Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi la peʼe koutou lava tali ki te ʼu fehuʼi ʼaenī:

• He koʼe ia Loma 5:3-5 ʼe talanoa fakamuli ia Paulo ki te ʼamanaki?

Neʼe fakahāhā e Paulo te ʼu puani ki te kau Kilisitiano fakapotopoto—te ʼu mamahi, te faʼa kātaki, te ʼuhiga tagata ʼaē kua ʼahiʼahiʼi, pea mo te ʼamanaki. Ko te “ ʼamanaki” ʼaia ʼe mole ko te meʼa ʼuluaki ʼaia ʼe kita maʼu ʼi te Tohi-Tapu, kae ʼe ko te ʼamanaki ʼaē ʼe ina fakamālohi pea mo hikihiki, mo tuputupu ʼi te Kilisitiano ʼaē ʼe feala ke ina maʼu ʼaki te temi.—15/12, pasina 22 ki te 23.

• He koʼe ʼe tonu ke mahino te kau Kilisitiano ia ʼaho nei ki te ʼu faigaoʼi ʼaē neʼe fai ʼi Heleni ʼi te temi muʼa?

Ko takita ʼiloʼi te agaaga pea mo te ʼu agamāhani ʼo te ʼu gaoʼi ʼaia, ʼe kita lava mahino ai ki te ʼu vaega faka Tohi-Tapu. ʼE talanoa te ʼu vaega ʼaia ki he ‘faiga ʼo mulimuli ki he ʼu lekula,’ ‘ke līaki te ʼu meʼa fuli pe ʼaē ʼe mamafa pea mo kita sioʼi te faʼifaʼitaki ʼa Sesu,’ ‘ke tou lele ʼo aʼu ki te fakaʼosi ʼo te lele’ pea mo tou maʼu te fakapale. (2 Timoteo 2:5; 4:7, 8; Hepeleo 12:1, 2; 1 Kolonito 9:24, 25; 1 Petelo 5:4)—1/1, pasina 28 ki te 30.

• Koteā te fakatuʼutuʼu foʼou moʼo tala te logo lelei neʼe hoko ʼi Sanualio 1914?

Neʼe ko te “Photo-Drame de la Création.” Neʼe ko ʼona koga e fā, ko te ʼata pea mo te ʼu paki, pea neʼe fakahaʼele tahi mo te foʼi fime neʼe puke ai te ʼu akonaki faka Tohi-Tapu. Ki te Drame ʼaia neʼe teuteuʼi ʼona ʼaiʼaga paki e 20 pea neʼe fakaʼaogaʼi lahi moʼo akoʼi ki te hahaʼi te logo ʼo te Tohi-Tapu.—15/1, pasina 8 ki te 9.

• Koteā ʼaē ʼe kehekehe ai te Kolesi Pule mo he sosiete kua fakamoʼoni?

ʼE fai te vote moʼo filifili te kau takitaki gāue ʼo te sosiete kua fakamoʼoni, kae ko Sesu Kilisito ʼaē ʼe ina hinoʼi te Kolesi Pule. ʼE mole fakamaʼua ke takitaki te ʼu sosiete kehekehe e he ʼu tēhina ʼo te Kolesi Pule. ʼI te fono ʼaē ʼe fai ʼi te taʼu fuli e te Watch Tower Bible and Tract Society of Pennsylvania, ko ʼihi tēhina ʼo te Kolesi Pule ʼaē neʼe ko te kau takitaki pea mo nātou faʼufaʼu te ʼu pilō, kua nātou tuku te ʼu maʼua ʼaia. Kua fakahoko leva te ʼu gāue ʼaia e te ʼu tēhina kua fakapotopoto ʼo te “tahi ʼu ōvi”. (Soane 10:16, MN ) ʼE faka fealagia ai ki te ʼu tēhina ʼo te Kolesi Pule ke lahi tonatou temi moʼo teuteuʼi te meʼa kai fakalaumālie, pea mo tokaga ki te ʼu meʼa ʼaē ʼe ʼaoga ʼi te faʼahi fakalaumālie maʼa te foʼi famili fakatautehina faka malamanei.—15/1, pasina 29, 31.

• Ko ai te ʼu faʼifaʼitaki e lua ʼe tou lava vakaʼi ke tou mahino ai peʼe feafeaʼi te tauʼi ʼo te lotovaivai?

Ko te faʼe ʼa Samuele ko Ana. Neʼe feala pe ke lotovaivai ʼi te temi ʼaē neʼe palalau kovi age ai ia Elia te pelepitelo lahi ʼo Iselaele. Kae ʼaki he aga fakaʼapaʼapa, neʼe ina fakahā fakahagatonu age kia te ia te ʼu meʼa ʼaē ʼi tona loto. Tahi ʼaē meʼa, neʼe mole faka ʼuhigaʼi kovi e Ana te ʼu palalau ʼa Elia. Ko te lua faʼifaʼitaki ko Maleko, ʼaē neʼe lagi lotovaivai koteʼuhi neʼe mole tali e Paulo ke kaugā gāue mo ia ʼi te minisitelio faka misionea. Neʼe mole lotovaivai ʼi te mole foaki age te pilivilesio ʼaia, kae neʼe hoko atu pe tana tauhi, ʼo ʼalu mo Palenapasi.—1/2, pasina 20 ki te 22.

• He koʼe ʼe tonu ke tokaga te kau Kilisitiano ki tanatou fefoakiʼaki mo niʼihi ia te ʼu polokalama olotinatea?

ʼE lahi te ʼu polokalama ʼi te olotinatea (ʼo kau ai mo te ʼu gaoʼi) ʼe puipui e te ʼu lao ki tona fakaʼaogaʼi pea mo te ʼai ʼo te polokalama ki te olotinatea. ʼI te agamāhani ʼe kita fakafeagai ki te lao mokā tou hiki he ʼu polokalama maʼa niʼihi, tatau aipe mokā neʼe foaki noa mai kia tatou. ʼE fakalogo anai te kau Kilisitiano ki te lao ʼaenī, “koutou liufaki te ʼu meʼa ʼa Sesale kia Sesale.” (Maleko 12:17, MN )—15/2, pasina 28 ki te 29.

• Neʼe ko ai ia Cyrille pea mo Méthode, pea koteā te gāue ʼaē neʼe nā fai ki te ako ʼo te Tohi-Tapu?

ʼE nā tautēhina pea neʼe nā tutupu ʼi te hiva sēkulō ʼi Tesalonika, ko te kolo ʼo Heleni. Neʼe nā fai te faʼahiga faitohi maʼa te ʼu lea faka Slave, pea neʼe lahi te ʼu Tohi-Tapu neʼe nā fakaliliu ki te lea ʼaia.—1/3, pasina 28 ki te 29.

• Koteā te faka ʼuhiga ʼo “te manatu ki te laumālie”?—Loma 8:6.

ʼE faka ʼuhiga ki he tahi ʼe takitaki, mo puleʼi pea mo uga e te laumālie mālohi ʼo Sehova. ʼE tou lava tuku te laumālie ʼo te ʼAtua ke gāue ia tatou, ʼo tou lau pea mo ako ia te Tohi-Tapu, mo tou fakalogo mo he loto katoa ki te ʼu lao ʼa te ʼAtua, pea mo tou kole tona laumālie.—15/3, pasina 15.

• Koteā ʼaē ʼe koutou lava fai mo kapau ʼe ʼi ai he femahino hala?

ʼE maʼuhiga ke kita faiga ʼaki he loto ʼofa, ke kita mahino lelei ki te fihifihia. Kapau ʼe mole hona fua, pea ʼaua naʼa koutou lotovaivai. Koutou kole kia Sehova ke tokoni atu pea ke koutou maʼu he lotomahino, koteʼuhi ʼe “sio ki te ʼuhiga ʼo te loto.” (Tāʼaga Lea 21:2; 1 Samuele 16:7)—1/4, pasina 21 ki te 23.