Neʼe Nātou Fai Te Finegalo ʼo Sehova

Neʼe Tauʼi e Paulo Te ʼu ʼAluʼaga Kovi

NEʼE tuʼutāmakiʼia ia Paulo. Ko ia pea mo te toko 275 ʼaē neʼe ʼi te vaka neʼe nātou tuʼutāmakiʼia ʼi te Ulakilo, ko he matagi mālohi ʼi te Metitelanea. Neʼe mālohi ʼaupito te afā, pea neʼe mole kei hā te laʼā ʼi te lolotoga ʼo te ʼaho peʼe ko te ʼu fetuʼu ʼi te pōʼuli. ʼE mahino ia, neʼe loto tuʼania te hahaʼi folau. Kae neʼe fakafimālieʼi nātou e Paulo ʼo ina tala age kia nātou te meʼa ʼaē neʼe fakahā age e te ʼAtua ʼi he moemisi: “E mole puli anai he mauli ia koutou, gatape anai ki te vaka e maumau.”​—Gaue 27:​14, 20-​22.

ʼI te māʼupō ʼo te 14 ʼaho ʼo te afā, neʼe punamaʼuli ai te kau tautai ʼi tanatou sio ʼaē neʼe gafa 20 pe te loloto ʼo te tai.a ʼI tanatou fakalaka ai, neʼe nātou toe gafa te tai. Neʼe gafa 15 pe. Kua nātou ʼamanaki tau ki te fenua! Kae neʼe mole fualoa tanatou fiafia ʼi te faʼahi ʼaia. He neʼe tokakovi te tai ʼaē neʼe mole loloto, ʼo nātou tuʼania naʼa mahaʼia te vaka ʼi te lauhakau. Koia neʼe nātou lī ai ki te tai te ʼu foʼi tau ʼo te vaka. Ko ʼihi ia nātou neʼe nātou fia fakahifo te vakapā ki te tai ke nātou feholaki ai pea ke nātou hāofaki ai tonatou maʼuli. Kae neʼe tāʼofi nātou e Paulo.b Neʼe ina ʼui age ki te tagata ofisie pea mo te ʼu solia: “Kapau e mole natou nonofo i vaka, pea e mole koutou mauli.” Neʼe fakalogo te tagata ofisie kia Paulo pea neʼe nofo tuʼania te toko 276 hahaʼi folau ʼi tanatou talitali ki te māfoatā.​—Gaue 27:​27-​32.

ʼE Mahaʼia Te Vaka

ʼI te uhu ake, ko te kau folau ʼo te vaka neʼe nātou sio ki he pokoga pea mo tona matatai. Neʼe toe tupu ai tanatou falala pea neʼe tuʼusi e te kau tautai te ʼu maea ʼo te ʼu foʼi tau, pea nātou lagaʼi te ʼu lā ʼo te taumuʼa ʼo fakatau matagi. Neʼe natou foe ake ki te ʼone, pea neʼe lagi kalaga fakafiafia te hahaʼi ʼo te vaka.​—Gaue 27:39, 40.

Fokifā pe, pea lave te vaka ki te fuga ʼafua ʼo maumau ai te foe fakaʼuli ʼuhi ko te ʼu peau mālohi. Neʼe maʼua ke mavae fuli te hahaʼi ʼi te vaka! (Gaue 27⁠:41) Kae neʼe ʼi ai te fihifihia. Ko te tokolahi ia nātou ʼi te vaka, ʼo kau ki ai mo Paulo, neʼe ko te kau pilisoni. ʼI te lao ʼa te kau Loma, ko te tagata leʼo ʼaē ʼe ina tuku ke hola te tagata pilisoni, ʼe fakahoko kia ia te fakatūʼa ʼaē neʼe fai ki te tagata pe ko te fafine pilisoni. Ohage la, kapau ʼe hola he tagata fai fakapō, pea ʼe matehi anai te tagata ʼaē neʼe ina leʼo ia ia.

ʼI tanatou tuʼania ki te faʼahi ʼaia, ko te kau solia neʼe nātou fia matehi te hahaʼi pilisoni fuli. Kae ko te tagata ofisie ʼaē neʼe kaumeʼa mo Paulo, neʼe ina puipui nātou. Neʼe ina fakatotonu age ke nātou hopo ki te tai ʼo kāuga ki uta. Ko nātou ʼaē neʼe mole poto kāuga neʼe tonu ke nātou tapiki ki he ʼu papa peʼe ko he tahi ʼu meʼa mai te vaka. Ko te kau folau fuli neʼe nātou kāuga māmālie ake ki te ʼone. Ohage ko te meʼa ʼaē neʼe ʼui e Paulo, neʼe mole mate he tokotahi!​—Gaue 27:​42-​44.

Te Milakulo ʼi Maleta

Neʼe kua nātou gaʼegaʼe ʼaupito ʼi tanatou tau atu ki te motu ko Maleta. Ko te hahaʼi ʼo te motu neʼe nātou “palalau he lea ʼa te kau matāpule,” peʼe ko te kau “barbares” (ʼi te lea faka Keleka, barʹba·ros).c Kae ko te hahaʼi ʼo Maleta neʼe mole nātou agamālohi. ʼE ʼui mai e Luka ʼaē neʼe kaugā fagona mo Paulo, neʼe nātou “felavei mo te manavaofa kehe o te hahai o te motu kia matou. Nee natou tafu he afi pea nee natou fakaoviʼage matou ke matou fakamafana ai, koteuhi nee kua toe ua pea nee momoko.” Neʼe kaugā gāue mo nātou ia Paulo moʼo tae hagohago moʼo tutu ʼaki te afi.​—Gaue 28:​1-3.

Fokifā neʼe uʼusi e te vipeli te nima ʼo Paulo ʼo tautau ai! Neʼe manatu ai e te hahaʼi ʼo te motu ko Paulo ʼe ko he tagata fakapō. ʼI tanatou fakakaukau, ʼe tauteaʼi e te ʼAtua te hahaʼi agahala ʼo ina fakamamahiʼi te kogaʼi sino ʼaē neʼe agahala. Kae ʼe punamaʼuli ʼaupito te hahaʼi ʼi tanatou sio ki te lī e Paulo te gata ki te afi. Ohage ko tona fakamatala e Luka, “nee natou amanaki ki he fufula ake o tona nima, pe toka fakafokifa o mate.” Koia neʼe fetogi ai leva te manatu ʼa te hahaʼi pea neʼe nātou kamata lau ko Paulo ko he ʼatua.​—Gaue 28:​3-6.

Neʼe nofo Paulo ia māhina e tolu ʼi Maleta, pea lolotoga te temi ʼaia neʼe ina fakamālōlō ai te tāmai ʼa Popilio, te tagata maʼu tuʼulaga tāfito ʼo te motu, ʼaē neʼe tali kāiga kia Paulo, pea mo he tahi ʼu hahaʼi mahaki. Tahi ʼaē meʼa, neʼe to e Paulo te ʼu pulapula ʼo te moʼoni, pea neʼe lahi ai te ʼu tapuakina ʼaē neʼe maʼu e te hahaʼi tali kāiga ʼo Maleta.​—Gaue 28:​7-11.

Te Ako Kia Tatou

ʼI te lolotoga ʼo tona minisitelio, neʼe tau ia Paulo mo te ʼu fihifihia lahi. (2 Kolonito 11:​23-​27) ʼI te fakamatala ʼaē ʼe tuʼu ʼi ʼoluga, neʼe pilisoniʼi ʼuhi ko te logo lelei. Pea neʼe toe felāveʼi ai mo te ʼu ʼahiʼahi: te afā fakamataku pea mo te mahaʼia ʼo te vaka. Logope la te ʼu faʼahi fuli ʼaia, kae neʼe mole he temi neʼe vaivai ai te lotomālohi ʼa Paulo ke ina faka mafola te logo lelei. ʼUhi ko te ʼu meʼa fuli ʼaē neʼe tau mo ia, neʼe ina tohi fēnei: “I te meafuape, mo te aluaga fuli nee au ako te nofo makona mo te nofo halofia, te mauli mahu mo te mauli masiva. E au fealagia te meafuape ia Ia ae e ina fakamalohi au.”​—Filipe 4:​12, 13.

ʼAua naʼa tou tuku ke fakavaivai e te ʼu faigataʼaʼia ʼo te maʼuli totatou lotomālohi ʼaē ke tou gāue fakamalotoloto ʼi totatou ʼuhiga kau minisi ʼo te ʼAtua moʼoni. Ka hoko fakafokifā mai he ʼu ʼahiʼahi, pea ʼe tou tuku anai tatatou kavega kia Sehova. (Pesalemo 55⁠:22) Pea ʼe tou atalitali anai ke tokoni mai ke feala hatatou kātakiʼi te ʼahiʼahi. ʼI te lolotoga ʼo te temi ʼaenī, ʼe tou haga tauhi agatonu anai kia te ia, ʼi tatatou falala ʼaē ʼe tokaga kia tatou. (1 Kolonito 10:13; 1 Petelo 5:7) Kapau ʼe tou nonofo mālohi ʼi te moʼoni, tatau aipe pe koteā te ʼu fihifihia ʼaē ʼe hoko kia tatou, kae ʼe feala anai ke tou tauʼi te ʼu ʼaluʼaga kovi ʼaia ohage ko Paulo.

[Nota ʼi te lalo pasina]