Tou Tufa Te ʼu Kaupepa Lalahi Moʼo Fakahā Te Folafola ʼa Te ʼAtua
1 ʼI tatatou sio ki te fakahoko ʼo te ʼu lea faka polofeta, ʼe tou fiafia he kua tou maʼu “te ʼatamai mālama totonu ʼo ʼuhiga mo te moʼoni,” te “ ʼamanaki ʼo te maʼuli heʼegata,” pea mo ‘te fai faka mafola ʼaē neʼe tuku mai ke tou fai.’ ʼAki te gāue ʼaia, ʼe fai e te ʼAtua moʼo “fakahā tana folafola.” (Tito 1:1-3) Ko te tufa ʼo tatatou ʼu kaupepa lalahi ʼi te minisitelio lolotoga te māhina ʼo Tesepeli, ʼe ko he faʼahi ʼe feala ke tou vaevae ai mo te hahaʼi tatatou ʼamanaki ʼo ʼuhiga mo te Puleʼaga, ʼo mulimuli ki te fakatotonu ʼaē neʼe fai e Sesu.—Mat. 24:14.
2 ʼE ʼaoga koa ke tou tufa ʼi te minisitelio te kaupepa Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei? ʼI tana ʼosi lau te kaupepa ʼaia, neʼe faitohi te tagata, ʼo ina ʼui fēnei: “ ʼE mole heʼeki ʼau sio ki he kautahi feiā. . . . ʼE ko he meʼa lelei hakita sio ki he ʼu hahaʼi ʼe nātou fai fakamalotoloto te finegalo ʼo te ʼAtua ʼi te temi ʼaenī ʼaē ʼe lahi ai te malualoi faka lotu.”
3 ʼE feala ke koutou ʼui fēnei:
◼ “ ʼE punamaʼuli te hahaʼi ʼi te kua lahi ʼo te ʼu lotu ʼi te malamanei. ʼE mole lelei age koa la ke tauhi te malamanei ki he lotu pe e tahi? [Koutou tuku ke ina fai atu hana tali.] ʼE mahino ia neʼe ko te fakatuʼutuʼu ʼaia ʼa te ʼAtua ʼi te kamataʼaga, he neʼe atolasio ia Atama mo Eva ki te ʼAtua e tahi, pea neʼe ko te faʼahiga tauhi e tahi ʼaē neʼe fai kia te ia? [Fakahā age te ʼuluaki paki ʼi te pasina 4 ʼo te kaupepa pea mo koutou fakamatalatala te paki ʼaia.] ʼI tau manatu ʼe kei loto koa te ʼAtua ki tana fakatuʼutuʼu ʼaē ke ʼi ai he lotu e tahi maʼa te malamanei katoa.” ʼE feala hakotou lau ia Isaia 2:2, 3 ʼaē ʼe tuʼu ʼi te pasina 3 pea mo tuku ki ai te kaupepa. Fakahā age ʼe koutou toe fia liliu mai anai ʼo fakahā age ki ai peʼe hoko feafeaʼi anai te ʼu meʼa ʼaia.
4 Peʼe ʼi te hili ʼo takotou fakamālo age, ʼe feala ke koutou ʼui fēnei:
◼ “Tokolahi te hahaʼi ʼe ʼi ai tanatou ʼu fehuʼi ʼo ʼuhiga mo te kau Fakamoʼoni ʼa Sehova, ka ʼe mole heʼeki nātou maʼu he ʼu tali kiai. Ohage la: ‘He koʼe ʼe nātou ʼōmai tuʼumaʼu ʼo fisifisi ʼi te ʼu matapā? Koteā te ʼu meʼa ʼaē ʼe nātou tui kiai? E feafeaʼi te fakaʼaluʼalu ʼo tanatou kautahi? ʼE haʼu maifea tanatou paʼaga?’ ʼE koutou maʼu anai te ʼu tali ʼo te ʼu fehuʼi ʼaia ʼi te kaupepa ʼaenī Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei. Ko te totogi fakaʼofa ʼo te kaupepa ko te 50.”
5 ʼAki te kaupepa “Puleaga,” ʼe feala ke koutou lau age ia Soane 17:3 pea koutou ʼui age:
◼ “Ko te ʼiloʼi ʼo te ʼAtua pea mo Sesu ko tona faka ʼuhiga ko te maʼu ʼo te maʼuli heʼegata. Neʼe kua koutou manatu koa ʼi he temi ki te maʼuli heʼegata ʼi te kele?” Koutou tuku ke ina fai atu hana tali. ʼOsi ʼaia pea koutou fuli age te pasina 3 ʼo te kaupepa pea koutou lau he koga ʼo te faikole ʼo totatou Tāmai ʼe ʼi selo, ʼo fakamahino lelei age ʼe hoko anai te finegalo ʼo te ʼAtua ki te kele. Pea, koutou lau te fakaʼosi ʼo te palakalafe 1 ʼaē ʼe fakahā ai, ko te Puleʼaga ʼe ko te puleʼaki pe ʼaia e tahi ʼaē ka fakaʼaogaʼi anai e te ʼAtua moʼo fakatokatoka ʼo te ʼu fihifihia ʼaē ʼe tupu ai te faigataʼa ʼaupito ʼo te maʼuli ia ʼaho nei. Ka ʼosi takotou fai te faʼahi ʼaia, pea koutou tuku age ki ai te kaupepa. Peʼe lagi koutou fia fuli age te ʼu pasina 28 pea mo 29, ʼo koutou fakahā age te ʼu tapuakina ʼaē ka foaki anai e te Puleʼaga ʼo te ʼAtua ki te malamanei, pea mo koutou tuku age te kaupepa ki te 50.
6 ʼAki te kaupepa “Fiafia Kite Mauli Heegata Ite Kele,” ʼi te ʼosi ʼo takotou fakamālo, ʼe feala ke koutou ʼui fēnei age:
◼ “ ʼI tau manatu ʼe ʼi ai anai koa he ʼaho, ʼe mahu anai te meʼa kai maʼa te hahaʼi fuli? ʼE feala anai koa ʼi he temi ki te ʼu famili fuli ʼo te kele, ke nātou maʼu honatou ʼu ʼapi, pea mo nātou maʼuʼuli ʼi te tokalelei pea mo te fīmālie?” ʼI tana ʼosi tali atu, koutou fuli age te paki ʼi te pasina 47 ʼo te kaupepa. Fakamahino age te ʼu ʼaluʼaga fakaofoofo ʼaē ʼe tuʼu ʼi te paki, pea mo fakahā age peʼe hoko feafeaʼi anai te ʼu meʼa ʼaia ʼi te kele. Kapau ʼe koutou maʼu te fealagia ʼaia, ʼe feala ke koutou fakaafe ia ia ke ina vakaʼi te ʼu vaega faka Tohi-Tapu ʼi te paki 47. ʼE feala hakotou ʼui age ki ai ko te kaupepa ʼaia ʼe ina fakahā pe koteā te meʼa ʼaē ʼe tonu ke tou fai ke tou maʼuli ʼo heʼegata ʼi te kele. Tou tuku age te kaupepa ki te 50.
7 ʼE tou maʼu te pilivilesio ʼaē ko te kau ki te kautahi ʼo te ʼAtua ʼi te kele, pea ʼe uga tatou ke tou palalau ʼo ʼuhiga mo te kautahi ʼaia kia nātou ʼaē ʼe fia fagono. (Pesalemo 48:12-14) Pea tahi ʼaē meʼa, ko te logo lelei ‘ ʼaē neʼe tuku mai ke tou fakahā’ ʼe ko te ʼu folafola ʼa te ʼAtua, pea ʼe feala ke nātou foaki mai kia tatou te maʼuli heʼegata. ʼOfa pe ke tou fakaʼaogaʼi te ʼu fealagia fuli moʼo tufa ʼo te ʼu kaupepa ʼi Tesepeli!