Te ʼu Folafola Fakalilo ʼa Te ʼAtua Mo Tana Fakatuʼutuʼu
KA MOLE kita ʼiloʼi tona tali, pea ʼe ko he meʼa faigataʼa; kae ka kita ʼiloʼi leva tona tali, pea faigafua leva. Koteā koa ia te meʼa ʼaia? ʼE ko he folafola fakalilo.
ʼI te mālama ʼaenī ʼaē ʼe tokaga tāfito ai te hahaʼi ki te ʼu meʼa ʼaē ʼe ʼaoga kia nātou, ʼe nātou faka ʼuhiga te ʼu fakamatala fakalilo ʼe ko he ʼu gaoʼi faka tamaliki, kae ʼi te ʼu temi ʼāfea, ko te ʼu folafola fakalilo “neʼe ko he ʼahiʼahiʼi ʼo tokita poto,” ohage ko tona fakahā mai e te tohi The Interpreter’s Dictionary of the Bible.—Vakaʼi ia Tāʼaga Lea 1:5, 6.
Neʼe mole fakahā tuʼumaʼu e Sehova tona finegalo pea mo tana fakatuʼutuʼu ʼi hona ʼaluʼaga faigafua ke kita mahino kiai, kae ʼi ʼihi temi neʼe ina faka faigataʼa tana ʼu palalau fakakikite, ʼaki he ʼu folafola fakatā, mo he ʼu “folafola faka misitelio,” pea mo he ʼu folafola fakalilo ʼe faigataʼa hakita mahino kiai. (Pesalemo 78:2, King James Version; Faka au 12:8, The Emphasized Bible) ʼI tona fakahagatonu, ko te kupu faka Hepeleo ʼaē ʼe fakaliliu ʼaki te ʼu kupu folafola fakalilo, ʼe tuʼa 17 pe tona fakaʼaogaʼi e te Tohi-Tapu, kae ʼe lahi ʼaupito te ʼu folafola feiā pea mo te ʼu tāʼaga lea ʼi te Tohi-Tapu.
ʼE Lahi Te ʼu Folafola Fakalilo ʼi Te Tohi-Tapu
ʼE fakamatala mai e te Tohi-Tapu, neʼe lava tali e te Hau ko Salomone ki te ʼu fehuʼi faigataʼa pea mo te ʼu folafola fakalilo ʼaē neʼe fai age kia ia. (1 Hau 10:1, kiʼi nota) ʼE mahino ia, ko te poto ʼaia neʼe foaki age e te ʼAtua kia ia. ʼE ʼui e ʼihi hahaʼi fai hisitolia ʼāfea, neʼe ʼi ai te lakaga ʼaē neʼe kau ia Salomone pea mo te Hau ko Ilame mai Tile ʼi te faigaoʼi, pea neʼe mole lava tali ai e Salomone ki te folafola fakalilo ʼaē neʼe fai age ki ai. Kae kapau ʼe moʼoni te faʼahi ʼaia, pea neʼe lagi hoko te faʼahi ʼaia ʼi te mole kei foaki age e Sehova tona laumālie kia ia ʼuhi ko tana ʼapositasia. ʼO feiā mo te Tuʼi Fakamāu ko Samisoni, neʼe ina leleiʼia te ʼu folafola fakalilo. ʼI te tahi lakaga, neʼe ina fakamatakuʼi te ʼu fili ʼa te ʼAtua ʼaki te tokoni ʼo te laumālie maʼoniʼoni, ʼo ina fai age kia nātou he ʼu folafola fakalilo.—Kau Fakamāu 14:12-19.
Kae ʼe lahi te ʼu folafola fakalilo ʼi te Tohi-Tapu, ʼe ʼi ai tonatou pikipikiga mo te ʼu fakatuʼutuʼu ʼa Sehova. Ohage la, ko te koga tohi ʼo Senesi 3:15. Ko te lea faka polofeta ʼaia, ʼaē ʼe ko te kupu tāfito ʼo te Tohi-Tapu, ʼe ko he faʼahiga folafola fakalilo, ko he “misitelio.” (Loma 16:25, 26) ʼO hilifaki ki te ʼu meʼa ʼaē neʼe hā kia ia, neʼe toe sio foki te ʼapositolo ko Paulo ki ʼihi agaaga ʼo te fakatuʼutuʼu ʼa te ʼAtua, kae neʼe “nenefu” tana sio ʼaia, heʼe ʼi tona fakahagatonu, neʼe ko he ʼu meʼa “faka misitelio.” (1 Kolonito 13:12; 2 Kolonito 12:1-4) Pea e feafeaʼi ki te feʼekeʼaki ʼa te hahaʼi ʼo ʼuhiga mo te higoa faka misitelio ʼo te manu fekai—“onogeau onogofulu-ma-ono”—ʼaē ʼe fakahā fakapunamaʼuli mai ia Apokalipesi 13:18, pea ʼe mole fai ai hona fakamahino? Ko ai ʼaē ʼe feala tana fakamahino te ʼu folafola fakalilo ʼaia ʼa te ʼAtua, pea koteā tonatou ʼaoga?
Tou Mahino Ki Te ʼu Meʼa Fakalilo Taputapu
Ki te tokolahi ʼo tatou, ko te sio ʼe ko te meʼa ʼaē ʼe maʼuhiga tāfito ki totatou maʼuli. Kae kanapaula neʼe mole ʼi ai he mālama, pea ʼe mole he ʼaoga anai ʼo tatatou sio. ʼE hage anai ʼe tou kivi. ʼE toe feiā pe mo te fakakaukau ʼa te tagata. ʼE fakaofoofo te fealagia ʼa te tagata ke ina faka ʼalutahi he ʼu manatu, mo fakakaukauʼi, pea mo fakatokatoka he ʼu fihifihia. Kae ʼe ʼi ai te tahi meʼa ʼaē ʼe ʼaoga ke kita mahino ai ki te ʼu meʼa fakalilo taputapu. ʼE ʼi ai te ʼu hahaʼi ʼe nātou fakamahino te ʼuhiga ʼo te ʼu folafola fakalilo ʼa te Tohi-Tapu, kae ʼe ko Sehova tokotahi pe ʼaē ʼe feala ke ina fakahā tonatou faka ʼuhiga moʼoni, heʼe ko Ia ʼaē neʼe ina fai te ʼu folafola ʼaia, pea ʼe ko ia te ʼAtua ʼo te mālama.—1 Soane 1:5.
Kae meʼa fakaʼofaʼofa foki, heʼe ʼi te agamāhani, ʼe fialahi te hahaʼi ʼo mole nātou talitali ke foaki mai e Sehova te ʼu tali ki te ʼu folafola ʼaia. ʼI tanatou manako ki te ʼu meʼa faka misitelio, ko ʼihi ʼe nātou faiga ke nātou fakafimālieʼi ʼonatou ʼatamai kae mole nātou kumi te moʼoni, pea ʼe nātou kumi he ʼu tali ki te ʼu folafola ʼaia ka mole nātou tokagaʼi te Tohi-Tapu. Ohage la ʼi te tohi faka misitelio ʼa te kau Sutea ʼaē ko te Kabbale, ʼe nātou metitasio ki te ʼuhiga makehe ʼo te ʼu mataʼi tohi pea mo te ʼu mataʼi numelo faka Hepeleo. ʼI te tahi faʼahi, ko te kau Gnostiques ʼo te lua sēkulō ʼo totatou temi, neʼe nātou fakaʼaogaʼi te ʼu Tohi Faka Hepeleo pea mo te ʼu Tohi Faka Keleka ke nātou maʼu ai he ʼu fakamahino faka misitelio.
Kae ko tanatou ʼu kumi ʼaia, neʼe iku ai ki te ʼu toʼotoʼoga faka pagani pea mo te ʼu manatu fakavale, pea neʼe nātou fakamamaʼo ʼi te moʼoni fakaʼatua. Neʼe manatu fēnei e te kau Gnostiques, ‘Kapau ʼe fonu te agakovi ʼi te malamanei, pea ko tona Tupuʼaga, ia Iave, ʼe mole ko he ʼAtua agalelei.’ Koʼena te manatu ʼaē kua nātou iku kiai! ʼI fakakaukau fakavale leva! ʼE mole tou punamaʼuli ai ki te ʼu fakatokaga mālohi ʼaē neʼe fai e te ʼapositolo ko Paulo ʼi tana tauʼi te ʼu manatu faka ʼaposita ʼaē neʼe faka mafola e te kau Gnostiques ki muli age, ʼi tana tohi fēnei: “ ʼAua naʼa koutou fakalaka ʼi te meʼa ʼaē kua tohi!”—1 Kolonito 4:6, MN.
Tou Mahino Ki Te ʼUhiga ʼo Te ʼu “Folafola Faka Misitelio”
Kae kapau ko Sehova ʼe ko te ʼAtua ʼo te mālama, he koʼe ʼe ina fai koa he ʼu “folafola faka misitelio”? Ko te ʼu folafola fakalilo ʼe ʼaoga moʼo uga takita fakakaukau pea mo tokita ʼatamai. Koia, ko te ʼu folafola ʼaia ʼe tou maʼu ʼi te ʼu koga kehekehe ʼo te Tohi-Tapu ohage ko he ʼu meʼa konakona ʼe tūtū ki he meʼa kai, pea neʼe fakaʼaogaʼi moʼo fakatupu te fia ʼiloʼi ʼa te kau lautohi peʼe ke mālie te ʼu fakamatala. Ka fai he ʼu folafola fakalilo, pea ʼi te agamāhani ʼe toe fakahā mo tonatou faka ʼuhiga.—Esekiele 17:1-18; Mateo 18:23-35.
ʼE lotolelei Sehova ke ina foaki lahi tona poto ki te hahaʼi kae ʼe mole ina hoko fai feiā pe. (Sakopo 1:5-8) Ohage la ko te tohi ʼo Tāʼaga Lea, ko te tānaki ʼaia ʼo he tuʼuga lea fakatātā ʼe hage ki ʼihi ʼe ko he ʼu folafola fakalilo. ʼE lagi tonu anai ke kita fakakaukauʼi pea mo metitasioʼi fualoa ke kita mahino kiai. Kae ʼe tokolahi koa te hahaʼi ʼaē ʼe nātou fia fai te faʼahi ʼaia? Ko te poto ʼaē ʼe tuʼu ʼi te ʼu folafola ʼaia, ʼe hoki mau pe e nātou ʼaē ʼe nātou faiga moʼoni ke nātou mahino kiai.—Tāʼaga Lea 2:1-5.
Neʼe toe fakaʼaogaʼi foki e Sesu he ʼu lea fakatātā moʼo fakahā te ʼuhiga ʼo te loto ʼo nātou ʼaē neʼe fakalogo kia ia. Neʼe fakapupu mai te hahaʼi kia tafa ʼo Sesu. Neʼe nātou leleiʼia tana ʼu fakamatala, pea neʼe nātou fia mamata ki tana ʼu milakulo. Kae neʼe tokolahi koa te hahaʼi ʼaē neʼe nātou fetogi tonatou maʼuli ke nātou mulimuli ia te ia? Neʼe mole nātou hage ko te kau tisipulo ʼa Sesu, ʼaē neʼe nātou faiga tuʼumaʼu ke nātou mahino ki te ʼu akonaki ʼa Sesu, pea neʼe nātou fakafisi kia nātou totonu ke feala hanatou mulimuli ia te ia.—Mateo 13:10-23, 34, 35; 16:24; Soane 16:25, 29.
Tou Kumi Te Mālama
ʼE ʼui fēnei e te tohi, “ko te fia ʼiloʼi e te hahaʼi ia te ʼu meʼa fakalilo, ʼe hoko pe ʼi te ʼu temi ʼaē ʼe ʼala ai tonatou fakakaukau.” Ia ʼaho nei, ʼe tou maʼu te pilivilesio ʼaē ke tou maʼuʼuli ʼi te temi ʼaē “kua hā [ai] te mālama” fakalaumālie ki te hahaʼi ʼa te ʼAtua. (Pesalemo 97:11; Taniela 12:4, 9) ʼE feala koa hatatou talitali kia Sehova ke ina fakahā mai tana ʼu fakatuʼutuʼu ʼo mulimuli pe ki te temi ʼaē kua ina fakakatofa kiai? Tahi faʼahi maʼuhiga, ʼe tou foimo fetogi koa totatou maʼuli ʼi tatatou mahino ʼaē, ʼe tonu ke tou faka ʼalutahi totatou maʼuli mo te finegalo ʼa te ʼAtua? (Pesalemo 1:1-3; Sakopo 1:22-25) Kapau ʼe tou fai te faʼahi ʼaia, pea ʼe tapuakina anai e Sehova tatatou ʼu faiga, ʼo ina tuku mai tona laumālie maʼoniʼoni ke ina fakahā lelei mai kia tatou te fakatuʼutuʼu katoa ʼa te ʼAtua, pea ke lelei tatatou sio ʼi te faʼahi fakalaumālie, ohage pe ko te hoki lelei ʼo takita sio ʼaē ʼe nenefu ʼaki he ʼu mataʼi sioʼata.—1 Kolonito 2:7, 9, 10.
Ei, ko te ʼu folafola fakalilo ʼo te Tohi-Tapu ʼe nātou fakamoʼoni mai, ko Sehova ʼe ko ia ʼaē ʼe ina “Fakahā te ʼu meʼa fakalilo.” (Taniela 2:28, 29) Tahi ʼaē meʼa, ʼe ina Sivisivi te ʼu loto. (1 Fakamatala 28:9) ʼE mole tonu ai ke tou punamaʼuli ʼi tatatou ʼiloʼi ʼaē, neʼe ʼāsili mū te mālama ʼo te moʼoni ʼaki te temi. (Tāʼaga Lea 4:18; Loma 16:25, 26) ʼAua naʼa tou kumi te ʼatamai mālama ʼo te ʼu meʼa fakalilo ʼa te ʼAtua ki te ʼu lotu faka misitelio pe ko te poto fakataga, heʼe mole he fua ʼo te ʼu meʼa ʼaia, kae tou falala ʼe ko Sehova ʼAtua ʼaē ʼe feala ke ina foaki te mālama ʼo ʼuhiga mo te ʼu “folafola faka misitelio” ʼaia, pea ʼe ina fakahā anai tana ʼu fakatuʼutuʼu taulekaleka ki tana hahaʼi kaugana ʼi tona temi totonu.—Amosi 3:7; Mateo 24:25-27.
[Haʼuʼaga ʼo te paki pasina 26]
Biblia Hebraica Stuttgartensia, Deutsche Bibelgesellschaft Stuttgart