ʼE Tokaga Ia Sehova Kia Koutou
“Koutou tuku [ki te ʼAtua] takotou ʼu tuʼania fuape, heʼe tokaga ia kia koutou.”—1 Petelo 5:7, MN.
1. Ko te ʼu faʼahi fea ʼaē ʼe kehekehe ai Sehova pea mo Satana?
ʼE KEHEKEHE ia Sehova pea mo Satana. Ko he tahi ʼe felogoi lelei mo Sehova ʼe fehiʼa ki ai te Tevolo. ʼE ʼi ai te tohi ʼe talanoa lelei ki tonā kehekehe. ʼO ʼuhiga mo te ʼu gāue ʼa Satana ʼaē ʼe talanoa kiai te Tohi-Tapu, ʼi te tohi ʼo Sopo, ʼe ʼui fēnei e te tohi Encyclopædia Britannica (1970): ‘ ʼE feʼaluʼaki Satana ʼi te kele ʼo kumikumi he ʼu aga peʼe ko ni hahaʼi ʼe feala hana tukugakoviʼi; kae ʼe mole hage ia “ko te ʼu mata ʼo te ʼAliki,” ʼaē ʼe sio ki te kele katoa moʼo fakaloto mālohiʼi ia meʼa fuli ʼe lelei (2 Fkma. 16:9). ʼE fehiʼa ia Satana ki te tauhi ʼa te tagata ki te ʼAtua ʼaki tona loto katoa, pea neʼe fakagafua e te ʼAtua ke ina ʼahiʼahiʼi ia ia ʼo mulimuli pe ki te ʼu tuʼakoi ʼaē kua ina fai.’ Ei, ʼe nā kehekehe ʼosi!—Sopo 1:6-12; 2:1-7.
2, 3. (a) Koteā te faka ʼuhiga ʼo te kupu “Tevolo,” pea ʼe hā lelei feafeaʼi ʼi te meʼa ʼaē neʼe hoko kia Sopo? (b) ʼE fakahā feafeaʼi e te Tohi-Tapu ʼe kei tukugakoviʼi pe e Satana te ʼu kaugana agatonu ʼa Sehova ʼi te kele?
2 Ko te kupu “Tevolo” ʼe haʼu mai te kupu faka Keleka ko tona faka ʼuhiga “ko he tahi ʼe ina fai he ʼu tukugakovi hala,” peʼe ko he “gutuloi.” ʼE fakahā ʼi te tohi ʼo Sopo neʼe tukugakoviʼi e Satana te kaugana agatonu ʼa Sehova ko Sopo, ʼo ina ʼui ʼe tauhi fakakākā ki te ʼAtua, ʼo ʼui maʼana: “ ʼE mole ʼi ai koa la he tupuʼaga ʼo te manavasiʼi ʼa Sopo ki te ʼAtua?” (Sopo 1:9) ʼE ʼasi mai ʼi te fakamatala ʼo te tohi ʼo Sopo, logola tona ʼu ʼahiʼahi pea mo tona ʼu mamahi, kae neʼe fakaōvi aipe ia Sopo kia Sehova. (Sopo 10:9, 12; 12:9, 10; 19:25; 27:5; 28:28) ʼI tona ʼosi ʼahiʼahiʼi, neʼe ina ʼui fēnei ki te ʼAtua: “Neʼe ʼau logo ki te ʼu palalau ʼo ʼuhiga mo koe, kae ʼi te temi nei ʼe sio moʼoni toku mata kia te koe.”—Sopo 42:5.
3 ʼI te hili ʼo te temi ʼo Sopo, neʼe tuku ai koa e Satana tana tukugakoviʼi te ʼu kaugana agatonu ʼa te ʼAtua? Kailoa. ʼE fakahā mai ʼi te tohi ʼo Apokalipesi ʼi te temi fakaʼosi ʼaenī, ʼe kei tukugakoviʼi pe e Satana te ʼu tēhina ʼo Kilisito pea mo tonatou ʼu kaugā fagona. (2 Timoteo 3:12; Apokalipesi 12:10, 17) Koia, ʼe ʼaoga tāfito ai kia tatou fuli kau Kilisitiano moʼoni ke tou talagafua ki totatou ʼAtua ʼofa ko Sehova, ʼo tou tauhi mo he ʼofa lahi kia te ia, moʼo fakamoʼoni ai ʼe hala te ʼu tukugakovi ʼa Satana. Kapau ʼe tou fai feiā, ʼe tou fakafiafia anai te loto ʼo Sehova.—Tāʼaga Lea 27:11.
ʼE Fia Tokoni Mai Sehova Kia Tatou
4, 5. (a) ʼO mole hage ko Satana, koteā ʼaē ʼe sioʼi e Sehova ʼi te kele? (b) Kapau ʼe tou fia maʼu te ʼofa ʼo Sehova, pea koteā ʼaē ʼe tonu ke tou fai?
4 ʼE feʼaluʼaki te Tevolo ʼi te kele, ʼo kumi ke ina tukugakoviʼi pea mo kai he tahi. (Sopo 1:7, 9; 1 Petelo 5:8) Kae ko Sehova ʼe fia tokoni kia nātou ʼaē ʼe ʼaoga ki ai tona mālohi. Neʼe ʼui fēnei e te polofeta ko Hanani ki te Hau ko Asa: “ ʼO ʼuhiga mo Sehova, ko tona ʼu mata ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.” (2 Fakamatala 16:9) ʼE kehekehe ʼosi te lamalama ʼa Satana mo tona fehiʼa, pea mo te tokaga ʼofa ʼa Sehova!
5 ʼE mole lamalama e Sehova tatatou ʼu kiʼi hala liliki fuli. Neʼe ʼui fēnei e te tagata fai pesalemo: “Kapau neʼe ke sivi te ʼu hala, Ê Sah, Ê Sehova, ko ai koa ʼaē ʼe feala anai ke tuʼu?” (Pesalemo 130:3) Ko tona tali fakahagatonu: ʼe mole feala anai ke tuʼu he tahi. (Tagata Tānaki 7:20) Kapau ʼe tou fakaōvi kia Sehova mo totatou loto katoa, ʼe sio mai anai tona ʼu mata, pea ʼe mole ina tautea anai tatou, kae ʼe ina tokagaʼi anai tatatou ʼu faiga pea mo tali tatatou ʼu faikole ʼaē ʼe tou kole ai ke tokoni mai pea mo fakamolemole mai. Neʼe ʼui fēnei e te ʼapositolo ko Petelo: “Ko te ʼu mata ʼo Sehova ʼe sio ki te kau agatonu, pea ko ʼona taliga ʼe haga ki tanatou ʼu tagi mamahi; kae ko te fofoga ʼo Sehova ʼe fakafeagai kia nātou ʼaē ʼe nātou fai te ʼu meʼa ʼaē ʼe kovi.”—1 Petelo 3:12, MN.
6. He koʼe ko te faʼahi ʼaē neʼe hoko kia Tavite, ʼe ko he fakaloto fīmālie pea mo he fakatokaga kia tatou?
6 Ko Tavite neʼe heʼe haohaoa pea neʼe ina fai te ʼu agahala mamafa. (2 Samuele 12:7-9) Kae neʼe ina vevete ia meʼa fuli ʼi tona loto kia Sehova, pea mo fakaōvi kia te ia ʼaki te faikole fakamalotoloto. (Pesalemo 51:1-12) Neʼe logo Sehova ki tana faikole pea neʼe fakamolemole kia te ia, kae neʼe mole hāo ia Tavite mai te ʼu fua kovi ʼo tana agahala. (2 Samuele 12:10-14) ʼE ko he fakaloto fīmālie pea mo he fakatokaga kia tatou. Kapau ʼe tou fakahemala moʼoni, ko Sehova ʼe ina fakamolemole anai tatatou ʼu agahala, pea ʼe mole tonu ke galo kia tatou, ʼe tou utu pe anai te ʼu fua kovi ʼo tatatou ʼu agahala. (Kalate 6:7-9) Kapau ʼe tou fia fakaōvi kia Sehova, ʼe tonu anai ke tou tokakaga naʼa tou fai he meʼa ʼe mole ina leleiʼia.—Pesalemo 97:10.
Ko Sehova ʼe Ina Taki Mai Tana Hahaʼi Kia Te Ia
7. Ko te hahaʼi feafeaʼi ʼaē ʼe tokaga ki ai Sehova, pea e feafeaʼi tana taki mai ia nātou kia te ia?
7 Neʼe ʼui fēnei e Tavite ʼi te tahi pesalemo: “Ko Sehova ʼe māʼoluga, kae ʼe sio kia ia ʼaē ʼe agavaivai; kae ko ia ʼaē ʼe fialahi, ʼe mamaʼo ia te ia.” (Pesalemo 138:6) ʼE toe ʼui fēnei ʼi te tahi pesalemo: “Ko ai koa ʼe tatau mo Sehova, totatou ʼAtua, ia ia ʼaē ʼe ina fai tona nofoʼaga ʼi ʼoluga? ʼE fia fakamālalo ifo ke sio ki te lagi pea mo te kele. ʼE ina fakatuʼu ake ia ia ʼaē ʼe veliveli mai te efu.” (Pesalemo 113:5-7) Ei, ʼe fakamālalo ifo te Tupuʼaga māfimāfi ʼo te ʼatulaulau ke sio tona ʼu mata ki ʼaē ʼe “agavaivai” peʼe “veliveli,” te hahaʼi ʼaē ʼe “toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko.” (Esekiele 9:4) ʼE ina fakaʼaogaʼi tona ʼAlo moʼo takitaki age kia te ia te ʼu taʼi hahaʼi ʼaia. ʼI tana kei nofo ʼi te kele, neʼe ʼui fēnei e Sesu: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au . . . E mole faa haù he tahi kia te au kapau nee heeki tukuʼage kia te ia e te Tamai.”—Soane 6:44, 65.
8, 9. (a) He koʼe ʼe tonu ke tou ʼōmai kia Sesu? (b) Koteā ʼaē ʼe fakatalakitupua ai te fakatuʼutuʼu ʼo te totogi?
8 ʼE tonu ke ʼōmai te hahaʼi fuli kia Sesu pea ke nātou tui ki tana sakilifisio faitotogi koteʼuhi neʼe nātou tutupu ʼi te agahala, pea ʼe nātou mamaʼo ʼi te ʼAtua. (Soane 3:36) ʼE ʼaoga ke nātou fakatokatoka mo te ʼAtua. (2 Kolonito 5:20) Ko te ʼAtua neʼe mole fakatalitali ke kole age e te hahaʼi agahala ke ina fai te fakatuʼutuʼu ʼaē neʼe feala ai ke nātou tokalelei pea mo ia. Neʼe tohi fēnei e te ʼapositolo ko Paulo: “E fakamooni mai e te Atua tona ofa kia tatou i te temi aeni: nee puluhia Kilisito o uhiga mo tatou, i te temi nee kei tou agahala ai. Koteuhi, kapau ko tatou ko te u fili o te Atua, nee fakatokatoka tatou mo ia aki te puluhia o tona Alo, pea e leleiʼage, i te fakatokatoka o tatou mo ia, e fakamauli anai tatou aki tona mauli.”—Loma 5:8, 10.
9 Neʼe fakamoʼoni e te ʼapositolo ko Soane ki te moʼoni taulekaleka ʼaē ko te ʼAtua totonu ʼaē ʼe ina fakatokatoka te hahaʼi pea mo ia, ʼo ina ʼui fēnei: “Nee fakaha fenei te ofa o te Atua kia tatou: nee ina fekaui mai tona Alo ulutokotahi ki te malama-nei, ke tou mauli aki iaʼia. Koeni ia te ofa: e mole ko tatou ae nee oʼofa ki te Atua, kae, ko ia ae nee ofa kia tatou pea nee ina fekaui mai tona Alo ke vikitima o uhiga mo te fakamolemole o atatou agahala.” (1 Soane 4:9, 10) Ko te ʼAtua ʼaē neʼe ʼuluaki fakaōvi ki te tagata kae mole ko te tagata. ʼE mole koutou fia fakaōvi koa la ki he ʼAtua neʼe ina fakahā ʼe ʼofa lahi ki ni hahaʼi neʼe ko te kau “agahala” pea neʼe ko tona ʼu “fili”?—Soane 3:16.
ʼE Tonu Ke Tou Kumi Sehova
10, 11. (a) He koʼe ʼe tonu ke tou kumi ia Sehova? (b) E feafeaʼi tatatou sio ki te tuʼu ʼo te ʼu faʼahiga meʼa ʼaenī ʼa Satana?
10 ʼE moʼoni, ʼe mole fakakinauʼi tatou e Sehova ke tou ʼōmai kia te ia. ʼE tonu ke tou kumi “fakataufā ia ia pea [tou] maʼu moʼoni ia ia, heʼe ʼi tona fakahagatonu mole mamaʼo ia tatou takitokotahi.” (Gaue 17:27, MN ) ʼE tonu ke tou fakamoʼoni ʼe tāu mo Sehova ke ina fakamaʼua mai ke tou fakalogo age kia te ia. Neʼe ʼui fēnei e te tisipulo ko Sakopo: “Koutou fakalogo ki te ʼAtua; kae ke koutou fakafeagai ki te Tevolo, pea ʼe hola mamaʼo anai ia koutou. Koutou fakaōvi ki te ʼAtua, pea ʼe fakaōvi atu anai kia koutou. Koutou fufulu ʼokotou nima, kau agahala, pea mo fakamaʼa tokotou ʼu loto, hahaʼi lotolotolua.” (Sakopo 4:7, 8, MN ) ʼE tonu ke tou lototoʼa ʼo fakafeagai ki te Tevolo pea mo tou fakalogo kia Sehova.
11 Ko tona faka ʼuhiga ke tou fakamamaʼo mai te tuʼu ʼo te ʼu faʼahiga meʼa ʼaenī ʼa Satana. Neʼe toe ʼui fēnei e Sakopo: “Pe mole iloi e koutou ko te manako ki te malama-nei e ko te fehiaʼaga o te Atua? Koia, ko he tahi e fia kaumea mo te malama-nei, e ina fakanofo iaʼia ko te fili o te Atua.” (Sakopo 4:4) Kae kapau ʼe tou fia kaumeʼa mo Sehova, pea ʼe fehiʼaʼinaʼi anai tatou e te mālama ʼa Satana.—Soane 15:19; 1 Soane 3:13.
12. (a) Koteā te ʼu palalau fakaloto fīmālie neʼe fai e Tavite? (b) Koteā te fakatokaga neʼe fai e Sehova ʼaki te polofeta ko Asalia?
12 ʼE tonu ke tou fakaōvi tāfito kia Sehova ʼi te faikole, ʼo kole tokoni ki ai mo kapau ʼe fakafeagai mai te mālama ʼa Satana kia tatou. Ko Tavite ʼaē neʼe lahi te ʼu lakaga neʼe tokoni ai Sehova kia ia, neʼe ina tohi te ʼu palalau fakaloto fīmālie ʼaenī maʼa tatou: “ ʼE ōvi ia Sehova kia nātou fuli ʼaē ʼe fetapā kia te ia, kia nātou fuli ʼaē ʼe fetapā kia te ia ʼi te agatonu. ʼE ina fakahoko anai te meʼa ʼaē ʼe loto kiai ia nātou ʼaē ʼe manavasiʼi kia te ia, pea ʼe logo anai ki tanatou pāui ʼaē ke tokoni age, pea ʼe ina hāofaki anai nātou. ʼE taupau e Sehova ia nātou fuli ʼaē ʼe ʼoʼofa kia te ia, kae ʼe ina fakaʼauha anai te kau agakovi fuli.” (Pesalemo 145:18-20) ʼE hā mai ʼi te pesalemo ʼaia ko Sehova ʼe ina hāofaki tatou mokā ʼe ʼahiʼahiʼi tatou takitokotahi, pea ʼi te “mamahi lahi” ʼe ina hāofaki anai tana hahaʼi fuli. (Apokalipesi 7:14, MN ) ʼE nofo ōvi anai ia Sehova mo tatou mo kapau ʼe tou nofo ōvi kia te ia. ʼAki tona takitaki e te “laumālie ʼo te ʼAtua,” neʼe ʼui e te polofeta ko Asalia te manatu moʼoni ʼe tonu ke tou tokagaʼi: “Ko Sehova ʼe nofo anai mo koutou mo kapau ʼe koutou nonofo mo ia; pea kapau ʼe koutou kumi ia ia, ʼe ina tuku anai ke koutou maʼu ia ia, kae kapau ʼe koutou līaki ia ia, pea ʼe ina līaki anai ia koutou.”—2 Fakamatala 15:1, 2.
ʼE Tonu Ke Tou Faka Tui ʼe Maʼuli Moʼoni Ia Sehova
13. ʼE tou lava fakahā feafeaʼi ʼe tou faka tui ʼe maʼuli moʼoni ia Sehova?
13 Ko te ʼapositolo ko Paulo neʼe ina ʼui ko Moisese “neʼe haga nofo agatonu ohage neʼe sio kia Ia ʼaē ʼe fakapulipuli.” (Hepeleo 11:27, MN ) Neʼe heʼeki sio mata ia Moisese kia Sehova. (Ekesote 33:20) Kae maʼa ia neʼe moʼoni ia Sehova ohage pe neʼe kua sio mata ki ai. ʼO feiā pe mo Sopo, ʼi tona ʼosi ʼahiʼahiʼi, neʼe feala ʼaki tona ʼu mata ʼo te tui ke mahino lelei ko Sehova ʼe ko te ʼAtua ʼe ina fakagafua ke ʼahiʼahiʼi tana ʼu kaugana agatonu kae ʼe mole ina līʼakina nātou ʼi he lakaga. (Sopo 42:5) Neʼe ʼui ko Enoke pea mo Noe neʼe nā ‘haʼele mo te ʼAtua.’ Neʼe nā fai te faʼahi ʼaia ʼo nā kumi aipe ke leleiʼia nāua e te ʼAtua pea mo nā fakalogo ki ai. (Senesi 5:22-24; 6:9, 22; Hepeleo 11:5, 7) Kapau ohage ko Enoke, mo Noe, mo Sopo, pea mo Moisese ʼe tou faka tui ʼe maʼuli moʼoni ia Sehova, pea ʼe tou “tokagaʼi [anai] ia ia” ʼi totatou ʼu ala fuli, pea ʼe ina “fakatonutonuʼi anai [totatou] ʼu ala foufou.”—Tāʼaga Lea 3:5, 6.
14. Koteā tona faka ʼuhiga ke tou “pipiki” kia Sehova?
14 ʼI muʼa ʼo te hū ʼo te kau Iselaele ki te Kele ʼo Te Fakapapau, neʼe tokoniʼi fēnei nātou e Moisese: “ ʼE koutou haʼele anai ʼo mulimuli kia Sehova tokotou ʼAtua, pea ʼe koutou manavasiʼi anai kia te ia, pea ʼe koutou taupau anai tana ʼu fakatotonu, pea ʼe koutou fakalogo anai ki tona leʼo, pea ʼe koutou tauhi anai kia te ia, pea ʼe koutou pipiki anai kia te ia.” (Teutalonome 13:4) Neʼe tonu ke nātou mulimuli kia Sehova, mo manavasiʼi, mo fakalogo, pea mo pipiki ki ai. Ko te kupu ʼaē neʼe fakaliliu ʼi henī ʼaki te kupu “pipiki,” ʼe ʼui e te tagata sivi Tohi-Tapu “ ʼi te lea faka Hepeleo ʼe ina faka ʼuhiga ki he felogoi lelei.” Neʼe ʼui fēnei e te tagata fai pesalemo: “ ʼE kaumeʼa Sehova mo nātou ʼaē ʼe manavasiʼi kia te ia.” (Pesalemo 25:14) ʼE tou maʼu anai te felogoi maʼuhiga ʼaia mo kapau ʼe tou tui ʼe maʼuli moʼoni ia Sehova pea mo tou ʼofa kia te ia, ʼo tou manavasiʼi ke ʼaua naʼa tou fai he faʼahiga meʼa ʼe kovi kia te ia.—Pesalemo 19:9-14.
ʼE Tou Mahino Koa Ki Te ʼOfa ʼo Sehova?
15, 16. (a) ʼE fakahā feafeaʼi mai e te Pesalemo 34 te tokaga ʼa Sehova kia tatou? (b) Koteā te meʼa ʼe tonu ke tou fai mo kapau ʼe mole kei tou manatuʼi te ʼu gāue ʼofa ʼa Sehova kia tatou?
15 ʼE ʼi ai te tahi hele ʼa Satana, ʼe ina faigaʼi ke galo kia tatou ko totatou ʼAtua ko Sehova ʼe tokaga tuʼumaʼu ki tana ʼu kaugana agatonu. Neʼe mahino lelei kia Tavite te Hau ʼo Iselaele neʼe puipui ia ia e Sehova ʼi te temi ʼaē neʼe tau ai mo te ʼu faigataʼaʼia fakamataku. ʼI te tahi temi neʼe ina fai te ʼu aga ohage ko he tagata vale moʼo hāofaki tona maʼuli, ia muʼa ʼo te Hau ko Akisi ʼo Kate, pea neʼe ina fai leva te hiva, ko te pesalemo taulekaleka, ʼaē ʼe ina fakahā fēnei ai tana tui: “Koutou fakavikiviki kia Sehova mo ʼau, pea ke tou faka kolōliaʼi fakatahi tona huafa. Neʼe ʼau fakafehuʼi ia Sehova, pea neʼe tali mai kia te ʼau, pea ʼi toku ʼu mataku fuli neʼe ina hāofaki ʼau. ʼE nofo te ʼaselo ʼa Sehova ʼo ʼatakai ia nātou ʼaē ʼe nātou manavasiʼi kia te ia, pea ʼe ina hāofaki nātou. Koutou ʼahiʼahi pea mo koutou sio ko Sehova ʼe lelei. Manuʼia te tagata mālohi ʼaē ʼe hola kia te ia. Ko Sehova ʼe ōvi kia nātou ʼaē ʼe lavea tonatou loto; pea ʼe ina hāofaki ia nātou ʼaē ʼe taʼomia tonatou laumālie. ʼE lahi te ʼu malaʼia ʼo ia ʼaē ʼe faitotonu, kae ko Sehova ʼe ina faka ʼāteaina ia ia mai te ʼu faʼahi fuli.”—Pesalemo 34:3, 4, 7, 8, 18, 19; 1 Samuele 21:10-15.
16 ʼE koutou tui moʼoni koa ki te fealagia ʼa Sehova moʼo hāofaki koutou? ʼE koutou tui koa ki tokotou puipui e te kau ʼaselo? Neʼe kua koutou ʼahiʼahiʼi koa takitokotahi pea mo vakaʼi ʼe lelei ia Sehova? Ko ʼanafea ʼaē neʼe koutou mahino lelei ai neʼe tokoni atu Sehova kia koutou? Koutou fakamanamanatuʼi lelei te ʼu faʼahi ʼaia. Neʼe lagi ko te ʼapi fakamuli ʼaē neʼe koutou fai ʼi te minisitelio, lagi ʼi takotou manatu neʼe mole kei feala hakotou fai palalau mo he tahi? Pea lagi neʼe lelei ai takotou fai palalau. Kei koutou manatuʼi koa, pe neʼe koutou fakamālo kia Sehova ʼi tana foaki atu te mālohi makehe ʼaē neʼe ʼaoga kia koutou pea mo ina tapuakinaʼi koutou? (2 Kolonito 4:7) Tahi ʼaē meʼa, ʼe lagi mole kei koutou manatuʼi lelei he gāue ʼofa ʼa Sehova neʼe ina fai maʼa koutou. ʼE lagi kei koutou manatuʼi te ʼu meʼa ʼaē neʼe hoko ʼi te vāhaʼa, peʼe ʼi te māhina, peʼe ʼi te taʼu, peʼe laka atu. Kapau koia, koutou fakaōvi lahi kia Sehova ke koutou mahino ai peʼe feafeaʼi tana takitaki ia koutou? Ko te ʼapositolo ko Petelo neʼe ina fakatokaga fēnei ia te kau Kilisitiano: “Koutou fia vaivai ifo ʼi te nima māfimāfi ʼo te ʼAtua . . . koutou tuku kia te ia takotou ʼu tuʼania fuape, heʼe tokaga ia kia koutou.” (1 Petelo 5:6, 7, MN ) ʼIo, ʼe koutou punamaʼuli anai ʼi tana tokaga lahi ʼaē kia koutou!—Pesalemo 73:28.
Tou Haga Kumi Ia Sehova
17. Koteā te meʼa ʼaē ʼe tonu ke tou fai mo kapau ʼe tou fia haga kumi ia Sehova?
17 ʼE tonu ke fai hoholo tatatou ʼu felogoi ʼaē mo Sehova. Neʼe ʼui fēnei e Sesu ʼi tana faikole ki tana Tāmai: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) ʼE tonu ke tou faiga tuʼumaʼu mo kapau ʼe tou fia ʼiloʼi ia Sehova pea mo tona ʼAlo. ʼE tokoni te faikole pea mo te laumālie maʼoniʼoni kia tatou ke tou mahino ki “[te ʼu] mea loloto o te Atua.” (1 Kolonito 2:10; Luka 11:13) ʼE ʼaoga foki mo te takitaki ʼa te “kaugana agatonu mo fakapotopoto” moʼo fafaga totatou ʼatamai ʼaki te meʼa kai fakalaumālie ʼaē neʼe ina foaki mai “i tona temi [totonu].” (Mateo 24:45) ʼAki te fakatuʼutuʼu ʼaia, ʼe fakaloto mālohiʼi tatou e Sehova ke tou lau tana Folafola ʼi te ʼaho fuli, pea mo tou kau tuʼumaʼu ki te ʼu fono faka Kilisitiano, pea mo tou kau mo totatou loto katoa ki te faka mafola ʼo te “Logolelei . . . o te Puleaga.” (Mateo 24:14) Kapau ʼe tou fai feiā, pea ʼe tou haga kumi anai totatou ʼAtua ʼofa ko Sehova.
18, 19. (a) Koteā ʼaē ʼe tou lotomālohi ke tou fai? (b) Kapau ʼe tou fakafeagai mālohi ki te Tevolo pea mo tou haga kumi ia Sehova, ʼe feafeaʼi anai totatou tapuakinaʼi?
18 Ko Satana ʼe ina fai ia meʼa fuli ʼe ina lavaʼi moʼo fakatagaʼi, pea mo fai he ʼu fakafeagai ki te hahaʼi ʼa Sehova. ʼE ina fia maumauʼi totatou tokalelei pea mo fakaʼauha tatatou felogoi lelei mo totatou ʼAtua. ʼE mole ina loto ke tou haga fai tatatou gāue ʼaē ke tou maʼu te hahaʼi fakamalotoloto pea mo tokoni kia nātou ke nātou ʼōmai ʼo lagolago ki te fehuʼi ʼaē neʼe lagaʼi ʼo ʼuhiga mo te tuʼi pule ʼo te ʼatulaulau ʼa Sehova. Ke tou fakatotonu ʼi totatou loto ke tou nofo agatonu kia Sehova, ʼo tou falala ʼe ina lava hāofaki tatou mai te agakovi. Kapau ʼe tou tuku te Folafola ʼa te ʼAtua ke ina taki tatou pea mo tou gāue mālohi mo tana kautahi ʼi te kele, ʼe mahino papau ia ʼe tokoni tuʼumaʼu anai kia tatou.—Isaia 41:8-13.
19 Koia, ʼofa pe ke tou fakafeagai mālohi ki te Tevolo pea mo tana ʼu kākā, pea mo tou kumi ʼi te temi fuli totatou ʼAtua ʼofa ko Sehova, ʼaē ʼe ina ‘fakaloto mālohiʼi anai tatou pea mo foaki mai te mālohi.’ (1 Petelo 5:8-11) Kapau ʼe tou fai feiā, ʼe tou ‘nofo anai ʼi te ʼofa ʼo te ʼAtua, ʼo talitali ki te manavaʼofa ʼo totatou ʼaliki ko Sesu Kilisito ʼaki te ʼamanaki ki te maʼuli heʼegata.’—Suta 21.
ʼE Koutou Tali Feafeaʼi Anai?
• Koteā te faka ʼuhiga ʼo te kupu “Tevolo” ʼi te lea faka Keleka, pea koteā te ʼu meʼa ʼe fai e te Tevolo ʼe ʼalutahi mo te kupu ʼaia?
• Koteā te kehekehe ʼo Sehova mo te Tevolo ʼi Tana faʼahiga sioʼi te hahaʼi ʼo te kele?
• He koʼe ʼe tonu ke tali e he tahi te totogi moʼo fakaōvi kia Sehova?
• Koteā tona faka ʼuhiga ke tou “pipiki” kia Sehova, pea ʼe tou lava kumi feafeaʼi ia ia?
[Paki ʼo te pasina 15]
Logola tona ʼu ʼahiʼahi, neʼe mahino pea mo logoʼi e Sopo te ʼofa ʼo Sehova kia te ia
[Paki ʼo te pasina 16, 17]
Kapau ʼe tou lau ʼi te ʼaho fuli te Tohi-Tapu, mo kau tuʼumaʼu ki te ʼu fono faka Kilisitiano, pea mo kau mālohi ki te fai faka mafola, pea ʼe tou manatuʼi ai ko Sehova ʼe tokaga kia tatou