Logo Tahi ʼi Te Gāue Ki Te ʼAtua ʼi Te ʼu Temi ʼAē ʼe Lelei Pea Mo Te ʼu Temi ʼAē ʼe Kovi

Neʼe fakamatala e Michel pea mo Babette Muller

“ ʼE ʼI AI taku logo kovi ʼe ʼau fia fakahā atu ʼo ʼuhiga mo koulua,” ko te ʼui ʼaia e te tōketā. “ ʼE feala ke ke lītuʼa ki tou maʼuli faka misionea ʼi Afelika.” ʼI tana haga ki toku ʼohoana, ko Babette, ʼo ʼui maʼana, “ ʼE ke maʼu te kosea ʼi te huhu.”

Neʼe ma punamaʼuli ʼi te ʼu palalau ʼaia. ʼE lahi te ʼu meʼa neʼe hake ʼi tomā ʼatamai. Neʼe ma ʼui pe ko te ʼaʼahi ʼaia ki te tōketā ʼe ko he sivi fakaʼosi pe anai. Neʼe kua ʼosi totogi ʼoma tohi folau ki Penine, ʼi te Potu Hihifo ʼo Afelika. Neʼe ma ʼamanaki ʼe ma toe liliu kiai ʼi te lolotoga vāhaʼa. ʼI te katoa ʼo te taʼu 23 ʼo tomā ʼohoana, neʼe hoko kia māua te ʼu temi ʼe lelei pea mo te ʼu temi ʼe kovi. Neʼe ma lotohoha pea mo matataku, ʼi te temi nei kua ma teuteu ke ma tauʼi te kosea.

Tou kamata mai te kamataʼaga. Neʼe tupu ia Michel ʼi Sepetepeli ʼo te taʼu 1947, ko Babette ʼi ʼAukusito 1945. Neʼe ma lalahi ʼi Falani pea neʼe ma ʼohoana ʼi te taʼu 1967. Neʼe ma nonofo ʼi Palesi. ʼI te pogipogi uhu ʼi te kamata ʼo te taʼu 1968, neʼe tuai ia Babette ki tana gāue. Neʼe fisifisi te fafine ʼi tomā matapā pea neʼe ina foaki age tana kaupepa faka lotu; pea neʼe toʼo e Babette. Neʼe ʼui mai e te fafine: “ ʼE feala koa ke ʼau toe liliu mai mo toku ʼohoana ʼo palalau mo koe pea mo tou ʼohoana?”

Neʼe manatuʼi e Babette tana gāue. Neʼe loto ia ke ʼalu la te fafine, koia neʼe ina ʼui age ai, “Fai pe kiai.”

ʼE fakamatala fēnei e Michel: “Neʼe mole ʼau fia logo ki te lotu, kae neʼe ʼau fakatokagaʼi te kaupepa, pea neʼe ʼau lau ai. ʼI he ʼu ʼaho ki muli age, ko te fafine, ko Jocelyne Lemoine, neʼe toe liliu mai mo tona ʼohoana, ko Claude. Neʼe poto ʼaupito ia ʼi te fakaʼaogaʼi ʼo te Tohi-Tapu. Neʼe ina tali ki taku ʼu fehuʼi fuli. Neʼe ʼau punamaʼuli ai.

“Ko Babette neʼe tauhi lelei ki te lotu Katolika kae neʼe mole ʼi ai hana Tohi-Tapu, ʼaē neʼe tahitahiga tona maʼu e te kau Katolika. Neʼe lotohoha ʼaupito ʼi tana sio pea mo lau te Folafola ʼa te ʼAtua. ʼI tamā ako neʼe ma ʼiloʼi ai ʼe lahi te ʼu manatu ʼo te lotu ʼaē neʼe akoʼi mai neʼe hala. Neʼe kamata ai tamā palalau ki tomā ʼu kāiga pea mo tomā ʼu kaumeʼa ʼo ʼuhiga mo te ʼu meʼa ʼaē ʼe ma lolotoga ako. ʼI Sanualio ʼo te taʼu 1969 neʼe ma papitema ai ko te kau Fakamoʼoni ʼa Sehova. Neʼe mole fualoa pea neʼe papitema te toko hiva ʼi tomā famili pea mo tomā ʼu kaumeʼa.”

Gāue ʼi Te Faʼahi ʼe ʼAoga Kiai He ʼu Kaugā Fai Faka Mafola

ʼI te hili pe ʼo tomā papitema, neʼe fēnei leva tamā fakakaukau: ‘ ʼE mole hamā fānau. He koʼe koa ʼe mole ma kau ki te minisitelio katoa?’ Koia ʼi te taʼu 1970 neʼe ma mavae ʼi tamā ʼu gāue, ʼo ma toʼo te pionie katoa, pea neʼe ma ʼolo ki te kiʼi kolo ko Magny-Lormes, ʼe ōvi ki Nevers, ʼi te lotomalie ʼo Falani.

Neʼe ko he gāue faigataʼa. Neʼe faigataʼa tamā maʼu ni hahaʼi ʼe nātou fia ako te Tohi-Tapu. Neʼe mole feala ke ma maʼu hamā gāue fakamālama, koia neʼe kua veliveli tamā falā. ʼI ʼihi temi ʼe ma kai pe ki te ʼu putete. Lolotoga te temi nive neʼe hifo te momoko ki te 22° C. Neʼe ma higoaʼi te temi ʼaē neʼe ma nonofo ai, ko te temi ʼo te ʼu pipi sino kovi e fitu.​—Senesi 41:⁠3.

Kae neʼe lagolago ia Sehova kia māua. ʼI he tahi ʼaho kua teitei pe ke mole ʼi ai hamā meʼa kai, neʼe ʼaumai e te tagata tufa tohi te foʼi puha ʼe tuku ai te folomasi neʼe fakamomoli mai e te tēhina ʼo Babette. ʼI te tahi ʼaho ʼi tamā tau mai ki tomā ʼapi ʼi te hili ʼo tamā fai faka mafola, neʼe ma maʼu ʼihi ʼi tomā ʼu kaumeʼa neʼe nātou ʼōmai ia kilometa e 500 ʼo fakasiosio māua. ʼI tanatou ʼosi logo ki te ʼu faigataʼaʼia ʼaia, neʼe fafaʼo e te ʼu tēhina ʼaia tanatou ʼu motokā e lua ʼo fonu ko te ʼu meʼa kai maʼa māua.

ʼI te hili ʼo te taʼu e tahi vaelua, neʼe hinoʼi maʼua e te Sosiete ko te ʼu pionie makehe. ʼI te ʼu taʼu e fā ki muli mai, neʼe ma gāue ʼi Nevers, pea ʼi Troyes, pea moʼo fakaʼosi ʼi Montigny-lès-​Metz. ʼI te taʼu 1976, neʼe fakanofo ia Michel ko te tagata taupau faka silikosikilipisio ki te potu toga-hihifo ʼo Falani.

Hili kiai taʼu e lua, ʼi te lolotoga ʼo te ako ʼa te kau tagata taupau faka silikosikilipisio, neʼe ma maʼu te tohi mai te Sosiete Watch Tower ʼo ina fakaafe māua ke ma ʼolo ʼo gāue faka misionea ʼi te tahi fenua; neʼe ʼui e te tohi ʼe feala ke ma fili, ʼi te fenua ko Tchad pea mo Burkina Faso (ʼi te temi muʼa neʼe ko te Haute-Volta). Neʼe ma fili te fenua ko Tchad. Mole fualoa pea neʼe ma maʼu te tahi tohi, ʼe ina hinoʼi māua ke ma ʼolo ʼo gāue ʼi te telituale ʼe tokaga kiai te filiale ʼo Tahisi. Neʼe ma kole ke ma ʼolo ki Afelika, ko he fenua lahi, kae mole faʼa fualoa pea neʼe ma ʼolo ki te motu veliveli!

Gāue ʼi Te Potu Toga ʼo Te Pasifika

Ko Tahisi ʼe ko he motu matalelei ʼe tuʼu ʼi te Potu Toga ʼo te Pasifika. ʼI tamā kaku atu, neʼe ko te toko teau tēhina neʼe ʼōmai ʼo tali māua ʼi te malaʼe vakalele. Neʼe nātou fakatalitali māua mo te ʼu kahoa fisiʼi teu, pea logope la tamā gaʼegaʼe ʼi te loaloaga ʼo tamā folau ʼaē mai Falani, neʼe ma fiafia ʼaupito.

Hili māhina e fā ki tama kaku mai ki Tahisi, neʼe ma ʼolo ʼi te kiʼi vaka neʼe fonu ko te uta niu matuʼu. Hili kiai ʼaho e nima pea ma aʼu ki te koga meʼa ʼaē neʼe hinoʼi māua kiai​—ko te motu ʼo Nuku Hiva ʼi te ʼu motu Marquises. Neʼe ko te toko 1 500 hahaʼi neʼe nonofo ʼi te motu, kae neʼe mole ʼi ai he ʼu tēhina. Ko māua pe.

Ko te ʼu agaaga ʼo te maʼuli neʼe kei hage pe ko te temi ʼāfea ʼi te temi ʼaia. Neʼe ma nonofo ʼi te kiʼi ʼapi veliveli neʼe fai ʼaki te simā pea mo te ʼu kofe. Neʼe mole ʼi ai te hila. Neʼe ʼi ai tamā foʼi tane vai pea neʼe tahitahiga pe tona haʼele, kae neʼe mole maʼa te vai. Kae neʼe lahi pe tamā fakaʼaogaʼi te vai ʼo te ʼua ʼo ma tānaki ki he foʼi tane. Neʼe mole ʼi ai he ʼu ala ʼe lelei, ʼe gata pe ki te ʼu kiʼi ala kele.

Ke feala hamā aʼu ki te ʼu faʼahi mamaʼo ʼo te motu, neʼe ma lue te ʼu hōsi. Ko te ʼu meʼa heka hōsi neʼe fai ʼaki te ʼakau​—neʼe mole makalūlū, tāfito la kia Babette, ʼaē neʼe mole heʼeki heka ki he hōsi ʼi te temi muʼa. Neʼe ma ʼave te hele huo moʼo tuʼusi ʼo te ʼu kofe ʼaē kua tō ki te ala. Neʼe kehekehe ʼaupito mo tomā maʼuli ʼaē ʼi Falani.

Neʼe ma fai te ʼu fono ʼi te ʼu ʼAhotapu, logope la neʼe ko māua toko lua pe. ʼI te kamataʼaga neʼe mole ma fai he tahi ʼu fono, koteʼuhi neʼe ma toko lua pe. Kae neʼe ma lau fakatahi te ʼu alatike ʼaē ʼe fai ʼi te fono.

Hili kiai he ʼu kiʼi māhina, pea neʼe ma fakatotonu ʼe mole lelei tamā fai feiā. ʼE fakamatala fēnei e Michel: “Neʼe ʼau ʼui age kia Babette, ‘ ʼE tonu ke tā teuteu fakalelei. ʼE feala ke ke heka ki hē, pea ʼe ʼau heka anai ʼi henī. ʼE ʼau kamata anai ʼaki te faikole, ʼosi ʼaia pea tā fai te Ako ʼo Te Minisitelio Faka Teokalatike pea mo te Fono Gāue. ʼE ʼau fai anai te ʼu fehuʼi, pea ʼe ke tali mai anai kiai, tatau aipe peʼe ko koe tokotahi pe ʼi te koga fale.’ ʼE lelei ke tā fai te faʼahi ʼaia koteʼuhi ʼe faigafua hatā liliu ʼo vaivai ʼi te faʼahi fakalaumālie heʼe mole ʼi ai he kokelekasio.”

Neʼe mole ʼōmai vave te hahaʼi ki tamā ʼu fono faka Kilisitiano. Neʼe ma toko lua pe ʼi te ʼu māhina e valu. Ki muli age, neʼe haʼu he tahi ʼo kau ki te fono, pea mo te toko lua, pea ʼi ʼihi temi ʼe tautau ʼōmai te toko tolu. ʼI te tahi taʼu, neʼe ko māua pe toko lua ʼaē neʼe ma kamata fai te Taumafa ʼo te ʼAliki ʼaē ʼe fai ʼi te taʼu fuli. Hili kiai te ʼu minuta e hogofulu, pea ʼōmai te ʼu hahaʼi, koia neʼe ʼau tuʼu muʼa pea neʼe ʼau toe kamata te akonaki.

Ia ʼaho nei, ko te toko 42 kaugā fai faka mafola pea ko te ʼu kokelekasio e 3 ʼi te ʼu motu Marquises. Logope la ko te koga lahi ʼo te gāue neʼe fai ʼe nātou ʼaē neʼe mumuli mai, ko ʼihi hahaʼi ʼaē neʼe ma fai faka mafola kiai kua nātou ʼosi papitema ʼi te temi nei.

Ko ʼOtatou ʼu Tēhina ʼe Maʼuhiga

Neʼe ma ako te loto faʼa kātaki ʼi Nuku Hiva. Neʼe tonu ke ma talitali ki te ʼu meʼa fuli ʼaē, gata pe ki te ʼu meʼa maʼuhiga ʼo te maʼuli. Ohage la, kapau ʼe koutou fia fai ki he tohi, ʼe koutou faitohi ʼo kole, pea ʼe koutou talitali ia māhina e lua peʼe tolu ia muʼa ʼo tona maʼu.

Ko te tahi age meʼa neʼe ma ako ai ko te maʼuhiga ʼo te ʼu tēhina. ʼI tamā ʼaʼahi ia Tahisi pea mo tamā kau ki te fono pea mo fagono ki te hiva ʼa te ʼu tēhina, neʼe tupu ai tamā fia tagi. ʼE moʼoni ʼe faigataʼa te maʼuli mo ʼihi tēhina, kae kapau ʼe koutou nonofo tokotahi, ʼe mahino ai kia koutou ʼe ko he meʼa lelei te fakatahi fakatautehina. ʼI te taʼu 1980 neʼe fakatuʼutuʼu e te Sosiete ke ma toe liliu ki Tahisi ʼo gāue ʼi te silikosikilipisio. ʼI te faʼahi ʼaia neʼe lahi ai tomā fakaloto mālohiʼi ʼaki te tali kāiga fakafiafia ʼo te ʼu tēhina pea mo tanatou ʼofa ʼaē ki te gāue fai faka mafola. Neʼe ma fakaʼaogaʼi te ʼu taʼu e tolu ʼo gāue ʼi te silikosikilipisio ʼi Tahisi.

Mai Te Motu Ki Te Tahi Motu

Ki muli age neʼe hinoʼi māua ke ma ʼolo ʼo nonofo ʼi te ʼapi faka misionea ʼi Raïatéa, ko te tahi motu ʼo te Pasifika, pea neʼe ma nonofo ʼi ai ia taʼu e lua. Hili tamā gāue ʼi Raïatéa, neʼe hinoʼi māua ki te gāue faka silikosikilipisio ʼi te motu ʼo Tuamotu. ʼI te ʼu motu ʼaē e 80, neʼe ma ʼaʼahi te ʼu motu e 25 ʼo ma feʼoloʼaki ʼi te vaka. Neʼe faigataʼa ia kia Babette. ʼI te temi fuli pe ʼaē ʼe ma folau ai ʼi he vaka, ʼe mahaki ia.

ʼE ʼui fēnei e Babette: “ ʼE ko he meʼa faikehe! Neʼe ʼau mahaki ʼi te temi katoa ʼaē neʼe ma ʼolo ai ʼi te vaka. Kapau ʼe ma ʼi te tai ia ʼaho e nima, pea ʼe ʼau mahaki ia ʼaho ʼaia e nima. Neʼe mole ʼi ai he faitoʼo neʼe ʼaoga kia ʼau. Kae, māʼiape la toku mahaki, neʼe matalelei te tai. ʼE matalelei tatatou sio ʼaē kiai. ʼE faiga te ʼu dauphins ke nātou fai lele mo te vaka. ʼE nātou tautau hopohopo ʼi te tai mo kapau ʼe koutou pasipasi!”

ʼI te hili ʼo taʼu e nima ʼi te gāue faka silikosikilipisio, pea neʼe toe hinoʼi māua ki Tahisi ia taʼu e lua pea neʼe ma toe fakaʼaogaʼi te temi lelei ʼaia ʼi te gāue fai faka mafola. Neʼe tuʼa lua te tuputupu ʼo tomatou kokelekasio heʼe ʼi te taʼu e tahi vaelua neʼe kamata ʼaki te toko 35 ʼo aʼu ki te toko 70 kaugā fai faka mafola. Ko te toko hogofulu-ma-lua ia nātou ʼaē neʼe ako mo māua neʼe papitema ʼi muʼa ʼo tama mavae ʼaē ʼi ai. Ko ʼihi ia nātou ʼaia ko te ʼu tagata ʼāfea ʼi te kokelekasio ʼi te temi nei.

Neʼe ko taʼu e 12 neʼe ma gāue fakatahi ai ʼi te Potu Toga ʼo te Pasifika. Pea neʼe ma maʼu leva te tohi mai te Sosiete ʼo ina ʼui mai ʼe mole kei he ʼaoga ʼo te ʼu misionea ʼi te ʼu motu ʼaia, koteʼuhi kua mālolohi te ʼu kokelekasio ʼi te temi nei. Neʼe ko te toko 450 kaugā fai faka mafola ʼi tamā kaku atu ki Tahisi pea ʼi tamā mavae mai ai neʼe fakalaka ʼi te 1 000 tupu.

Kua Ma Kaku Ki Afelika!

Neʼe ma toe liliu ki Falani, pea hili kiai te māhina e tahi vaelua, pea neʼe toe hinoʼi māua e te Sosiete ke ma ʼolo ki he tahi fenua​—ko Penine, te Potu Hihifo ʼo Afelika. Neʼe ma fia ʼolo ki Afelika ia taʼu e 13 ki muʼa atu, koia neʼe ma fiafia ʼaupito ai.

Neʼe ma tau ki Penine ʼi te ʼaho 3 ʼo Novepeli ʼo te taʼu 1990, pea neʼe ma kau ʼi te ʼu ʼuluaki misionea ʼaē neʼe ʼōmai ʼi te hili pe ʼo te fakagafua ʼo te gāue fai faka mafola ʼo te Puleʼaga ʼaē neʼe tapuʼi ia taʼu e 14. Neʼe ko he meʼa fakafiafia ʼaupito. Neʼe mole faigataʼa tamā nonofo ʼi ai, koteʼuhi ʼe tatau te maʼuli ʼo te hahaʼi mo te ʼu motu ʼo te Pasifika. ʼE agalelei ʼaupito te hahaʼi pea ʼe nātou tali kāiga. ʼE feala hakotou tutuʼu ʼi te ala pea koutou palalau mo he tahi pe.

ʼI te hili pe ʼo he ʼu kiʼi vāhaʼa ki tamā tau mai ki Penine, neʼe tokagaʼi e Babette ʼe ʼi ai te foʼi fula ʼi tona huhu. Koia neʼe ma ʼolo ai ki te kilinike ʼe ōvi ki te filiale foʼou. Neʼe vakaʼi ia e te tōketā pea ina ʼui age ki ai ʼe ʼaoga ke tafa ia ia. ʼI te ʼaho ake neʼe ma ʼolo ki te tahi kilinike pea neʼe ma sio ai ki te tōketā papālagi, ko te tōketā vakaʼi fatu ʼe haʼu mai Falani. Neʼe ina toe ʼui mai ʼe tonu ke ma foimo ʼolo ki Falani ke feala ai he tafa ʼo Babette. Hili pe ʼaho e lua pea ma folau ki Falani.

Neʼe ma lotomamahi ʼi tamā mavae ʼi Penine. ʼUhi ko te faka ʼāteaina ʼo te ʼu lotu ʼi te fenua, neʼe fiafia ʼaupito te ʼu tēhina ʼi te ʼōmai ʼo te ʼu misionea foʼou, pea neʼe ma fiafia ʼaupito ʼi tamā ʼi ai. Koia neʼe ma lotomamahi ʼi tamā mavae ʼi te fenua ʼaia ka neʼe ma nonofo pe ʼi ai ʼi he ʼu kiʼi vāhaʼa.

ʼI tamā kaku atu ki Falani, neʼe sivi ia Babette e te tōketā fai tafa, pea neʼe ina fakamoʼoni age ʼe ʼaoga ke tafa ia ia. Neʼe foimo tafa atu aipe e te ʼu tōketā, ʼo nātou fai te tafa veliveli, pea neʼe mavae ia Babette mai te lopitali ʼi te ʼaho ake. Neʼe ma manatu kua ʼosi leva te faʼahi ʼaia.

Hili kiai ʼaho e valu, neʼe ma toe ʼolo ki te tōketā fai tafa. Neʼe ina fakahā mai ʼe maʼu e Babette te kosea ʼi tona huhu.

ʼI tana fakakaukauʼi ʼaki te temi pe koteā te meʼa ʼaē neʼe ina logoʼi, neʼe ʼui e Babette: “ ʼI te kamataʼaga, neʼe siʼisiʼi toku lotomamahi ia Michel. Kae ʼi te ʼaho ake, neʼe ʼau logo kovi. Neʼe mole kei feala haku kalaga. Neʼe mole kei feala haku malimali. ʼI taku manatu ʼe tonu ke ʼau mate. Kia ʼau, ko te kosea ʼe fakatatau ki te mate. Neʼe fēnei taku manatu, ʼE tonu ke ma fai ia meʼa fuli ʼe feala ke fai.”

Te Tauʼi ʼo Te Kosea

Neʼe ma logo ki te logo kovi ʼi te Feliaono, pea neʼe fakatuʼutuʼu ke toe tafa ia Babette ʼi te Feliatolu. Neʼe ma nonofo ʼi te taʼokete ʼo Babette, kae neʼe toe mahaki foki mo ia, koia neʼe mole feala ai ke ma toe nonofo ʼi tona kiʼi koga fale.

Neʼe mole ma ʼiloʼi pe ma ʼolo kifea. Pea neʼe ma manatuʼi ia Yves pea mo Brigitte Merda, ko he taumatuʼa neʼe ma nonofo ai ʼi te temi ki muʼa atu. Ko te taumatuʼa ʼaia neʼe agalelei ʼaupito kia māua. Koia neʼe ma telefoni ai kia Yves pea neʼe ma ʼui age ʼe ʼaoga ke tafa ia Babette pea ʼe mole ma ʼiloʼi peʼe ma ʼolo ʼo nonofo ʼifea. Neʼe ma ʼui age foki ki ai ʼe ʼaoga ke maʼu he gāue ʼa Michel.

Neʼe ʼui age e Yves kia Michel ke gāue kia ia ʼi tona ʼapi. Neʼe lagolago te ʼu tēhina pea mo nātou fakaloto mālohiʼi māua ʼaki tanatou fai kia māua te ʼu gāue lelei. Neʼe nātou toe tokoni paʼaga foki kia māua. Neʼe totogi e te Sosiete te tafa ʼo Babette.

Neʼe maʼuhiga tona tafa. Neʼe tonu ke toʼo e te ʼu tōketā te foʼi fula lymphatiques pea mo te huhu. Neʼe nātou kamata aipe te chimiothérapie. Hili kiai te vāhaʼa, pea neʼe feala te mavae ʼa Babette ʼi te lopitali, kae neʼe tonu ke toe liliu ʼi te hili ʼo te ʼu vāhaʼa fuli e tolu ʼo hoko atu tona faitoʼo.

Lolotoga te temi ʼaē neʼe fai ai te faitoʼo ʼo Babette, neʼe tokoni ʼaupito te ʼu tēhina ʼi te kokelekasio kia māua. Ko he tuagaʼane neʼe ina maʼu foki te kosea ʼi te huhu neʼe ina fakaloto mālohiʼi māua. Neʼe ina fakahā age kia Babette te meʼa ʼaē neʼe ʼamanaki ia kiai pea mo te meʼa ʼaē neʼe ina maʼu ai he fīmālie lahi.

Kae, neʼe ma tuʼania ʼo ʼuhiga mo tomā ka haʼu. ʼI tanā mahino ki te faʼahi ʼaia, neʼe ʼave māua e Michel pea mo Jeanette Cellerier ki te fale kai.

Neʼe ma ʼui age kia nāua ʼe tonu ke ma mavae ʼi te gāue faka misionea pea ʼe mole kei feala anai hamā toe liliu ki Afelika. Kae, neʼe ʼui mai e te Tēhina Cellerier: “Koteā? Ko ai ʼaē ʼe ina ʼui ʼe tonu ke koulua mavae ʼi te gāue? Ko te Kolesi Pule? Ko te ʼu tēhina ʼaē ʼi Falani? Ko ai ʼaē neʼe ina ʼui atu te meʼa ʼaia?”

“ ʼE mole he tahi neʼe ina ʼui mai,” ko taku tali age ʼaia, “ko ʼau pe ia.”

“Kailoa, kailoa!” ko te ʼui ʼaia ʼa te tēhina Cellerier. “ ʼE koulua toe liliu anai kiai!”

Neʼe hoa atu ki te chimiothérapie te radiothérapie, ʼaē neʼe ʼosi ʼi te fakaʼosi ʼo ʼAukusito ʼo te taʼu 1991. Neʼe ʼui mai e te ʼu tōketā ʼe mole he faigataʼaʼia ʼo tamā toe liliu ki Afelika, kae ʼe tonu ke tatuʼu ia Babette ki Falani ʼo sivi tuʼumaʼu ai.

Toe Liliu Ki Penine

Koia neʼe ma faitohi ai ki Brooklyn, ʼo kole kiai te faka fealagia ʼaē ke ma toe liliu ʼo gāue faka misionea. Neʼe ma tuʼaniaʼi te tali ʼaē ka fai mai. ʼE hage neʼe loaloaga te fakalaka ʼo te ʼu ʼaho. Pea, neʼe mole kei feala ke talitali fualoa ia Michel, koia neʼe telefoni ai ia ki Brooklyn pea neʼe ina fehuʼi kiai pe kua nātou maʼu tamā tohi. Neʼe nātou ʼui mai neʼe nātou vakaʼi tamā tohi​—kua feala hamā toe liliu ki Penine! Neʼe ma loto fakafetaʼi ai kia Sehova!

Neʼe fai e te famili Merda he lafeti ʼo ʼuhiga mo te logo ʼaia. ʼI Novepeli ʼo te tau 1991 neʼe ma toe liliu ki Penine, pea neʼe fai e te ʼu tēhina te meʼa kai ʼo fakatalitali māua!

ʼE hage kua lelei ia Babette ʼi te temi nei. Neʼe ma tatuʼu ki Falani ʼo fai tona ʼu sivi, pea neʼe mole kei toe maʼu e te ʼu tōketā he agaaga ʼo te kosea. Neʼe ma toe liliu ki tamā gāue faka misionea. Neʼe ma logoʼi ʼe ʼaoga ke ma gāue ʼi Penine, pea neʼe tapuakina e Sehova tamā gāue. Talu tamā toe liliu mai neʼe ko te toko 14 hahaʼi neʼe kua papitema. Ko te toko nima ia nātou ʼaia kua pionie katoa ʼi te temi nei, pea ko te tahi neʼe fakanofo ko te tagata faifekau faka minisitelio. Neʼe ma sisio foki ki te tuputupu ʼo tomatou kiʼi kokelekasio pea mo tona vaheʼi ko te ʼu kokelekasio e lua.

ʼI te lolotoga ʼo te ʼu taʼu, neʼe ma gāue taumatuʼa kia Sehova pea neʼe ma maʼu te ʼu tapuakina lahi pea neʼe ma ʼiloʼi te ʼu hahaʼi ʼe agalelei. Kae neʼe akoʼi foki māua pea mo fakaloto mālohiʼi e Sehova ke ma kātaki ʼo tauʼi tomā ʼu fihifihia. Ohage ko Sopo, neʼe mole ma mahino tuʼumaʼu ki te ʼu meʼa ʼaē neʼe hoko, kae neʼe ma ʼiloʼi ʼe tokoni tuʼumaʼu ia Sehova kia māua. ʼE ʼui fēnei ʼi te Folafola ʼa te ʼAtua: “Koʼeni! Ko te nima ʼo Sehova neʼe mole liliu ia ʼo nounou ke feala ai hokotou hāofaki, peʼe ko tona taliga ʼe mole liliu ia ʼo mamafa ki te fagono.”​—Isaia 59:⁠1.

[Paki ʼo te pasina 23]

Ko Michel pea mo Babette Muller ʼi te ʼu mutuʼi meʼa ʼo te fenua ʼo Penine

[Paki ʼo te pasina 25]

Ko Te gāue faka misionea ʼi te lotolotoiga ʼo te kau Polinesia ʼi Tahisi