foaki ia ia ʼo tou fai ʼaki totatou nefesi katoa, ʼo “mole [tou maʼuʼuli] ʼuhi ko te ʼu holi ʼo te tagata kae tou maʼuʼuli ʼuhi ko te finegalo ʼo te ʼAtua.” (1 Petelo 4:2; vakaʼi ia 2 Kolonito 5:15.) Ko te finegalo ʼa Sehova ia ʼaho nei “ke hāofaki te hahaʼi fuli pea ke nātou maʼu te mālama totonu ʼo te moʼoni.” (1 Timoteo 2:4) ʼAki te fakatuʼutuʼu ʼaia, ʼe tonu ke tou faka mafola “te logo lelei ʼaia ʼo te puleʼaga” ʼi muʼa ʼo te hoko mai ʼo te temi fakaʼosi. (Mateo 24:14) ʼE tou faiga mālohi koa ki te fai ʼo te gāue ʼaia? ʼE feala pe ke tou fai kia tatou totonu te fehuʼi ʼaenī, ‘ ʼE ʼau faiga katoa koa?’ (2 Timoteo 2:15) Ko te ʼu ʼaluʼaga ʼe mole tatau. ʼE leleiʼia e Sehova te tauhi ʼaē ʼe fai kia te ia “ ʼo fakalogo pe ki te meʼa ʼaē ʼe maʼu e he tahi, ka mole fai ʼaki he meʼa ʼe mole maʼu e he tahi.” (2 Kolonito 8:12; Luka 21:1-4) ʼE mole he tahi ʼe tonu ke ina fakamāu te loloto pea mo te fakamalotoloto ʼo te foaki ʼa he tahi kehe tona maʼuli. Ko te hahaʼi takitokotahi ʼe tonu ke nātou fakafuafua te lahi ʼo tanatou foaki ia nātou ʼaē kia Sehova. (Kalate 6:4) ʼE tonu ke uga e totatou ʼofa ʼaē kia Sehova ke tou fai te fehuʼi ʼaenī, ‘ ʼE lava feafeaʼi koa haku fakafiafia ia Sehova?’
17. Koteā te pikipikiga ʼo te foaki ʼo kita pea mo te loto fakafetaʼi? Koutou fakamatala te faʼifaʼitaki.
17 Ko te foaki ʼo totatou maʼuli kia Sehova ʼe ʼāʼāsili loloto mokā ʼe tou fakatuputupu tatatou loto fakafetaʼi ʼaē kia te ia. Ko te tūpulaga e taʼu 14 ʼi Saponia, neʼe ina foaki tona maʼuli kia Sehova pea neʼe ina fakahā te faʼahi ʼaia ʼaki tana papitema ʼaē ʼi te vai. Ki muli age, neʼe loto ke hoko tana ako ʼi te ʼu faleako lalahi pea ke liliu ko he tagata ʼe ina akoʼi te ʼu meʼa ʼo ʼuhiga mo te maʼuli. Neʼe mole heʼeki manatu tuʼa tahi ia ki te gāue katoa ʼi te minisitelio, kae ʼi tona ʼuhiga kaugana ʼaē kua foaki tona maʼuli, neʼe mole ina fia līaki ia Sehova pea mo tana kautahi ʼaē ʼi te kele. Moʼo fakahoko tana fakatuʼutuʼu, neʼe kau ki te univelesitē. Neʼe sio ai leva ia ki te kau maʼu pepa ʼo te univelesitē neʼe nātou faiga ke nātou foaki tonatou maʼuli katoa ki tonatou ʼu kaumeʼa peʼe ki tanatou ako. Neʼe ina ʼeke ai ʼo ʼui fēnei, ‘Koteā te meʼa ʼaē ʼe ʼau fai ʼi henī? ʼE feala moʼoni koa ke ʼau muliʼi tonatou faʼahiga maʼuli pea mo fai haku gāue fakamālama? Neʼe mole heʼeki ʼau foaki koa la toku maʼuli kia Sehova?’ ʼAki he loto fakafetaʼi, neʼe liliu ia ko te pionie katoa. Ko tana mahino ʼaē ki te foaki ʼo tona maʼuli neʼe liliu ʼo loloto, pea neʼe ina uga ia ia ke ina tuku katoa tona loto ke ʼalu ki te ʼu faʼahi fuli pe ʼaē neʼe ʼaoga ai ki ai. Neʼe kau ki te Ako Ki Te Teuteu Faka Minisitelio pea neʼe hinoʼi ia ia ke ʼalu ʼo gāue faka misionea ʼi te tahi fenua.
18. (a) ʼE tonu ke tou foaki feafeaʼi ia tatou ki te ʼAtua? (b) Koteā te fakapale ʼe tou maʼu ʼi tatatou foaki ʼo totatou maʼuli kia Sehova?
18 Ko te foaki ʼo kita ʼe fakamaʼua kiai totatou maʼuli katoa. ʼE tonu ke tou fakafisi kia tatou totonu pea “ ʼi te ʼaho fuli pe” ke tou mulimuli ki te faʼifaʼitaki lelei ʼa Sesu. (Luka 9:23) ʼI tatatou fakafisi ʼaē kia tatou, ʼe mole tou kole kia Sehova ke tou mālōlō ʼi te gāue ʼaē ʼe tonu ke tou fai. Ko totatou maʼuli ʼe mulimuli ki te ʼu pelesepeto ʼa Sehova ʼaē ʼe ina tuku ki tana kau kaugana. Tatau aipe mo te ʼu faʼahi ʼaē ʼe feala ke tou fai ai ni ʼu tonu takitokotahi, ʼe lelei ke tou fakasiosio peʼe tou faiga fakamalotoloto ke tou maʼuliʼi te foaki ʼo kita ʼaē neʼe tou fai kia Sehova. Kapau ʼe tou kaugana kia te ia ʼi te ʼaho fuli pe, ʼo tou faiga fakamalotoloto ke ina leleiʼia tatou ʼi totatou ʼuhiga Kilisitiano, ʼe fua manuʼia anai pea ʼe tou maʼu anai te tapuakina mai ia Sehova, ia Ia ʼaē ʼe tau mo feʼauga ke tou foaki ki ai totatou nefesi katoa.
ʼE Feala Koa Hakotou Fakamatala?
◻ Koteā ʼaē neʼe pipiki ki ai te foaki ʼo ia ʼa Sesu Kilisito?
◻ He koʼe ʼe mole tonu ke tou muhumuhu kia Sehova?
◻ ʼE lava feafeaʼi hatatou tauʼi te tauhi tamapua ke ʼaua naʼa tou kau kiai?
◻ Koteā ʼaē ʼe tonu ke tou manatuʼi ke ʼaua naʼa tou “fiu” ʼi te fai ʼo te finegalo ʼo te ʼAtua?
[Paki ʼo te pasina 17]
Ko te kau Kilisitiano ʼaē kua foaki tonatou maʼuli “ ʼe mole [nātou] fiu ʼi te fai ʼo te meʼa ʼaē ʼe lelei”