Te ʼu Fehuʼi ʼa Te Kau Lautohi

ʼE ʼui iā Pesalemo 102:26 ʼe “pulinoa anai” te kele pea mo te lagi. Ko tona faka ʼuhiga koa ʼe fakaʼauha anai te kele ʼaenī?

ʼI tana faikole kiā Sehova, neʼe ʼui fēnei e te tagata fai pesalemo: “ ʼI muʼa atu neʼe ke fakatuʼu te ʼu fakatafitoʼaga ʼo te kele, pea ko te lagi ʼe ko te gāue ʼo tou ʼu nima. Ko nāua ʼaia ʼe nā pulinoa anai, kae ko koe ʼe ke haga tuʼu anai; pea ohage ko he mutuʼi meʼa, ko nātou fuli ʼe nātou popo anai. Ohage ko he ʼu teu, ʼe ke fetogi anai nātou, pea ʼe nātou fakaʼosi ai anai tonatou temi.” (Pesalemo 102:​25, 26) Ka tou vakavakaʼi ia te ʼu vaega ʼi muʼa atu, ʼe mahino mai ʼe mole talanoa te ʼu vaega ʼaenī ki te fakaʼauha ʼo te kele, kae ʼe talanoa ki te maʼuli heʼegata ʼo te ʼAtua. ʼE toe fakahā foki ʼi te ʼu vaega ʼi muʼa atu pea mo ʼaē ʼe hoa mai kiai, pe koʼe ʼe ko he moʼoni maʼuhiga ke maʼu he fakaloto fīmālie e te kau kaugana ʼa te ʼAtua.

Ko te tagata fai pesalemo, ʼaē ʼe lagi ʼaunofo ʼi Papiloni, neʼe ina fakamatala muʼa tona ʼu mamahi. Neʼe lāuga ʼo ina ʼui ko tona maʼuli ʼe pulinoa “ohage ko te ʼahu.” Ko tana tuʼania ʼe ina fakamamahiʼi tona sino, ohage ai tona ʼu hui ʼe “kakaha ohage ko he gutuʼumu afi.” Kua gaʼegaʼe, “kua gigila ohage ko te ʼu ʼulu ʼakau,” pea ʼe ina logoʼi ʼe nofo tokotahi, “ohage ko he manulele ʼe nofo tokotahi ʼi he ʼato.” Ko tana ʼu ʼahiʼahi neʼe nātou pulihi tana fia kai pea neʼe nofo tagi pe ʼi te ʼu ʼaho. (Pesalemo 102:​3-11) Logola te ʼu faʼahi ʼaia, kae neʼe kei ʼi ai te falalaʼaga ʼa te tagata fai pesalemo. Koteā tona tupuʼaga? ʼUhi ko te fakapapau ʼaē neʼe fai e Sehova ʼo ʼuhiga mo Sione, peʼe ko Selusalemi.

Logola neʼe kua fakaʼauha ia Sione, kae neʼe fakapapau e Sehova ʼe toe laga anai pea mo toe nofoʼi. (Isaia 66:8) Koia neʼe ʼui ai e te tagata fai pesalemo ʼaki he loto falala kiā Sehova: “ ʼE ke manavaʼofa anai kiā Sione, koteʼuhi kua tonu ke ke tali ia ia, heʼe kua hoko mai te temi ʼaē neʼe fakakatofa. Koteʼuhi ʼe laga moʼoni anai e Sehova ia Sione.” (Pesalemo 102:​13, 16) ʼOsi ʼaia pea toe talanoa ia te tagata fai pesalemo ki tona ʼu mamahi. Neʼe ina fakakaukauʼi kapau ko Selusalemi ʼaē kua maumauʼi ʼe toe lava lagaʼi ʼaki te mālohi ʼo te ʼAtua, pea ʼe mahino ia ʼe ina fakaliliu mai anai ia ia mai tona maʼuli fakaʼofaʼofa. (Pesalemo 102:​17, 20, 23) Pea ʼe ʼi ai te tahi meʼa neʼe ina ʼeke te tagata fai pesalemo ke ina tuku kātoa tana falala kiā Sehova. Koteā ʼaia? Ko te heʼegata ʼo te maʼuli ʼo te ʼAtua.

Ko te heʼegata ʼo te maʼuli ʼo Sehova ʼe kehekehe ʼaupito ia mo te nounou ʼo te maʼuli ʼo te tagata fai pesalemo. Neʼe ina ʼui kiā Sehova: “Ko tou ʼu taʼu ʼe hoko atu ʼi te ʼu taʼitapu fuli.” (Pesalemo 102:24) Neʼe toe hoko atu fēnei te ʼu palalau ʼa te tagata fai pesalemo: “ ʼI muʼa atu neʼe ke fakatuʼu te ʼu fakatafito ʼo te kele, pea ko te lagi ʼe ko te gāue ʼo tou ʼu nima.”​—Pesalemo 102:⁠25.

Kae māʼia te kua ʼāfea ʼaupito ʼo te kele pea mo te lagi, kae ʼe mole feala ia ke fakatatau ki te heʼegata ʼo te maʼuli ʼo Sehova. Neʼe toe hoko atu fēnei ia te tagata fai pesalemo: “Ko nāua ʼaia [ia te kele mo te lagi] ʼe nā pulinoa anai, kae ko koe ʼe ke haga tuʼu anai.” (Pesalemo 102:26) Ko te kele mo te lagi ʼe feala ke pulihi. ʼE moʼoni ia, neʼe tala e Sehova ʼi te tahi ʼu vaega ko te kele pea mo te lagi ʼe tuʼu maʼu ia ʼo heʼegata. (Pesalemo 119:90; Tagata Tānaki 1:4) Kae ʼe feala pe honā fakaʼauha, mo kanapaula neʼe ko te fakatuʼutuʼu ʼaia ʼa te ʼAtua. Kae ko te ʼAtua, ʼe mole feala ke mate. Ko te kele pea mo te lagi ʼe nā haga “[tutuʼu] ʼo talu ai” ʼuhi pe heʼe taupau nāua e te ʼAtua. (Pesalemo 148:6) Kae kanapaula neʼe mole haga fakafoʼou e Sehova ia te kele pea mo te lagi, kanaʼauala ‘ ʼe nā popo anai ohage pe ko he mutuʼi meʼa.’ (Pesalemo 102:26) Ohage pe ko te maʼuli loa age ʼa te tagata ʼi tona ʼu mutuʼi meʼa, ʼe feiā pe mo Sehova ʼe maʼuli loa age ʼi te ʼu meʼa ʼaē neʼe ina fakatupu​—mo kapau ʼe ko tona finegalo ʼaia. Kae ʼe tou maʼu ʼi te tahi ʼu vaega ʼe mole ko tona finegalo ʼaia. ʼE fakamoʼoni mai ʼi te Folafola ʼa te ʼAtua, neʼe fakatuʼutuʼu e Sehova ke tuʼu ʼo talu ai ia te kele mo te lagi.​—Pesalemo 104:⁠5.

ʼE fakaloto fīmālie kiā tatou hatatou ʼiloʼi ko Sehova ʼe ina fakahoko tuʼumaʼu anai tana ʼu fakapapau. Koia logola he faʼahiga ʼahiʼahi ʼe hoko kiā tatou, kae ʼi te temi ʼaē ʼe tou kalaga ai kiā Sehova, ʼe tou tui papau ʼe “haga anai ki te faikole ʼo nātou ʼaē kua māsisiva iā meʼa fuli, pea ʼe mole ina meʼa noaʼi anai tanatou faikole.” (Pesalemo 102:17) ʼE tou tui papau ʼo ʼuhiga mo te lagolago mai ʼa Sehova ʼaē ʼe tou maʼu iā Pesalemo 102, ʼe tologa age ia ʼi te kele ʼaenī ʼe tou māʼuʼuli ai.