Tou Faka Kolōlia Ki Te ʼAtua, Kae Mole Ko Te Tagata
ʼI TE ʼu māhina kua hili, ko nātou ʼaē ʼe manako ki te faitotonu ʼi te malamanei katoa neʼe nātou ako peʼe feafeaʼi hanatou faka kolōlia ki te ʼAtua, ʼi tanatou kau ki te ʼu Fakatahi Faka Tisitilike ʼa te kau Fakamoʼoni ʼa Sehova, ʼaē ko tona kupu tāfito “Koutou Faka Kolōlia Ki Te ʼAtua.” Tou toe vakaʼi te polokalama ʼaia ʼaē neʼe akoʼi ai tatou.
Ko te polokalama faka Tohi-Tapu ʼaia, neʼe fai lolotoga ʼaho e tolu peʼe ko ʼaho e fā kia nātou ʼaē neʼe feala ke nātou kau ki te ʼu fakatahi makehe faka malamanei. Neʼe fakalogo te hahaʼi kia akonaki faka Tohi-Tapu e 30, ko te ʼu akonaki neʼe nātou fakaloloto totatou loto fakafetaʼi ki te ʼu meʼa fakalaumālie, mo te ʼu fakamatala ʼa te ʼu tēhina mo tuagaʼane, neʼe nātou fakaloto mālohiʼi tatatou tui, mo te ʼu faʼifaʼitaki neʼe nātou fakahā lelei te maʼuliʼi ʼo te ʼu pelesepeto ʼo te Tohi-Tapu, pea mo te kiʼi gaoʼi neʼe fakamatala ai te ʼu faigataʼaʼia neʼe tau mo te ʼu Kilisitiano ʼo te ʼuluaki sēkulō. Kapau neʼe koutou kau ki te fakatahi ʼaia, ʼe lagi lelei hakotou toe vakaʼi takotou ʼu nota lolotoga takotou lau te alatike ʼaenī. ʼE mahino papau ia ʼe kei koutou manatuʼi he ʼu puani ʼo te kātoaga fakalaumālie lahi ʼaia, ʼaē neʼe ʼaoga ʼaupito kia tatou.
Te Kupu Tāfito ʼo Te ʼUluaki ʼAho: “ ʼE Tāu Mo Koe, Sehova, . . . Ke Ke Tali Te Kolōlia”
ʼI te ʼosi hiva ʼo te katiko pea mo te faikole ʼo te kamata, ko te ʼuluaki tēhina ʼaē neʼe faiakonaki neʼe fakatalitali ki te nofoʼaki katoa ʼaki te akonaki ʼaē neʼe talanoa tāfito ki te tupuʼaga ʼo tatatou fakatahi: “Fakatahiʼi Moʼo Faka Kolōlia Ki Te ʼAtua.” ʼAki te ʼu palalau ʼaē ʼe tuʼu ia Apokalipesi 4:11, neʼe faka maʼuhigaʼi e te tēhina te kupu tāfito ʼo te fakatahi. Neʼe ina fakamahino te faka ʼuhiga ʼo te faka kolōlia ki te ʼAtua. Neʼe ina fakaʼaogaʼi te tohi ʼo Pesalemo, ʼo ina fakahā lelei ko te faka kolōlia ki te ʼAtua ko te tona faka ʼuhiga ke tou “atolasio,” mo “fakafetaʼi,” pea mo “fakavikiviki.”—Pesalemo 95:6; 100:4, 5; 111:1, 2.
Ko te akonaki ʼaē neʼe hoa kiai neʼe fēnei tona kupu tāfito “Ke Tapuakina Ia Nātou ʼAē ʼe Nātou Faka Kolōlia Ki Te ʼAtua.” Neʼe ʼi ai te manatu lelei neʼe talanoa kiai te tēhina. ʼUhi ʼaē ko te toko ono miliona kau Fakamoʼoni ʼa Sehova ia fenua e 234 ʼi te malamanei katoa, ʼe feala ke tou ʼui ʼi te ʼaho mo te po, ʼe ʼi ai te ʼu hahaʼi ʼe nātou faka kolōlia kia Sehova. (Apokalipesi 7:15) Neʼe ko he meʼa fakafiafia pea mo fakaloto mālohi ki te nofoʼaki, tanatou logo ki te fakafehuʼi ʼo te ʼu tēhina mo tuagaʼane ʼe nātou kau ki he faʼahiga selevisi temi katoa.
Neʼe hoa kiai te akonaki “ ʼE Tala e Te ʼu Meʼa ʼAē Neʼe Fakatupu Te Kolōlia ʼo Te ʼAtua.” Logola ʼe mole palalau, kae ʼe faka kolōliaʼi e te lagi te lahi ʼo te ʼAtua, pea mo tokoni mai ke lahi age tatatou fakafetaʼi ki tona ʼofa ʼo taupau ia tatou. Neʼe fakamahino lelei te faʼahi ʼaia.—Isaia 40:26.
Ko te ʼu fakataga, mo te ʼu fakafeagai, mo te ʼu fakaneke ʼo te malamanei, pea mo te ʼu vaivaiʼaga, ʼe ko he ʼu ʼahiʼahi ʼaia ki te agatonu ʼa te kau Kilisitiano moʼoni. Koia neʼe fakalogo lelei ai e te nofoʼaki ki te akonaki “Tou Haʼele ʼi Te Ala ʼo Te Agatonu.” Neʼe talanoa ki te ʼu vaega takitahi ʼo te Pesalemo 26, ʼo fai ai mo te ʼu fakafehuʼi ʼa te Fakamoʼoni tūpulaga kei ako neʼe ina taupau maʼu tana agatonu pea mo te tahi neʼe ina fakaʼaogaʼi lahi tona temi ki te ʼu fakafiafia ʼe mole lelei kae neʼe ina fai he ʼu fakatuʼutuʼu moʼo fetogi te faʼahi ʼaia.
Neʼe ʼosi te polokalama ʼo te uhu ʼaki te akonaki tāfito ʼaē ko tona kupu “Te ʼu Meʼa Faka Polofeta Pea Mo Faka Kolōlia ʼAē Neʼe Hā, ʼe Nātou Fakaloto Mālohiʼi Tatou.” Ko te tēhina faiakonaki neʼe palalau ki te ʼu faʼifaʼitaki ʼo te polofeta ko Taniela pea mo te ʼu ʼapositolo ko Soane pea mo Petelo, ʼaē neʼe fakaloto mālohi tanatou tui ʼaki te ʼu meʼa faka polofeta pea mo faka kolōlia ʼaē neʼe hā kia nātou, ʼo ʼuhiga mo te fakatuʼu ʼo te Puleʼaga Faka Mesianike ʼa te ʼAtua pea mo te ʼu gāue ʼaē ka ina fakahoko. ʼO ʼuhiga mo nātou ʼaē ʼe feala ke nātou galoʼi te fakamoʼoni ʼaē ʼe tou maʼuʼuli ʼi te ʼu temi fakaʼosi, neʼe ʼui fēnei e te tēhina faiakonaki: “ ʼE tou fakaʼamu moʼoni ʼe toe tokagaʼi anai e nātou ʼaia te kua ʼafio moʼoni ʼa Kilisito ʼi te kolōlia ʼi te Puleʼaga pea mo tokoni anai kia nātou ke nātou toe mālolohi ʼi te faʼahi fakalaumālie.”
Ko te polokalama ʼo te hili hoʼatā neʼe kamata ʼaki te akonaki ʼaē ko tona kupu tāfito “ ʼE Fakahā e Sehova Tona Kolōlia Ki Te Kau Agavaivai.” Neʼe fakahā e te tēhina peʼe tuku feafeaʼi e Sehova te faʼifaʼitaki ʼo te agavaivai, logola ko Ia ʼe māʼoluga ʼi te ʼatulaulau. (Pesalemo 18:35) ʼE ʼofa Sehova kia nātou ʼaē ʼe agavaivai moʼoni, kae ʼe fakafeagai kia nātou ʼaē ʼe agavaivai pe mokā nātou felogoi mo he tahi ʼe tatau mo nātou peʼe ko tonatou ʼu pule, kae nātou gaohi koviʼi ia nātou ʼaē ʼe nātou puleʼi.—Pesalemo 138:6.
Ki muli age, neʼe vakaʼi te lea faka polofeta ʼa te Tohi-Tapu ʼi te ʼu akonaki ʼaē neʼe talanoa tāfito ki te kupu tāfito ʼaenī: “Te Lea Faka Polofeta ʼa Amosi—Ko He Logo Ki Totatou Temi.” ʼI tana talanoa ki te faʼifaʼitaki ʼo Amosi, neʼe fakatokagaʼi mai e te ʼuluaki tēhina totatou maʼua ʼaē ko te tala ki te hahaʼi te fakamāu ʼa Sehova ʼaē ka hoko mai. Neʼe fēnei te kupu tāfito ʼo tana akonaki: “Tou Tala Te Folafola ʼa te ʼAtua ʼAki He Lototoʼa.” Neʼe fai e te lua tēhina te fehuʼi ʼaenī, “ ʼE fakagata anai koa e Sehova te agakovi pea mo te mamahi ʼi te kele nei?” ʼI tana kupu tāfito ʼaē ko “Te Fakamāu ʼa Sehova Ki Te Kau Agakovi,” neʼe ina fakahā ai ko te fakamāu fakaʼatua ʼe faitotonu tuʼumaʼu, mo hoko moʼoni pea ʼe mole ina fakaʼauha anai te hahaʼi fuli. Ko te tēhina ʼaē neʼe ina fai te akonaki fakamuli neʼe ina fakatokagaʼi mai te kupu tāfito ʼaenī “ ʼE Vakaʼi e Sehova Te Loto.” Ko nātou ʼaē ʼe nātou fia fakafiafia ia Sehova ʼe nātou manatuʼi anai te ʼu palalau ʼa Amosi 5:15: “Koutou fehiʼa ki te meʼa ʼaē ʼe kovi, pea ke koutou manako ki te meʼa ʼaē ʼe lelei.”
ʼE feala ke fakaʼaogaʼi kovi te kava, ohage la ko te vino, ʼaē ʼe ko he meʼa ʼe ina fakafiafia te loto. ʼI tana faiakonaki “Tou Fakafisi Ki Te Hele ʼAē Ko Te ʼInu Kava Tuʼumaʼu,” neʼe fakahā e te tēhina te ʼu tuʼutāmaki fakalaumālie pea mo fakasino ʼo te ʼinu kava fakavale, tatau aipe peʼe mole kita konahia. Neʼe ina foaki mai he pelesepeto moʼo takitaki tatou: Mai tona ʼaluʼaga ʼaē ʼe mole malave tatau te kava kia tatou, ʼe feala ke kita ʼui, kua lahi fau takita ʼinu mo kapau ʼe mole kei feala ke kita fakaʼaogaʼi tokita ‘poto ʼaoga pea mo tokita fealagia fakakaukau.’—Tāʼaga Lea 3:21, 22.
ʼUhi ʼaē ʼe tou maʼuʼuli ʼi te ʼu temi faigataʼa, ko te akonaki ʼaē neʼe hoa kiai, “Ko Sehova Ko ‘Totatou Tule Mālohi ʼi Te ʼu Temi ʼo Te Mamahi’ ” neʼe ina fakaloto fīmālieʼi te nofoʼaki. Ko te faikole, te laumālie maʼoniʼoni pea mo te ʼu kaumeʼa Kilisitiano ʼe feala ke nātou tokoni mai ke tou kātakiʼi.
Ko te akonaki fakaʼosi ʼo te ʼaho, “ ‘Te Fenua Lelei’—ʼE Ko He Fakahā Veliveli ʼo Te Palatiso,” neʼe fakaʼosi ʼaki te meʼa fakafiafia ʼaē neʼe tala ifo: ko te tohi foʼou ʼaki te ʼu mape ʼo te Tohi-Tapu. Ko tona kupu tāfito ‘ Voyez le bon pays. ’
Te Kupu Tāfito ʼo Te Lua ʼAho: “Koutou Kalagaʼi Tona Kolōlia ʼi Te Lotolotoiga ʼo Te ʼu Puleʼaga”
ʼI te ʼosi vakaʼi ʼo te koga tohi ʼo te ʼaho, neʼe fai te tahi ʼu akonaki ʼo fakatafito ki te kupu tāfito ʼaenī, “Tou Fakatapa Ohage He ʼu Sioʼata Te Kolōlia ʼo Sehova.” Neʼe talanoa te ʼuluaki akonaki ki te kupu ʼaenī “ ʼO Kalagaʼi ʼi Te Potu Fuape Ia Te Logo Lelei” pea neʼe toe faʼifaʼitaki ai te ʼu meʼa neʼe hoko ʼi te fai faka mafola. ʼI te lua akonaki neʼe fakahā ai te faʼifaʼitaki ʼo te fai ʼo te ʼaʼahi, ʼaki te kupu tāfito ʼaenī “ ʼO Tou Toʼo Te Kie ʼi Te ʼu Mata ʼo Nātou ʼAē ʼe Fakakiviʼi.” Ko te akonaki fakaʼosi, ʼaē ko tona kupu tāfito “ ʼO Tou Fakalahi Age Tatatou Minisitelio,” neʼe fai ai te ʼu fakafehuʼi ʼo te ʼu tēhina mo tuagaʼane ʼo ʼuhiga mo te ʼu meʼa neʼe hoko ʼi te fai faka mafola.
Ko te tahi koga ʼo te polokalama neʼe ko te akonaki ʼaē ko tona kupu tāfito “ ʼE Fehiʼaʼinaʼi Kae Mole Hona Tupuʼaga.” Neʼe kau kiai te ʼu fakafehuʼi ʼo te ʼu tēhina mo tuagaʼane agatonu, ʼaē neʼe feala ʼaki te mālohi ʼo te ʼAtua ke nātou taupau tanatou agatonu ʼi te ʼu fakafeagai.
Ko te faʼahi ʼaē ʼe tou atalitali fuli kiai ʼi te ʼu fakatahi, ʼe ko te akonaki ʼo te papitema ʼaē ʼe hoa kiai te fakauku katoa ʼo te kau papitema ʼi te vai. Ko te papitema ʼe ina fakatātā te foaki e he tahi tona maʼuli katoa kia Sehova. Koia neʼe ʼalutahi ai mo tona kupu tāfito “Tou Faka Kolōlia Ki Te ʼAtua ʼo Maʼuli Tahi Mo Te Foaki ʼo Totatou Maʼuli.”
Neʼe kamata te polokalama ʼo te hili hoʼatā ʼaki te akonaki ʼaē neʼe ina fakaloto mālohiʼi tatou ke tou vakavakaʼi ia tatou totonu, ko tona kupu tāfito “Tou Maʼu Te Manatu ʼa Kilisito ʼo ʼUhiga Mo Te Māʼoluga.” Neʼe fakahā e te tēhina te puani maʼuhiga ʼaenī: ʼE tou māʼoluga mokā tou faʼifaʼitakiʼi te agavaivai ʼa Kilisito. Koia ʼe mole tonu ke kumi e he Kilisitiano ke ina maʼu he tuʼulaga ʼuhi heʼe fia hā. ʼE tonu ke ina fai te fehuʼi ʼaenī: ‘ ʼE ʼau fia tokoni koa ki ʼihi tatau aipe peʼe mole sio anai he tahi ki te faʼahi ʼaia?’
Neʼe kua koutou logo gaʼegaʼe koa ʼi he temi? ʼE mahino ia. Neʼe leleiʼia e te tokolahi te akonaki “ ʼE Tou Gaʼegaʼe, Kae Mole Tuku Ke Mālo Ia Tatou Te Gaʼegaʼe.” Ko te fakafehuʼi ʼaē neʼe fai ki te kau Fakamoʼoni kua fualoa tanatou ʼi te moʼoni, neʼe hā ai ko Sehova ʼe feala ke ina fakaliliu tatou ʼo “malohiʼage . . . aki tona Laumalie.”—Efeso 3:16.
Ko te loto foaki ʼe ko he kalitate ʼe mole tou maʼu ʼi tatatou tutupu ake kae ʼe tonu ke tou ako ke tou maʼu. Neʼe fakahā lelei ai te kupu tāfito “Tou Loto Foaki, Pea Mo Loto Fia Vaevae.” Neʼe fai te fehuʼi ʼaenī ke tou fakakaukau kiai: “ ʼE tou lotolelei koa ke tou fakaʼaogaʼi he ʼu kiʼi minuta ke tou fakatahi ai mo totatou ʼu tēhina pea mo tuagaʼane ʼaē kua matutuʼa, peʼe mahahaki, peʼe loto mamahi peʼe maʼuʼuli tokotahi?”
Ko te akonaki “Tou Tokaga Ki ‘Te Leʼo ʼo Te Kau Matāpule’ ” neʼe fakalogo lelei e te nofoʼaki. Ko te akonaki ʼaia neʼe ina fakatatau te kau tisipulo ʼa Sesu ki he ʼu ōvi ʼe nātou fakalogo ʼāteaina pe ki tona leʼo ʼi tona ʼuhiga “tauhiovi agalelei,” pea ʼe mole nātou fakalogo ki “te leo o te kau matapule” ʼaē ʼe maʼu ʼi te ʼatu sosiete fakatagata ʼaē ʼe fakaneke e te Tevolo.—Soane 10:5, 14, 27.
Ke tou mahino ki te meʼa ʼaē ʼe hiva e he kauhiva, ʼe tonu ke nātou hiva fakatahi. Moʼo faka kolōlia ki te ʼAtua, ʼe tonu ke logo tahi te kau atolasio moʼoni ʼi te malamanei katoa. Koia ko te akonaki “Tou Faka Kolōlia Ki Te ʼAtua ‘ ʼAki He Gutu e Tahi’ ” neʼe ina akoʼi lelei tatou ʼo ʼuhiga mo tatatou lava palalau fuli ʼaki te “lea maʼa” e tahi pea mo tauhi “fakatahi” kia Sehova.—Sofonia 3:9.
Ko te ʼu mātuʼa, kae tāfito ia nātou ʼaē ʼe ʼi ai tanatou ʼu tamaliki kei liliki, neʼe nātou fiafia lahi ʼi te akonaki fakaʼosi ʼo te ʼaho, “Ko ʼAtatou Fānau Ko He Tofiʼa Maʼuhiga.” Neʼe fakahā te tohi foʼou e pasina 256, ʼo fiafia ai te nofoʼaki. Ko te tohi Écoute le grand Enseignant ʼe tokoni anai ki te ʼu mātuʼa ke nātou fakaʼaogaʼi he temi mo tanatou fānau, pea ʼe fua lelei anai kia nātou ʼi te faʼahi fakalaumālie, heʼe ko te meʼa ʼofa mai te ʼAtua maʼa nātou.
Te Kupu Tāfito ʼo Te Tolu ʼAho: “Koutou Fai Ia Meʼa Fuape Ki Te Kolōlia ʼo Te ʼAtua”
Neʼe kamata te ʼaho fakaʼosi ʼo te fakatahi mo he manatu fakalaumālie ʼaki te ʼu fakamanatu ʼo te koga tohi ʼo te ʼaho. Ko te ʼuluaki koga ʼo te polokalama ʼaia neʼe faka ʼuhiga tāfito ki te ʼu famili. Ko te ʼuluaki akonaki, “ ʼU Mātuʼa, Koutou Laga Tokotou Famili,” neʼe ina teuteuʼi ai te fakakaukau ʼa te nofoʼaki. ʼI te ʼosi fakamanatuʼi ʼo te ʼu maʼua ʼa te ʼu mātuʼa ke nātou foaki te ʼu meʼa ʼaē ʼe ʼaoga ʼi te faʼahi fakasino ki tonatou famili, neʼe fakahā e te tēhina ko te ʼuluaki maʼua ʼa te ʼu mātuʼa ʼe ko te tokoni ki tanatou fānau ʼi te faʼahi fakalaumālie.
Ko te tēhina ʼaē neʼe hoa kiai, neʼe palalau ki te kau tūpulaga pea mo talanoa ki te kupu tāfito “ ʼE Fakavikiviki Feafeaʼi e Te Kau Tūpulaga Ia Sehova.” Neʼe ina ʼui ko te kau tūpulaga ʼe nātou hage ko he ʼu “mosiʼi hahau” ʼuhi heʼe nātou tokolahi pea ʼe fakafiafia tanatou faʼafai ʼi tonatou kei tūpulaga. ʼE fiafia te hahaʼi lalahi ʼi tanatou gāue mo nātou ʼi te tauhi kia Sehova. (Pesalemo 110:3) Neʼe kau ki te akonaki ʼaia te fakafehuʼi fakafiafia ʼo te kau tūpulaga ʼe nātou tuku he faʼifaʼitaki lelei.
Ko te kiʼi gaoʼi ʼaē ʼe fakatafito ki te fakamatala ʼo te Tohi-Tapu ʼe ko he temi fakafiafia tuʼumaʼu ʼi te ʼu fakatahi faka tisitilike, pea neʼe feiā mo te fakatahi ʼaia. Ko te kupu tāfito ʼo te kiʼi gaoʼi “Tou Fakamoʼoni ʼAki He Lototoʼa, Logola Te Fakafeagai” neʼe talanoa ai ki te ʼu tisipulo ʼa Sesu ʼo te ʼuluaki sēkulō. Neʼe mole ko he temi fakafiafia pe, koteʼuhi neʼe akoʼi tāfito ai tatou. Ko te akonaki ʼaē neʼe hoa ki te kiʼi gaoʼi, “Tou Haga Kalagaʼi Te Logo Lelei” neʼe ina fakahā lelei te ʼu puani maʼuhiga ʼo te kiʼi gaoʼi.
Neʼe atalitali te nofoʼaki ki te faʼahi maʼuhiga ʼo te polokalama ʼo te ʼAhotapu, te akonaki ki te kaugamālie, “Ko Ai ʼe Ina Faka Kolōlia Te ʼAtua Ia ʼAho Nei?” Neʼe foaki e te tēhina te ʼu fakamoʼoni moʼo fakahā ko te faʼahi ʼo te poto fakatagata pea mo faka lotu neʼe mole nā faka kolōlia ki te ʼAtua. ʼE gata pe ki te hahaʼi ʼaē ʼe nātou toʼo tona huafa, ʼe nātou faka kolōliaʼi moʼoni tona huafa ia ʼaho nei, heʼe nātou faka mafola pea mo akoʼi ki te hahaʼi te moʼoni ʼo ʼuhiga mo Sehova.
Neʼe hoa ki te akonaki ki te kaugamālie te ʼu manatu fakanounou ʼo te ako ʼo Te Tule Leʼo ʼo te vāhaʼa. Pea hoa kiai te akonaki fakaʼosi “ ‘Ke Haga Fua Ia Koutou’ Te ʼu Fua Ki Te Kolōlia ʼo Sehova.” Neʼe fakahā ifo e te tēhina te ʼu tonu e hogofulu ki te nofoʼaki katoa. Neʼe talanoa tāfito ki te ʼu faʼahi kehekehe ʼaē ʼe tou faka kolōlia ai kia Sehova, te Tupuʼaga. Mai te tahi potu ʼo aʼu ki te tahi potu ʼo te kele, neʼe “Ei” ʼaki he lototahi te kau fakatahi fuli.
Neʼe fakaʼosi te fakatahi ʼaki te fakamanatuʼi ki te nofoʼaki te kupu tāfito “Koutou Faka Kolōlia Ki Te ʼAtua.” Pea ʼofa pe, ʼaki te tokoni ʼa te laumālie ʼo Sehova pea mo tana kautahi, ke tou kumi tuʼumaʼu ke tou faka kolōlia ki te ʼAtua kae mole ko te tagata.
[Talanoa ʼo te pasina 23]
Te ʼu Fakatahi Faka Malamanei
Neʼe fai te ʼu fakatahi faka malamanei lolotoga ʼaho e fā ʼi Afelika, mo Asia, mo Ositalalia, mo Eulopa, pea mo Amelika ʼo te Potu Noleto pea mo te Potu Saute. Ko te ʼu Fakamoʼoni mai te malamanei katoa neʼe fakaafe nātou ke nātou fakafofoga tonatou ʼu fenua ʼi te ʼu fakatahi ʼaia. ʼI te ʼaluʼaga ʼaia, neʼe hoko ai te “fefakaloto mālohiʼaki” ia nātou ʼaē neʼe ʼōmai mai te tahi ʼu fenua pea mo tonatou ʼu tēhina ʼaē neʼe nātou tali ia nātou. (Loma 1:12) Neʼe toe felāveʼi ai ia nātou ʼaē neʼe kua feʼiloʼiʼaki, pea neʼe felāveʼi ʼihi mo te ʼu tēhina mo tuagaʼane foʼou. Ko te faʼahi makehe ʼo te ʼu fakatahi faka malamanei, neʼe ko te koga ʼo te polokalama ʼaē neʼe ko tona kupu tāfito “Te ʼu Fakamatala Mai Te Tahi ʼu Fenua.”
[Talanoa ʼo te pasina 25]
Te ʼu Tohi Foʼou ʼAē ʼe Nātou Faka Kolōlia Ki Te ʼAtua
Ko te ʼu tohi foʼou e lua neʼe fakahā ʼi te ʼu Fakatahi Faka Tisitilike “Koutou Faka Kolōlia Ki Te ʼAtua.” Ko te tohi ‘ Voyez le bon pays, ’ ʼe tologa tona takafi pea ʼi te ʼu pasina e 36 ʼe maʼu ai te ʼu mape pea mo te ʼu paki ʼo te ʼu kolo faka Tohi-Tapu. ʼE lahi te ʼu lanu ʼi te ʼu pasina pea mo te ʼu mape ʼo te ʼu puleʼaga Asilia, mo Papiloni, mo Metia-Pelesia, mo Heleni, pea mo Loma. ʼE ʼi ai te tahi ʼu mape ʼe tuʼu kehe, ko te ʼu mape ʼe hā ai te minisitelio ʼo Sesu pea mo te mafola ʼo te Lotu Faka Kilisitiano.
Ko te tohi Écoute le grand Enseignant, ʼe pasina 256 pea mo te ʼu paki e teitei 230. ʼE lahi anai te ʼu temi fakafiafia ʼe feala ke tou fakatahi ai mo tatatou ʼu fānau, ʼo vakaʼi pe te ʼu paki pea mo tali ki te ʼu fehuʼi ʼaē ʼe tuʼu ʼi te tohi. Neʼe fai te tohi foʼou ʼaia moʼo fakafeagai ki te ʼohofi e Satana ia te kau tūpulaga, heʼe ina fia ʼulihi tanatou ʼu aga ʼaē ʼe lelei.
[Paki ʼo te pasina 23]
Neʼe fakamatala e te kau misionea tanatou ʼu faʼifaʼitaki ʼe fakaloto mālohi ki te tui
[Paki ʼo te pasina 24]
Ko te papitema ʼe ko he faʼahi maʼuhiga ʼo te ʼu fakatahi “Koutou Faka Kolōlia Ki Te ʼAtua”
[Paki ʼo te pasina 24]
Neʼe leleiʼia te kiʼi gaoʼi e te kau tūpulaga pea mo nātou lalahi