Tou Falala Kia Sehova Te ʼAtua ʼAē ʼe Maʼuli Moʼoni
Kua koutou mamata koa ʼi te pōʼuli ki te lagi mokā lauʼatea, pea mo koutou sio ki te ʼu lauʼi teau fetuʼu? ʼE koutou fakamahino feafeaʼi te maʼuli ʼo te ʼu meʼa ʼaia?
ʼI TE gona ʼo te pōʼuli, neʼe hage ʼe palalau te ʼu fetuʼu ki te Hau ko Tavite ʼo te Iselaele ʼāfea, ʼo ina tohi ai te ʼu palalau ʼaenī: “ ʼE kalagaʼi e te lagi te kolōlia ʼo te ʼAtua. Pea ko te laulahi ʼo te lagi ʼe ina fakahā te gāue ʼo tona ʼu nima.” (Pesalemo 19:1) Ei, ko te Tupuʼaga kae mole ko te ʼu meʼa ʼaē neʼe ina fakatupu, ʼe tāu mo “te kololia, mo te fakaapaapa pea mo te mafimafi.”—Apokalipesi 4:11; Loma 1:25.
ʼE ʼui fēnei ʼi te Tohi-Tapu: “Ko te tufuga o meafuape e ko te Atua.” (Hepeleo 3:4) ʼIo, ko te ʼAtua moʼoni ʼe ‘ ko tona huafa ko Sehova, ia ia ʼaē ʼe Māʼoluga ʼAupito ʼi te kele katoa.’ (Pesalemo 83:18) Pea ʼe maʼuli moʼoni ia—ʼe mole ko he moemisi. Neʼe ʼui e Sesu Kilisito ʼo ʼuhiga mo tana Tāmai ʼe ʼi selo ko Sehova: “E mooni iaʼia nee ina fekaui mai au.”—Soane 7:28.
Ko Sehova—ʼe Ina Fakahoko Tana ʼu Fakatuʼutuʼu
Ko te huafa ʼo te ʼAtua ko Sehova, ʼe teitei fakaʼaogaʼi tuʼa 7 000 ʼi te ʼu Tohi Faka Hepeleo. ʼE ʼasi mai ʼi te huafa ʼaia ʼe maʼuli moʼoni. Ko te huafa ʼo te ʼAtua ko tona faka ʼuhiga “ ʼE ina Fakahoko.” Koia ʼe fakahā lelei e Sehova ʼAtua ko ia ko he Tahi ʼe ina Fakahoko tana ʼu fakatuʼutuʼu. ʼI te temi ʼaē neʼe fakalavelave age ai e Moisese ki te ʼAtua tona huafa, neʼe fakamahino fēnei age e Sehova: “ ʼE ʼau fakahā anai pe ko ai ia ʼau.” (Ekesote 3:14) Ko te vaega ʼaia, ʼe fakaliliu fēnei ʼi te Tohi-Tapu ʼa Rotherham: “ ʼE ʼau liliu anai ohage ko te meʼa ʼaē ʼe ʼau loto kiai.” ʼE fakahā e Sehova pe ko ai ia ia, peʼe ina filifili ke liliu ko te meʼa ʼaē ʼe ʼaoga moʼo fakahoko tana ʼu fakatotonu faitotonu pea mo tana ʼu fakapapau. Koia la ʼaē, ʼe lahi ʼaupito ai tona ʼu tuʼulaga, ohage la ko te Tupuʼaga, ko te Tāmai, ko te Pule Faʼitaliha, ko te Tauhi Ōvi, ko Sehova ʼo te kautau, ko Ia ʼaē ʼe Fagono ki te faikole, ko te Tuʼi Fakamāu, ko te Tagata Faiako Lahi, ko te Tagata Fai Totogi.—Kau Fakamāu 11:27; Pesalemo 23:1; 65:2; 73:28; 89:26; Isaia 8:13; 30:20; 40:28; 41:14.
Ko te ʼAtua moʼoni pe ʼaē ʼe lava fakatoʼo ki ai te huafa ko Sehova, koteʼuhi ʼe mole ʼiloʼi papau e te tagata peʼe hoko anai tana ʼu fakatuʼutuʼu. (Sakopo 4:13, 14) Ko Sehova tokotahi pe ʼe ina lava ʼui fēnei: “Ohage pe ko te tō ifo ʼo te ʼua lahi mai te lagi, ʼo feiā aipe mo te nive, pea ʼe mole toe liliu kiai ka mole heʼeki ina faka huhuʼa te kele pea mo gaohi ke ina fakatupu pea mo fakahomo, ke feala ai ke maʼu moʼoni te pulapula e te tagata to pulapula pea mo te pane kia ia ʼaē ʼe kai, ʼe feiā anai taku folafola ʼaē ʼe mavae atu ʼi toku gutu. ʼE mole toe liliu mai anai kia te ʼau ka mole hona ʼu fua, kae ʼe mahino papau ia ʼe ina fai anai te meʼa ʼaē kua ʼau leleiʼia, pea ʼe hoko anai te meʼa ʼaē neʼe ʼau fekauʼi ki ai.”—Isaia 55:10, 11.
ʼE fakahoko moʼoni e Sehova tana fakatuʼutuʼu tatau aipe mo kapau ʼe mata faigataʼa ki te tagata. Kua fualoa te mate ʼa Apalahamo, mo Isaake, mo Sakopo, kae neʼe ʼui fēnei e Sesu ʼo ʼuhiga mo nātou: “Ko ia [ia Sehova] ʼe mole ko he ʼAtua ʼo te kau mate, kaʼe ʼo te kau maʼuʼuli, heʼe kia ia ʼe nātou maʼuʼuli fuli.” (Luka 20:37, 38, MN ) Neʼe kua mamate te ʼu pateliaka agatonu e tolu ʼaia, kae maʼa te ʼAtua neʼe kei nātou maʼuʼuli, he neʼe ina ʼiloʼi papau ʼe ina fakatuʼuake anai nātou. ʼE mole faigataʼa kia Sehova ia te toe fakatuʼuake ʼo tana ʼu kaugana agatonu ʼaia, heʼe hage pe ko tana fakatupu te ʼuluaki tagata mai te efu ʼo te kele.—Senesi 2:7.
ʼE tuku mai e te ʼapositolo ko Paulo te tahi faʼifaʼitaki ʼo te fakahoko e te ʼAtua tana ʼu fakatuʼutuʼu. ʼE ʼui ʼi te Tohi-Tapu ko Apalahamo ʼe “ko [te] tamai o [te] u puleaga kaugamalie.” (Loma 4:16, 17) ʼI te mole heʼeki maʼu e Apalamo hana fānau, neʼe fetogi e Sehova tona higoa ʼo liliu ko Apalahamo, ko tona faka ʼuhiga ko te “Tāmai ʼo Te Kaugamālie (Tokolahi).” Neʼe fakahoko moʼoni e Sehova te faka ʼuhiga ʼo tona huafa, he neʼe ina faka fealagia ki te matuʼa ʼaia ko Apalahamo pea mo tona ʼohoana finematuʼa ko Sala ke maʼu hanā fānau.—Hepeleo 11:11, 12.
Kua foaki age kia Sesu Kilisito te mālohi pea mo te pule, neʼe palalau ia ʼo ʼuhiga mo te ʼu meʼa ka hoko moʼoni ʼi hona ʼaluʼaga ʼe makehe age ʼi te ʼu fakapapau ʼa te tagata. Logola neʼe kua mate tona kaumeʼa ko Lasalo, kae neʼe ʼui fēnei e Sesu ki tana kau tisipulo: “E moe totatou kaumea ko Lasalo; kae e au alu ke au fafagu iaʼia.” (Soane 11:11) He koʼe neʼe faka ʼuhiga e Sesu te mate ʼa te tagata ohage pe ʼe moe?
ʼI te tau mai ʼa Sesu ki Petania, te kolo ʼo Lasalo, neʼe ʼalu ki te falemaka pea neʼe ina fakatotonu ke toʼo te foʼi maka ʼaē neʼe ina pupunu te hūʼaga. ʼI tana ʼosi faikole leʼo lahi, pea ina fakatotonu fēnei: “Lasalo, hu mai ki tuà!” Pea neʼe sio te hahaʼi ki te falemaka, “nee haù ki tuà te mate, pea ko ona nima mo ona vae nee haʼihaʼi ia aki he u kie-haʼi pea nee kofu aki he kie tona fofoga.” Pea neʼe ʼui maʼa Sesu: “Koutou vetevete ia pea koutou tukuʼage ke alu.” (Soane 11:43, 44) Neʼe fakatuʼuake e Sesu ia Lasalo—ʼo toe maʼuli te tagata ʼaia ʼaē neʼe kua mate kua hili kiai ʼaho e fā! Neʼe mole loi Kilisito ʼi tana ʼui ʼaē neʼe moe tona kaumeʼa. ʼI te manatu ʼa Sehova pea mo Sesu, ko te mate ʼa Lasalo neʼe hage pe ia neʼe moe. Ei, ko Sesu pea mo tana tāmai ʼe ʼi selo ʼe nā fakahoko moʼoni te ʼu meʼa.
ʼE Lava Fakahoko e Sehova Tatatou ʼu Fakaʼamu
ʼE kehekehe te ʼu tamapua loi pea mo te ʼAtua moʼoni! ʼE faihala te kau tauhi tamapua ʼi tanatou manatu ʼaē ʼe maʼu he ʼu faʼahiga fealagia e te ʼu fakatātā ʼaē ʼe nātou tauhi kiai. ʼE mole feala ki te ʼu faʼahiga tauhi ʼaia ke nātou foaki ki te ʼu fakatātā he ʼu fealagia faka milakulo. ʼI te tahi faʼahi, ʼe feala kia Sehova ʼAtua ke ina faka ʼuhiga ʼe kei maʼuʼuli tana ʼu kaugana ʼaē kua mamate talu mai fualoa, koteʼuhi ʼe ina lava ʼo toe fakamaʼuli age ia nātou. “Ko Sehova ʼe ko te ʼAtua moʼoni,” pea ʼe mole heʼeki ina kākāʼi tana hahaʼi.—Selemia 10:10.
ʼE ko he meʼa fakaloto fīmālie te ʼiloʼi ʼaē ʼi te temi ʼaē ka fakatuʼutuʼu kiai Sehova, ʼe ina fakatuʼuake anai te hahaʼi ʼaē ʼe ina manatuʼi! (Gaue 24:15) Ei, ko te fakatuʼuake ʼe ko te toe foaki ʼo te ʼu agaaga kia ia ʼaē neʼe mate. ʼE mole faigataʼa ki te Tupuʼaga hana manatuʼi te ʼu agaaga ʼo nātou ʼaē kua mamate pea mo fakatuʼuake nātou, ia ia ʼaē ʼe lahi tona poto pea mo tona mālohi. (Sopo 12:13; Isaia 40:26) Ko Sehova ʼe mahu ʼi te ʼofa, koia ʼe ina fakaʼaogaʼi ai anai tana fakakaukau haohaoa moʼo fakatuʼuake te kau mate ki te palatiso ʼi te kele, ʼo ina toe foaki age kia nātou tonatou ʼulugaaga ʼaē neʼe nātou maʼu ʼi muʼa ʼo tonatou mate.—1 Soane 4:8.
ʼI te kua ōvi mai ʼo te fakaʼosi ʼo te mālama ʼa Satana, ʼe mahino ko nātou ʼaē ʼe falala ki te ʼAtua moʼoni ʼe nātou fakafiafia ki te ka haʼu. (Tāʼaga Lea 2:21, 22; Taniela 2:44; 1 Soane 5:19) ʼE fakapapau fēnei mai e te tagata fai pesalemo: “Kei toe he kiʼi temi siʼipe, pea pulihi anai te tagata agakovi; . . . kae ko te kau agavaivai ʼe nātou maʼu anai te kele, pea ʼe nātou fiafia moʼoni anai ʼi te mahu ʼo te tokalelei.” (Pesalemo 37:10, 11) ʼE mole toe ʼi ai anai te fai fakapō pea mo te agamālohi. ʼE tuʼu anai te faitotonu, pea ko te ʼu faigataʼaʼia faka ekonomika ʼe pulihi anai. (Pesalemo 37:6; 72:12, 13; Isaia 65:21-23) ʼE mole toe ʼi ai anai te ʼu fakapalatahi faka sosiale, faka fenua, faka telepi. (Gaue 10:34, 35) ʼE pulihi anai te ʼu tau pea mo te ʼu mahafu tau. (Pesalemo 46:9) ʼI te temi ʼaia, “ ʼe mole he tahi ʼe ina ʼui anai: ‘ ʼE ʼau mahaki.’ ” (Isaia 33:24) ʼE fiafia anai te hahaʼi pea ʼe mole toe mahahaki anai. (Apokalipesi 21:3, 4) ʼE mole kei tuai pea liliu moʼoni anai te kele ko he palatiso. Neʼe ko te fakatuʼutuʼu ʼaia ʼa Sehova!
Ei, ko te ʼu ʼamanaki ʼa te Tohi-Tapu kua vave fakahoko. He koʼe koa ʼe tou hēʼia anai ʼi te ʼu meʼa ʼaē ʼe tauhi kiai te malamanei kae tou lava falala katoa kia Sehova? Ko tona finegalo “ke fakamauli te tagata fuape, pea ke natou kaku ki te iloi o te mooni.” (1 Timoteo 2:3, 4) Koia ke ʼaua naʼa pulinoa totatou temi pea mo totatou ʼu fealagia ki he ʼu meʼa noa, mo he ʼu moemisi, ʼi te ʼu faʼahiga meʼa ʼo te tuʼu ʼaenī pea mo tona ʼu ʼatua, kae ke tou tuputupu ʼi te ʼatamai ʼo ʼuhiga mo te ʼAtua moʼoni pea mo tou falala katoa ki ai.—Tāʼaga Lea 3:1-6; Soane 17:3.
[Paki ʼo te pasina 6]
ʼI te manatu ʼa Sehova pea mo Sesu, ko Lasalo neʼe moe pe ia
[Paki ʼo te pasina 7]
Ko te palatiso ʼi te kele kua vave hoko moʼoni