Te ʼu Folafola Faka Polofeta ʼa Te ʼAtua—Pea Mo He ʼAmanaki Ki Te Ka Haʼu
ʼAKI te Folafola ʼa te ʼAtua, te Tohi-Tapu, ʼe mole matataku te kau Kilisitiano moʼoni ʼo ʼuhiga mo te ka haʼu kae ʼe nātou loto falala ʼuhi ko tanatou tui. ʼUhi ko tanatou felogoi lelei mo Sehova ʼAtua, ʼe nātou fakaʼamu ki te ʼapogipogi. Ohage ko tona fakamahino e te ʼuluaki akonaki ʼo te ʼu Fakatahi Faka Tisitilike “Te ʼu Lea Faka Polofeta ʼa Te ʼAtua,” kua ako talu mai fualoa e te kau Fakamoʼoni ʼa Sehova te ʼu lea faka polofeta faka Tohi-Tapu. Koia, koteā te meʼa ʼaē neʼe teuteuʼi e Sehova maʼa tana hahaʼi ʼi te ʼu fakatahi ʼaia? Neʼe fia ʼiloʼi te faʼahi ʼaia e te hahaʼi fuli ʼaē neʼe ʼolo kiai ʼaki tanatou Tohi-Tapu. ʼE tou vakaʼi anai te ʼu kupu tāfito ʼo te ʼu ʼaho e tolu ʼo te fakatahi.
ʼULUAKI ʼAHO: Tou Haʼele ʼi Te Mālama ʼo Te Folafola ʼa Te ʼAtua
Neʼe fakamahino mai e te akonaki “ ʼE Takitaki Tatou e Te Folafola ʼa Te ʼAtua,” ko te hahaʼi ʼa Sehova ʼe hage ko he tagata ʼe kamata folau ʼi te kei pōʼuli. ʼI te hake ake ʼo te laʼā, ʼe kei nenefu tana sio, kae ʼi te kua ʼasi lelei ʼo te laʼā, kua lelei leva tana sio. Ohage ko tona fakakikite ia Tāʼaga Lea 4:18, kua sio lelei te hahaʼi ʼa Sehova ki te ala ʼaē ʼe tonu ke nātou haʼele ai, ʼuhi ko te mālama ʼo te moʼoni ʼaē ʼe haʼu mai te ʼu folafola faka polofeta ʼa te ʼAtua. ʼE mole ina tuku nātou ke nātou tūkia ʼi te fakapōʼuli fakalaumālie.
Ko te akonaki tāfito, “Koutou Tokagaʼi Te ʼu Folafola Faka Polofeta ʼa Te ʼAtua,” neʼe ina fakamanatuʼi ki te hahaʼi ʼo te fakatahi, kapau ʼe nātou falala kia Sehova, pea ʼe mole nātou lotomamahi anai ohage ko te hahaʼi ʼaē ʼe nātou mulimuli ki te ʼu mesia loi pea mo te kau polofeta loi. ʼE mole tatau ia Sesu Kilisito pea mo te hahaʼi ʼaia, heʼe lahi ʼaupito te ʼu meʼa ʼaē ʼe fakamoʼoni ki tona ʼuhiga Mesia moʼoni. Ohage la, ʼi te fetogi faka milakulo ʼa Sesu neʼe ko he hā fakatomuʼa ʼaia peʼe feafeaʼi anai tona tuʼulaga Hau ʼi te Puleʼaga ʼo te ʼAtua. Talu mai tona fakanofo Hau ʼi te taʼu 1914, ʼe toe ʼui foki ko Sesu te “fetuuʼaho” ʼaē ʼe talanoa kiai ia 2 Petelo 1:19. Neʼe ʼui e te tēhina faiakonaki, “ ʼI tona ʼuhiga Fetuʼu ʼAho Faka Mesianike, ʼe ko te faka ʼiloga ʼaia ʼo te ʼaho foʼou, te temi foʼou ʼaē ka hoko mai ki te hahaʼi fakalogo fuli.”
Moʼo kamata te polokalama ʼo te hoʼatā, neʼe fai te akonaki “Tou Mū Ohage Ko He ʼu Mālama,” pea neʼe fakamahino ai te vaega ʼo Efeso 5:8 ʼaē neʼe ʼui ai e te ʼapositolo ko Paulo ke tou “mauli o hage ko te u fanau o te malama.” Ko te kau Kilisitiano ʼe ko he ʼu mālama, heʼe nātou fakahā te Folafola ʼa te ʼAtua ki te hahaʼi, pea ʼe nātou toe fakaʼaogaʼi foki te Tohi-Tapu ʼi tonatou maʼuli moʼo faʼifaʼitaki kia Sesu.
Ke feala hatatou liliu ko he faʼahiga mālama feiā, ʼe tonu ke “Tou Leleiʼia Te Lau ʼo Te Folafola ʼa Te ʼAtua.” Neʼe fakamahino te faʼahi ʼaia ʼi te ʼu akonaki e tolu. ʼI tana ʼosi talanoa kia Abraham Lincoln ʼaē neʼe ina ʼui ko te Tohi-Tapu ʼe “ko te meʼa ʼofa lelei tāfito ʼaē neʼe foaki e te ʼAtua ki te tagata,” neʼe fehuʼi e te ʼuluaki tēhina faiakonaki ki te hahaʼi, peʼe hā ʼi tanatou ʼu agamāhani, ʼe nātou leleiʼia moʼoni te lau ʼo te Tohi-Tapu, te Folafola ʼa Sehova. Neʼe fakaloto mālohiʼi nātou ke nātou lau fakalelei te Tohi-Tapu, ke nātou fakakaukauʼi pe neʼe hoko feafeaʼi te ʼu meʼa ʼaē ʼe fakamatala ʼi te Tohi-Tapu, pea ke nātou fakakaukauʼi te pikipikiga ʼo te ʼu puani foʼou pea mo te ʼu meʼa ʼaē kua nātou ʼiloʼi.
Neʼe fakatokagaʼi mai e te lua akonaki, ʼe tonu ke tou ako ke feala hatatou kai te “meakai fefeka,” kae mole tou lau feiā pe te Tohi-Tapu. (Hepeleo 5:13, 14) Neʼe ʼui e te tēhina faiakonaki, ʼe fakaloto mālohiʼi anai tatou e tatatou ako mo kapau ʼe tou ‘teuteuʼi totatou loto’ ohage ko tona fai e te pelepitelo Iselaele ko Esitalasi. (Esitalasi 7:10) Kae he koʼe koa ʼe maʼuhiga ʼaupito te ako? ʼE maʼuhiga heʼe fakalogo kiai tatatou felogoi mo Sehova. Koia ʼe tonu ke maʼuhiga kia tatou tatatou ako te Tohi-Tapu, ke liliu ko he meʼa fakafiafia pea mo fakaloto fīmālie logola ʼe ʼaoga ke tou fakakaukauʼi loloto pea mo faʼa kātaki moʼo fai ʼo te faʼahi ʼaia. ʼE tou lava maʼu feafeaʼi he temi ki te ako? Neʼe ʼui e te tēhina fakamuli, ʼe tou lava fai anai te faʼahi ʼaia mo kapau ʼe tou ‘totogi maʼa tatou te temi faigamālie’ ʼi te ʼu meʼa ʼaē ʼe mole faʼa maʼuhiga. (Efeso 5:16) Ei, ke ʼi ai hotatou temi ki te ako, ʼe tonu ke tou fakaʼaogaʼi fakapotopoto totatou temi.
Neʼe fakahā e te akonaki “ ʼE Foaki e Te ʼAtua Te Mālohi Kia Ia ʼAē Kua Gaʼegaʼe,” ko te hahaʼi tokolahi ia ʼaho nei ʼe nātou gaʼegaʼe. Ke feala hatatou maʼu “te malohi tauʼoluga pau o te Atua” ʼi te minisitelio faka Kilisitiano, ʼe tonu ke tou falala kia Sehova, ʼaē ʼe “ina foaki te mālohi kia ia ʼaē kua gaʼegaʼe.” (2 Kolonito 4:7; Isaia 40:29) Ko te ʼu meʼa ʼaē ʼe feala ke tou maʼu ai te mālohi, ʼe ko te Folafola ʼa te ʼAtua, mo te faikole, mo te kokelekasio faka Kilisitiano, mo te ʼu tēhina taupau faka Kilisitiano, mo te kau tuʼumaʼu ki te minisitelio pea mo te faʼifaʼitaki ʼo te ʼu tēhina mo tuagaʼane agatonu. Ko te akonaki “Tou Liliu Ko He Kau Faiako ʼUhi Ko Te Maʼuhiga ʼo Totatou Temi,” neʼe fakamahino ai ʼe tonu ki te kau Kilisitiano ke nātou liliu ko he kau faiako pea mo nātou fai faka mafola, pea ʼe tonu ke nātou gāue kinakina moʼo hikihiki tanatou “faiva ʼi te faiakonaki.”—2 Timoteo 4:2, MN.
Ko te akonaki fakamuli ʼo te ʼaho ʼaia “ ʼE Mole Mālo Anai Ia Nātou ʼAē ʼe Nātou Tauʼi Te ʼAtua,” neʼe fakahā ai te ʼu faiga ʼaē neʼe fai mole heʼeki faʼa fualoa, ke manatu e te hahaʼi ko te kau Fakamoʼoni ʼa Sehova ʼe ko he magaʼi lotu ʼe fakatupu tuʼutāmaki. Kae ʼe mole tonu ke tou loto tuʼania, heʼe ʼui fēnei ia Isaia 54:17: “ ‘Ko te mahafu tau fuli ʼaē ka faʼu anai moʼo fakafeagai atu kia te koe ʼe mole iku anai ia, pea ko te lea fuli ʼaē ka fakafeagai anai kia te koe ʼi he fakamāu, ʼe ke tauteaʼi anai. Koʼena te tofiʼa ʼa te kau kaugana ʼa Sehova, pea ko tanatou faitotonu ʼe haʼu mai ia te ʼau, ko te ʼui ʼaia ʼa Sehova.’ ”
LUA ʼAHO: Te ʼu Meʼa ʼAē ʼe Fakahā e Te ʼu Folafola Faka Polofeta
ʼI te hili ʼo te fai palalau ki te vaega Tohi-Tapu ʼo te ʼaho, neʼe fakalogo ʼaki he loto fiafia te hahaʼi ki te ʼu akonaki e tolu, ʼaē neʼe fakatafito ki te kupu tāfito “ ʼE Faka Kolōliaʼi Ia Sehova e Te Kau Taki Mālama.” Ko te ʼuluaki akonaki neʼe ina fakamahino ko te fakatuʼutuʼu ʼa te Kilisitiano, ko te faka kolōliaʼi ʼo Sehova ʼi tana fai faka mafola ʼi te potu fuli pe. Pea neʼe fakahā e te lua akonaki ʼe tonu ke tou taki te hahaʼi ki te kautahi ʼa te ʼAtua. ʼO feafeaʼi? ʼO tou fakaʼaogaʼi ia minuta e nima peʼe hogofulu ʼi te kamata peʼe ʼi te fakaʼosi ʼo te ako, moʼo fakamahino peʼe feafeaʼi te fakaʼaluʼalu ʼo te kautahi ʼa te ʼAtua. Neʼe fakahā e te tolu akonaki, ʼe tonu ke tou faka kolōliaʼi te ʼAtua ʼaki tatatou ʼu gāue lelei.
Ko te akonaki “Tou ʼOfa ʼAupito Ki Te ʼu Fakamanatu ʼa Sehova” neʼe ina fakamahino he ʼu vaega neʼe filifili ʼi te Pesalemo 119. ʼE mahino papau ia, ʼe ʼaoga kia tatou te ʼu fakamanatu, heʼe tou loto galogalo. Koia ʼe maʼuhiga ʼaupito ke tou ʼofa ki te ʼu fakamanatu ʼa Sehova ohage pe ko te tagata fai pesalemo!
Pea neʼe hoko leva te meʼa makehe—ko te akonaki ʼo te papitema ʼaē ko tona kupu tāfito “ ʼE Papitema Te Hahaʼi ʼAē ʼe Nātou Fakalogo Ki Te ʼu Folafola Faka Polofeta.” Neʼe fakamanatuʼi ki te kau papitema, ʼe nātou faʼifaʼitakiʼi ia Kilisito ʼi tanatou papitema, pea ʼe nātou toe faʼifaʼitaki foki kia ia ʼi tanatou mulimuli ki tona faʼahiga maʼuli. (1 Petelo 2:21) ʼE ko he pilivilesio ki te kau foʼofoʼou ʼaia tanatou kau ki te fakahoko ʼo Soane 10:16, MN, ʼaē neʼe fakakikite ai e Sesu ʼe tānaki anai te “tahi ʼu ōvi” ke nātou tauhi fakatahi mo tana kau tisipulo fakanofo!
Neʼe kamata te polokalama ʼo te hoʼatā ʼaki te akonaki “Koutou Fakalogo Ki Te Meʼa ʼAē ʼe ʼUi e Te Laumālie,” pea neʼe fakamahino ai ko te laumālie ʼa Sehova ʼe palalau mai kia tatou ʼaki te Tohi-Tapu, “te kaugana agatonu mo fakapotopoto,” pea mo totatou leʼo ʼo loto ʼaē neʼe akoʼi e te Tohi-Tapu. (Mateo 24:45) Koia ʼe mole ʼaoga ki te kau Kilisitiano ke nātou logo ki he leʼo ʼe haʼu mai lagi ke nātou ʼiloʼi ai pe koteā te ʼu meʼa ʼaē ʼe tonu ke nātou fai ke leleiʼia ai nātou e te ʼAtua. ʼI te akonaki ʼaē neʼe hoa kiai, “Tou Lagolago Ki Te ʼu Akonaki ʼAē ʼe ʼAlutahi Mo Te Tauhi Ki Te ʼAtua,” neʼe fakaloto mālohiʼi ai te kau Kilisitiano ke nātou tekeʼi te ʼu manatu fakaloto vaivai ʼaē ʼe faka mafola e te mālama ʼaenī. Koteʼuhi kapau ʼe tou fia ʼiloʼi te ʼu meʼa ʼa te mālama, pea ʼe feala ke lave ai kia tatou te ʼu manatu ʼa te kau ʼaposita pea mo te kau kaugana ʼa Satana ʼo tou tuʼutāmaki ai. ʼE lelei age ke tou lau tuʼumaʼu te Tohi-Tapu mo te ʼu alatike ʼo Te Tule Leʼo pea mo te Réveillez-vous!
“Tou Taupau Maʼu Te Faʼifaʼitaki ʼo Te ʼu Folafola ʼo Te Maʼuli,” neʼe ko te kupu tāfito ʼaia ʼo te tahi akonaki, pea neʼe ʼui ai ʼe tonu ke kita māhani lelei ki te “faʼifaʼitaki,” peʼe ko te tafitoʼaga ʼo te moʼoni ʼaē ʼe haʼu mai te Tohi-Tapu. (2 Timoteo 1:13) Kapau ʼe tou mahino lelei ki te tafitoʼaga ʼaia pea ʼe feala anai ke tou aga faka lotu pea mo tou ʼiloʼi te ʼu meʼa ʼaē ʼe mole ʼalutahi mo te moʼoni.
Koutou fakakaukauʼi, ʼe leleiʼia koutou e Sehova. ʼI fakaʼapaʼapa leva! Neʼe fakaloto mālohi te akonaki “ ʼE Fakafonu Te ʼApi ʼa Sehova e ‘Te ʼu Meʼa Manakoʼia’,” ʼaē ʼe fakatafito ki te lea faka polofeta ʼa Asea, koteʼuhi neʼe fakapapauʼi ai ko nātou fuli ʼo te “hahai kaugamalie” ʼe leleiʼia nātou e Sehova. (Apokalipesi 7:9) Koia, ʼe hāofaki anai nātou e Sehova ʼi tana “luluʼi” fakaʼosi te ʼu puleʼaga ʼi te lolotoga ʼo te “mamahi lahi” ʼaē ka ʼamanaki hoko. (Asea 2:7, 21, 22; Mateo 24:21) Kae ʼe tonu ki te hahaʼi ʼa Sehova ke nātou nonofo tokakaga ʼi te faʼahi fakalaumālie, ohage ko tona fakahā e te akonaki “ ʼE Uga Tatou e Te ʼu Folafola Faka Polofeta Ke Tou Nofo Tokaga.” Neʼe fakaʼaogaʼi e te tēhina faiakonaki te ʼu palalau ʼaenī ʼa Sesu: “Koia, koutou alaʼala, koteuhi e mole koutou iloi pe ko te aho fea e haele mai ai toutou Aliki.” (Mateo 24:42) ʼE lava feafeaʼi hatatou nofo tokakaga ʼi te faʼahi fakalaumālie? ʼI tatatou maʼumaʼua ʼi te selevisi ʼa Sehova, mo tatatou faikole tuʼumaʼu pea mo tatatou fakatalitali ki te ʼaho lahi ʼo Sehova.
Ko te akonaki fakamuli ʼo te ʼaho ʼaia neʼe ko “Te ʼu Folafola Faka Polofeta ʼi Te Temi Fakaʼosi.” ʼE mole toe galoʼi anai te akonaki ʼaia. Koteā tona tupuʼaga? Koteʼuhi neʼe fakahā e te tēhina faiakonaki te tohi foʼou Prêtons attention à la prophétie de Daniel ! Neʼe ina ʼui, “ko te tohi ʼaenī ko ʼona pasina e 320 pea ʼe maʼu ai he ʼu paki matalelei, pea ʼe ina fakamahino te tohi katoa ʼo Taniela.” ʼE ko he fakamoʼoni ʼaia ʼe foaki mai e Sehova te mālama ʼo ʼuhiga mo tana Folafola faka polofeta pea ʼe ina fakamālohiʼi tatatou tui!
TOLU ʼAHO: ʼE Hoko Anai Te ʼu Folafola Faka Polofeta ʼa Te ʼAtua
Ko te ʼaho fakamuli ʼo te fakatahi neʼe kamata ʼaki te akonaki “Te ʼu Folafola Faka Polofeta Ki Te Temi ʼAē Neʼe Fakakatofa.” Neʼe vakaʼi ʼi te ʼu akonaki e tolu te ʼu faifakamāu e tolu ʼa Sehova ʼaē neʼe fakahā e te polofeta ko Hapakuke. Neʼe fai te ʼuluaki fakamāu ʼo ʼuhiga mo Suta ʼaē neʼe hēʼia, pea ko te lua neʼe fai ʼo ʼuhiga mo te puleʼaga fefeka ʼo Papiloni. Ko te fakamuli, ʼaē ʼe kei ʼamanaki hoko, ʼe ko te fakaʼauha ʼo te hahaʼi agakovi fuli. ʼI tana talanoa ʼo ʼuhiga mo Halamaketone, neʼe fakatupu e te tēhina fakamuli te manavasiʼi lahi ʼi te loto ʼo te hahaʼi ʼaē neʼe nātou fakalogo kia ia, he neʼe ina ʼui fēnei: “ ʼE moʼoni, ʼe fakamataku ʼaupito anai te temi ʼaē ka fakaʼaogaʼi ai e Sehova tona māfimāfi.”
“Tou Leleiʼia Totatou Tofiʼa Fakalaumālie,” neʼe ko te kupu tāfito ʼaia ʼo te kiʼi gaoʼi faka Tohi-Tapu ʼo te fakatahi. Ko te gaoʼi ʼaia ʼaē neʼe malave ki te loto ʼo te hahaʼi, neʼe ina fakahāhā te kehekehe ʼo te aga ʼa Sakopo pea mo Esau ʼo ʼuhiga mo te ʼu meʼa fakalaumālie. Neʼe meʼa noaʼi e Esau tona tofiʼa fakalaumālie, pea neʼe foaki kia Sakopo he neʼe ina leleiʼia. Neʼe fai te fehuʼi ʼaenī ki te hahaʼi, “Koteā [te tofiʼa fakalaumālie] ʼaē neʼe foaki mai e Sehova?” Neʼe tali fēnei e te tēhina faiakonaki: “ ʼE ko te moʼoni ʼo tana Folafola, te Tohi-Tapu; mo te ʼamanaki ki te maʼuli heʼegata pea mo te pilivilesio ke tou fakafofoga ia ia ʼi tatatou gāue ʼaē ko te faka mafola ʼo te logo lelei.”
Ko te akonaki ʼaē neʼe hoa kiai neʼe ina fai te fehuʼi ʼaenī, “Koteā Te Faka ʼUhiga ʼo Tatatou Tofiʼa Fakalaumālie Kia Koutou?” ʼE tou fakahā ʼe tou leleiʼia totatou tofiʼa fakalaumālie mo kapau ʼe tou fakamuʼamuʼa te selevisi kia Sehova, pea mo te ʼu pilivilesio fakalaumālie kae tou tuku ki muli te ʼu meʼa ʼa tatou takitokotahi peʼe ko te ʼu meʼa fakasino. Kapau ʼe tou fai te faʼahi ʼaia pea ʼe tou fakatafito anai totatou maʼuli ki tatatou ʼu felogoi mo Sehova, kae mole tou fai ohage ko Atama, mo Esau pea mo te kau Iselaele heʼe agatonu.
Ko te akonaki ki te kaugamālie, “Ohage Ko Tona Fakakikite, ʼe Fai Anai Ia Meʼa Foʼou Fuli Pe,” neʼe ina fakamahino te pikipikiga ʼo te ʼu lea faka polofeta maʼuhiga e fā ʼo ʼuhiga mo te “lagi foʼou” pea mo te “kele foʼou.” (Isaia 65:17-25; 66:22-24; 2 Petelo 3:13; Apokalipesi 21:1, 3-5) ʼE mahino ia, neʼe fakatuʼutuʼu e Sehova ke toe lahi age te fakahoko ʼo te ʼu lea faka polofeta ʼaia ʼi tona hoko ki tana hahaʼi ʼaē neʼe toe fakatuʼu ʼi te taʼu 537 ʼi muʼa ʼo totatou temi. Ei, neʼe manatu ki tona Puleʼaga ʼaē ʼi selo (te “lagi foʼou”), pea mo te hahaʼi fakalogo ʼi te kele (te “kele foʼou”) ʼaē ka nonofo ʼi te palatiso fakakelekele.
Neʼe fakaʼosi te fakatahi ʼaki te akonaki lelei pea mo fakaloto mālohi ʼaē “Koteā Tatatou ʼAmanaki Mokā Tou Tuku Ke Takitaki Tatou e Te Folafola ʼa Te ʼAtua?” Neʼe ina fakamanatuʼi ki te hahaʼi fuli “kua nounou te temi” ʼaē kei toe moʼo fakaʼosi te gāue fai faka mafola ʼo te Puleʼaga. (1 Kolonito 7:29, MN) Ei, kua tou fakaōvi ki te temi ʼaē ka fakahoko ai e Sehova tana tautea kia Satana pea mo tana tuʼu agakovi katoa. ʼOfa pe ke hage totatou loto ko te loto ʼo te tagata fai pesalemo ʼaē neʼe hiva fēnei: “Kua talitali totatou nefesi kia Sehova. ʼE ko totatou tokoni pea ʼe ko totatou meʼa tali tau.” (Pesalemo 33:20) ʼE ko he ka haʼu taulekaleka ʼaē ʼe fakatalitali kia nātou ʼaē ʼe nātou falala ki te fakahoko ʼo te ʼu folafola faka polofeta ʼa te ʼAtua!
[Paki ʼo te pasina 7]
ʼAki te kiʼi gaoʼi matalelei ʼaē neʼe fai, neʼe toe ʼāsili leleiʼia e te kau kaugana ʼa Sehova tonatou tofiʼa fakalaumālie
[Paki ʼo te pasina 7]
Neʼe papitema ai te tokolahi ʼaē neʼe nātou leleiʼia te ʼu folafola faka polofeta ʼa te ʼAtua