Ko He Temi Fakafiafia ʼi Te ʼu Fenua ʼo Te ʼu Balkans

ʼI te taʼu 1922, neʼe fai te fono ʼa te kau Ako Tohi-Tapu, ko te higoa ʼāfea ʼo te kau Fakamoʼoni ʼa Sehova, ʼi Innsbruck, ʼi Otilisia. ʼI te hahaʼi ʼaē neʼe kau ki te fono ʼaia, neʼe ʼi ai ia Franz Brand, ko te tūpulaga Siamani mai te kolo ʼo Apatin ʼi Voïvodine, ʼi Serbie. ʼI te temi pe ʼaē neʼe toʼo ai e te tagata faiakonaki ia te huafa ʼo te ʼAtua, ia Sehova, neʼe kamata logoaʼa te hahaʼi, ʼo mole nātou faka fealagia age ki ai ke ina hoko atu tana akonaki, ʼo fakagata ai te fono. Kae ko te meʼa ʼaē neʼe logo kiai ia Franz neʼe malave ʼaupito kia te ia, pea neʼe ina fakatotonu ai ke ina faka mafola te logo lelei ʼo te Puleʼaga. Neʼe kamata māmālie feiā te tuputupu fakalaumālie ʼi te fenua e tahi ʼo te ʼu fenua ʼo te ʼu Balkans.

MAʼA te hahaʼi tokolahi ʼi te temi nei, ka nātou logo ki te higoa ʼo Iukoselavia ʼe nātou manatu ki te tau pea mo te fakapogi ʼo te hahaʼi. Ko te meʼa ʼe manatu kiai te hahaʼi ʼe ko te ʼu paki fakaʼofaʼofa ʼo te ʼu mātea, mo te hahaʼi ʼaē ʼe feholaki pea ʼe mole kei ʼi ai honatou ʼamanaki, mo te ʼu ʼapi kua maumau, mo te ʼu tamaliki ʼe mole kei ʼi ai hanatou ʼu mātuʼa pea ʼe nātou maʼuli tuʼania. ʼE mole maʼu he kupu feʼauga moʼo fakamatala te mamahi fakasino pea mo te mamahi ʼo te loto pea mo te maʼuli masiva ʼaē neʼe hoko ʼaki te tau neʼe fai ʼi te Potu fenua ʼo te ʼu Balkans mai te taʼu 1991 ki te taʼu 1995, ʼo holoʼi fuli ai te ʼu ʼamanaki ʼa te ʼu faiga ʼa te tagata, ʼo ʼuhiga mo he ka haʼu pea mo he ka haʼu ʼe mole ʼi ai he tuʼania. ʼI te hili ʼo te tau, ko te hahaʼi ʼo te Iukoselavia ʼāfea ʼe tau mo te maʼuli kinakina ʼi te faʼahi faka ekonomika pea mo te maʼuli masiva ʼaupito.a

ʼAki te maʼuli mamahi ʼaia, ʼe faigataʼa hakita manatu ʼe kita maʼu anai he hahaʼi fiafia ʼi te fenua ʼaia. ʼE lagi faikehe kia tatou, kae ʼe maʼu ai te ʼu hahaʼi fiafia. ʼI tona fakahagatonu, neʼe hoko te ʼaho fakafiafia makehe ki te hahaʼi fiafia ʼaia ʼi te fakaʼosiʼosi ʼo te 20 sēkulō. Koteā te pikipikiga ʼo te tūpulaga ko Franz Brand, ʼaē neʼe tou palalau kiai ʼi te kamataʼaga, mo te fakafiafia ʼaia?

Ko He Tuputupu Fakalaumālie ʼi Te ʼu Fenua ʼo Te ʼu Balkans

Neʼe fiafia ia Franz Brand ki te ʼu moʼoni foʼou ʼaē neʼe logo kiai pea neʼe ina fakatotonu ʼe tonu ke ina faka mafola te logo lelei. Neʼe ina maʼu tana gāue ko te kosi ʼulu maʼa te hahaʼi tagata ʼi Maribor, ko te kolo ʼi Slovénie ʼe ōvi ki te tuʼakoi ʼo Otilisia, pea neʼe ina kamata faka mafola ki te hahaʼi ʼaē neʼe ʼōmai ʼo kosi ʼulu, ʼaē neʼe heheka pea mo fakalogo kae ina lolotoga fai tana gāue. ʼAki tana ʼu faiga, neʼe ʼi ai leva te kiʼi kūtuga ʼo te kau fai faka mafola ʼo te Puleʼaga ʼi Maribor ʼi te fakaʼosi ʼo te ʼu taʼu 1920. Neʼe fai te ʼu akonaki faka Tohi-Tapu ʼi te fale kai, ʼaē ki muli age neʼe fakahigoaʼi ʼaki tona higoa lelei ko te Fale Kai ʼAē ʼe Kai Ai Te ʼu Manu Kehekehe ʼo Te Tai ʼo te Novi svet (te Mālama Foʼou).

ʼI te holo ʼo te temi, neʼe mafola te logo lelei ʼi te fenua katoa. Ko te fakaʼaogaʼi ʼo te “Photo-Drame de la Création” (ko te fakahāhāʼaga ʼata ʼe hola valu tona loaloaga, ko te ʼu ʼata, mo te ʼu paki pea mo te ʼu pa fakatagi neʼe puke) neʼe ʼaoga lahi ki te faka mafola ʼaia. Pea ʼi te ʼu taʼu 1930 ʼi te temi ʼaē neʼe fakatagaʼi kovi ai te kau Fakamoʼoni ʼi Siamani, neʼe fakaloto mālohiʼi te kau Fakamoʼoni ʼi te fenua ʼo Iukoselavia ʼaki te feholaki mai ʼa te kau pionie Siamani ʼo gāue ʼi te fenua ʼo Iukoselavia. ʼI tanatou lītuʼa ki tonatou ʼu lelei takitokotahi, neʼe nātou ʼolo ʼo faka mafola ʼi te ʼu koga meʼa mamaʼo ʼo te fenua moʼugaʼia ʼaia. ʼI te kamataʼaga, neʼe mole faʼa tali lelei te gāue. ʼI te kamataʼaga ʼo te ʼu taʼu 1940, neʼe ko te toko 150 kau fai faka mafola neʼe nātou tuku tanatou pepa tānaki gāue.

ʼI te 1941, neʼe ʼāsili kovi te ʼu fakataga, pea neʼe fakaʼosi ʼi te taʼu 1952. Kae ʼi te ʼaho 9 ʼo Sepetepeli 1953, lolotoga te puleʼaga Kominisi ʼaē neʼe pule ai te Senelale ko Tito, neʼe fakagafua e te puleʼaga ke gāue te kau Fakamoʼoni ʼa Sehova! ʼI te taʼu ʼaia, neʼe ko te toko 914 kau fai faka mafola ʼo te logo lelei, pea neʼe nātou haga tuputupu. ʼI te taʼu 1991, neʼe tuputupu te kau fai faka mafola ʼo aʼu ki te toko 7 420, pea ko te toko 16 072 neʼe kau ki te ʼAho Fakamanatu ʼo te taʼu ʼaia.

Mai te ʼaho 16 ki te ʼaho 18 ʼo ʼAukusito 1991, neʼe fai te ʼuluaki fakatahi faka malamanei ʼa te kau Fakamoʼoni ʼa Sehova ʼi te fenua ʼaia ʼi Zagreb, ʼi Croatie. Ko te toko 14 684 hahaʼi neʼe kau ai, ko te hahaʼi ʼo te loto fenua pea mo te ʼu hahaʼi mai te tahi ʼu fenua. Ko te fakatahi heʼe galo ʼaia neʼe ina teuteuʼi te hahaʼi ʼa Sehova ki te ʼu ʼahiʼahi ka hoko mai. ʼI te ʼu motokā fakamuli ʼaē neʼe fakalaka ʼi te faʼahi ʼe vakavakaʼi ai te ʼu pepa ʼi te vaha ʼo Croatie mo Serbie, neʼe ʼi ai te ʼu papikā neʼe fetuku ai te kau Serbes ki tonatou ʼu ʼapi. ʼI te ʼosi fakalaka ʼo te papikā fakamuli, neʼe pupunu te tuʼakoi ʼo te fenua kae kamata te tau.

Te ʼu Tupuʼaga Ke Fiafia Ai Te Hahaʼi ʼa Sehova

Ko te ʼu taʼu ʼo te tau neʼe hoko ai te ʼu ʼahiʼahiʼi fakamataku ki te kau Fakamoʼoni ʼa Sehova ʼi te ʼu fenua ʼo te ʼu Balkans. Kae ʼe nātou fakafiafia koteʼuhi neʼe tapuakina e Sehova ia tana hahaʼi ʼo te ʼu fenua ʼaia ke nātou tuputupu ʼi hona ʼaluʼaga fakaofoofo. Talu mai te taʼu 1991, ʼi te fenua ʼo Iukoselavia ʼāfea neʼe haga tuputupu aipe te kaugamālie ʼo te kau fai faka mafola ʼo te Puleʼaga ʼo laka ʼi te 80 ki te teau. Ko te taʼu gāue 2001 ʼaē neʼe hahaʼi ʼaupito ai te kau fai faka mafola, he neʼe nātou kaku ki te toko 13 472.

ʼI te agamāhani neʼe ko te ʼu pilō ʼi Zagreb pea mo Belgrade (Serbie) ʼaē neʼe tokakaga ki te gāue ʼa te kau Fakamoʼoni ʼa Sehova ʼi te Iukoselavia ʼāfea katoa. ʼAki te tuputupu pea mo te ʼu fetogi faka politike, neʼe ʼaoga ke ʼi ai he ʼu pilō foʼou ʼi Ljubljana (Slovénie), mo Skopje (Masetonia), pea ke ʼi ai he ʼu pilō foʼou ʼi Belgrade pea mo Zagreb. ʼE teitei pe ko te toko 140 ʼe gāue ʼi te ʼu pilō ʼaia. Tokolahi ia nātou ʼe ko te kau tūpulaga pea ʼe nātou gāue mālohi pea mo ʼoʼofa kia Sehova. ʼE kaugamālie ia nātou ʼe kau ki te fakaliliu ʼo te ʼu tohi faka Tohi-Tapu ki te lea faka Croate, faka Masetonia, mo te faka Serbe, pea mo te faka Slovène. ʼE ko he tapuakina lahi heʼe ko te ʼu kaupepa pea mo te ʼu tohi ʼa te kau Fakamoʼoni ʼa Sehova ʼo te ʼu lea ʼaia, ʼe tā fakatahi mo te ʼu tohi faka Pilitania! Ko te ʼu tohi ʼaia ʼe tokoni ki te hahaʼi tokolahi ke nātou maʼu he fakaloto fīmālie pea mo he ʼamanaki.

Ko te tahi tupuʼaga ʼo te fakafiafia, ʼe ko te lagolago lelei ʼa te tahi ʼu kaugana ʼe nātou gāue temi katoa, mai te tahi ʼu fenua. ʼE toe ʼāsili fiafia te ʼu kokelekasio, heʼe lahi te ʼu Fale matalelei ʼo Te Puleʼaga neʼe hoki laga pe ʼi te ʼu taʼu ʼaenī. Kae neʼe ʼi ai te tahi meʼa fakafiafia ʼaupito neʼe ʼamanaki hoko kia nātou. ʼE lava hoko feafeaʼi te faʼahi ʼaia?

Te Fakatuʼutuʼu Makehe

Tokolahi te kau fai faka mafola neʼe nātou tau feʼekeʼaki fēnei, ‘ ʼE feala ʼapē ʼi he ʼaho ke ʼi ai he Tohi-Tapu Traduction du monde nouveau ʼi tatatou lea?’ ʼI te taʼu fuli, neʼe nātou fakaʼamu ke nātou logo ʼi he fakatahi faka tisitilike ʼe tala ifo he logo feiā. Kae ʼe lava fakahoko feafeaʼi te toe fakatuʼutuʼu gāue ʼaia, koteʼuhi ko te ʼu kūtuga ʼe gāue ki te fakaliliu ʼo te ʼu lea ʼaia neʼe mole heʼeki faʼa fualoa te akoako ʼo nātou ki te gāue, pea ʼe nātou tokosiʼi?

ʼI te ʼosi kumikumi fakalelei ʼo te ʼu ʼaluʼaga, neʼe tali e te Kolesi Pule ke gāue fakatahi ia te ʼu kūtuga ʼaē ʼe nātou fakaliliu ki te lea faka Croate, faka Masetonia, mo te faka Serbe, pea mo nātou fetokoniʼaki ʼi te gāue ʼaia pea mo nātou talanoa ki te ʼu faʼahiga manatu ʼo ʼuhiga mo tanatou ʼu lea. Neʼe kamata te fakatuʼutuʼu ʼaia e te kūtuga ʼaē ʼe nātou fakaliliu ki te lea faka Croate.

Ko He ʼAho Fakafiafia

ʼE mole galo anai ki te kau Fakamoʼoni ʼa Sehova ʼi te ʼu fenua ʼo te ʼu Balkans ia te ʼaho 23 ʼo Sūlio 1999. Ko te ʼu fakatahi faka tisitilike “Te ʼu Lea Faka Polofeta ʼa Te ʼAtua” neʼe tonu ke hoko fakatahi ʼi Belgrade, Sarajevo (Bosnie-Herzégovine), Skopje, pea mo Zagreb. Lolotoga he temi neʼe mole ʼiloʼi papau peʼe hoko anai te fakatahi lahi ʼi Belgrade ʼuhi ko te laku pulu ʼa te OTAN ki te ʼu koga meʼa ʼaia, pea neʼe mole tali ke fai he fono maʼa te hahaʼi. Logola te ʼu māhina ʼaē neʼe mole ʼiloʼi papau ai e te ʼu tēhina peʼe hoko anai te ʼu fakatahi, kae neʼe nātou fiafia ʼi tanatou ʼiloʼi ʼaē ʼe nātou lava fakatahi anai mo tonatou ʼu tēhina! Kae neʼe mole ʼiloʼi e nātou te toe fiafia lahi ka nātou ʼamanaki maʼu.

ʼI te Feliaono hili hoʼatā, neʼe tala te logo makehe ʼi te ʼu kolo fuli e fā ʼaē neʼe fai ai te ʼu fakatahi. Neʼe nonofo fakalogologo ia te toko 13 497 hahaʼi ʼo te fakatahi ʼo talitali ki te logo ʼaia. ʼI te ʼosi fakahā ifo e te tagata fai akonaki kua fakaliliu te ʼu Tohi Faka Keleka Faka Kilisitiano ʼo te Traduction du monde nouveau ʼi te lea faka Croate, mo te faka Serbe pea ʼe kei lolotoga fakaliliu ki te faka Masetonia, neʼe fiafia ʼaupito te hahaʼi ʼo te fakatahi. Neʼe mole kei feala ki te tēhina faiakonaki ke ina fakaʼosi tana tala fuli ʼo te logo, ʼuhi ko te pasipasi mālohi ʼa te hahaʼi. ʼI te fakatahi ʼaē neʼe fai ʼi Sarajevo, neʼe fakalogologo te hahaʼi ʼo te fakatahi ʼi tanatou punamaʼuli ki te logo, pea neʼe hoa kiai te ʼu pasipasi loaloaga. ʼI Belgrade, neʼe lahi te fetāgihi fakafiafia, pea ʼaki te ʼu pasipasi ʼaē neʼe fai putuputu, neʼe faigataʼa ki te tēhina faiakonaki tana fakaʼosi te tala ʼo te ʼu logo. Ei, neʼe fiafia ʼaupito ia te hahaʼi fuli!

Neʼe maʼu te tahi meʼa ʼofa e te kau Fakamoʼoni ʼa Sehova, ko te ʼu fealagia ʼaē ke nātou tā ia te Tohi-Tapu ʼi te lea faka Croate pea mo te faka Serbe. Koia, ko te ʼu Tohi Faka Keleka Faka Kilisitiano ʼo te Traduction du monde nouveau ʼi te ʼu lea ʼaia e lua, neʼe fakatahiʼi ki te ʼu Koga Tohi-Tapu Faka Hepeleo ʼo te Tohi-Tapu ʼo te ʼu lea e lua. Pea tahi ʼaē meʼa, ko te Tohi-Tapu faka Serbe neʼe tā ʼaki te ʼu mataʼi tohi māhani, pea mo te ʼu mataʼi tohi faka Cyrillique.

ʼI tanatou fakafetaʼi ki te ʼu tapuakina fuli ʼaia pea mo tonatou takitaki, ʼe maʼuhiga ki te hahaʼi ʼa Sehova ʼi te ʼu fenua ʼo te ʼu Balkans ia te ʼu palalau ʼaenī ʼa Tavite: “Tatau aipe peʼe ʼau haʼele ʼi te sia ʼo te fakapōʼuli, ʼe mole ʼau mataku ki he meʼa kovi, heʼe [ko koe Sehova] ʼe ke nofo mo ʼau.” Logope te ʼu faigataʼaʼia fuli ʼe tonu ke nātou haga kātakiʼi, kae ʼe nātou lotomālohi ke nātou fakaliliu ‘te fiafia ʼa Sehova ko honatou tule mālohi.’—Pesalemo 23:4; Nehemia 8:10.

[Kiʼi nota]

[Paki ʼo te pasina 20]

Ko te ʼuluaki kūtuga ʼo te kau fai faka mafola ʼi Maribor,ʼi Slovénie, ʼe nātou fai faka mafola ʼi te telituale mamaʼo