Neʼe Nātou Fai Te Finegalo ʼo Te ʼAtua

ʼE Papitemaʼi e Filipo Te Etiopea Maʼu Tuʼulaga

LOLOTOGA tana ʼalu ʼi tana saliote, neʼe fakaʼaogaʼi fakalelei e te Etiopea tona temi. Neʼe lautohi leʼolahi​—he ko he meʼa neʼe fai māhani e te hahaʼi folau ʼo te ʼuluaki sēkulō. Ko te tagata ʼaia neʼe ko he tagata maʼu tuʼulaga “ ʼi te nofo hau ʼa Kanitase te fineʼaliki ʼo Etiopea.”a Neʼe ina “puleʼi tona ʼu koloā katoa”​—ʼio, neʼe ko ia ko te tagata taupau ʼo te ʼu koloā. Ko te tagata maʼu tuʼulaga ʼaia neʼe ina lolotoga lau te Folafola ʼa te ʼAtua ke feala hana maʼu te ʼatamai mālama.​—Gāue 8:​27, 28.

Neʼe ōvi mai ki ai te tagata tala evaselio ko Filipo. Neʼe takitaki ia ia e te ʼaselo ke ʼalu ki te potu tonu ʼaia, pea ʼi te temi ʼaia neʼe ʼui age ki ai: “Fakaōvi atu pea ke ke heka ki te saliote ʼaia.” (Gāue 8:26, 29) Neʼe lagi manatu fēnei ia Filipo, ‘Ko ai koa te tagata ʼaenī? Koteā koa te meʼa ʼaē ʼe ina lau? He koʼe neʼe taki ʼau kia ia?’

ʼI te lele ʼa Filipo ia tafa ʼo te saliote, neʼe logo ia ki te lau e te tagata Etiopea te ʼu kupu ʼaenī: “Ohage ko he ōvi neʼe ʼave ke tāmateʼi, pea ohage ko he akeno ʼe fakalogologo ʼi muʼa ʼo tona tagata fai kosi, pea ʼe mole ina avahi tona gutu. Lolotoga tona fakalainoaʼi neʼe toʼo ia te ia te fakamāu. Ko ai koa ʼaē ka ina fakamatala anai te ʼu meʼa fuli ʼo tona taʼiake? Koteʼuhi kua toʼo tona maʼuli ʼi te kele.”​—Gāue 8:32, 33.

Neʼe ʼiloʼi atu aipe e Filipo ia te vaega ʼaia. ʼE ko te vaega ʼe tuʼu ʼi te tohi ʼa Isaia. (Isaia 53:​7, 8) Neʼe mole mahino te tagata Etiopea ki te meʼa ʼaē neʼe ina lau. Neʼe kamata ai e Filipo te fai palalau ʼo ina fehuʼi age ki ai: “ ʼE ke mahino moʼoni koa ki te meʼa ʼaē ʼe ke lau?” Neʼe tali age e te tagata Etiopea: “ ʼO feafeaʼi la haku mahino mo kapau ʼe mole takitaki ʼau e he tahi?” Pea ina kole age kia Filipo ke kake ake ki tana saliote.​—Gāue 8:​30, 31.

“Koteā Koa ʼAē ʼe Ina Tāʼofi ʼAu Ke ʼAu Papitema?”

Neʼe ʼui age e te tagata Etiopea kia Filipo “ ʼE ʼau kole atu kia koe, ko ai koa ʼaē ʼe talanoa kiai te polofeta? ʼE talanoa koa ia kia ia totonu peʼe ki he tahi tagata?” (Gāue 8:​34) Ko te mole mahino ʼa te Etiopea neʼe mole ko he meʼa fakapunamaʼuli, he neʼe ko he misitelio talu mai fualoa te “ōvi,” peʼe ko te “tagata kaugana,” ʼaē ʼe talanoa kiai te lea faka polofeta ʼa Isaia. (Isaia 53:11) Neʼe lagi mahino lelei ai ki te tagata Etiopea ʼi te temi ʼaē neʼe fakahā age ai e Filipo “te logo lelei ʼo ʼuhiga mo Sesu”! Hili kiai te kiʼi temi nounou pea ʼui age e te tagata Etiopea: “Koʼeni te vai; koteā koa ʼaē ʼe ina tāʼofi ʼau ke ʼau papitema?” Koia neʼe papitemaʼi ai e Filipo ia ia ʼi te moʼi temi pe ʼaia.​—Gāue 8:35-38.

Neʼe vave fau koa tona papitema? Kailoa! Ko te tagata Etiopea neʼe ko te Sutea poloselite.b Koia neʼe kua tauhi ia kia Sehova ʼaki te ʼatamai mālama ʼo ʼuhiga mo te Tohi-Tapu, ʼo kau kiai mo te ʼu lea faka polofeta ʼo ʼuhiga mo te Mesia. Kae, neʼe mole heʼeki katoa tana mahino ki te ʼu meʼa ʼaia. ʼI te temi ʼaia kua mālama ai ki te tuʼulaga ʼo Sesu Kilisito, neʼe mahino ai ki te tagata Etiopea te meʼa ʼaē neʼe fakamaʼua age e te ʼAtua kia ia pea neʼe kua lotolelei ke ina fakahoko. Neʼe kua ʼaoga leva ke papitemaʼi.​—Mateo 28:18-20; 1 Petelo 3:21.

ʼOsi ʼaia, pea “ ʼave fakavilivili e te laumālie ʼa Sehova ia Filipo.” Neʼe fekauʼi ia ki he tahi gāue. Ko te tagata Etiopea “neʼe hoko atu tona fagona ʼi te fiafia.”​—Gāue 8:​39, 40.

Te Ako Maʼa Tatou

ʼI totatou ʼuhiga kaugana ʼa Sehova ʼi te temi nei, ʼe tou maʼu te maʼua ʼaē ke tou tokoni ki te hahaʼi ʼaē ʼe lotolelei, ke nātou ako te moʼoni ʼo te Folafola ʼa te ʼAtua. Tokolahi ʼe fua lelei tanatou fakahā te logo lelei ki niʼihi lolotoga tanatou feʼoloʼaki peʼe ʼi he tahi ʼu ʼaluʼaga faigamālie. ʼAki te faka mafola ʼo te Puleʼaga, ko te lauʼi teau afe hahaʼi ʼi te taʼu fuli, ʼe nātou foaki tonatou maʼuli kia Sehova ʼAtua ʼi te papitema.

ʼE mahino ia, ʼe mole tonu ke papitemaʼi fakavilivili te ʼu hahaʼi foʼou. ʼUluaki ʼe tonu ke nātou maʼu te ʼatamai mālama totonu ʼo ʼuhiga mo Sehova ʼAtua pea mo tona ʼAlo ko Sesu Kilisito. (Soane 17:3) Pea ʼe tonu ke nātou fakahemala, ʼo nātou līaki te aga ʼaē ʼe kovi pea ke nātou tafoki mai ʼo nātou mulimuli ki te ʼu lekula ʼa te ʼAtua. (Gāue 3:​19) ʼE mole ko he meʼa faigafua, tāfito la mo kapau ko te ʼu manatu pea mo te ʼu aga ʼaē ʼe kovi ʼe kua tauaka ia kita. Logope la ʼe mole ko he meʼa faigafua ki te ʼu hahaʼi foʼofoʼou hanatou liliu ko he ʼu Kilisitiano, kae ʼe feala ke nātou ʼamanaki ki he ʼu tapuakina lahi ʼi tanatou ʼu felogoi ʼaia mo Sehova ʼAtua. (Vakaʼi ia Luka 9:​23; 14:25-​33.) Ko nātou ʼaē ko te kau Fakamoʼoni ʼa Sehova, ʼe nātou takitaki ʼaki he loto fiafia te ʼu hahaʼi foʼou ki te kautahi ʼaē ʼe fakaʼaogaʼi e te ʼAtua moʼo fakahoko ʼo tona finegalo. (Mateo 24:45-​47) Ohage ko te tagata Etiopea, ʼe fiafia anai te ʼu hahaʼi foʼou ʼaia, ʼi tanatou ako te ʼu meʼa ʼaia pea mo nātou mulimuli ki te ʼu meʼa ʼaē ʼe fakamaʼua age e te ʼAtua kia nātou.

[Kiʼi nota ʼi te lalo pasina]

[Talanoa ʼo te pasina 8]

He Koʼe Neʼe Higoaʼi Ko Te Enuke?

ʼI te tohi ʼo Gāue kapite 8, neʼe talanoa ai ki te Etiopea ohage ko he “enuke.” Kae, mai tona ʼaluʼaga ʼaē neʼe mole tali e te Lao ʼa Moisese he tagata neʼe sele ke kau ki te kokelekasio, ʼe mahino ia ko te tagata ʼaia neʼe mole ko he enuke ʼi tona ʼuhiga moʼoni. (Teutalonome 23:1) Ko te kupu faka Keleka ʼo ʼuhiga mo te “enuke,” ʼe feala ke faka ʼuhiga ki he tagata māʼoluga. Koia, ko te tagata Etiopea neʼe ko he tagata maʼu tuʼulaga ʼe gāue ki te fineʼaliki ʼo Etiopea.