ʼE Maʼuli Te Folafola ʼa Sehova
Ko He ʼu Puani ʼAoga ʼo Te Tolu Koga Pea Mo Te Fā Koga ʼo Te ʼu Pesalemo
ʼI TANA faikole ki te ʼAtua, neʼe fehuʼi fēnei age e te tagata fai pesalemo: “ ʼE tala anai koa tou lotoʼofa ʼi te faitoka, tau agatonu ʼi te potu ʼo te fakaʼauha?” (Pesalemo 88:11) Kailoa, heʼe ka tou mamate, pea ʼe mole feala ke tou fakavikiviki kiā Sehova. Ko te fakavikiviki ʼaē kiā Sehova, ʼe ko he tupuʼaga lelei ke tou māʼuʼuli, pea kapau ʼe tou māʼuʼuli, pea ʼe ko he tupuʼaga lelei ke tou fakavikiviki kiā te ia.
Ko te Tolu Koga pea mo te Fā Koga ʼo te ʼu Pesalemo, ʼaē ko te Pesalemo 73 ʼo aʼu ki te Pesalemo 106, ʼe tou maʼu ai te ʼu tupuʼaga kehekehe ke tou fakavikiviki ai ki totatou Tupuʼaga, pea mo faka kolōliaʼi ia tona huafa. Ko te metitāsioʼi ʼo te ʼu pesalemo ʼaia, ʼe ina fakamaʼua mai ke tou loto fakafetaʼi ʼaupito ki “te folafola a te Atua,” pea mo ina uga tatou ke tou fakalahi pea mo hikihiki tatatou ʼu fakavikiviki ʼaē kiā te ia. (Hepeleo 4:12) ʼAki he loto fia mahino, tou ʼuluaki vakaʼi muʼa te Tolu Koga ʼo te ʼu Pesalemo.
“KIĀ TE AU, ʼE KO HE MEʼA LELEI TE FAKAŌVI KI TE ʼATUA”
Ko te ʼu ʼuluaki pesalemo e 11 ʼo te tolu koga, neʼe tohi e Asafe peʼe ko he ʼu hahaʼi ʼo tona famili. Ko te ʼuluaki hiva ʼe ina fakamahino mai ia te faʼahi ʼaē neʼe ina hāofaki ia Asafe, ke ʼaua naʼa higa ʼi te ʼu manatu hala. Neʼe ina maʼu te manatu ʼaē ʼe totonu, ʼo ina hivaʼi fēnei: “Kiā te au, ʼe ko he meʼa lelei te fakaōvi ki te ʼAtua.” (Pesalemo 73:28) Pea ʼi te Pesalemo 74, ʼe ko he lāuga ʼo ʼuhiga mo te fakaʼauha ʼo Selusalemi. ʼI te Pesalemo 75, 76, pea mo te 77, ʼe ʼui ai ko Sehova ʼe ko he Tuʼi Fakamāu faitotonu, ko te Fakamaʼuli ʼo te hahaʼi agavaivai, pea ʼe Fakalogo ki te ʼu faikole. ʼI te Pesalemo 78, ʼe fakamatala ai te ʼu aga ʼaē neʼe fai e Iselaele, mai te temi ʼo Moisese ʼo aʼu ki te temi ʼo Tavite. ʼI te Pesalemo 79, ʼe ko he lāuga ʼo ʼuhiga mo te fakaʼauha ʼo te fale lotu. Pea ʼi te Pesalemo 80, ʼe ko he faikole ki te toe fakaliliu ʼo te kau Sutea ki tonatou fenua. ʼI te Pesalemo 81, ʼe ko he fakaloto mālohi ki te fakalogo ʼaē kiā Sehova. ʼI te Pesalemo 82 pea mo te 83, ʼe ko he ʼu faikole ki te fakahoko ʼo te ʼu tautea fakaʼatua, ʼuluaki ki te ʼu tuʼi fakamāu kākā pea fakamuli leva ki te ʼu fili ʼo te ʼAtua.
ʼE ʼui fēnei ʼi te hiva ʼo te ʼu foha ʼo Kole: “Neʼe fakaʼamu toku nefesi, pea neʼe holi ki te ʼu malaʼe ʼo Sehova.” (Pesalemo 84:2) Ko te Pesalemo 85 ʼe ko he tagi ki te ʼAtua, ke ina tapuakinaʼi te kau Sutea ʼaē neʼe liliu mai tanatou ʼaunofo. ʼI te pesalemo ʼaia, ʼe fakahā ai te maʼuhiga age ʼo te ʼu tapuakina fakalaumālie ʼi te ʼu tapuakina fakasino. ʼI te Pesalemo 86, ʼe kole ai e Tavite ki te ʼAtua ke ina hāofaki ia ia pea mo akoʼi ia ia. ʼI te Pesalemo 87, ʼe ʼi ai te hiva ʼo ʼuhiga mo Sione pea mo nātou ʼaē neʼe tutupu ʼi te kolo ʼaia, pea hoa atu kiai te faikole kiā Sehova ʼi te Pesalemo 88. Ko te lotoʼofa ʼa Sehova, ʼaē neʼe ʼiloga ʼi tana fuakava mo Tavite, ʼe fakahā lelei ʼi te Pesalemo 89, ʼaē neʼe tohi e Etane, lagi neʼe kau ʼi te ʼu tagata popoto e toko fā ʼo te temi ʼo Salomone.—1 Hau 4:31.
Te ʼu Tali Ki Te ʼu Fehuʼi Faka Tohi-Tapu:
73:9—Koteā te faka ʼuhiga ʼo te ʼui ʼaē ko te kau agakovi neʼe nātou “ ʼai tonatou gutu ki te lagi, pea ʼe feʼaluʼaki tonatou ʼalelo ʼi te kele”? Mai tona ʼuhiga ʼaē ko te kau agakovi ʼe mole nātou tokagaʼi he tahi ʼi te lagi peʼe ʼi te kele, koia ʼe mole nātou fakatātāʼofi ʼi te fakaʼaogaʼi ʼo tonatou gutu moʼo fasituʼu ki te ʼAtua. ʼE nātou fakaʼaogaʼi mo tonatou ʼalelo moʼo fasituʼu ki te hahaʼi.
74:13, 14—Ko te temi fea ʼaē neʼe ‘fasiʼi ai e Sehova te ʼu ʼulu ʼo te ʼu manu lalahi ʼo te tai, pea mo laliki te ʼu ʼulu ʼo Leviata’? Ko “Falaone, hau ʼo Esipito,” ʼe fakahigoaʼi ko “te manu lahi ʼo te tai, ʼaē ʼe moe ʼi te lotomalie ʼo te ʼu vaitafe ʼo [te] Nile.” (Esekiele 29:3) Ko Leviata ʼe lagi ina fakatātā ia “te ʼu tagata mālolohi ʼa Falaone.” (Pesalemo 74:14, nota ʼi te lalo pasina) Ko te laliki ʼo tonatou ʼu ʼulu, ʼe lagi faka ʼuhiga ki te laliki e Sehova ia Falaone mo tana kautau, ʼi te temi ʼaē neʼe faka ʼāteaina ai e Sehova ia te kau Iselaele mai tonatou maʼuli popūla ʼi Esipito.
75:4, 5, 10—Koteā te faka ʼuhiga ʼo te kupu “talaʼi manu”? Ko te ʼu tala ʼo te ʼu manu, ʼe ko he meʼa tau mālohi. Koia, ko te kupu “talaʼi manu,” ʼe ina fakatātā ia te mālohi. Neʼe hiki e Sehova te ʼu tala ʼo tana hahaʼi, ke fakavikivikiʼi nātou, kae neʼe ina ‘tuʼusi te ʼu tala ʼo te kau agakovi.’ ʼE fakatokagaʼi mai ke ʼaua naʼa ‘tou hiki totatou tala ki ʼoluga,’ ko tona faka ʼuhiga, ke ʼaua naʼa tou fiameʼameʼa peʼe tou fiatuʼu. Kapau ʼe ko Sehova ʼaē ʼe ina hikihiki tatou, pea ʼe tonu ke mahino kiā tatou ʼe ko ia ʼaē ʼe ina foaki mai te ʼu pilivilesio ʼi te kokelekasio.—Pesalemo 75:7.
76:10—Koteā te faka ʼuhiga ʼo te ʼu palalau ʼaenī: Ko “te ʼita ʼa te tagata” ʼe ina fakavikiviki anai ia Sehova? Ka fakagafua e te ʼAtua ke fakahoko e te hahaʼi tanatou ʼiʼita kiā tatou ʼuhi ko tatou ko tana ʼu kaugana, ʼe feala ke ʼi ai hona ikuʼaga lelei. Ko te ʼu faigataʼaʼia ʼaē ʼe lava hoko kiā tatou, ʼe ko he faʼahiga akonakiʼi ʼo tatou. Ko Sehova ʼe ina fakagafua pe ia te ʼu mamahi, mo kapau ʼe tou maʼu ai ia te faʼahiga ako ʼaia. (1 Petelo 5:10) ‘ ʼE nonoʼo anai e te ʼAtua ki tona koga loto, te toega ʼita ʼo te tagata.’ Kae e feafeaʼi mo kapau ʼe tou mamahi ʼo kaku ai mo tatatou mate? ʼO feiā mo te ʼaluʼaga ʼaia, ʼe feala ke hoko ai he fakavikiviki kiā Sehova, heʼe ko nātou ʼaē ʼe nātou sisio ki tatatou kātaki agatonu, ʼe feala mo nātou ke nātou faka kolōlia ai ki te ʼAtua.
78:24, 25, nota ʼi te lalo pasina—He koʼe ʼe fakahigoaʼi te mane ko “te pulapula ʼo te lagi,” pea ko “te pane ʼa te kau ʼāselo”? Ko te ʼu kupuʼi palalau ʼaia ʼe mole faka ʼuhiga ko te mane neʼe ko te meʼa kai ʼa te kau ʼāselo. ʼE ʼui ko “te pulapula ʼo te lagi,” he neʼe ko he meʼa kai mai lagi. (Pesalemo 105:40) Mai tona ʼuhiga ʼaē ko te kau ʼāselo, peʼe ko “te kau mālolohi,” ʼe nātou nonofo ʼi te lagi, koia ko te kupuʼi palalau “te pane ʼa te kau ʼāselo,” ko tona faka ʼuhiga pe ia neʼe ko he pane mai te ʼAtua, ʼaē ʼe nofo ʼi te lagi. (Pesalemo 11:4) Neʼe lagi toe fakaʼaogaʼi e Sehova ia te kau ʼāselo moʼo foaki ia te mane ki te kau Iselaele.
82:1, 6—Ko ai ia nātou ʼaē ʼe fakahigoaʼi ko “te ʼu ʼatua” pea ko “te ʼu foha ʼo te Māʼoluga”? Ko te ʼu kupuʼi palalau ʼaia ʼe faka ʼuhiga ki te ʼu tuʼi fakamāu ʼo Iselaele. Neʼe tāu mo feʼauga ke fakahigoaʼi feiā ia nātou, he neʼe ko he ʼu tagata neʼe nātou tala te ʼu folafola ʼa te ʼAtua pea mo nātou fakafofoga ia ia.—Soane 10:33-36.
83:2—Koteā tona faka ʼuhiga te ‘lagaʼi ake ʼo tokita ʼulu’? ʼE faka ʼuhiga ki te fia fakahoko ʼo he pule peʼe ko he gāue, pea ʼi te agamāhani, ʼe fai te faʼahi ʼaia moʼo fakafeagai, moʼo tauʼi peʼe moʼo fakatagaʼi.
Te ʼu Puani ʼe Tou Lava Tāʼofi:
73:2-5, 18-20, 25, 28. ʼAua naʼa tou fakaʼamuʼamu ki te maʼuli koloaʼia ʼa te kau agakovi pea mo ʼaua naʼa tou fai tanatou ʼu aga ʼaē ʼe fakafeagai ki te ʼAtua. ʼE haʼele te kau agakovi ʼi he kele ʼe mahekeheke pea ʼe “fakaʼauha” moʼoni anai nātou. Tahi ʼaē, ʼe mole feala ke pulihi te agakovi ʼi te pule heʼe haohaoa ʼa te tagata, koia ʼe ko he puli temi anai tatatou faiga moʼona pulihi. Ohage ko Asafe, ʼe ko he aga fakapotopoto anai mo kapau ʼe tou tauʼi te agakovi, ʼi tatatou “fakaōvi ki te ʼAtua,” pea mo tou felogoi lelei mo ia.
73:3, 6, 8, 27. Tou tōkakaga naʼa tou laupisi, mo fiatuʼu, mo lea manukinuki, pea mo aga fakakākā ʼi te ʼu fai koloā. ʼAua naʼa tou fai te ʼu aga ʼaia, tatau aipe peʼe hage ʼe kita maʼu ai ni ʼu lelei.
73:15-17. Kapau ʼe ʼi ai he ʼu faʼahi ʼe mole tou mahino kiai, ʼaua naʼa tou meo ʼi te kaugamālie. Ko ‘te fakamatala ʼo te ʼu faʼahi ʼaia,’ ʼe ina fakaloto vaivaiʼi anai niʼihi. ʼE lelei age hatatou metitāsioʼi ʼi te tokalelei, tatatou ʼu tuʼania pea mo kumi puleʼaki mokā tou fakatahi mo totatou ʼu tēhina mo tuagaʼane.—Taʼaga Lea 18:1.
73:21-24. Ka mamahi totatou loto heʼe hage ʼe maʼuli fīmālie te kau agakovi, pea ʼe ko he agavale ʼaia ohage ko ni ʼu manu. Ko te taʼi manatu ʼaia neʼe mole fakakaukauʼi, ʼe tupu mai te ʼu meʼa ʼaē ʼi totatou loto. ʼE lelei age hatatou mulimuli ki te ʼu tokoni ʼa Sehova, ʼo tou falala kātoa ‘ ʼe ina puke anai totatou nima mataʼu,’ pea mo lagolago kiā tatou. Tahi ʼaē meʼa, ko Sehova ‘ ʼe ina taki anai tatou ki te kolōlia,’ ko tona faka ʼuhiga, ʼe tou felogoi lelei anai mo ia.
77:6. Ko te ʼofa moʼoni ki te ʼu moʼoni fakalaumālie pea mo tona kumi, ʼe fakamaʼua kiai he temi moʼo akoʼi pea mo metitāsioʼi. ʼE maʼuhiga ke tuku keheʼi hotatou temi ke tou ʼāteaina ai moʼo fai ia te ʼu faʼahi ʼaia.
79:9. ʼE fakalogo ia Sehova ki tatatou ʼu faikole, tāfito la mokā ʼe tou faikole ʼo ʼuhiga mo te tāpuhā ʼo tona huafa.
81:13, 16. Ko te fakalogo ki te leʼo ʼo Sehova pea mo haʼele ʼi tona ʼu ala, ʼe ina fakaiku ki he ʼu tapuakina lahi.—Taʼaga Lea 10:22.
82:2, 5. Ko te ʼu aga heʼe faitotonu, ʼe nātou luluʼi “te ʼu tafitoʼaga ʼo te kele,” pea ko te ʼu aga fakakākā ʼe nātou fakasīʼia ia te malamanei.
84:1-4, 10-12. ʼE ko he ʼu faʼifaʼitaki kiā tatou, ia te loto fakafetaʼi ʼa te ʼu tagata fai pesalemo ki te fale tauhi ʼa Sehova, pea mo tanatou fiafia ʼo ʼuhiga mo te ʼu pilivilesio ʼaē neʼe tuku age kiā nātou.
86:5. ʼE tou loto fakafetaʼi ʼaupito ki te “fakamolemole gafua” ʼa Sehova. ʼE ina vakavakaʼi te ʼu fakamoʼoni ʼaē ʼe nātou faka fealagia anai kiā ia ke loto manavaʼofa ki he tahi neʼe agahala pea ʼe fakahemala.
87:5, 6. Ko nātou ʼaē ka māʼuʼuli anai ʼi te Palatiso ʼi te kele, ʼe nātou ʼiloʼi anai koa te ʼu higoa ʼo nātou ʼaē ka fakatuʼuake ki te maʼuli ʼi selo? ʼI te ʼu vaega ʼaenī, ʼe hā mai ʼe ko he meʼa ʼe feala.
88:13, 14. Kapau ʼe mole tali vave mai e Sehova ki tatatou ʼu kole, ʼaē neʼe tou fai age ʼo ʼuhiga mo tatatou ʼu fihifihia, lagi ko tona faka ʼuhiga, ʼe loto e Sehova ke tou fakahā age tatatou ʼoʼofa moʼoni kiā te ia.
“KOUTOU FAKAFETAʼI KIĀ TE IA, KOUTOU FAKA KOLŌLIAʼI TONA HUAFA”
Tou vakaʼi age muʼa ʼi te fā koga ʼo te ʼu pesalemo, ia te ʼu tupuʼaga kehekehe ʼaē ke tou fakavikiviki ai kiā Sehova. ʼI te Pesalemo 90, neʼe fakakehekeheʼi e Moisese ia te maʼuli ʼo “te Hau ʼo te heʼegata,” pea mo te maʼuli nounou ʼo te tagata. (1 Timoteo 1:17, MN ) Ohage ko tona tuʼu ʼi te Pesalemo 91:2, ʼe ʼui ai e Moisese ko Sehova ʼe ko ‘tona holaʼaga pea mo tona tule mālohi’—te Matapuna ʼo tona hāofaki. ʼI te tahi ʼu pesalemo ki muli age, ʼe talanoa ai ʼo ʼuhiga mo te ʼu kalitātē taulekaleka ʼo te ʼAtua, tana ʼu manatu māʼoluga, pea mo tana ʼu gāue fakaofoofo. ʼI te ʼu hiva e tolu, ʼe kamata ʼaki te ʼu kupuʼi palalau “ko Sehova totonu kua liliu ko te hau.” (Pesalemo 93:1; 97:1; 99:1) ʼI tana ʼui ʼaē ko Sehova totatou Tupuʼaga, ʼe fakaafe tatou e te tagata fai pesalemo ke tou ‘fakafetaʼi kiā te ia, pea mo tou faka kolōliaʼi tona huafa.’—Pesalemo 100:4.
Ko he pule ʼe manavasiʼi kiā Sehova, ʼe tonu ke ina fakahoko feafeaʼi tana ʼu gāue? ʼE maʼu tona tali ʼi te Pesalemo 101, ʼaē neʼe tohi e te Hau ko Tavite. ʼI te pesalemo ʼaē ʼe hoa mai kiai, ʼe ina fakahā mai ko Sehova “ ʼe ina tokagaʼi moʼoni anai te faikole ʼa nātou ʼaē ʼe mole kei ʼi ai hanatou meʼa, pea ʼe mole ina meʼa noaʼi anai tanatou faikole.” (Pesalemo 102:17) ʼI te Pesalemo 103, ʼe talanoa ai ʼo ʼuhiga mo te lotoʼofa ʼo Sehova pea mo tana loto manavaʼofa. ʼI tana talanoa ʼo ʼuhiga mo te ʼu faʼu kehekehe ʼo te kele, neʼe ʼui fēnei e te tagata fai pesalemo: “ ʼE lahi tau ʼu gāue, Ê Sehova! Neʼe ke fai tau ʼu gāue fuli ʼaia ʼaki te poto.” (Pesalemo 104:24) Ko te ʼu hiva fakaʼosi e lua ʼo te Koga Fā ʼo te ʼu pesalemo, ʼe ko he ʼu fakavikiviki kiā Sehova ʼo ʼuhiga mo tana ʼu gāue taulekaleka.—Pesalemo 105:2, 5; 106:7, 22.
Te ʼu Tali Ki Te ʼu Fehuʼi Faka Tohi-Tapu:
91:1, 2—Koteā ia “te potu fakalilo ʼo te Māʼoluga,” pea e feafeaʼi hatatou ‘nonofo’ ʼi te potu ʼaia? ʼE ko he potu fakatātā, ʼe kita maʼu ai te hāofaki pea mo te fīmālie fakalaumālie—ko he ʼaluʼaga ʼe hāofaki ai kita mai te ʼu mamahi fakalaumālie. ʼE ko he potu fakalilo, heʼe mole ʼiloʼi e nātou ʼaē ʼe mole falala ki te ʼAtua. ʼE tou fakaliliu ia Sehova ko totatou nofoʼaga, ʼi tatatou faka ʼuhiga ia ia ko totatou holaʼaga pea mo tule mālohi, ʼi tatatou fakavikiviki kiā te ia ko totatou Tuʼi ʼAliki ʼo te ʼatulaulau, pea mo tatatou faka mafola ia te logo lelei ʼo te Puleʼaga. ʼE tou nonofo ʼi te fīmālie fakalaumālie heʼe tou ʼiloʼi ko Sehova ʼe lava tokoni tuʼumaʼu mai kiā tatou.—Pesalemo 90:1.
92:12—Koteā tona faka ʼuhiga te ʼui ʼaē “ ʼe fisi anai te tagata faitotonu ohage ko he fuʼu pālema”? ʼE ʼiloʼi tāfito ia te fuʼu pālema ʼo ʼuhiga mo tana fua lelei. Ko he tagata faitotonu ʼe hage ko he fuʼu pālema, ko tona faka ʼuhiga, kiā mata ʼo Sehova ʼe ko he tagata agatonu, pea ʼe ina fakatupu “te ʼu fua matalelei,” ʼaē ʼe faka ʼuhiga ki tana ʼu gāue lelei.—Mateo 7:17-20, MN.
Te ʼu Puani ʼe Tou Lava Tāʼofi:
90:7, 8, 13, 14. Ko tatatou ʼu aga ʼaē ʼe kovi, ʼe nātou maumauʼi tuʼumaʼu tatatou ʼu felogoi mo te ʼAtua moʼoni. Ko te ʼu agahala ʼaē ʼe tou fufū, ʼe mole ū ia kiā te ia. Kae kapau ʼe tou fakahemala moʼoni, pea mo tou līaki tatatou ʼu aga ʼaē ʼe kovi, ʼe toe tapuakina anai tatou e Sehova, ‘ ʼo ina fakaloto fīmālieʼi tatou ʼaki tona lotoʼofa.’
90:10, 12. ʼE nounou totatou maʼuli, koia ʼe tonu ke tou ‘lau totatou ʼu ʼaho.’ ʼO feafeaʼi? ʼO tou fakahū kiai “he loto ʼe fakapotopoto,” peʼe tou aga fakapotopoto, ke ʼaua naʼa ʼalunoa totatou ʼu ʼaho ʼaē ʼe kei toe, kae ke tou fakaʼaogaʼi ʼi hona ʼaluʼaga ʼe ina fakafiafia ia Sehova. Moʼo fai ia te faʼahi ʼaia, ʼe maʼua anai ke takimuʼa kiā tatou ia te ʼu meʼa fakalaumālie, pea mo tou fakaʼaogaʼi fakapotopoto totatou temi.—Efeso 5:15, 16; Filipe 1:10.
90:17. ʼE ko he meʼa lelei hatatou faikole kiā Sehova ke ina ‘fakatuʼu mālohi te gāue ʼo totatou ʼu nima’ pea mo ina tapuakina tatatou ʼu faiga ʼi te minisitelio.
92:14, 15. Kapau ko te kau tagata ʼāfea ʼe nātou ako tuʼumaʼu ia te Folafola ʼa te ʼAtua pea mo nātou fakatahi tuʼumaʼu mo te hahaʼi ʼa Sehova, ʼe nātou “haga sino lelei anai pea mo mālolohi,” ko tona faka ʼuhiga ʼe nātou mālolohi anai ʼi te faʼahi fakalaumālie, pea mo nātou liliu anai ko he ʼu tapuakina ki te kokelekasio.
94:19. Tatau aipe peʼe koteā te tupuʼaga ʼo “te ʼu meʼa ʼaē ʼe hoha kiai tatatou fakakaukau,” kae ko tatatou lau pea mo metitāsioʼi “te ʼu fakaloto fīmālie” ʼaē ʼe tuʼu ʼi te Tohi-Tapu, ʼe tou maʼu ai anai he fakaloto fīmālie.
95:7, 8. ʼE mole tou loto fefeka anai, mo kapau ʼe tou fakalogo, mo tokagaʼi pea mo talagafua ki te ʼu tokoni faka Tohi-Tapu.—Hepeleo 3:7, 8.
106:36, 37. ʼI te ʼu vaega ʼaenī, ʼe fakapipiki tahi ia te tauhi tamapua pea mo te ʼu fai sākilifisio ki te kau temonio. ʼE hā ʼaki mai, ko he tahi ʼe ina fakaʼaogaʼi he ʼu tamapua ʼe lava fakahalaʼi anai e te kau temonio. ʼE tokoni fēnei mai ia te Tohi-Tapu: “Koutou fakamamaʼo mai te ʼu tamapua.”—1 Soane 5:21, MN.
“Koutou Fakavikiviki Kiā Sah!”
Ko te ʼu hiva fakaʼosi e tolu, ʼo te Koga Fā ʼo te ʼu Pesalemo, ʼe ina fakaʼosi ʼaki ia te fakaloto mālohi ʼaenī: “Koutou fakavikiviki kiā Sah!” ʼE toe maʼu te ʼu kupuʼi palalau ʼaenī ʼi te pesalemo fakaʼosi. (Pesalemo 104:35; 105:45; 106:1, 48) ʼI te Koga Fā ʼo te ʼu pesalemo, ʼe tautau maʼu ia te ʼu kupuʼi palalau “Koutou fakavikiviki kiā Sah!”
ʼE lahi te ʼu tupuʼaga ke tou fakavikiviki ai kiā Sehova. Mai te Pesalemo 73 ʼo aʼu ki te Pesalemo 106, ʼe lahi te ʼu manatu ʼe tonu ke tou metitāsioʼi, mo nātou fakafonu totatou loto ʼi te fakafetaʼi ki tatatou Tāmai ʼaē ʼi selo. Ka tou fakakaukauʼi ia meʼa fuli ʼaē neʼe ina fai maʼa tatou, pea mo te ʼu meʼa ʼaē ka ina fai anai maʼa tatou ʼi te ka haʼu, ʼe mole uga ai koa la tatou ke tou “fakavikiviki kiā Sah,” ʼaki totatou mālohi kātoa?
[Paki ʼo te pasina 16]
Ohage ko Asafe, ʼe tou lava tauʼi te agakovi ʼo tou “fakaōvi ki te ʼAtua”
[Paki ʼo te pasina 17]
Neʼe mole mālo ia Falaone ʼi te Tai Mate
[Paki ʼo te pasina 17]
ʼE koutou ʼiloʼi koa pe koʼe ʼe fakahigoaʼi te mane ko “te pane ʼa te kau ʼāselo”?
[Paki ʼo te pasina 19]
Koteā ʼaē ka ina pulihi ia “te ʼu meʼa ʼaē ʼe hoha kiai tatatou fakakaukau”?