Tou Mulimuli Ki Te Kua Foaki ʼo Totatou Maʼuli

“Ko he meʼa pe ʼe koutou fai, koutou gāue ʼaki tokotou nefesi katoa, ohage ʼe koutou gāue maʼa Sehova, kae mole maʼa te tagata.”—Kolose 3:23, MN.

1. ʼI te mālama, koteā ʼaē ʼe fai e te hahaʼi faigaoʼi?

ʼE AʼU feafeaʼi he ʼu tagata faigaoʼi ki tonatou mālo? ʼI te aka fitipolo, ʼi te haʼele mānava, peʼe ʼi he tahi pe faʼahiga faigaoʼi, ʼe mālo te hahaʼi ʼaē neʼe nātou faiga mālohi ke nātou gāueʼi tonatou sino pea mo tonatou ʼatamai ke mālohi ʼi te faigaoʼi ʼaē neʼe nātou fili. ʼE maʼuhiga te fakagāueʼi ʼo te sino pea mo te fakakaukau. ʼE tonu koa ke tou feiā ʼo ʼuhiga mo te foaki ʼo totatou maʼuli ʼaē neʼe tou fai ʼi hona faka ʼuhiga fakalaumālie?

2. ʼE faka ʼuhiga feafeaʼi ʼi te Tohi-Tapu ia te kupu “foaki”? Koutou fakahā he faʼifaʼitaki.

² Koteā te faka ʼuhiga ʼo te kupu “foaki” ʼi te Tohi-Tapu? ʼE fakaliliu e te kupu “foaki” ia te kupu faka Hepeleo ʼe faka ʼuhiga fēnei “tuku keheʼi; mavae kehe; fakamamaʼo.”a ʼI Iselaele, ko te Pelepitelo Lahi ko Alone neʼe ina haʼi ki te kie ʼaē ʼe takai tona ulu, “te fakaʼiloga taputapu ʼo te foaki,” neʼe ko te pale gigila neʼe gaohi ʼaki te aulo maʼa pea neʼe tohi ai te ʼu kupu faka Hepeleo ʼaenī “Ko te Maʼoniʼoni ʼe ʼa Sehova.” Neʼe ko he fakamanatu ki te pelepitelo lahi ke ʼaua naʼa ina ʼulihi te sagatualio “heʼe nofo mo ia te fakaʼiloga ʼo te foaki, te lolo fakanofo ʼo tona ʼAtua.”—Ekesote 29:6; 39:30; Levitike 21:12.

3. ʼE tonu ke malave feafeaʼi ia te foaki ʼo totatou maʼuli ki tatatou aga?

³ ʼE hā mai ʼi te vaega ʼaia, ko te foaki ʼe ko he meʼa maʼuhiga. Ko tona faka ʼuhiga ʼe tou fili tonu ke tou liliu ko te kaugana ʼa te ʼAtua, pea ʼe tonu ai ke tou aga maʼa. Koia ʼe tou mahino ai pe koʼe neʼe fakaʼaogaʼi e te ʼapositolo ko Petelo te ʼu palalau ʼa Sehova, ʼaē neʼe ina ʼui fēnei: “Koutou maonioni, koteuhi e au maonioni.” (1 Petelo 1:15, 16) ʼI totatou ʼuhiga Kilisitiano ʼe tonu ke tou maʼuli ʼo mulimuli ki te fakapapau ʼaē neʼe tou fai, ke tou agatonu ʼo aʼu ki te fakaʼosi. Kae ki he Kilisitiano, koteā ʼaē ʼe fakapipiki ki tana foaki ʼo tona maʼuli?—Levitike 19:2; Mateo 24:13.

4. ʼE tou fakahoko feafeaʼi tatatou foaki, pea koteā ʼaē ʼe feala ke pipiki kiai?

⁴ ʼI tatatou ʼosi maʼu te ʼatamai mālama totonu ʼo ʼuhiga mo Sehova ʼAtua pea mo tana ʼu fakatuʼutuʼu, pea mo Sesu Kilisito pea mo tona tuʼulaga ʼi te ʼu fakatuʼutuʼu ʼaia, ʼe tou filifili tonu ke tou tauhi ki te ʼAtua ʼaki totatou loto katoa, totatou ʼatamai katoa, totatou nefesi katoa pea mo totatou mālohi katoa. (Maleko 8:34; 12:30; Soane 17:3) ʼE feala pe ke faka ʼuhiga te faʼahi ʼaia ki he fakapapau ʼe kita fai, ko he foaki katoa ʼo kita ki te ʼAtua. Ko te foaki ʼaia ʼo kita ʼe ko he meʼa neʼe kita fakakaukauʼi pea mo hūfakiʼi. Pea neʼe mole ko he fakatuʼutuʼu faka temi. ʼE mole tou hage ko ia ʼaē ʼe ina fai hana gāueʼaga pea ina līaki koteʼuhi ʼe ko he gāue fakakinakina ʼaupito peʼe ko te taʼukai ʼe kei tuai mai peʼe mole kei hoko. Koutou fakatokagaʼi te ʼu faʼifaʼitaki ʼa ʼihi, ʼi hona ʼaluʼaga fakatā neʼe ‘fā tonatou ʼu nima ki te saliote’ ʼo te ʼu maʼua faka teokalatike logola te ʼu faigataʼaʼia.—Luka 9:62; Loma 12:1, 2.

Neʼe Mole Nātou Līaki Tanatou Fakapapau

5. Koteā te faʼifaʼitaki makehe ʼaē neʼe tuku mai e Selemia ʼi tona ʼuhiga kaugana ʼaē kua ina foaki tona maʼuli ki te ʼAtua?

⁵ Ko te minisitelio faka polofeta ʼa Selemia ʼi Selusalemi neʼe fai ia taʼu e 40 tupu (647-607 ʼi muʼa ʼo totatou temi), pea neʼe mole ko he gāue faigafua. Neʼe ina ʼiloʼi tona ʼu vaivaiʼaga. (Selemia 1:2-6) Neʼe tonu ke lototoʼa pea mo faʼa kātaki moʼo tauʼi ʼo te hahaʼi loto fefeka ʼo Suta ʼi te ʼaho fuli pe. (Selemia 18:18; 38:4-6) Kae neʼe falala ia Selemia kia Sehova ʼAtua, ʼaē neʼe ina fakaloto mālohiʼi ia ia ke ina fakahā ʼe ko he kaugana kua ina foaki moʼoni tona maʼuli ki te ʼAtua.—Selemia 1:18, 19.

6. Koteā te faʼifaʼitaki ʼaē neʼe tuku mai e te ʼapositolo ko Soane?

⁶ E feafeaʼi ki te ʼapositolo agatonu ko Soane, ʼaē neʼe ʼaunofo ʼi te motu ʼo Patemosi ʼi tona temi matuʼa ʼuhi ko tana “palalau ʼo ʼuhiga mo te ʼAtua pea mo fakamoʼoni kia Sesu”? (Apokalipesi 1:9, MN ) Lolotoga taʼu e 60, neʼe ina kātakiʼi pea mo taupau maʼu tona ʼuhiga Kilisitiano ʼaē kua foaki tona maʼuli ki te ʼAtua. Neʼe mole mate ia ʼi te temi ʼaē neʼe fakaʼauha ai Selusalemi e te ʼu kautau Loma. Neʼe ina maʼu te pilivilesio ʼaē ke ina tohi he Evaselio, mo te ʼu episitola e tolu, pea mo te tohi ʼo te Apokalipesi, ʼaē neʼe ina fakakikite ai te tau ʼo Halamaketone. Neʼe ina tuku koa tana gāue ʼi tana ʼiloʼi ʼaē ʼe mole hoko anai Halamaketone ʼi tona temi? Neʼe tupu ai koa hana fakaʼauʼauganoa? Kailoa! Neʼe agatonu ia Soane ʼo aʼu ki tona mate, he neʼe ina ʼiloʼi logola ‘kua ōvi mai te temi ʼaē kua fakakatofa,’ kae ko te ʼu meʼa ʼaē neʼe sio kiai ʼe hoki hoko anai ki muli age.—Apokalipesi 1:3; Taniela 12:4.

Te ʼu Faʼifaʼitaki Ia ʼAho Nei

7. Koteā te faʼifaʼitaki lelei faka Kilisitiano neʼe tuku mai e te tēhina?

⁷ ʼI totatou temi ko te lauʼi afe Kilisitiano agatonu neʼe nātou faʼafai ʼo taupau maʼu tanatou fakapapau logola kua nātou mamate kae mole heʼeki hoko mai Halamaketone. Ohage ko Ernest E. Beavor ʼi Pilitania. Neʼe liliu ko te Fakamoʼoni ʼi te 1939, ʼi te kamataʼaga ʼo te Lua Tau Faka Malamanei pea neʼe ina līaki tana gāue fai paki ke feala hana kau ki te minisitelio temi katoa. Neʼe pilisoni ia taʼu e lua koteʼuhi neʼe ina taupau maʼu tona ʼāteaina faka Kilisitiano. Neʼe lagolago tona kiʼi famili kia te ia, pea ʼi te taʼu 1950 neʼe kau tana ʼu tamaliki e toko tolu ki te ako misionea ʼo te Faleako Faka Tohi-Tapu ʼo Kalaate ʼi New York. ʼI te mālohi ʼo te fai faka mafola ʼo te Tēhina ko Beavor, neʼe higoaʼi ia ia e tona ʼu kaumeʼa ko Ernie Halamaketone. Neʼe agatonu ki te kua foaki ʼo tona maʼuli, pea neʼe ina faka mafola te kua ōvi mai ʼo Halamaketone, te tau ʼo te ʼAtua ʼo aʼu ki tona mate ʼi te 1986. Neʼe mole ina faka ʼuhiga ia tana foaki ʼaē ʼo tona maʼuli ki te ʼAtua ohage ko he meʼa ʼe faka tuʼakoi!b—1 Kolonito 15:58.

8, 9. (a) ʼI te temi pule ʼa Franco ʼi Sepania, koteā te faʼifaʼitaki ʼaē neʼe tuku mai e te kau tūpulaga tokolahi? (b) Koteā te ʼu fehuʼi ʼaē ʼe tonu ke tou fai?

⁸ ʼE ʼi ai te tahi faʼifaʼitaki mālohi ʼi Sepania. Lolotoga te temi pule ʼo Franco (1939-1975), ko te toko lauʼi teau kau Fakamoʼoni tūpulaga neʼe nātou taupau maʼu tonatou ʼāteaina faka Kilisitiano. Tokolahi ia nātou neʼe pilisoniʼi ia taʼu e hogofulu tupu ʼi te ʼu fale solia. Ko te tahi Fakamoʼoni, ko Jesús Martín, neʼe fakatūʼa ke pilisoniʼi ia taʼu e 22. Neʼe lahi tona tā ʼi tana nofo pilisoni ʼi te fale solia ʼi te Potu Noleto ʼo Afelika. Neʼe mole faigafua te faʼahi ʼaia, kae neʼe mole ina fia fai he meʼa ʼe fakafeagai ki tana tui.

⁹ ʼE mole he temi neʼe ʼiloʼi ai e te kau tūpulaga ʼaia peʼe ko ʼāfea ʼaē ka nātou mavae ai mai te pilisoni, he neʼe lahi te ʼu fakatūʼa ʼaē neʼe fai hoholo age kia nātou. Kae neʼe nātou nonofo agatonu pea mo mālohi ʼi te minisitelio logola neʼe pilisoniʼi nātou. ʼI te kua tokalelei ʼo te fenua ʼi te 1973, tokolahi ʼi te kau Fakamoʼoni ʼaia, ʼaē kua nātou taki taʼu 30 tupu neʼe faka ʼāteaina mai te pilisoni pea neʼe nātou fakahoko aipe tanatou minisitelio temi katoa, ko ʼihi neʼe liliu ko te kau pionie makehe pea ko ʼihi ko te kau taupau feʼoloʼaki. ʼI tanatou nofo pilisoni neʼe nātou taupau maʼu tonatou ʼuhiga hahaʼi ʼaē kua foaki tonatou maʼuli ki te ʼAtua, pea tokolahi ia nātou ʼaia neʼe nātou hoko aipe tanatou selevisi ʼi tanatou ʼosi mavae ʼaē mai te ʼu fale pilisoni.c E feafeaʼi kia tatou ʼi te temi nei? ʼE tou nofo agatonu koa ohage ko te kau tūpulaga agatonu ʼaia?—Hepeleo 10:32-34; 13:3.

Ko Te Manatu Fakapotopoto Ki Te Foaki ʼo Totatou Maʼuli

10. (a) ʼE tonu ke tou faka ʼuhiga feafeaʼi te foaki ʼo totatou maʼuli? (b) ʼE faka ʼuhiga feafeaʼi e Sehova tatatou tauhi age ʼaē kia te ia?

¹⁰ ʼE tou faka ʼuhiga feafeaʼi te foaki ʼo totatou maʼuli ki te ʼAtua moʼo fai ʼo tona finegalo? ʼE tou fakamuʼamuʼa koa te faʼahi ʼaia ʼi totatou maʼuli? Tatau aipe peʼe koteā totatou ʼu ʼaluʼaga, peʼe tou tūpulaga peʼe tou matutuʼa, peʼe kua tou ʼohoana peʼe kei tou ʼeʼeva, peʼe tou mālolohi peʼe tou mahahaki, ʼe tonu ke tou haga mulimuli ki te kua foaki ʼo totatou maʼuli, ʼo fakalogo pe ki totatou ʼu fealagia. ʼE lagi feala ki he tahi ke kau ki te minisitelio temi katoa, peʼe pionie, peʼe gāue ʼi he Petele ʼo te Sosiete, peʼe misionea, peʼe taupau feʼaluʼaki. ʼI te tahi faʼahi, ʼe feala ke maʼumaʼua ʼihi ʼu mātuʼa ʼi te taupau ʼo te faʼahi fakasino pea mo fakalaumālie ʼo tonatou famili. ʼE mole faʼa maʼuhiga koa kia Sehova tonatou ʼu kiʼi hola ʼaē ʼe nātou fai ʼi te minisitelio ʼi te māhina fuli ʼi te ʼu tuʼuga hola ʼaē ʼe fai e nātou ʼaē ʼe gāue temi katoa? Kailoa. ʼE mole kole mai e te ʼAtua ke tou fai te meʼa ʼaē ʼe mole tou lavaʼi. Neʼe fakahā e te ʼapositolo ko Paulo ia te pelesepeto ʼaenī: “Kapau ʼe ʼi ai tāfito te lotolelei, ʼe lelei tāfito ia, ʼo fai ki te meʼa ʼaē ʼe maʼu e he tahi, ka mole fai ki he meʼa ʼe mole maʼu e he tahi.”—2 Kolonito 8:12, MN.

11. ʼE fakalogo kiteā totatou hāofaki?

¹¹ ʼI te ʼu faʼahi ʼaia, ʼe mole fakalogo totatou maʼuli ki te ʼu meʼa ʼaē ʼe tonu ke tou fai, kae ki te ʼofa makehe ʼa Sehova ʼaki ia Kilisito Sesu totatou ʼAliki. Neʼe fakamahino lelei fēnei e Paulo: “Ko tatou fuli neʼe tou agahala pea mole tou aʼu ki te kolōlia ʼo te ʼAtua, pea ʼe ko he meʼa ʼofa ʼe mole totogi ʼaē ʼe tala ai ko nātou ko te kau faitotonu ʼaki tona ʼofa makehe, ʼuhi ko te faka ʼāteaina ʼaē neʼe totogi e Kilisito Sesu.” Kae ko tatatou ʼu gāue ʼe ko he fakamoʼoni ʼe tou tui ki te ʼu fakapapau ʼa te ʼAtua.—Loma 3:23, 24, MN; Sakopo 2:17, 18, 24.

12. He koʼe ʼe mole tonu ke tou fakatatau tatatou gāue mo he tahi?

¹² ʼAua naʼa tou fakatatau mo niʼihi totatou temi ʼaē ʼe tou foaki ki te tauhi ki te ʼAtua, feiā mo te ʼu tohi ʼaē neʼe tou tufa, peʼe ko te ʼu ako ʼaē ʼe tou fai. (Kalate 6:3, 4) Tatau aipe pe koteā te ʼu meʼa ʼaē ʼe tou fakahoko ʼi te minisitelio faka Kilisitiano, kae ʼe tonu ke tou manatuʼi fuli te ʼu palalau agavaivai ʼaenī ʼa Sesu: “Koia, ke toe feiā foki mo koutou, ka koutou ʼosi fai anai te ʼu meʼa fuli ʼaē neʼe fakatotonu atu, koutou ʼui, ‘Ko mātou ko te kau kaugana ʼe mole mātou lelei ʼi he meʼa. Neʼe mātou fai pe te meʼa ʼaē ʼe tonu ke mātou fai.’ ” (Luka 17:10, MN ) ʼE tou lava ʼui moʼoni koa neʼe tou fai “te ʼu meʼa fuli ʼaē neʼe fakatotonu” mai kia tatou? Koutou fai te fehuʼi ʼaenī: ʼE tonu ke lelei feafeaʼi taku tauhi ki te ʼAtua?—2 Kolonito 10:17, 18.

Tou Faka Maʼuhigaʼi Te ʼAho Fuli Pe

13. ʼE tonu ke tou fai feafeaʼi tatatou gāue?

¹³ ʼI tana ʼosi foaki te ʼu tokoni ki te ʼu fafine pea mo te ʼu tagata ʼohoana, mo te ʼu tamaliki, mo te ʼu mātuʼa, pea mo te ʼu kaugana, ʼe tohi fēnei e Paulo: “Ko he meʼa pe ʼe koutou fai, koutou gāue ʼaki tokotou nefesi katoa, ohage ʼe koutou gāue maʼa Sehova, kae mole maʼa te tagata. Heʼe koutou ʼiloʼi ʼe koutou maʼu anai mai ia Sehova te fakapale ʼo te tofiʼa ʼaē ʼe tau mo koutou. Koutou gāue ohage ko ni ʼu kaugana maʼa te Pule, ko Kilisito.” (Kolose 3:23, 24, MN ) ʼE mole tou gāue ke vikiʼi tatou e te tagata ʼuhi ko te ʼu meʼa ʼaē ʼe tou fakahoko ʼi tatatou tauhi kia Sehova. ʼE tou faiga ke tou tauhi ki te ʼAtua ʼo muliʼi te faʼifaʼitaki ʼa Sesu Kilisito. Logola neʼe nounou te temi ʼaē neʼe tonu ke ina fakahoko ai tona minisitelio, kae neʼe ina fakahoko ohage ko he gāue ʼe tonu ke foimo fai.—1 Petelo 2:21.

14. Koteā ʼaē neʼe ʼui e Petelo ʼo ʼuhiga mo te ʼu ʼaho fakamuli?

¹⁴ Neʼe toe mahino ki te ʼapositolo ko Petelo te maʼuhiga ʼaē ke foimo fai te gāue. ʼI tana lua tohi, neʼe ina ʼui ʼi te ʼu ʼaho fakamuli ʼe ʼi ai anai te kau vāvā—te kau ʼaposita pea mo te kau lotolotolua—ʼe nātou haʼele anai ʼo mulimuli ki tanatou ʼu holi, ʼo nātou lagaʼi te ʼu fehuʼi ʼo ʼuhiga mo te ʼi henī ʼa Kilisito. Kae neʼe ʼui fēnei e Petelo: “Ko Sehova ʼe mole tuai ʼo ʼuhiga mo tana fakapapau, ohage ko te faka ʼuhiga e ʼihi ia te tuai, kae ʼe faʼa kātaki kia koutou heʼe mole ina loto ke fakaʼauha he tahi kae ʼe loto ia ke aʼu te hahaʼi fuli ki te fakahemala. Kae ko te ʼaho ʼo Sehova ʼe haʼu anai ohage ko he tagata kaihaʼa.” Ei ʼe hoko moʼoni anai te ʼaho ʼo Sehova. Koia ʼe tonu ke tou manatuʼi tuʼumaʼu te ʼaho ʼaia, ʼo tou faiga ke tou tui mālohi ʼe hoko moʼoni anai ia te fakapapau ʼa te ʼAtua.—2 Petelo 3:3, 4, 9, 10, MN.

15. Koteā ʼaē ʼe tonu ke tou vakavakaʼi ʼi te ʼaho fuli ʼi totatou maʼuli?

¹⁵ Ke feala hatatou mulimuli fakalelei ki tatatou kua foaki ʼo totatou maʼuli, ʼe tonu ke tou fakavikiviki kia Sehova ʼi te ʼaho fuli. ʼI te fakaʼosi ʼo te ʼaho fuli, ʼe feala koa ke tou fakakaukauʼi pea mo vakaʼi pe neʼe feafeaʼi tatatou kau ki te tāpuhā ʼo te huafa ʼo te ʼAtua pea mo tatatou faka mafola ia te logo lelei ʼo te Puleʼaga? Lagi neʼe tou fai ʼaki tatatou aga maʼa, tatatou ʼu fai palalau, peʼe ko te ʼofa ʼaē neʼe tou fai ki te famili pea mo te ʼu kaumeʼa. ʼE tou fakaʼaogaʼi koa totatou ʼu temi faigamālie moʼo fakahā tatatou ʼamanaki faka Kilisitiano ki niʼihi? Neʼe tou tokoni koa ki he tahi ke ina fakakaukauʼi te ʼu fakapapau ʼa te ʼAtua? ʼI te ʼaho fuli, tou fakatuputupu he ʼu meʼa lelei ʼi te faʼahi fakalaumālie, ʼo tou fai ke lahi totatou ʼu koloā fakalaumālie.—Mateo 6:20; 1 Petelo 2:12; 3:15; Sakopo 3:13.

Ke Lelei Takotou Sio

16. Koteā te ʼu meʼa ʼaē ʼe fai e Satana moʼo fakavaivai tatatou fia gāue ki te ʼAtua?

¹⁶ ʼE tou maʼuʼuli nei ʼi te ʼu temi ʼe ʼāsili faigataʼa maʼa te kau Kilisitiano. ʼE faigaʼi e Satana mo tana kau gāue ke nātou faka ʼepu ia te kehekehe ʼo te meʼa ʼaē ʼe lelei mo te meʼa ʼaē ʼe kovi, ia te meʼa ʼaē ʼe maʼa mo te meʼa ʼaē ʼe heʼemaʼa, ia te aga ʼaē ʼe tonu ke fai pea mo te aga heʼeʼaoga. (Loma 1:24-28; 16:17-19) Neʼe ina faka faigafua te ʼulihi ʼo totatou loto pea mo totatou ʼatamai, ʼaki te televisio peʼe ko te Internet. ʼE feala ki tatatou sio fakalaumālie ke fakapōʼuli, peʼe ʼepu, pea mo puli tatatou fakasiosio tonu ʼo ʼuhiga mo tana ʼu gāue kākā. ʼE feala ke vaivai tatatou fia mulimuli ki te kua foaki ʼo totatou maʼuli, pea mo tatatou “mālohi fakalaumālie,” mo kapau ʼe tou meʼa noaʼi tatatou ʼu lekula fakalaumālie.—Luka 9:62; Filipe 4:8.

17. ʼE ʼaoga feafeaʼi ia te tokoni ʼa Paulo moʼo taupau maʼu tatatou ʼu felogoi mo te ʼAtua?

¹⁷ Koia ko te ʼu palalau ʼa Paulo ki te kokelekasio ʼo Tesalonika ʼe ʼaoga kia tatou: “Ko te meʼa ʼaē ʼe loto ki ai te ʼAtua, ko tokotou maʼoniʼoni, ke koutou fakamamaʼo mai te folonikasio; ke koutou tahi poto ʼi te taupau ʼo tona ipu ʼi te maʼoniʼoni pea mo te fakaʼapaʼapa, ka mole ʼi te ʼu holi fakavale ki te ʼu felāveʼi fakasino ohage ko tona fai ʼi te ʼu puleʼaga ʼaenā ʼaē ʼe mole nātou ʼiloʼi te ʼAtua.” (1 Tesalonika 4:3-5, MN ) Ko ʼihi neʼe fakamavae ʼi te kokelekasio faka Kilisitiano ʼuhi ko te ʼu felāveʼi fakasino heʼeʼaoga, pea neʼe mole kei nātou faka maʼuhigaʼi te kua foaki ʼo tonatou maʼuli ki te ʼAtua. Neʼe mole kei nātou tokakaga ki tanatou ʼu felogoi mo te ʼAtua, koteʼuhi neʼe mole kei maʼuhiga te ʼu meʼa ʼaia ki tonatou maʼuli. Kae neʼe ʼui fēnei e Paulo: “Nee mole pauiʼi tatou e te Atua ki te agauli, kae ki te maonioni. Koia, kia ia ae e fakafisi ki te u akonaki aia, e mole ko he tagata e fakafisi ki ai, kae ko te Atua, iaʼia ae e ina foaki kia koutou tona Laumalie-Maonioni.”—1 Tesalonika 4:7, 8.

Koteā Takotou Fakatuʼutuʼu?

18. Koteā te fakatuʼutuʼu ʼaē ʼe tonu ke tou fai?

¹⁸ Kapau ʼe tou mahino ki te maʼuhiga ʼo te foaki ʼo totatou maʼuli kia Sehova ʼAtua, pea koteā ʼaē ʼe tonu ke tou fai? ʼE tonu ke tou fakatuʼutuʼu mālohi ke tou taupau maʼu he leʼo ʼo loto ʼe lelei ʼo ʼuhiga mo tatatou aga pea mo tatatou minisitelio. Neʼe fēnei te fakaloto mālohi ʼa Petelo: “Koutou taupau he leʼo ʼo loto ʼe lelei, ke feala ʼi te temi ʼaē ʼe fatufatuʼi ai koutou, ke ufiufi ia nātou ʼaē ʼe laukovi ki takotou aga ʼaē ʼe lelei ʼo ʼuhiga mo Kilisito.” (1 Petelo 3:16, MN ) ʼE lagi tou lotomamahi pea mo gaohi koviʼi tatou ʼuhi ko tatatou aga faka Kilisitiano, kae neʼe feiā mo Kilisito ʼuhi ko tana tui pea mo tana agatonu ʼaē ki te ʼAtua. Neʼe ʼui fēnei e Petelo: “Koia, mai tona ʼuhiga ʼaē ko Kilisito neʼe mamahi ʼi te kakano, mo koutou foki koutou teuʼi te faʼahiga manatu ʼaia, koteʼuhi ko ia ʼaē neʼe mamahi ʼi te kakano kua mavae mai te ʼu agahala.”—1 Petelo 4:1, MN.

19. Koteā ʼaē ʼe tou loto ke ʼui ʼo ʼuhiga mo tatou?

¹⁹ ʼIo, ko tatatou fakatuʼutuʼu mālohi ʼaē ke tou mulimuli ki totatou ʼuhiga ʼaē kua tou foaki totatou maʼuli, ʼe ina puipui anai ia tatou mai te ʼu fakahala ʼo te mālama ʼa Satana ʼaē ʼe mahaki ʼi te faʼahi fakalaumālie, ʼi te ʼu aga ʼaē ʼe tonu ke fai pea mo te faʼahi fakasino. Kae ʼe ʼi ai te tahi age meʼa ʼe maʼuhiga, ʼe tou toe falala moʼoni anai ʼe tou maʼu te ʼofa ʼo te ʼAtua, ʼaē ʼe lelei ʼaupito age ʼi te ʼu meʼa ʼaē ʼe feala ke foaki mai e Satana mo tana kau gāue. Koia ʼaua naʼa tou līaki te ʼofa ʼaē neʼe tou maʼu ʼi tatatou kamata ʼiloʼi te moʼoni. Kae ke tou hage ko te kau Kilisitiano ʼo te ʼuluaki sēkulō ʼi te kokelekasio ʼo Tiatile, ʼaē neʼe ʼui fēnei ʼo ʼuhiga mo nātou: “E au iloi tau u gaue, mo tou ofa, mo tau tui, mo tau tauhi, mo tau kataki, pea mo tau u gaue fakamuli e lahiʼage i tau u uluaki gaue.” (Apokalipesi 2:4, 18, 19) Ei ʼaua naʼa tou māfanaʼia ʼo ʼuhiga mo tatatou foaki ʼo totatou maʼuli, kae ke tou “kakaha ʼi te laumālie,” ʼo faʼafai ʼo aʼu ki te fakaʼosi—heʼe kua ōvi mai te fakaʼosi.—Loma 12:11, MN; Apokalipesi 3:15, 16.

[Kiʼi nota]

ʼE Kei Koutou Manatuʼi Koa?

• Koteā tona faka ʼuhiga ia te foaki ʼo totatou maʼuli?

• Ko te ʼu faʼifaʼitaki fea ʼo te temi muʼa pea mo te temi nei ʼo te ʼu kaugana neʼe foaki tonatou maʼuli ki te ʼAtua, ʼe tonu ke tou faʼifaʼitakiʼi?

• ʼE tonu ke feafeaʼi tatatou tauhi ki te ʼAtua?

• Koteā te fakatuʼutuʼu ʼaē ʼe tonu ke tou fai ʼo ʼuhiga mo tatatou foaki ʼo totatou maʼuli ki te ʼAtua?

[Paki ʼo te pasina 15]

Neʼe nofo agatonu ia Selemia logola tona gaohi koviʼi

[Paki ʼo te pasina 16]

Neʼe tuku e Ernest Beavor te faʼifaʼitaki lelei faka Kilisitiano maʼa tana ʼu fānau

[Paki ʼo te pasina 17]

Ko te lauʼi teau kau Fakamoʼoni tūpulaga ʼi te ʼu fale pilisoni ʼo Sepania neʼe nātou nofo agatonu

[Paki ʼo te pasina 18]

ʼI te ʼaho fuli, tou fakatuputupu he meʼa lelei ʼi te faʼahi fakalaumālie