ʼE Maʼu e Te Famili Katoa ʼa Sehova Te Logo Tahi Maʼuhiga
“Koʼeni! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!”—Pesalemo 133:1.
1. E feafeaʼi te ʼaluʼaga ʼo te ʼu famili ia ʼaho nei?
IA ʼAHO NEI, kua tokakovi te ʼu famili. ʼE lahi te ʼu loto fale ʼe mole kei felogoi ai te taumatuʼa. Kua ʼāsili te tuputupu ʼa te ʼu mavete, pea tokolahi te ʼu tamaliki ʼo te ʼu taumatuʼa ʼaē kua mavete, ʼe nātou mamahi ʼaupito. Ko te lauʼi miliona famili ʼe mole kei nātou fiafia pea kua nātou mavetevete. Kae, ʼe ʼi ai te famili e tahi ʼe ina maʼu te fiafia moʼoni pea mo he logo tahi moʼoni. Ko te famili faka malamanei ʼa Sehova ʼAtua. ʼI te famili ʼaia, ko te ʼu lauʼi miliate kau ʼaselo fakapulipuli ʼe nātou fakahoko te ʼu gāue kua hinoʼi age kia nātou, ʼo mulimuli ki te finegalo fakaʼatua. (Pesalemo 103:20, 21) Kae, ʼe ʼi ai koa he famili ʼi te kele ʼe ina maʼu te taʼi logo tahi ʼaia?
2, 3. (a) ʼI te temi ʼaenī, ko ai ʼaē ʼe kau ki te famili ʼa te ʼAtua ʼi te kele katoa? (b) Koteā te ʼu fehuʼi ʼaē ka tou palalau anai kiai?
2 Neʼe tohi fēnei e te ʼapositolo ko Paulo: “ ʼE ʼau tuʼutuli ʼi muʼa ʼo te Tāmai, ʼaē ʼe maʼu mai ai e te famili katoa ʼi selo pea mo te kele tonatou higoa.” (Efesi 3:14, 15) Ko te ʼu hākoga faka famili fuli ʼi te kele ʼe nātou maʼu tonatou higoa mai te ʼAtua, koteʼuhi ko ia te Tupuʼaga. Logope la ʼe mole ʼi ai he ʼu famili fakatagata ʼi te lagi, ʼi hona ʼaluʼaga fakatā, ʼe ʼohoana te ʼAtua mo tana kautahi ʼaē ʼi selo, pea ʼe ʼohoana anai ia Sesu mo tona ʼohoana fakalaumālie, ʼi selo. (Isaia 54:5; Luka 20:34, 35; 1 Kolonito 15:50; 2 Kolonito 11:2) Ko te ʼu hahaʼi agatonu ʼaē neʼe fakanofo ʼi te kele ʼe nātou kau ʼi te temi nei ki te famili katoa ʼa te ʼAtua, pea ko te “tahi ʼu ōvi” ʼa Sesu, ʼaē ʼe nātou maʼu te ʼamanaki ke nātou maʼuʼuli ʼi te kele, ʼe nātou kau anai ki te famili ʼaia. (Soane 10:16; Loma 8:14-17; Te Tule Leʼo, ʼo te ʼaho 15 ʼo Sanualio 1996, pasina 31) Kae, ia ʼaho nei, ko te kau Fakamoʼoni fuli ʼa Sehova ʼe feala ke nātou fakatahi ki te famili ʼe logo tahi ʼi te kele katoa.
3 ʼE koutou kau koa ki te famili faka malamanei fakatalakitupua ʼo te ʼu kaugana ʼa te ʼAtua? Kapau ʼe koutou kau kiai, pea ʼe koutou maʼu te tapuakina lahi ʼaē ʼe mole hona fakatatau. Ko te lauʼi miliona ʼe nātou fakamoʼoni anai ko te famili katoa ʼa Sehova, tana kautahi fakakelekele, ʼe nātou maʼuʼuli ʼi te tokalelei pea mo te logo tahi, logope la te fetauʼaki ʼa te malamanei pea mo tanatou mole logo tahi. Koteā te ʼu fakamatala ʼaē ʼe feala ke tou fai ʼo ʼuhiga mo te logo tahi ʼo te famili ʼa Sehova ʼi te kele katoa? Pea koteā te ʼu faʼahi ʼaē ʼe nātou faka fealagia ai te taʼi logo tahi ʼaia?
Ko He Meʼa Lelei Pea Mo Fakafiafia!
4. ʼE feafeaʼi anai hakotou fakamatala te meʼa ʼaē ʼe ʼui ia Pesalemo 133 ʼo ʼuhiga mo te logo tahi fakatautehina?
4 Neʼe leleiʼia ʼaupito e te tagata fai pesalemo ko Tavite ia te logo tahi fakatautehina. Koia, neʼe ina fai ai te hiva ʼo ʼuhiga mo te faʼahi ʼaia. Koutou fakakaukauʼi age ki tana hiva mo tana alepa: “Koʼeni! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi! ʼE hage ko he lolo magoni ʼi te ʼulu, ʼe hali ki te kava, ki te kava ʼo Alone, ʼo hali ki tona kiaʼi kofu. ʼE hage ko te hahau ʼo Helemone ʼaē ʼe hifo ifo ki te ʼu moʼuga ʼo Sione. Heʼe ko te potu ʼaia ʼaē neʼe fakatotonu e Sehova ke hoko ai te tapuakina, ʼio, te maʼuli ʼo aʼu ki he ʼu temi ʼe mole ʼiloʼi hona gataʼaga.”—Pesalemo 133:1-3.
5. ʼO fakatafito kia Pesalemo 133:1, 2, koteā te fakatatau ʼe feala ke tou fai ʼo ʼuhiga mo te kau Iselaelite pea mo te kau kaugana ʼa te ʼAtua ʼi te temi nei?
5 Ko te ʼu palalau ʼaia ʼe faka ʼuhiga ki te logo tahi fakatautehina ʼaē neʼe maʼu e te ʼu ʼuluaki hahaʼi ʼa te ʼAtua, te kau Iselaelite. ʼI te temi ʼaē neʼe nātou ʼolo ai ki Selusalemi ki tanatou ʼu ʼaho lalahi e tolu ʼaē neʼe fai ʼi te taʼu fuli, neʼe nātou fakatahitahi ai ʼi te logo tahi. Logope la neʼe nātou ʼōmai mai te ʼu telepi kehekehe, kae neʼe ko he foʼi famili pe e tahi. Neʼe ko he meʼa lelei kia nātou hanatou fakatahitahi, ohage ko he moʼi lolo mokomoko pea mo magoni neʼe fakaʼaogaʼi moʼo fakanofo he tahi. ʼI te temi ʼaē neʼe huaʼi ai te moʼi lolo ʼaia ki te ʼulu ʼo Alone, neʼe hali ki tona kava pea mo tona kiaʼi kofu. Maʼa te kau Iselaelite, ko tanatou fakatahitahi neʼe lave lelei kia nātou, neʼe ina faka fealagia te fakatahi katoa ʼa te hahaʼi. Neʼe fakatokatoka ai te ʼu tokakovi, pea neʼe fakatuputupu ai te logo tahi. Ia ʼaho nei, ʼe toe maʼu te logo tahi ʼaia ʼi te famili katoa ʼa Sehova. Ko tanatou fakatahitahi tuʼumaʼu ʼe malave ʼaupito ki tana hahaʼi ʼi te faʼahi fakalaumālie. Ko te maʼuliʼi ʼo te ʼu tokoni ʼa te Folafola ʼa te ʼAtua, ʼe ina pulihi te ʼu tokakovi pea mo te ʼu faigataʼaʼia. (Mateo 5:23, 24; 18:15-17) ʼE leleiʼia ʼaupito e te hahaʼi ʼa Sehova te fefakaloto mālohiʼaki ʼaē ʼe tupu mai tanatou logo tahi fakatautehina.
6, 7. Neʼe tatau feafeaʼi te logo tahi ʼa Iselaele pea mo te hahau ʼo te Moʼuga ʼo Helemone, pea ʼe feala ke tou maʼu ʼifea te tapuakina ʼa te ʼAtua ʼi te temi nei?
6 ʼE tatau feafeaʼi te fakatahitahi ʼa te kau Iselaelite ʼi te logo tahi pea mo te hahau ʼo te Moʼuga ʼo Helemone? Mai tona ʼaluʼaga ʼaē ko te tumutumu ʼo te moʼuga ʼaia ʼe māʼoluga ia meta e 2 800 ʼi te nivo ʼo te tai, koia ʼe teitei pe ke niveʼia tona tumutumu ʼi te taʼu katoa. Ko te tumutumu niveʼia ʼo te Moʼuga ʼo Helemone ʼe ina fakaliliu te ʼu kakapu ʼo te pōʼuli ko he vai pea ʼe ina fakatupu ai te hahau lahi, ʼe ina taupau lelei te ʼu ʼulu ʼakau lolotoga te ʼu temi vevela loaloaga. Ko te ʼu matagi momoko mai te ʼu moʼuga ʼo Helemone, ʼe feala ke nātou ʼave te ʼu kakapu ʼaia ʼo aʼu ki te potu toga ʼo Selusalemi, pea ʼe liliu ai ko he hahau. Koia, neʼe tonu te ʼu palalau ʼa te tagata fai pesalemo ʼi tana talanoa ʼaē ʼo ʼuhiga mo ‘te hahau ʼo Helemone ʼaē ʼe hifo ki te Moʼuga ʼo Sione.’ ʼE ina fakamanatu lelei mai te fakamokomoko ʼaē ʼe tupu ʼaki ai te logo tahi ʼi te famili ʼo te kau kaugana ʼa Sehova!
7 ʼI muʼa ʼo te fakatuʼu ʼo te kokelekasio Kilisitiano, ko Sione, peʼe ko Selusalemi, neʼe ko te potu fenua tāfito ʼo te tauhi moʼoni. Koia, neʼe ko te potu fenua ʼaia ʼaē neʼe fakatotonu ai e Sehova ke hoko ai te tapuakina. Mai tona ʼaluʼaga ʼaē, ʼi hona ʼaluʼaga fakatā neʼe nofo te Matapuna ʼo te ʼu tapuakina fuli ʼi te sagatualio ʼo Selusalemi, koia neʼe haʼu te ʼu tapuakina mai te potu fenua ʼaia. Kae, mai tona ʼaluʼaga ʼaē ko te tauhi moʼoni ʼe mole kei fai ki he potu fenua kua hinoʼi ke fai kiai, koia ko te tapuakina, mo te ʼofa, pea mo te logo tahi ʼo te ʼu kaugana ʼa te ʼAtua ʼe feala ke maʼu ʼi te potu fenua fuli pe ʼo te kele, ia ʼaho nei. (Soane 13:34, 35) Koteā te ʼu meʼa ʼaē ʼe nātou fakatuputupu ai te logo tahi ʼaia?
Te ʼu Meʼa ʼAē ʼe Nātou Fakatuputupu Ai Te Logo Tahi
8. Koteā ʼaē ʼe tou ako ʼo ʼuhiga mo te logo tahi ia Soane 17:20, 21?
8 Ko te logo tahi ʼa te kau atolasio ʼa Sehova ʼe fakatafito ki tanatou mulimuli ki te ʼu meʼa ʼaē kua nātou mahino lelei kiai ʼi te Folafola ʼa te ʼAtua, ʼo kau ai mo te ʼu akonaki ʼa Sesu Kilisito. ʼI te fekauʼi mai e Sehova tona ʼAlo ki te malamanei, moʼo fakamoʼoni ki te moʼoni pea mo mate ʼi he mate faka sakilifisio, neʼe ava ai te ala ki te fakatuʼu ʼo te kokelekasio faka Kilisitiano ʼe logo tahi. (Soane 3:16; 18:37) Neʼe hā lelei ʼi te faikole ʼa Sesu, neʼe tonu ke maʼu te logo tahi moʼoni ʼi te kokelekasio: “ ʼE ʼau kole atu, ʼo mole ʼuhiga pe mo nātou ʼaenī, kae ʼo ʼuhiga foki mo nātou ʼaē ʼe nātou tui kia te ʼau ʼi tanatou ʼu palalau; ke nātou liliu fuli ko he meʼa e tahi, ohage ko koe, Tāmai, ʼe ke fakatahi mo ʼau pea mo ʼau fakatahi mo koe, ke nātou fakatahi foki mo tāua, ke tui ai te malamanei neʼe ke fekauʼi mai ʼau.” (Soane 17:20, 21) Neʼe maʼu e te kau tisipulo ʼa Sesu te logo tahi ohage ko te logo tahi ʼa te ʼAtua pea mo tona ʼAlo. Neʼe nātou maʼu te logo tahi ʼaia he neʼe nātou mulimuli ki te Folafola ʼa te ʼAtua pea mo te ʼu akonaki ʼa Sesu. Ko te aga ʼaia ʼe ko he faʼahi maʼuhiga ʼi te logo tahi ʼo te famili ʼa Sehova ʼi te malamanei ia ʼaho nei.
9. Koteā te meʼa ʼaē ʼe fai e te laumālie maʼoniʼoni ʼi te logo tahi ʼa te hahaʼi ʼa Sehova?
9 Ko te tahi meʼa ʼe ina fakatahiʼi ai te hahaʼi ʼa Sehova, ʼe ko tatatou maʼu te laumālie maʼoniʼoni ʼa te ʼAtua, peʼe ko tona mālohi gāue. ʼE ina foaki mai kia tatou te fealagia ʼaē ke tou mahino ki te moʼoni ʼo te Folafola ʼa Sehova pea mo tou tauhi kia te ia ʼi te logo tahi. (Soane 16:12, 13) ʼE tokoni mai te laumālie kia tatou ke tou tekeʼi te ʼu taʼi gāue ʼo te kakano ʼaē ʼe nātou fakamavetevete, ohage ko te ʼu kē, te maheka, te hoko ʼita, pea mo te ʼu maveuveu. Kae, ʼe foaki mai e te laumālie ʼa te ʼAtua te fealagia ʼaē ke tou fakatuputupu te ʼu fua ʼo te logo tahi, ohage ko te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, pea mo te loto lolomi.—Kalate 5:19-23.
10. (a) Koteā te fakatatau ʼe feala ke tou fai ʼi te ʼofa ʼaē ʼe maʼu ʼi he famili logo tahi pea mo te ʼofa ʼaē ʼe hā ia nātou ʼaē neʼe kua nātou foaki tonatou maʼuli kia Sehova? (b) Neʼe fakahā feafeaʼi e te tahi tēhina ʼo te Kolesi Pule tana manatu ʼo ʼuhiga mo tana fakatahi mo tona ʼu tēhina fakalaumālie?
10 Ko he famili ʼe logo tahi ʼe nātou feʼofani pea ʼe ko he meʼa fakafiafia kia nātou hanatou fakatahitahi. ʼO toe feiā aipe, ko te famili logo tahi ʼo te kau atolasio ʼa Sehova, ʼe nātou ʼoʼofa kia te ia, ki tona ʼAlo, pea ki tonatou ʼu tēhina ʼi te tui. (Maleko 12:30; Soane 21:15-17; 1 Soane 4:21) Ohage pe ko te leleiʼia e he famili ke nātou kakai fakatahi, ʼo toe feiā aipe, ʼe leleiʼia e te kau kaugana ʼa te ʼAtua ke nātou kau ki te ʼu fono faka Kilisitiano, ki te ʼu fakatahi lalahi, ke nātou fakatahitahi mo ʼonatou ʼu tēhina pea mo nātou kai te ʼu meʼa kai lelei ʼi te faʼahi fakalaumālie. (Mateo 24:45-47; Hepeleo 10:24, 25) ʼI te tahi ʼaho, neʼe ʼui fēnei e te tēhina ʼi te Kolesi Pule ʼa te kau Fakamoʼoni ʼa Sehova: “Maʼa ʼaku, ko te fakatahi mo te ʼu tēhina, ʼe ko he meʼa fakafiafia lahi ʼi toku maʼuli pea mo fakaloto mālohi. ʼE ʼau leleiʼia ʼi taku kau ia nātou ʼaē ʼe ʼōmai fakatomuʼa ki te Fale ʼo te Puleʼaga, pea mo kau ia nātou ʼaē ʼe mavae fakamuli. ʼE ʼau logo fiafia mokā ʼau fai palalau mo te hahaʼi ʼa te ʼAtua. Ka ʼau nofo mo nātou, ʼe mole ʼau hoha ki he meʼa, heʼe nātou hage ko hoku famili.” ʼE koutou manatu feiā koa mo koutou?—Pesalemo 27:4.
11. Koteā te gāue ʼaē ʼe fiafia tāfito ai te kau Fakamoʼoni ʼa Sehova, pea koteā te ʼu fua ʼaē ʼe tou maʼu mo kapau ʼe tou fakaliliu te selevisi ʼaē ki te ʼAtua ʼe ko hatatou fakatuʼutuʼu tāfito?
11 ʼE fiafia he famili logo tahi mokā nātou gāue fakatahi. ʼO toe feiā aipe, ko te famili ʼa te kau atolasio ʼa Sehova ʼe nātou fiafia mokā nātou fai fakatahi tanatou gāue fai faka mafola ʼo te Puleʼaga pea mo te fai ʼo ni ʼu tisipulo. (Mateo 24:14; 28:19, 20) Ko te lagolago tuʼumaʼu ki te gāue ʼaia ʼe ina fakatahiʼi lelei tatou mo ʼihi ʼu Fakamoʼoni ʼa Sehova. Ko te fakaliliu ʼo te selevisi ki te ʼAtua ko te fakatuʼutuʼu tāfito ʼaia ʼo totatou maʼuli, pea mo te lagolago ki te ʼu gāue fuli ʼo tana hahaʼi, ʼe ina toe faka fealagia foki ke tuputupu ia tatou te manatu ʼaē ko tatou ko te foʼi famili.
ʼE Maʼuhiga Te ʼu Fakatuʼutuʼu Faka Teokalatike
12. Koteā te ʼu agaaga ʼo he famili fiafia pea mo logo tahi, pea koteā te fakatuʼutuʼu ʼaē neʼe fai moʼo fakatuputupu te logo tahi ʼi te kokelekasio faka Kilisitiano ʼo te ʼuluaki sēkulō?
12 Kapau ʼe maʼu e he famili hona pule ʼe mālohi tana takitaki kae ʼe fai ʼaki te ʼofa, pea mo fakalogo lelei te famili ki te fakatuʼutuʼu ʼaia, ʼe mahino papau ia ʼe logo tahi anai pea mo fiafia. (Efesi 5:22, 33; 6:1) Ko Sehova ʼe ko te ʼAtua ʼo te tokalelei, pea ko nātou fuli ʼaē ʼe kau ki tona famili, ʼe nātou faka ʼuhiga ia ia ʼe ko “te Māfimāfi.” (Taniela 7:18, 22, 25, 27; 1 Kolonito 14:33) ʼE nātou toe fakamoʼoni foki kua ina fakanofo tona ʼAlo, ia Sesu Kilisito, ko ia ʼaē ka ina maʼu te tōfiga ʼo meʼa fuli, pea neʼe ina tuku ia ia ke pule kia meʼa fuli ʼi te lagi pea mo te kele. (Mateo 28:18; Hepeleo 1:1, 2) Ko te kokelekasio faka Kilisitiano ʼe ko he kautahi tokalelei pea mo logo tahi, heʼe ko tana Pule ʼe ko Kilisito. (Efesi 5:23) Moʼo takitaki te ʼu gāue ʼaia ʼo te ʼu kokelekasio ʼo te ʼuluaki sēkulō, neʼe ʼi ai te kolesi pule neʼe faʼufaʼu e te kau ʼapositolo pea mo te kau “tagata ʼāfea” kua fakapotopoto ʼi te faʼahi fakalaumālie. Neʼe maʼu e te ʼu kokelekasio takitahi te ʼu tagata taupau neʼe fakanofo, peʼe ko te ʼu tagata ʼāfea, pea mo te kau tagata faifekau faka minisitelio. (Gāue 15:6; Filipe 1:1) Ko te fakalogo kia nātou ʼaia ʼaē ʼe nātou takitaki, ʼe fakatuputupu te logo tahi.—Hepeleo 13:17.
13. ʼE taki feafeaʼi mai e Sehova te hahaʼi, pea koteā tona ʼu fua?
13 Kae ʼe faka ʼuhiga koa e te takitaki katoa ʼaia ko te logo tahi ʼa te kau atolasio ʼa Sehova ʼe tupu ʼuhi ko he takitaki mālohi pea mo fefeka? Kailoa! ʼE lotoʼofa te ʼAtua pea mo tana kautahi. ʼE taki mai e Sehova te hahaʼi ʼaki te ʼofa, pea ʼi te taʼu fuli ko te lauʼi teau afe hahaʼi ʼe nātou hū ki te kautahi ʼa Sehova ʼaki he lotolelei pea mo he loto fiafia, ʼo nātou papitema moʼo fakahā kua nātou foaki ʼaki he loto katoa tonatou maʼuli ki te ʼAtua. ʼE tatau tanatou manatu mo Sosue, ʼaē neʼe ina uga fēnei tona ʼu tēhina Iselaelite: “Koutou fili ʼi te ʼaho nei pe ko ai ʼaē ka koutou tauhi ki ai . . . Kae kia ʼau mo toku loto fale, ʼe mātou tauhi anai kia Sehova.”—Sosue 24:15.
14. He koʼe ʼe feala ke tou ʼui ko te kautahi ʼa Sehova ʼe ko he kautahi faka teokalatike?
14 ʼI tatatou kau ki te famili ʼa Sehova, ʼe mole tou fiafia pe kae ʼe tou maʼu ai foki mo te fīmālie. ʼE tupu te faʼahi ʼaia he ko tana kautahi ʼe faka teokalatike. Ko te Puleʼaga ʼa te ʼAtua ʼe ko he teokalasia (mai te kupu faka Keleka the·osʹ, ʼatua, pea mo kraʹtos, pule). ʼE puleʼi e te ʼAtua te kautahi ʼaia, pea ko ia ʼaē neʼe ina fakatuʼu. Ko te “puleʼaga maʼoniʼoni” ʼa Sehova ʼaē neʼe ina fakanofo, ʼe fakalogo ki tana pule pea ʼe faka teokalatike. (1 Petelo 2:9) ʼAki te Teokalate Lahi, ko Sehova, tatatou Tuʼi Fakamāu, tatatou Tagata Faʼu Lao, pea mo tatatou Hau, ʼe mole tou tuʼania ai ki he meʼa. (Isaia 33:22) Kae, e feafeaʼi mokā hoko he ʼu fakafifihi, ʼo feala ke tuʼutāmaki ai tatatou fiafia, mo tatatou nofo fīmālie, pea mo tatatou logo tahi?
ʼE Gāue Te Kolesi Pule
15, 16. Koteā te fihifihia ʼaē neʼe hoko ʼi te ʼuluaki sēkulō, pea koteā tona tupuʼaga?
15 Moʼo taupau ʼo te logo tahi ʼo he famili, ʼi ʼihi temi ʼe tonu ke fakatokatokaʼi he fihifihia. Ohage la, ʼi te ʼuluaki sēkulō, neʼe tonu ke fakatokatokaʼi te fihifihia fakalaumālie moʼo taupau ia te logo tahi ʼo te famili ʼa te kau atolasio ʼa te ʼAtua. Koteā ʼaē neʼe tonu ke fai? Neʼe fai e te kolesi pule he ʼu tonu ʼo ʼuhiga mo te ʼu faʼahi fakalaumālie. ʼE tou maʼu te fakamatala ʼi te Tohi-Tapu ʼo ʼuhiga mo te taʼi tonu ʼaia ʼaē neʼe fai.
16 ʼI te lagi taʼu 49 ʼo totatou temi, neʼe fakatahitahi te kolesi pule ʼi Selusalemi moʼo fakatokatokaʼi te fihifihia maʼuhiga, pea mo taupau ai te logo tahi ʼo “te kaugā ʼapi ʼa te ʼAtua.” (Efesi 2:19) Ko teitei taʼu e 13 ki muʼa atu, neʼe fai faka mafola Petelo kia Kolonelio, pea neʼe ko te ʼuluaki Senitile, peʼe ko te hahaʼi ʼo te ʼu puleʼaga, ʼaē neʼe liliu ʼo tui pea mo papitema. (Gāue, kapite 10) Lolotoga te ʼuluaki folau misionea ʼa Paulo, neʼe kaugamālie te kau Senitile ʼaē neʼe nātou hū ki te Lotu Faka Kilisitiano. (Gāue 13:1–14:28) ʼI tona fakahagatonu, neʼe fakatuʼu te kokelekasio ʼo te kau Kilisitiano Senitile ʼi Atiokia, ʼi Silia. Neʼe manatu e ʼihi kau Kilisitiano Sutea neʼe tonu ke faka silikosisioʼi te kau Senitile ʼaē neʼe tafoki ki te Lotu Faka Kilisitiano pea mo taupau te Lao ʼa Moisese, kae ko ʼihi, neʼe mole nātou manatu feiā. (Gāue 15:1-5) Neʼe feala ke iku te fihi ʼaia ki te fakamavetevete katoa, ʼo fakatupu ʼaki ai he ʼu kokelekasio Sutea pea mo Senitile ʼe mole logo tahi. Koia, neʼe foimo fai ai e te kolesi pule he tonu moʼo taupau ia te logo tahi faka Kilisitiano.
17. Koteā te fakatuʼutuʼu faka teokalatike lelei ʼaē ʼe fakamatala ia Gāue kapite 15?
17 Ohage ko tona ʼui ia Gāue 15:6-22, “neʼe fakatahi te kau ʼapositolo pea mo te kau tagata ʼāfea moʼo vakaʼi te faʼahi ʼaia.” Neʼe toe kau ai foki mo ʼihi, ʼo kau ai mo te hahaʼi ʼaē neʼe ʼōmai mai Atiokia. Neʼe ʼuluaki fakamahino e Petelo, ‘ ʼaki tona gutu neʼe logo te hahaʼi ʼo te ʼu puleʼaga ki te logo lelei pea neʼe nātou tui.’ Pea, neʼe fakalogo te “hahaʼi fuli” ki te fakamatala e Palenapasi pea mo Paulo, “te ʼatu ʼu fakaʼiloga pea mo te ʼu meʼa fakaofo ʼaē neʼe fai e te ʼAtua ʼaki ia nāua, ʼi te lotolotoiga ʼo te ʼu puleʼaga,” peʼe ko te kau Senitile. Ki muli age, neʼe fakahā e Sake te tonu ʼaē ʼe tonu ke fai moʼo fakatokatoka ia te fihifihia. ʼI te kua ʼosi fai e te kolesi pule tana tonu, ʼe ʼui fēnei mai: “Ko te kau ʼapositolo pea mo te kau tagata ʼāfea, ʼo fakatahi mo te kokelekasio katoa, neʼe nātou lotolelei ke nātou filifili ni ʼu tagata ia nātou ke ʼolo ki Atiokia mo Paulo pea mo Palenapasi.” Ko ‘te ʼu tagata ʼaia ʼaē neʼe fili’—ia Sutasi pea mo Silasi—neʼe nā ʼave te ʼu tohi fakaloto mālohi ki te ʼu tēhina.
18. Koteā te tonu ʼaē neʼe fai e te kolesi pule ʼe pipiki ki te Lao ʼa Moisese, pea neʼe lave feafeaʼi te tonu ʼaia ki te kau Sutea pea mo te kau Senitile Kilisitiano?
18 Neʼe kamata fēnei te tohi ʼaē neʼe fakahā ai te tonu ʼa te kolesi pule: “ ʼE fakaʼalofa atu te kau ʼapositolo, mo te ʼu tagata ʼāfea, pea mo te ʼu tēhina ki te ʼu tēhina mai te ʼu puleʼaga ʼaē ʼi Atiokia mo Silia pea mo Silisia.” Ko ʼihi ʼu tēhina neʼe nātou kau ki te fono lahi ʼaia, kae ʼe hā lelei mai neʼe faʼufaʼu te kolesi pule e “te ʼu ʼapositolo pea mo te ʼu tagata ʼāfea.” Neʼe takitaki nātou e te laumālie ʼa te ʼAtua, koteʼuhi ʼe kamata fēnei te tohi: “Ko te laumālie maʼoniʼoni pea mo mātou totonu, kua mātou fakafuafua ʼe lelei ke ʼaua naʼa mātou hilifaki atu kia koutou he tahi age kavega ʼi te ʼu meʼa ʼaenī ʼe ʼaoga, ʼaē ko te fakamamaʼo mai te ʼu meʼa ʼaē ʼe sakilifisioʼi ki te ʼu tamapua, mo te toto, mo te meʼa ʼaē neʼe tege, pea mo te folonikasio.” (Gāue 15:23-29) Neʼe mole fakamaʼua ki te kau Kilisitiano ke nātou fai te silikosisio pea mo nātou taupau te Lao ʼa Moisese. Neʼe tokoni te tonu ʼaia ki te kau Sutea pea mo te kau Senitile Kilisitiano ke nātou gāue pea mo palalau ʼi te logo tahi. Neʼe fiafia te ʼu kokelekasio, pea neʼe hoko atu tanatou logo tahi maʼuhiga, ohage pe ko tona fai ʼi te famili katoa ʼa te ʼAtua ʼi te kele ia ʼaho nei, ʼi te takitaki fakalaumālie ʼo te Kolesi Pule ʼa te kau Fakamoʼoni ʼa Sehova.—Gāue 15:30-35.
Tou Tauhi ʼi Te Logo Tahi Faka Teokalatike
19. He koʼe ʼe tuputupu te logo tahi ʼi te famili ʼo te kau kaugana ʼa Sehova?
19 ʼE tuputupu te logo tahi mokā ʼe fetokoniʼaki te hahaʼi ʼo te famili. ʼE toe moʼoni te faʼahi ʼaia ʼi te famili ʼo te kau atolasio ʼa Sehova. ʼI tanatou mulimuli ki te fakatuʼutuʼu faka teokalatike, neʼe tauhi te kau tagata ʼāfea pea mo ʼihi ʼi te kokelekasio ʼo te ʼuluaki sēkulō ki te ʼAtua, ʼo nātou lagolago katoa ki te kolesi pule pea mo nātou tali tana ʼu tonu. ʼAki te tokoni ʼa te kolesi pule, neʼe ‘faka mafola te folafola’ e te kau tagata ʼāfea pea ko te hahaʼi fuli ʼo te kokelekasio neʼe nātou ‘palalau ʼi te logo tahi.’ (2 Timoteo 4:1, 2; 1 Kolonito 1:10) Koia, neʼe tatau te ʼu moʼoni faka Tohi-Tapu ʼaē neʼe fakahā ʼi te minisitelio pea mo te ʼu fono faka Kilisitiano, ʼi Selusalemi, ʼi Atiokia, ʼi Loma, ʼi Kolonito, peʼe ʼi he tahi age koga meʼa. Ia ʼaho nei, ʼe tou toe maʼu te taʼi logo tahi faka teokalatike ʼaia.
20. Moʼo taupau tatatou logo tahi faka Kilisitiano, koteā ʼaē ʼe tonu ke tou fai?
20 Moʼo taupau tatatou logo tahi, ko tatou fuli ʼaē ʼe tou kau ki te famili katoa ʼa Sehova, ʼe tonu ke tou faiga ke tou fakahā te ʼofa faka teokalatike. (1 Soane 4:16) ʼE tonu ke tou fakalogo ki te finegalo ʼo te ʼAtua, pea mo tou fakahā he fakaʼapaʼapa lahi ki te ‘tagata kaugana agatonu’ pea mo te Kolesi Pule. Ohage ko tatatou foaki totatou maʼuli ki te ʼAtua, ʼe mahino papau ia, ʼe tou fai tatatou fakalogo ʼaki he lotolelei pea mo he loto fiafia. (1 Soane 5:3) Neʼe tonu te tagata fai pesalemo ʼi tana fakapipiki ia te fiafia pea mo te fakalogo! Neʼe ina hivaʼi fēnei: “Koutou fakavikiviki kia Sah! Manuʼia te tagata ʼaē ʼe manavasiʼi kia Sehova, ʼaē ʼe lahi tona fiafia ʼi tana ʼu fakatotonu.”—Pesalemo 112:1.
21. ʼE lava feafeaʼi ke tou fakahā ʼe tou mulimuli ki te ʼu fakatuʼutuʼu faka teokalatike?
21 Ko Sesu, te Pule ʼo te kokelekasio, ʼe mulimuli katoa ki te ʼu fakatuʼutuʼu faka teokalatike pea ʼe ina fai tuʼumaʼu te finegalo ʼo tana Tāmai. (Soane 5:30) Koia, tou mulimuli ki totatou Faʼifaʼitakiʼaga ʼo tou fai te finegalo ʼa Sehova ʼi te teokalasia pea mo tou logo tahi, ʼo tou lagolago katoa ki Tana kautahi. Pea ʼaki he loto fiafia pea mo he loto fakafetaʼi fakamalotoloto, ʼe feala ke tou fai mo tatou ia te hiva ʼaenī ʼa te tagata fai pesalemo: “Koʼeni! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!”
ʼE Koutou Tali Feafeaʼi Anai?
◻ Koteā te pikipikiga ʼo tatatou logo tahi faka Kilisitiano mo te Pesalemo kapite 133?
◻ Koteā te ʼu meʼa ʼaē ʼe nātou fakatuputupu te logo tahi?
◻ He koʼe ʼe ʼaoga te tokalelei faka teokalatike ki te logo tahi ʼa te hahaʼi ʼa te ʼAtua?
◻ Neʼe koteā ʼaē neʼe fai e te kolesi pule ʼo te ʼuluaki sēkulō moʼo taupau ia te logo tahi?
◻ Koteā tona faka ʼuhiga kia tatou te tauhi ʼi te logo tahi faka teokalatike?
[Paki ʼo te pasina 13]
ʼE gāue te kolesi pule moʼo taupau te logo tahi