ʼE Feala Hakotou ʼIloʼi Te Ka Haʼu!

Ko te tokolahi ʼo te hahaʼi ʼe nātou tuʼania ki tonatou ka haʼu. ʼE nātou fai he ʼu fakatuʼutuʼu pea mo nātou fakaʼaogaʼi lelei tanatou paʼaga ke nātou maʼuli fīmālie ai. Kae ʼe feala koa ke tou ʼiloʼi papau te ka haʼu?

MOʼO mahino ki te ka haʼu, neʼe ʼahiʼahiʼi e te hahaʼi te ʼu faʼahiga meʼa kehekehe. Ko te ʼu hahaʼi popoto ʼaē ʼe fakahigoaʼi ko te kau futurologues, ʼe nātou sivisivi te ʼu meʼa ʼaē ʼe hoko ʼi te temi nei pea nātou fai ai leva he ʼu fakakikite. ʼE toe fai feiā mo te hahaʼi ʼaē ʼe nātou sivi te maʼuli faka ekonomika. ʼE fakaʼaogaʼi e te kau astrologues pea mo te hahaʼi fai fakakikite he ʼu horoscopes, mo te ʼu meʼa sioʼata ʼe takafuafua pea mo te ʼu meʼa faka misitelio, pea ko te tokolahi ʼe ʼolo kia nātou ʼaia. Ohage la, ʼe kei ʼiloa te astrologue Falani ko Nostradamus logope la kua fualoa tana mate.

Kae neʼe mole feala ke kita falala ki te hahaʼi ʼaia ʼaē neʼe nātou ʼui ʼe nātou polofeta. Koteā tona tupuʼaga? Koteʼuhi ʼe nātou meʼa noaʼi ia Sehova pea mo tana Folafola, te Tohi-Tapu. Ko te tupuʼaga la ʼaia ʼo tanatou mole lava tali ki te ʼu fehuʼi faigafua ʼaenī: ‘He koʼe ʼe feala ke ʼau tui papau ʼe hoko anai te ʼu meʼa ʼaē ʼe fakakikite e te Tohi-Tapu? Koteā tonatou pikipikiga mo te fakatuʼutuʼu ʼa te ʼAtua maʼa te hahaʼi? ʼE feala koa ke fua lelei te ʼu lea faka polofeta ʼaia kia ʼau pea mo toku famili?’ ʼE tali te Tohi-Tapu ki te ʼu fehuʼi ʼaia.

ʼE lahi te tahi ʼu agaaga ʼaē ʼe maʼuhiga age ai te ʼu lea faka polofeta ʼo te Tohi-Tapu. ʼO mole hage ko te ʼu fakakikite ʼa te kau astrologues, ʼe mole faka tuʼakoi e te ʼu lea faka polofeta ʼa te Tohi-Tapu te loto faʼitaliha ʼa te hahaʼi. Ei, ʼe mole heʼeki tohi fakatomuʼa te maʼuli ʼo te hahaʼi. (Teutalonome 30⁠:19) Ko te ʼu tohi ohage ko te ʼu tohi ʼa Nostradamus, ʼe mole ina fakahā mai pe koteā te ʼu aga ʼaē ʼe tonu ke kita fai, kae ʼe maʼu ai te ʼu meʼa faka misitelio pea mo faikehe. Kae ʼe fakatafito te ʼu lea faka polofeta ʼo te Tohi-Tapu ki te aga ʼaē ʼe tonu ke fai. ʼE nātou fakamahino mai pe koʼe ʼe fakahoko anai e te ʼAtua te meʼa ʼaē neʼe ina fakatuʼutuʼu. (2 Fakamatala 36⁠:15) Pea ʼe hoko moʼoni te ʼu lea faka polofeta ʼa Sehova, koteʼuhi ko “te Atua . . . e mole lohi.” (Tito 1⁠:⁠2) Koia ko te hahaʼi ʼaē ʼe nātou mulimuli ki te takitaki ʼo te Folafola ʼa te ʼAtua, ʼe nātou fiafia, ʼe ʼi ai te ʼuhiga ʼo tonatou maʼuli, pea ʼe mole puli tonatou temi pea mo tonatou ʼu koloā ʼi te ʼu meʼa noa.​—Pesalemo 25⁠:​12, 13.

Neʼe fakamahino te puani ʼaia pea mo te tahi ʼu puani ʼi te ʼu Fakatahi Faka Tisitilike ʼa te kau Fakamoʼoni ʼa Sehova ʼaē neʼe fai ʼi te malamanei katoa ʼi te taʼu 1999/2000, pea ko tona kupu tāfito “Te ʼu Lea Faka Polofeta ʼa Te ʼAtua.” ʼAki te ʼu akonaki, mo te ʼu fakafehuʼi, mo te ʼu faʼifaʼitaki pea mo te kiʼi gaoʼi faka Tohi-Tapu, neʼe fakatokagaʼi ki te hahaʼi te tofiʼa fakalaumālie taulekaleka ʼaē ʼe feala ke maʼu ʼe nātou ʼaē ʼe ako pea mo maʼuliʼi te ʼu folafola faka polofeta ʼa te ʼAtua. ʼE fakahā mai anai e te lua alatike te ʼu puani maʼuhiga tāfito ʼo te fakatahi.