Te ʼu Fakamanatu ʼo ʼUhiga Mo Te ʼu Temi Mālōlō
1 Koteā koa te meʼa neʼe tou fakatuʼutuʼu ke tou fai ʼi totatou temi mālōlō? Ka hili te ʼu temi mālōlō, ʼe feala anai koa ke tou foaki he pepa tānaki gāue ʼe hā ai neʼe tou fakaʼaogaʼi lelei te ʼu temi mālōlō ʼaia pea mo fua lelei? ʼE feala anai mo kapau ʼe tou mulimuli ki te tokoni ʼaē ke tou totogi maʼa tatou te temi faigamālie. (Ef. 5:15, 16) Ko te meʼa ʼe tonu ke tou fakatuʼutuʼu ʼi totatou ʼu temi mālōlō, ke tou ʼolo ʼo kau ki te Fakatahi Makehe ʼaē ʼe ʼaho tahi ka fai anai ʼi Sanualio. Ko te tahi gāue ʼe feala ke tou kau kiai ko te laga ʼo te Filiale foʼou. Kae ʼe feafeaʼi anai te fai faka mafola?
2 ʼI te māhina ʼo Sanualio, ʼe tou tufa anai te kaupepa lahi Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei. Kapau ʼi te ʼu temi mālōlō ʼe tou nonofo ʼi te kokelekasio, ʼe tou faiga anai ke tou lagolago tuʼumaʼu ki te ʼu fakatuʼutuʼu ʼaē ka fai ʼo ʼuhiga mo te gāue fai faka mafola. ʼE feala anai hatatou kau ki te fai faka mafola ʼi te afiafi, koteʼuhi ko te ʼu temi mālōlō ʼaia ʼe loaloaga ai te ʼu ʼaho. Ka tou felāveʼi mo he ʼu faigamālie moʼo fakahoko ʼo te fagonogono faigamālie, ʼe feala ke tou fakahā he tohi kia ia ʼaē ʼe felāveʼi mo tatou. Tatau aipe peʼe tou folau ki he tahi fenua peʼe tou ʼolo ʼo mālōlō ʼi he tahi potu fenua, ʼe tonu ke tou ʼiloʼi peʼe tuʼu ʼifea te Fale ʼo te Puleʼaga, ke tou ʼolo ki te ʼu fono pea ke tou kau ki te gāue fai faka mafola mo te ʼu tēhina pea mo te ʼu tuagaʼane ʼi te koga meʼa ʼaia. Ko te faʼahi ʼaia ʼe ko he meʼa lelei moʼo fakaloto mālohiʼi ʼo tatou pea mo te ʼu tēhina ʼaē ʼe fakatahi mo tatou.—Loma 1:12.
3 Kapau ʼe tou folau ʼi te fakaʼosi ʼo te māhina ki he koga meʼa ʼe mamaʼo mo totatou kokelekasio, ʼe tonu ke tou fakamomoli tautonu tatatou pepa tānaki gāue ki te sikalaipe, ke feala hana tohi ʼi te pepa tānaki gāue ʼaē ka ina fakamomoli ʼi te ʼaho ono ʼo te māhina ʼaē ʼe hoa mai. Kapau ʼe tou tohi te tuʼasila ʼo totatou kokelekasio pea mo teuteuʼi fakatomuʼa he sila, ʼe feala anai ke tou fakamomoli tautonu tatatou pepa tānaki gāue.
4 ʼI te agamāhani ʼe tokosiʼi te ʼu ako ʼe fai ʼi te ʼu temi mālōlō, koteʼuhi ko ʼihi kau ako Tohi-Tapu ʼe nātou ʼolo ʼo mālōlō. Tahi ʼaē meʼa, ko ia ʼaē ʼe ina fai te ako ʼe lagi ʼalu anai ʼo mālōlō ʼi he tahi temi. ʼO mole ina tuku feiā anai te ako, kae ʼe feala koa hana fakatuʼutuʼu mo he tahi ʼi te kokelekasio, ke ina fai te ako ʼaia lolotoga tana ʼalu ʼo mālōlō? ʼE lelei ke fai tuʼumaʼu te ako, ke feala ai kia ia ʼaē ʼe ako ke ina ʼiloʼi te maʼuhiga ʼaē ʼo te kai tuʼumaʼu ʼo te meʼa kai fakalaumālie. ʼOfa pe ʼi totatou ʼuhiga kaugana ʼa Sehova, ke tou fakaʼaogaʼi fakalelei te ʼu temi mālōlō ʼaenī.