Te Kau Tūpulaga ʼe Nātou Manako Ki Te ʼu Moʼoni ʼo Te Tohi-Tapu

KUA hili kiai te ʼu taʼu ʼe lauʼi afe, neʼe fehuʼi fēnei e te tagata fai pesalemo Hepeleo: “ ʼE lava feafeaʼi anai ki he tūpulaga ke ina fakamaʼa tona ala?” (Pesalemo 119:9) ʼE kei ʼaoga ke lagaʼi te fehuʼi ʼaia ia ʼaho nei koteʼuhi ʼe felāveʼi te kau tūpulaga mo te ʼu fihifihia ʼaupito ʼi te mālama ʼaenī. ʼI te kua fai fakalāluvale ʼo te ʼu felāveʼi fakasino, kua tokolahi te kau tūpulaga kua nātou maʼu te mahaki ko te SITA, pea teitei pe kia nātou ʼaia ʼe nātou taʼu 15 pea mo taʼu 24. Ko te fakaʼaogaʼi ʼo te toloke, ʼe ina fakatupu te tahi ʼu fihifihia, pea ʼe mamate ʼihi kau tūpulaga. ʼE lahi te ʼu tuʼutāmaki ʼe hoko ki te kau tūpulaga ʼuhi ko te ʼu musika heʼeʼaoga, mo te ʼu ʼata ʼaē ʼe ʼasi ai te ʼu agamālohi pea mo te ʼu aga heʼeʼaoga, mo te ʼu ʼata ʼi te televisio pea mo te ʼu fime viteo, pea mo te ʼu felāveʼi fakasino heʼeʼaoga ʼaē ʼe fakahā ʼi te Internet. Koia ko te fehuʼi ʼaē neʼe lagaʼi e te tagata fai pesalemo ʼe ko he fehuʼi maʼuhiga ki te tokolahi ʼo te ʼu mātuʼa pea mo te ʼu tūpulaga ia ʼaho nei.

Moʼo tali ki tana fehuʼi, neʼe ʼui fēnei e te tagata fai pesalemo: “Mo kapau ʼe nofo tokaga ʼo mulimuli ki tau folafola.” ʼIo, ʼe foaki e te Folafola ʼa te ʼAtua, te Tohi-Tapu, te takitaki lelei maʼa te kau tūpulaga, pea kapau ʼe nātou muliʼi, tokolahi te kau tūpulaga ʼe fua lelei anai tonatou maʼuli. (Pesalemo 119:105) Tou vakaʼi te faʼifaʼitaki ʼa ʼihi tūpulaga ʼe nātou ʼofa ki te ʼAtua pea mo nātou faiga ke nātou mālolohi ʼi te faʼahi fakalaumālie, ʼo mole nātou manako fakavale ki te ʼu fakafiafia pea mo te ʼu koloā ʼo te malamanei.

ʼE Nātou Fakafetaʼi Ki Te Takitaki ʼa Tanatou ʼu Mātuʼa

Neʼe fualoa te pionie katoa ʼa Jacob Emmanuel ʼi muʼa ʼo tana ʼalu ʼo gāue ʼi te filiale ʼo te kau Fakamoʼoni ʼa Sehova ʼi Mekesike. ʼE ina manatuʼi ʼaki he loto fakafetaʼi pe neʼe feafeaʼi tana manako ki te tauhi ki te ʼAtua: “Neʼe tuku mai e taku ʼu mātuʼa te faʼifaʼitaki mālohi, ʼo feiā mo te ʼu tokoni lelei ʼaē neʼe tuku mai e te ʼu tēhina fakalaumālie ʼaē neʼe kaumeʼa mo ʼau. Neʼe nātou uga ʼau ke ʼau manako ki te gāue faka mafola. Neʼe nātou takitaki māmālie ʼau ʼi te ala ʼaē ʼe lelei, neʼe mole hage kia ʼau ʼi he temi neʼe fefeka fau.”

ʼE manatuʼi e David ʼaē kua fualoa tana pionie katoa, ko te meʼa ʼaē neʼe malave kia ia neʼe ko te pionie makehe ʼo tanā ʼu mātuʼa, ʼi tana kei veliveli mo tona kiʼi tēhina. ʼI te temi ʼaē neʼe mate ai tana tāmai, neʼe hoko atu te pionie makehe ʼa tana faʼe. Neʼe ina haga taupau aipe ia nāua pea mo hoko atu tana faka mafola ia te logo lelei. ʼE ʼui fēnei e David: “Neʼe mole nā fakakinauʼi ʼau ke ʼau pionie, kae neʼe fakafiafia ʼaupito tamatou selevisi pionie, koia ʼaē neʼe ʼau fia toʼo ai te selevisi pionie ʼuhi ko toku famili pea mo tomatou ʼu kaumeʼa.” ʼO ʼuhiga mo te maʼuhiga ʼo te takitaki lelei pea mo te tokaga ʼa te ʼu mātuʼa, ʼe ʼui fēnei e David: “ ʼI te po fuli, neʼe lau mai e tamā faʼe te ʼu hisitolia mai te tohi Du paradis perdu au paradis reconquis.a Ko tana faʼahiga fakamatala mai ʼo te ʼu hisitolia neʼe tokoni kia māua tautēhina ke ma leleiʼia te meʼa kai fakalaumālie.”

Te Loto Fakafetaʼi Ki Te ʼu Fono

Maʼa ʼihi tūpulaga ʼe mata faigataʼa tanatou leleiʼia te ʼu fono faka Kilisitiano. ʼE nātou ʼōmai kiai ʼuhi ko tanatou ʼu mātuʼa. Kae kapau ʼe nātou haga tatuʼu mai ki te ʼu fono, ʼaki te temi ʼe nātou leleiʼia leva te ʼu fono. Tou vakaʼi te faʼifaʼitaki ʼa Alfredo, ʼaē neʼe pionie katoa ʼi tona taʼu 11. ʼE ina fakahā fakalelei ʼi tona kei taʼu nima, neʼe mole fia ʼalu ki te ʼu fono koteʼuhi neʼe tulemoe ai, kae neʼe faiga aipe e tanā ʼu mātuʼa ke mole moe ʼi te ʼu fono. ʼE ina manatuʼi: “ ʼI taku lahilahi ake, māmālie pe neʼe ʼau fia logo ki te ʼu fono, tāfito la ʼi te temi ʼaē neʼe kua ʼau poto ai ʼi te lautohi pea mo te faitohi, he neʼe ʼau kamata fai taku ʼu tali ʼaki taku ʼu palalau māhani.”

Ko Cintia, ʼe taʼu 17 pea ʼe pionie temi katoa, ʼe ina ʼui ko te ʼu fakakaugā lelei neʼe maʼuhiga ʼaupito ki te fakatuputupu ʼo tana manako ki te selevisi maʼa te ʼAtua. ʼE ina ʼui fēnei: “Ko te felogoi lelei mo te ʼu tēhina pea mo te kau tuʼumaʼu ki te ʼu fono, ʼe ko he ʼu puipui ke ʼaua naʼa ʼau fia kumi toku ʼu kaumeʼa ʼi te mālama, pea mo te ʼu meʼa ʼaē ʼe holi māhani kiai te kau tūpulaga, ohage la ko te ʼolo ki te ʼu fale meʼe. Ko taku fakalogo ʼi te ʼu fono ki te ʼu tali pea mo te ʼu meʼa neʼe hoko ki ʼihi tēhina mo tuagaʼane, neʼe tokoni mai ke ʼau foaki kia Sehova ia meʼa fuli ʼe ʼau maʼu, pea neʼe ʼau logoʼi ko te meʼa lelei ʼaupito ʼaē ʼe ʼau maʼu ko toku temi finemui. Koia neʼe ʼau fakatotonu ai ke ʼau kau ki te selevisi pionie.”

Kae ʼe ina ʼui fēnei: “Neʼe ʼi ai te temi, ʼi muʼa ʼo taku papitema, neʼe ʼau tō fono, neʼe ʼau takuʼaki ʼe ʼi ai te ʼu gāue ʼi tomatou loto fale peʼe ko taku ʼu meʼa ʼe ako. Neʼe lahi taku tō fono, pea neʼe fua kovi ki toku maʼuli fakalaumālie. Neʼe ʼau fakatahi leva mo te tama neʼe mole ina ako te Tohi-Tapu. Kae ʼaki te tokoni ʼa Sehova, pea ʼaki te temi neʼe ʼau fakatonutonuʼi te faʼahi ʼaia.”

Ko Te Tonu Takitokotahi

ʼI te fehuʼi ʼaē kia Pablo, ko te tahi tūpulaga ʼe pionie katoa, pe koteā ʼaē ʼe maʼuhiga tāfito kia ia moʼo fakatuputupu ʼo tana manako ki te moʼoni ʼo te Folafola ʼa te ʼAtua, neʼe ina ʼui fēnei: “Ko meʼa e lua ʼe ʼau manatuʼi: ko taku ako tokotahi te Tohi-Tapu pea mo taku fai faka mafola lahi. ʼE ʼau fakafetaʼi ki taku ʼu mātuʼa ʼi tanā akoʼi mai te ʼu moʼoni ʼo ʼuhiga mo Sehova, pea kia ʼau neʼe ko te meʼa maʼuhiga ʼaia neʼe feala ke nā foaki mai kia ʼau. Kae neʼe tonu ke ʼau ʼiloʼi papau pe koʼe ʼe ʼau ʼofa kia Sehova. Pea ki te faʼahi ʼaia, neʼe tonu ke ʼau ʼiloʼi ‘te laulahi pea mo te loloto’ ʼo te ʼu moʼoni ʼo te Tohi-Tapu. Ka tou fai te faʼahi ʼaia, pea hoki tou holi ai leva ki te Folafola ʼa Sehova, ʼaē ʼe hage ko ‘he afi kakaha’ ʼe ina uga tatou ke tou palalau ki te hahaʼi. ʼE lahi anai totatou loto fakafetaʼi ki te ʼu moʼoni mokā ʼe tou faka mafola mālohi.”—Efeso 3:18; Selemia 20:9.

Ko Jacob Emmanuel, ʼaē neʼe tou talanoa kiai ki muʼa atu, ʼe ina toe manatuʼi te maʼuhiga ʼaē ke tou fili takitokotahi ke tou gāue maʼa Sehova. ʼE ina ʼui neʼe mole fakakinauʼi ia ia e tanā ʼu mātuʼa ke papitema. “ ʼI taku manatu ʼe lelei age pe te fai ʼaia heʼe ʼau sio ki tona ʼu fua lelei. Ko te kau tūpulaga ʼaē neʼe ʼau fakakaugā kiai, tokolahi neʼe nātou fakatotonu ke nātou papitema fakatahi. ʼIo neʼe ko he fakatuʼutuʼu lelei, kae ko ʼihi neʼe nātou fai te faʼahi ʼaia ʼuhi pe ko te fakakaumeʼa, koteʼuhi mole fualoa kiai neʼe mole kei lahi tanatou ʼu gāue maʼa te Puleʼaga. Ki toku faʼahi neʼe mole fakakinauʼi ʼau e taku ʼu mātuʼa ke ʼau foaki toku maʼuli kia Sehova. Neʼe ko he tonu ʼa ʼaku tokotahi pe.”

Te Tuʼulaga ʼo Te Kokelekasio

Ko ʼihi tūpulaga neʼe nātou ako tokotahi te ʼu moʼoni ʼo te ʼAtua, he neʼe mole tokoni age tanatou ʼu mātuʼa. ʼE mahino ia ʼi te ʼu ʼaluʼaga ʼaia ʼe faigataʼa te fai ʼo te meʼa ʼaē ʼe lelei pea mo taupau maʼu te faʼahi ʼaia.

ʼE manatuʼi e Noé neʼe fua lelei ʼaupito te moʼoni kia ia. Talu mai tana kei veliveli, neʼe ʼitaʼita pea mo agamālohi. ʼI tana kamata ako te Tohi-Tapu ʼi tona taʼu 14, neʼe kamata fetogi tana aga, pea neʼe fiafia tanā ʼu mātuʼa ki te fetogi ʼaia logola neʼe heʼeki nā fia logo ki te moʼoni. Pea ʼi te tuputupu ʼa Noé ʼi te faʼahi fakalaumālie, neʼe ina fia fakaʼaogaʼi lahi tona maʼuli maʼa te ʼAtua. ʼI te temi nei kua minisi temi katoa.

ʼO toe feiā mo Alejandro, ʼi tana kei veliveli neʼe ina kamata ako te ʼu moʼoni faka Kilisitiano logola neʼe heʼeki fia logo tanā ʼu mātuʼa ki te moʼoni. ʼI tana fakamatala tona loto fakafetaʼi ki te moʼoni, ʼe ina ʼui fēnei: “Neʼe ʼau lahilahi ake ʼi te lotu Katolika. Kae neʼe lahi taku fia mahino ki te Kominisi ʼaē ʼe tui ʼe mole he ʼAtua, koteʼuhi talu mai taku kei veliveli neʼe mole ʼau maʼu ʼi taku lotu te ʼu tali ki te ʼu fehuʼi ʼaē neʼe ʼau fia mahino kiai. Neʼe tokoni mai te kautahi ʼa Sehova ke ʼau ʼiloʼi te ʼAtua. Neʼe ina hāofaki toku maʼuli heʼe ka na neʼe mole ʼau ako te Tohi-Tapu, pea ʼe mahino ia ʼe ʼau hēhē nei ki te ʼu felāveʼi fakasino heʼeʼaoga, mo te ʼinu kava, peʼe ko te toloke. Peʼe lagi neʼe feala ke ʼau fakakaugā ki he kūtuga agatuʼu, ʼo fua kovi ai kia ʼau.”

ʼE lava feafeaʼi ki he tūpulaga hana taupau te ʼu moʼoni ʼaē ʼe ina kumi pea mo pipiki kiai, mo kapau ʼe mole ina maʼu te tokoni ʼofa ʼo tanā ʼu mātuʼa? ʼE mahino ia, ʼe ʼaoga tāfito ʼi te temi ʼaia te tokoni ʼa te kau tagata ʼāfea pea mo ʼihi ʼi te kokelekasio. ʼE manatuʼi e Noé: “Neʼe mole ʼau logoʼi ʼe ʼau tokotahi, he neʼe nofo tuʼumaʼu Sehova mo ʼau. Pea neʼe lahi te ʼu tēhina pea mo te ʼu tuagaʼane ʼofa neʼe nātou tokoni mai kia ʼau, ʼo nātou liliu ʼi te faʼahi fakalaumālie ko taku ʼu tāmai, mo taku ʼu faʼe, pea mo toku ʼu tēhina.” ʼE gāue nei ʼi te Petele pea ʼe ina fakaʼaogaʼi tona temi maʼa te ʼAtua. ʼO toe feiā mo Alejandro, ʼe ina ʼui fēnei: “Ko te meʼa ʼaē ʼe ʼau fakafetaʼi tuʼumaʼu anai kiai, ko te tokaga moʼoni ʼa te kau tagata ʼāfea ʼo te kokelekasio kia ʼau. ʼE ʼau fakafetaʼi ʼaupito ki te faʼahi ʼaia heʼe ʼi taku kamata ako te Tohi-Tapu ʼi toku taʼu 16, ohage pe ko te kau tūpulaga fuli neʼe mālohi ʼi toku kakano te ʼu holi ʼo toku temi tūpulaga. Ko te ʼu famili ʼi te kokelekasio neʼe nātou tokaga tuʼumaʼu kia ʼau. ʼI te temi fuli neʼe fakaafe ʼau e ʼihi ki ʼonatou ʼapi pea mo fakaafe ʼau ke mātou kakai pea neʼe nātou ʼofa kia ʼau.” ʼI te temi nei kua taʼu 13 tupu te selevisi temi katoa ʼa Alejandro.

Maʼa ʼihi ko te lotu ʼe ʼaoga pe ia ki te hahaʼi matutuʼa. Kae tokolahi te kau tūpulaga neʼe nātou ako te ʼu moʼoni ʼo te Tohi-Tapu ʼi tanatou kei liliki, pea neʼe nātou ʼofa kia Sehova pea mo nofo agatonu kia te ia. ʼE feala ke tou faka ʼuhiga ki te kau tūpulaga ʼaia te ʼu palalau ʼaenī ʼa Tavite ia Pesalemo 110:3: “Ko tau hahaʼi ʼe nātou foaki fakamalotoloto anai ia nātou ʼi te ʼaho ʼo tou ʼu mālohi faka solia. ʼI te taulekaleka ʼo te maʼoniʼoni, ʼi te mafoa ʼo te ʼaho, kua ʼi ai tau kau tūpulaga ohage ko he ʼu mosiʼi hahau.”

ʼE tonu ke fakatuʼutuʼu mālohi ia te kau tūpulaga ke nātou ako te ʼu moʼoni pea mo taupau maʼu. ʼE ko he meʼa fakafiafia hatatou sio ko te tokolahi ʼe nātou pipiki maʼu ki te kautahi ʼa Sehova, pea mo kau tuʼumaʼu ki te ʼu fono, pea mo ako mālohi te Tohi-Tapu. ʼI tanatou fai feiā, neʼe nātou manako moʼoni ai ki te Folafola ʼa te ʼAtua pea mo gāue kia te ia!—Pesalemo 119:15, 16.

[Kiʼi nota]