Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • w01 15/11 p. 10-15
  • ʼE Fakahā Mai e Sehova Peʼe Feafeaʼi Te Lau ʼo Totatou ʼu ʼAho

Aucune vidéo n'est disponible pour cette sélection.

Il y a eu un problème lors du chargement de la vidéo.

  • ʼE Fakahā Mai e Sehova Peʼe Feafeaʼi Te Lau ʼo Totatou ʼu ʼAho
  • Te Tule Leʼo—2001
  • Manatu Tafito
  • He Tahi ʼu Alatike
  • Ko Sehova Totatou “Nofoʼaga Moʼoni”
  • ʼE Tokoni Tuʼumaʼu Ia Sehova Kia Tatou
  • ʼE Tokoni Mai Sehova Ke Tou “Lau Totatou ʼu ʼAho”
  • Ko Te Tapuakina ʼa Sehova ʼe Ina Fakafiafia Tatou
  • Tou Haga Lau Totatou ʼu ʼAho
  • He Koʼe Kua Nounou Te Temi?
    Te Tule Leʼo—1999
  • Ko He ʼu Puani ʼAoga ʼo Te Tolu Koga Pea Mo Te Fā Koga ʼo Te ʼu Pesalemo
    Te Tule Leʼo—2006
  • Ko Sehova Ko Totatou Nofoʼaga
    Te Tule Leʼo—2013
  • Neʼe ʼi Ai Koa He Kamataʼaga ʼo Te ʼAtua?
    Te Tule Leʼo—2010
Hoko Atu
Te Tule Leʼo—2001
w01 15/11 p. 10-15

ʼE Fakahā Mai e Sehova Peʼe Feafeaʼi Te Lau ʼo Totatou ʼu ʼAho

“Fakahā mai kia mātou peʼe feafeaʼi te lau ʼo tomatou ʼu ʼaho ke feala hamatou maʼu he loto fakapotopoto.”—Pesalemo 90:12.

1. He koʼe ʼe lelei ke tou kole kia Sehova ke ina fakahā mai peʼe feafeaʼi te ‘lau ʼo totatou ʼu ʼaho’?

KO SEHOVA ʼATUA ko totatou Tupuʼaga, pea neʼe ina Foaki mai te maʼuli. (Pesalemo 36:9; Apokalipesi 4:11) ʼE mole he tahi age ʼe feala ke ina fakahā lelei mai, peʼe feafeaʼi hatatou fakaʼaogaʼi totatou temi maʼuli ʼi hona ʼaluʼaga fakapotopoto. Koia ʼe ʼalutahi mo te kole fēnei ʼa te tagata fai pesalemo ki te ʼAtua: “Fakahā mai kia mātou peʼe feafeaʼi te lau ʼo tomatou ʼu ʼaho ke feala hamatou maʼu he loto fakapotopoto.” (Pesalemo 90:12) ʼE mahino ia ko te Pesalemo 90, ʼaē ʼe tou maʼu ai te kole ʼaia, ʼe tau mo feʼauga ke tou tokagaʼi lelei. Tou ʼuluaki vakaʼi fakanounou te hiva ʼaia ʼaē ʼe haʼu mai te ʼAtua.

2. (a) Ko ai ʼaē neʼe ina tohi te Pesalemo 90, pea neʼe lagi tohi ʼi te temi fea? (b) ʼAki te Pesalemo 90, ʼe tonu ke feafeaʼi tatatou manatu ʼo ʼuhiga mo totatou maʼuli?

2 ʼE fakahigoaʼi te Pesalemo 90 ko “te faikole ʼa Moisese, te tagata ʼa te ʼAtua moʼoni.” Mai tona ʼaluʼaga ʼaē ʼe talanoa tāfito te pesalemo ʼaia ki te maʼuli nounou ʼo te tagata, koia neʼe lagi ina tohi ʼi te kua faka ʼāteaina ʼo Iselaele mai tanatou nofo popūla ʼi Esipito pea lolotoga te ʼu taʼu e 40 ʼaē neʼe nātou feʼoloʼaki ai ʼi te toafa, pea neʼe puli ai te taʼiake heʼe agatonu, he neʼe mamate te ʼu lauʼi afe hahaʼi. (Faka au 32:9-13) Tatau aipe peʼe ko te temi fea ʼaē neʼe tohi ai, kae ʼe hā mai ʼi te Pesalemo 90 ʼe nounou te maʼuli ʼo te tagata agahala. Koia ʼe tonu ai ke tou fakaʼaogaʼi fakapotopoto totatou ʼu ʼaho.

3. Koteā ʼaē ʼe tou maʼu ia Pesalemo 90?

3 ʼI te Pesalemo 90, ʼi te ʼu vaega 1 ki te 6 ʼe fakahā ai ʼo ʼuhiga mo Sehova, ʼe ko totatou nonoʼaga heʼegata. ʼI te ʼu vaega 7 ki te 12 ʼe fakahā ai te ʼu meʼa ʼaē ʼe tonu ke tou fai moʼo fakaʼaogaʼi totatou temi maʼuli ʼaē ʼe fakalaka, ʼi hona ʼaluʼaga ʼe ina leleiʼia. Pea ohage ko tona tohi ʼi te ʼu vaega 13 ki te 17, ʼe tou loto moʼoni ke tou maʼu te lotoʼofa pea mo te tapuakina ʼa Sehova. ʼE mahino ia ʼe mole talanoa te pesalemo ʼaia ki te ʼu meʼa ʼaē ka hoko ki te ʼu kaugana takitokotahi ʼa Sehova. Kae ʼe tonu ke tou tahi tokaga fakalelei ki te faikole fakamalotoloto ʼaia. Koia ʼi totatou ʼuhiga hahaʼi ʼaē kua tou foaki totatou maʼuli ki te ʼAtua, tou fakasiosio te Pesalemo 90.

Ko Sehova Totatou “Nofoʼaga Moʼoni”

4-6. ʼE liliu feafeaʼi ia Sehova ko totatou “nofoʼaga moʼoni”?

4 ʼE kamata fēnei te tagata fai pesalemo: “Ê Sehova, neʼe ke liliu maʼa mātou ko he nofoʼaga moʼoni ʼi te ʼu taʼiake ki te ʼu taʼiake. ʼI muʼa ʼo te tupu ʼo te ʼu moʼuga, peʼe ko tau fānauʼi ohage ʼi te mamahi ia te kele pea mo te fenua ʼaē ʼe maʼuli, ʼio mai te ʼu temi ʼe heʼegata ki he ʼu temi heʼegata ʼe ke ʼAtua.”—Pesalemo 90:1, 2.

5 Kia tatou ko “te Atua heegata,” ia Sehova ʼe ko “he nofoʼaga moʼoni,” ko he nonoʼaga fakalaumālie. (Loma 16:26) ʼE tou nonofo ʼi te fīmālie heʼe tokoni tuʼumaʼu mai kia tatou pea ʼe “fagono ki te faikole.” (Pesalemo 65:2) ʼUhi heʼe tou fakahā tatatou ʼu tuʼania ki tatatou Tāmai ʼaē ʼi selo ʼaki tona ʼAlo ʼofaina, koia ko ‘te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai totatou ʼu loto pea mo totatou ʼu ʼatamai.’—Filipe 4:6, 7; Mateo 6:9; Soane 14:6, 14.

6 ʼE tou fīmālie ʼi te faʼahi fakalaumālie, heʼe ʼi tona ʼuhiga fakatātā, ko Sehova ʼe ko “he nofoʼaga moʼoni” maʼa tatou. ʼE ina toe foaki mo te ʼu “koga fale loto”—ʼe lagi faka ʼuhiga ki te ʼu kokelekasio—ohage ko he ʼu nonoʼaga fakalaumālie, pea ʼe tou maʼu ai he fīmālie lahi, heʼe ʼi ai te ʼu tagata taupau ʼofa. (Isaia 26:20; 32:1, 2; Gaue 20:28, 29) Tahi ʼaē meʼa, ʼe kau ʼihi ia tatou ki he ʼu famili kua fualoa tanatou tauhi ki te ʼAtua, pea ʼe nātou tahi fakamoʼoni ko te ʼAtua ʼe ko ‘he nofoʼaga moʼoni ʼi te ʼu taʼiake ki te ʼu taʼiake.’

7. Koteā te faka ʼuhiga ʼo te ʼui ʼaē neʼe “tupu” te ʼu moʼuga pea neʼe fānauʼi te kele ohage neʼe fānauʼi “ ʼi te mamahi”?

7 Neʼe kua maʼuli ia Sehova ʼi muʼa ʼo te “tupu” ʼo te ʼu moʼuga peʼe ʼi muʼa ʼo te fānauʼi ʼo te kele ohage ko hana fānauʼi “ ʼi te mamahi.” ʼI te sio fakatagata, ko te faʼu ʼo te kele mo ʼona ʼu agaaga kehekehe pea mo faigataʼa, ʼe mole ko he kiʼi gāue. Pea ko te ʼui ʼaē neʼe “tupu” te ʼu moʼuga pea ko te kele neʼe fānauʼi ohage neʼe fānauʼi “ ʼi te mamahi,” ʼe fakahā ai e te tagata fai pesalemo he fakaʼapaʼapa lahi ki te ʼu tuʼuga gāue ʼaē neʼe fai ʼi te temi ʼaē neʼe fakatupu ai e Sehova te ʼu meʼa ʼaia. ʼE mole tonu koa la mo tatou ke tou fakaʼapaʼapa pea mo loto fakafetaʼi ki te ʼu gāue ʼa te Tupuʼaga?

ʼE Tokoni Tuʼumaʼu Ia Sehova Kia Tatou

8. Koteā te faka ʼuhiga ʼo te ʼui ʼaē ko Sehova ʼAtua ʼe maʼuli talu “mai te ʼu temi ʼe heʼegata ki he ʼu temi heʼegata”?

8 Neʼe hiva fēnei te tagata fai pesalemo: “ ʼIo, mai te ʼu temi ʼe heʼegata ki te ʼu temi heʼegata ʼe ke ʼAtua.” Ko “te ʼu temi heʼegata” ʼe feala ke faka ʼuhiga ki te ʼu meʼa ʼe ʼi ai tonatou gataʼaga, kae ʼe mole ʼiloʼi te temi ʼaē ka gata ai. (Ekesote 31:16, 17; Hepeleo 9:15) Kae ʼi te Pesalemo 90:2 pea mo te tahi ʼu vaega ʼo te ʼu Tohi Faka Hepeleo, ko “te ʼu temi heʼegata” ʼe faka ʼuhiga ki he ʼu “temi ʼe mole ʼi ai honatou gataʼaga.” (Tagata Tānaki 1:4) ʼE mole lava mahino totatou ʼatamai ki te ʼuhiga heʼegata ʼo te ʼAtua. Kae ko Sehova ʼe mole hona kamataʼaga pea ʼe mole hona gataʼaga. (Hapakuke 1:12) ʼE maʼuli tuʼumaʼu anai pea ʼe lava tokoni mai.

9. Koteā ʼaē ʼe fakatatau e te tagata fai pesalemo ki te ʼu taʼu e afe ʼo te maʼuli ʼo te tagata?

9 ʼAki te takitaki ʼa te ʼAtua, neʼe fakatatau e te tagata fai pesalemo te ʼu taʼu e afe ʼo te maʼuli ʼo te tagata ki he kiʼi temi nounou ʼi te maʼuli ʼo te Tupuʼaga heʼegata. ʼI tana palalau ki te ʼAtua, neʼe ina tohi fēnei: “ ʼE ke toe fakaliliu te tagata ʼaē ʼe mate ki te meʼa ʼaē kua lailai, pea ʼe ke ʼui fēnei: ‘Koutou toe liliu, ʼu foha ʼo te tagata.’ He ko taʼu e afe kia te koe, ʼe hage pe ko te ʼaho ʼo ʼanāfi mokā kua hili, pea ʼe hage ko te ʼu lakaga leʼo ʼi te pōʼuli.”—Pesalemo 90:3, 4.

10. E feafeaʼi te “toe fakaliliu [e te ʼAtua] te tagata . . . ki te meʼa ʼaē kua lailai”?

10 Ko te tagata ʼe mate, pea ko te ʼAtua ʼe ina “toe fakaliliu te tagata . . . ki te meʼa ʼaē kua lailai.” Ko tona faka ʼuhiga, ʼe toe liliu te tagata “ki te efu,” ohage ko he moʼi kele kua lailai. ʼE moʼoni, ʼe ʼui fēnei e Sehova: ‘Toe liliu ki te efu ʼo te kele ʼaē neʼe toʼo koe mai ai.’ (Senesi 2:7; 3:19) ʼE hoko te faʼahi ʼaia ki te hahaʼi fuli—te hahaʼi mālolohi peʼe vaivavai, koloaʼia peʼe māsisiva—heʼe mole he tagata agahala ‘ ʼe feala ʼi he faʼahiga meʼa pe ke ina totogi he tēhina, peʼe ke ina foaki ki te ʼAtua he totogi ʼo ʼuhiga mo ia, ke feala hana toe maʼuli ʼo talu ai.’ (Pesalemo 49:6-9) Kae ʼe tou loto fakafetaʼi ki te ‘foaki e te ʼAtua tona ʼAlo ʼulu tokotahi, ke feala ai ki ʼaē ʼe tui kia te ia ke ina maʼu te maʼuli heʼegata’!—Soane 3:16; Loma 6:23.

11. He koʼe ʼe feala ke tou ʼui ko te temi ʼaē ʼe loaloaga kia tatou ʼe nounou ʼaupito ki te ʼAtua?

11 Kia Sehova, ko te ʼu taʼu e 969 ʼaē neʼe maʼuli ai ia Metusela neʼe mole ko he ʼaho katoa. (Senesi 5:27) Ki te ʼAtua, ko te ʼu taʼu e afe ʼe hage ko ʼanāfi, ko he ʼu hola pe e 24. ʼE toe fakatokagaʼi e te tagata fai pesalemo, kia mata ʼo te ʼAtua ko taʼu e afe ʼe hage ko te ʼu hola e fā ʼaē neʼe nofo ʼalaʼala ai te tagata solia ʼi te pōʼuli moʼo leʼoleʼo te foʼi nofoʼaga. (Kau Fakamāu 7:19) Pea ʼe mahino ia, ko te temi ʼaē ʼe loaloaga kia tatou ʼe nounou ʼaupito ia ki te ʼAtua heʼegata, ko Sehova.

12. Neʼe ‘ ʼave’ feafeaʼi e te ʼAtua ia te tagata?

12 Ko te ʼAtua ʼe maʼuli heʼegata, kae ko te maʼuli ʼo te tagata ʼe nounou ʼaupito. ʼE ʼui fēnei e te tagata fai pesalemo: “Neʼe ke ʼave nātou; ʼe nātou liliu ko he moe, ʼi te uhu ʼe nātou hage pe ko te luna fuluʼi hega ʼaē ʼe fetogi. ʼI te uhu, ʼe homo ai te ʼu fisiʼi teu pea ʼe tonu ke fetogi; ʼi te pōʼuli ʼe fefe pea mo magemage.” (Pesalemo 90:5, 6) Neʼe sio ia Moisese ki te ʼu lauʼi afe kau Iselaele ʼaē neʼe mamate ʼi te toafa, neʼe ‘ ʼave nātou’ e te ʼAtua ohage ko he lōmaki. Neʼe fakaliliu fēnei te vaega ʼaia ʼo te pesalemo: “Neʼe ke tafi te tagata ʼi te mate.” (New International Version) ʼI te tahi faʼahi, ko te temi maʼuli ʼo te tagata agahala ʼe ko he temi “moe” ʼe mole fualoa—ʼe fakatatau ki te moe ʼa he tahi ʼi te pōʼuli.

13. He koʼe ʼe tou “hage pe ko te luna,” pea ʼe tonu ke malave feafeaʼi te faʼahi ʼaia ki tatatou fakakaukau?

13 ʼE tou ‘hage pe ko te luna ʼaē ʼe homo ai te ʼu fisiʼi teu ʼi te uhu’ kae magemage ʼi te pōʼuli ʼuhi ko te vela ʼaupito ʼo te laʼā. Ei, ko totatou maʼuli ʼe fakalaka ohage pe ko te luna ʼaē ʼe magemage ʼi he ʼaho pe e tahi. Koia, ʼaua naʼa tou meʼa noaʼi te koloā maʼuhiga ʼaia. Kae ʼe tonu ke tou kumi te takitaki ʼa te ʼAtua, ʼo ʼuhiga mo tatatou faʼahiga fakaʼaogaʼi ʼo totatou ʼu taʼu ʼaē kei toe ʼi te tuʼu ʼo te ʼu faʼahiga meʼa ʼaenī.

ʼE Tokoni Mai Sehova Ke Tou “Lau Totatou ʼu ʼAho”

14, 15. Neʼe hoko feafeaʼi ia Pesalemo 90:7-9 ki te kau Iselaele?

14 ʼE toe ʼui fēnei e te tagata fai pesalemo, ohage ʼe palalau ki te ʼAtua: “ ʼI tou ʼita neʼe mātou aʼu ki tomatou fakaʼosi, pea ʼi tou hāūhāū neʼe mātou hoha. Neʼe ke hili ʼi ʼou muʼa tamatou ʼu hala, pea ia muʼa ʼo tou fofoga gigila tamatou ʼu meʼa ʼaē ʼe fufū. Heʼe ʼi tou hāūhāū kua hifohifo tomatou ʼu ʼaho; neʼe mātou fakaʼosi tomatou ʼu taʼu ohage ko he fanafana.”—Pesalemo 90:7-9.

15 Ko te kau Iselaele heʼe agatonu ‘neʼe nātou aʼu ki tonatou fakaʼosi ʼi te ʼita ʼo te ʼAtua.’ Neʼe nātou ‘hoha ʼi tona hāūhāū,’ pe neʼe ‘matataku ʼi tona ʼita.’ (New International Version) Ko ʼihi neʼe “matehi nātou ʼi te toafa,” ʼuhi ko te ʼu fakamāu ʼa te ʼAtua. (1 Kolonito 10:5, MN ) Ko Sehova neʼe ina ‘hili ʼi ʼona muʼa tanatou ʼu hala.’ Neʼe nātou huʼi maʼua kia te ia ʼo ʼuhiga mo tanatou agakovi, kae māʼia mo tanatou “ ʼu meʼa ʼaē [neʼe] fufū,” peʼe ko te ʼu agahala ʼaē neʼe nātou fai fakafūfū, neʼe mole ū te ʼu meʼa ʼaia ‘ia muʼa ʼo tona fofoga gigila.’ (Tāʼaga Lea 15:3) Neʼe tupu te hāūhāū ʼo te ʼAtua ʼuhi ko te kau Iselaele ʼaē neʼe mole fakahemala, koia ‘neʼe fakaʼosi tonatou ʼu taʼu ohage pe ko he fanafana.’ Koia ko totatou maʼuli ʼaē ʼe nounou ʼe hage ko te matagi mokā tou fanafana.

16. Kapau ʼe fufū e ʼihi tanatou ʼu agahala, pea koteā ʼaē ʼe tonu ke nātou fai?

16 Kapau ʼe tou agahala fakafūfū, pea ʼe lagi ū anai tatatou ʼu agahala ʼaia ki te tagata lolotoga he temi. Kae ko tatatou agakovi ʼaē ʼe fai fakafūfū ʼe hā ‘ia muʼa ʼo te fofoga gigila ʼo Sehova,’ pea ko te ʼu meʼa ʼaē ka tou fai anai ʼe nātou maumauʼi anai tatatou ʼu felogoi mo ia. Ke tou toe felogoi lelei mo Sehova, ʼe tonu anai ke tou kole ke fakamolemole mai, ke tou līaki tatatou ʼu hala, pea ʼaki he loto fakafetaʼi, ke tou tali te tokoni fakalaumālie ʼa te kau tagata ʼāfea. (Tāʼaga Lea 28:13; Sakopo 5:14, 15) ʼE lelei age ke tou fai te ʼu meʼa ʼaia ʼi hatatou ‘fakaʼosi totatou ʼu taʼu ohage ko he fanafana,’ ʼo mole tou ʼiloʼi peʼe tou maʼu anai te maʼuli heʼegata!

17. ʼI te agamāhani, koteā te loaloaga ʼo te temi maʼuli ʼo te hahaʼi, pea ʼe fonu totatou ʼu taʼu ʼaki tea?

17 ʼO ʼuhiga mo te temi maʼuli ʼo te tagata agahala, ʼe ʼui fēnei e te tagata fai pesalemo: “Ko te ʼu ʼaho ʼo totatou ʼu taʼu ʼe ko taʼu pe e fitugofulu; pea ko taʼu e valugofulu, mo kapau ʼe makehe totatou mālohi, kae ʼe ko he ʼu taʼu ʼo te malaʼia pea mo te ʼu meʼa kovi; heʼe tonu ke fakalaka vave, pea ʼe tou feleleʼi ai.” (Pesalemo 90:10) ʼI te agamāhani, ko te temi maʼuli ʼo te hahaʼi ʼe ko taʼu e 70, pea ʼi tona taʼu 85, neʼe talanoa ia Kalepe ki tona mālohi makehe. Neʼe ʼi ai ʼihi neʼe maʼuʼuli fualoa atu ia, ohage ko Alone (123), mo Moisese (120), pea mo Sosue (110). (Faka au 33:39; Teutalonome 34:7; Sosue 14:6, 10, 11; 24:29) Kae ʼi te taʼiake heʼe agatonu ʼaē neʼe mavae mai Esipito, ko te hahaʼi mai te taʼu 20 ʼo laka atu neʼe mamate ʼi te ʼu taʼu e 40. (Faka au 14:29-34) Ia ʼaho nei, ʼe lahi te ʼu fenua, ko te loaloaga ʼo te temi maʼuli ʼo te tagata ʼe hage ko tona ʼui e te tagata fai pesalemo. ʼE fonu totatou ʼu taʼu ʼaki “te malaʼia pea mo te ʼu meʼa kovi.” ʼE nātou fakalaka vave, “pea ʼe tou feleleʼi ai.”—Sopo 14:1, 2.

18, 19. (a) Koteā te faka ʼuhiga ʼo te ʼui ʼaē ke tou ‘lau totatou ʼu ʼaho ke feala hatatou maʼu he loto fakapotopoto’? (b) Koteā ʼaē ka uga anai e te poto ke tou fai?

18 ʼE hiva fēnei te tagata fai pesalemo: “Ko ai ʼaē ʼe ina ʼiloʼi te mālohi ʼo tou ʼita pea mo tou hāūhāū ʼo mulimuli pe ki te manavasiʼi ʼaē kia te koe. Fakahā mai kia mātou peʼe feafeaʼi te lau ʼo tomatou ʼu ʼaho ke feala hamatou maʼu he loto fakapotopoto.” (Pesalemo 90:11, 12) ʼE mole he tahi ia tatou ʼe ina ʼiloʼi te mālohi ʼo te ʼita ʼo te ʼAtua peʼe ko te lahi ʼo tona hāūhāū, pea ʼe tonu ke ʼāsili lahi ai tatatou manavasiʼi kia Sehova. ʼI tona fakahagatonu, ʼe tonu ke ina uga tatou ke tou kole kia te ia “peʼe feafeaʼi te lau ʼo [totatou] ʼu ʼaho ke feala [hatatou] maʼu he loto fakapotopoto.”

19 Ko te ʼu palalau ʼaē ʼe fai e te tagata fai pesalemo ʼe ko he faikole kia Sehova ke ina akoʼi tana hahaʼi peʼe feafeaʼi te maʼu ʼo te poto, ʼo nātou lau pea mo fakaʼaogaʼi tonatou ʼu ʼaho ʼaē kei toe ʼi hona ʼaluʼaga ʼe leleiʼia e te ʼAtua. Ko te ʼu taʼu e 70 ʼaē ʼe maʼuli ai he tahi, ʼe ko ʼaho e 25 000. Peʼe tou taʼu fia, kae ‘ ʼe mole tou ʼiloʼi, peʼe feafeaʼi anai totatou maʼuli ʼapogipogi, heʼe ko tatou ʼe ko he hahau ʼe hā ʼi he temi siʼi pea puli noa.’ (Sakopo 4:13-15) Mai tona ʼaluʼaga ʼaē ko ‘te ʼu temi pea mo te ʼu meʼa fakafokifā ʼe hoko kia tatou fuli,’ koia ʼe mole feala ke tou ʼui pe ko temi ʼe fia ʼe tou maʼuʼuli ai anai. Koia tou faikole ke tou maʼu te poto moʼo tauʼi te ʼu ʼahiʼahi, ke tou agalelei mo te hahaʼi, pea ke tou fai ʼi te temi nei ia meʼa fuli ʼe tou lavaʼi ʼi te tauhi kia Sehova. (Tagata Tānaki 9:11; Sakopo 1:5-8) ʼE taki tatou e Sehova ʼaki tana Folafola, tona laumālie, pea mo tana kautahi. (Mateo 24:45-47; 1 Kolonito 2:10; 2 Timoteo 3:16, 17) Ko te maʼuliʼi ʼo te poto ʼe ina uga tatou ke tou ‘kumi muʼa te Puleʼaga ʼo te ʼAtua’ pea mo fakaʼaogaʼi totatou ʼu ʼaho ʼi hona ʼaluʼaga ʼe faka kolōliaʼi ai ia Sehova pea mo fakafiafia ai tona loto. (Mateo 6:25-33; Tāʼaga Lea 27:11) ʼE mahino ia ʼe mole pulihi anai totatou ʼu fihifihia fuli mo kapau ʼe tou tauhi kia te ia ʼaki totatou loto katoa, kae ʼe tou maʼu moʼoni anai he toe fiafia lahi.

Ko Te Tapuakina ʼa Sehova ʼe Ina Fakafiafia Tatou

20. (a) ʼE “fakahemala” feafeaʼi te ʼAtua? (b) Koteā ʼaē ʼe fai e Sehova mokā tou agahala mamafa kae tou fakahemala moʼoni?

20 ʼI meʼa matalelei leva mo kapau ʼe feala ke tou fakafiafia ʼi totatou temi maʼuli ʼaē kei toe? ʼO ʼuhiga mo te faʼahi ʼaia, ʼe kole fēnei e Moisese: “Toe liliu mai, Ê Sehova! ʼO aʼu ki ʼafea? Pea ke fakahemala ʼo ʼuhiga mo tau ʼu kaugana. Faka mākona mātou, ʼi te uhu, ʼaki tou loto ʼofa [peʼe ko tou “ ʼofa agatonu”], ke mātou kalaga fakafiafia pea mo fiafia ʼi tomatou ʼu ʼaho fuli.” (Pesalemo 90:13, 14; kiʼi nota ʼi te lalo pasina) ʼE mole faihala te ʼAtua. Kae ʼe feala ke “fakahemala” pea ke ‘toe liliu mai’ ʼi tona ʼita pea mo tana fakamāu mo kapau, ʼi tana ʼosi tala te ʼu fakatokaga ʼaia ʼe hoko ai he fetogi ʼo te manatu pea mo te aga ʼa te kau agahala ʼaē ʼe loto fakahemala. (Teutalonome 13:17) Koia, tatau aipe pe neʼe tou agahala mamafa, kae tou fakahā tatatou fakahemala moʼoni, pea ko Sehova ʼe ina ‘faka mākona anai tatou ʼaki tona loto ʼofa,’ pea ʼe feala anai ke tou “kalaga fakafiafia.” (Pesalemo 32:1-5) Pea ʼi tatatou mulimuli ki te aga ʼaē ʼe faitotonu, ʼe tou logoʼi anai te ʼofa agatonu ʼo te ʼAtua kia tatou pea ʼe feala anai ke tou ‘fakafiafia ʼi totatou ʼu ʼaho’—ei, ki te ʼu taʼu ʼaē kei toe.

21. ʼI te ʼu palalau ʼaē neʼe tohi ia Pesalemo 90:15, 16, koteā ʼaē neʼe lagi kole e Moisese?

21 ʼE faikole fakamalotoloto fēnei te tagata fai pesalemo: “Fakafiafiaʼi mātou ʼo fakatatau mo te ʼu ʼaho ʼaē neʼe ke fakamamahiʼi ai mātou, te ʼu taʼu ʼaē neʼe mātou sio ai ki te ʼu malaʼia. Ke hā tau gāue ki tau ʼu kaugana, pea mo tou kolōlia ki tonatou ʼu foha.” (Pesalemo 90:15, 16) Neʼe lagi kole e Moisese ki te ʼAtua ke ina tapuakina Iselaele ʼaki te fiafia, lolotoga he temi ʼe tatau mo te ʼu ʼaho ʼaē neʼe nātou lotomamahi ai peʼe ko te ʼu taʼu ʼaē neʼe nātou tau ai mo te ʼu malaʼia. Neʼe ina kole ke hā te “gāue” ʼa te ʼAtua ʼaē ko te tapuakina ʼo te kau Iselaele, ke sio kiai Tana ʼu kaugana pea ke hā Tona kolōlia ki tona ʼu foha, peʼe ko tona hōloga. ʼE feala ke tou faikole ke foaki te ʼu tapuakina ki te hahaʼi fakalogo ʼi te mālama foʼou ʼaē neʼe fakapapauʼi mai e te ʼAtua.—1 Petelo 3:13.

22. ʼO mulimuli kia Pesalemo 90:17, koteā ʼaē ʼe feala ke tou kole ʼi te faikole?

22 ʼE fakaʼosi te Pesalemo 90 ʼaki te kole ʼaenī: “Ke ia tatou te matamatalelei ʼo Sehova, totatou ʼAtua, pea ke ke fakatuʼu mālohi kia mātou te gāue ʼo tomatou ʼu nima. Ei, ke ke fakatuʼu mālohi te gāue ʼo tomatou ʼu nima.” (Pesalemo 90:17) ʼE fakahā e te ʼu palalau ʼaia ʼe feala pe ke tou faikole ki te ʼAtua ke ina tapuakina tatatou ʼu faiga ʼaē moʼo tauhi kia te ia. Peʼe ko tatou ko he kau Kilisitiano fakanofo peʼe ko honatou ʼu kaugā gāue, te “tahi ʼu ōvi,” kae ʼe tou fiafia heʼe nofo mo tatou ia “te matamatalelei ʼo Sehova.” (Soane 10:16, MN ) ʼE tou fiafia koteʼuhi ko te ʼAtua neʼe ina ‘fakatuʼu mālohi te gāue ʼo totatou ʼu nima,’ ʼi totatou ʼuhiga kau fai faka mafola ʼo te Puleʼaga peʼe ʼi he tahi age ʼu faʼahi!

Tou Haga Lau Totatou ʼu ʼAho

23, 24. ʼE ʼaoga feafeaʼi kia tatou te metitasio ki te Pesalemo 90?

23 Ko tatatou metitasio ki te Pesalemo 90, ʼe ina fakatuputupu ai tatatou fia fakalogo kia Sehova, totatou “nofoʼaga moʼoni.” Kapau ʼe tou fakakaukauʼi te ʼu palalau ʼo te Pesalemo ʼaia, ʼo ʼuhiga mo te nounou ʼo te maʼuli, pea ʼe tonu ke mahino lelei kia tatou ʼe ʼaoga ke takitaki tatou e te ʼAtua moʼo lau totatou ʼu ʼaho. Pea kapau ʼe tou kātaki ʼo kumi pea mo maʼuliʼi te poto fakaʼatua, pea ʼe tou ʼiloʼi papau ai ʼe tou maʼu anai te lotoʼofa pea mo te tapuakina ʼa Sehova.

24 ʼE hoko atu anai e Sehova tana fakahā mai kia tatou peʼe feafeaʼi te lau ʼo totatou ʼu ʼaho. Pea kapau ʼe tou fakalogo ki tana akonaki, pea ʼe feala anai ke tou haga lau totatou ʼu ʼaho ʼo talu ai. (Soane 17:3) Kapau ʼe tou fia maʼu moʼoni te maʼuli heʼegata, pea ʼe tonu ke liliu ia Sehova ko totatou holaʼaga. (Suta 20, 21) Ohage ko te meʼa ka tou vakaʼi anai ʼi te alatike ka hoa mai, ʼe fakahā lelei anai te faʼahi ʼaia ʼi te ʼu palalau fakaloto mālohi ʼo te Pesalemo 91.

Koteā Takotou Tali?

• ʼE liliu feafeaʼi ia Sehova ko totatou “nofoʼaga moʼoni”?

• He koʼe ʼe feala ke tou ʼui ko Sehova ʼe lava tokoni tuʼumaʼu kia tatou?

• ʼE tokoni feafeaʼi mai ia Sehova ke tou ‘lau totatou ʼu ʼaho’?

• Koteā ʼaē ka ina faka fealagia ke tou ‘fiafia lolotoga totatou ʼu ʼaho fuli’?

[Paki ʼo te pasina 10]

Ko Sehova neʼe kua ʼAtua “ ʼi muʼa ʼo te tupu ʼo te ʼu moʼuga”

[Paki ʼo te pasina 12]

Kia Sehova, ko te ʼu taʼu e 969 ʼaē neʼe maʼuli ai ia Metusela neʼe mole ko he ʼaho katoa

[Paki ʼo te pasina 14]

Ko Sehova neʼe ina ‘fakatuʼu mālohi te gāue ʼo totatou ʼu nima’

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae