ʼE Koutou Lava Puipui Feafeaʼi Takotou Fānau?

ʼI TANA ʼosi ako lolotoga ni ʼu taʼu ʼi te faleako ʼaē neʼe ōvi age kiō ia, neʼe hoko atu e Wernera tana ako mo te tahi kau tūpulaga e toko 3 000, ʼi São Paulo, ʼi Brésil. Ko tana hoki sioe ki tona ʼu kaugā ako ʼe nātou fakatau pea mo fakaʼaogaʼi te toloke. Mai tona ʼuhiga ʼaē neʼe nounou, mole tuai pea fakalainoaʼi pea mo gaohi koviʼi ia ia e te kau ako lalahi.

Neʼe toe ʼi ai foki mo te ʼu fihifihia ʼa te tokolua ʼo Werner, ko Eva. ʼI tana holi ʼaē ke lelei tana ako, neʼe ako mālohi pea neʼe gaʼegaʼe ai pea mo fakatupu kovi ki tona fakakaukau. Ohage ko ʼihi kau tūpulaga, neʼe ʼaoga kia Werner pea mo Eva ke puipui nāua ʼi te faʼahi fakasino pea mo te meʼa ʼaē ʼe nā logoʼi. Ko te faʼahiga tokoni feafeaʼi ʼaē ʼe ʼaoga ki takotou fānau? ʼE lava feafeaʼi hakotou teuteuʼi ki te temi ʼaē ka nātou lalahi ai? Ei, koteā te ka haʼu ʼaē ʼe koutou loto ke maʼu e takotou fānau?

ʼE Mole Feʼauga Pe Takotou Tokoni Kia Nātou

Koutou fakakaukauʼi muʼa te faigataʼaʼia ʼaē ʼe tau mo te ʼu mātuʼa ʼi tanatou puipui tanatou fānau ʼi te temi nei. ʼE lahi te ʼu fenua ʼe kua kaugamālie ai te ʼu fānau ʼaē ʼe mole kei ʼi ai honatou ʼapi, ʼuhi ko te fakaʼāsili kovi ʼo te maʼuli faka famili, pea mo te tuputupu ʼo te maʼuli masiva. Ko te fakagāueʼi ʼo te ʼu kiʼi tamaliki ʼe ko te fua ʼaia ʼo te mole lava puipui ʼo te kau tūpulaga mai tonatou gaohi koviʼi. ʼE toe kovi foki te maʼuli ʼo te ʼu tamaliki ʼuhi ko te toloke. Ohage la, ʼi te temi ʼaē neʼe liliu ai te tūpulaga ʼi Brésil ʼo toloke, neʼe mole kei tokalelei ai tona loto fale. Neʼe hoha ʼaupito ai te loto ʼo tanā ʼu mātuʼa, neʼe toe faigataʼa foki ki te tūpulaga ʼaia ke ina totogi tana toloke, pea neʼe ʼolo age te hahaʼi fakatau toloke agakovi kiō ia, ʼo nātou kole age te falā ʼaē ʼe tonu ke ina huʼi age.

Logope la te ʼu faigataʼaʼia ʼo te maʼuli, kae tokolahi te ʼu mātuʼa ʼe hoko atu tanatou faiga mālohi ʼaē ke nātou foaki ki tanatou fānau te meʼa kai, mo te mutuʼi meʼa, mo he loto fale, pea ʼe nātou toe puipui foki tanatou fānau mai te agamālohi, te toloke, pea mo ʼihi ʼatu ʼu fihifihia. ʼE ko he faiga maʼuhiga ʼaia, kae ʼe feʼauga koa? E feafeaʼi ʼo ʼuhiga mo te puipui ʼo te fānau ke ʼaua naʼa nātou mamahi ʼi tonatou loto pea mo te faʼahi fakalaumālie? Kua mahino ki te tokolahi, ke lelei te takitaki ʼo te ʼu mātuʼa, ʼe fakamaʼua kiai ke nātou vakavakaʼi te ʼu fakakaugā ʼo tanatou ʼu fānau pea mo tonatou ʼu fakafiafia. Kae koteā ʼaē ʼe feala ke fai e te ʼu mātuʼa ke mole lahi fau tanatou puipui ʼo tanatou fānau pea ke ʼaua naʼa lahi fau tanatou tuku ke nātou faʼifaʼitaliha? ʼE fakaafe atu koutou ke koutou vakaʼi te ʼu tali ki te ʼu fehuʼi ʼaia ʼi te alatike ʼaē ka hoa mai.

[Nota ʼi te lalo pasina]