Ko Te Hahaʼi Fuli ʼe Tonu Ke Nātou ‘Tali Te Folafola ʼAki Tonatou Loto Katoa’!
1 Ko te toko lauʼi miliona hahaʼi ʼe nātou ako te Tohi-Tapu mo te kau Fakamoʼoni ʼa Sehova. Ke feala hanatou maʼu te maʼuli heʼegata, ʼe tonu ke nātou ‘tali te folafola ʼaki tonatou loto katoa,’ ohage ko te meʼa ʼaē neʼe fai e te toko 3 000 ʼaē neʼe fakahemala pea mo papitema ʼi te Penikosite ʼo te taʼu 33 ʼo totatou temi. (Gāue 2:41) Koteā koa te maʼua ʼaē ʼe tuku mai kia tatou ia ʼaho nei?
2 ʼE tonu ke tou tokoni kia nātou ʼaē ʼe ako ke tuputupu tanatou fia tauhi kia Sehova. (1 Tim. 4:7-10) Moʼo fai te faʼahi ʼaia, ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ʼe ina tuku mai te tokoni ʼaenī ʼi te palakalafe 20: “ ʼAki te ako ʼaia, koutou kumi he ʼu fealagia ke koutou fakatupu ia ia he ʼofa ki te ʼu kalitate ʼo Sehova. Koutou fakahā takotou ʼofa lahi ʼaē ki te ʼAtua. Koutou tokoni kia ia ʼaē ʼe ako ke fakatuputupu tana ʼu felogoi ʼaē mo Sehova.”
3 Ko Te Meʼa Faigataʼa ʼAē ʼe Tonu Ke Tou Fai: ʼI te fakahēʼi ʼo nātou e te lotu hala, ko te tokolahi ʼo te hahaʼi ʼe nātou fakafeauga pe ki he faʼahiga tauhi ʼe mole lahi te temi ʼaē ʼe nātou fakaʼaogaʼi kiai, pea ʼe mole fakamaʼua age ke nātou fai he ʼu fetogi maʼuhiga ʼi tonatou maʼuli. (2 Tim. 3:5) Ko te meʼa faigataʼa ʼaē ʼe tonu ke tou fai, ko te tokoni kia nātou ʼaē ʼe ako te Tohi-Tapu ke nātou mahino, ko te tauhi moʼoni ʼe mole gata ʼaki pe tanatou logo ki te folafola ʼa te ʼAtua. ʼE toe maʼua foki ke nātou maʼuliʼi te ʼu meʼa ʼaē ʼe nātou ako. (Sake 1:22-25) Kapau ʼe mole leleiʼia e te ʼAtua te aga ʼaē ʼe nātou fai, pea ʼe tonu ke mahino kia nātou, ʼe maʼua ke nātou “mafuli mai ai” pea mo fai te meʼa ʼaē ʼe lelei moʼo fakafiafia ia te ia. (Gāue 3:19) Ke feala hanatou maʼu te maʼuli heʼegata, ʼe tonu ke nātou “faiga mālohi” pea mo lagolago ki te moʼoni.—Luka 13:24, 25.
4 Ka koutou vakavakaʼi te ʼu faʼahiga aga ʼaē ʼe tonu ke fai, koutou kole age kia ia ʼaē ʼe ina ako te Tohi-Tapu ke ina fakahā atu pe koteā tana manatu ʼo ʼuhiga mo te faʼahi ʼaia, pea koteā ʼaē ʼe tonu ke ina fai mo kapau ʼe mahino kia ia, ʼe tonu ke fetogi tona maʼuli. Koutou fakatokagaʼi kia ia te kautahi ʼaē ʼe ina ako ai te moʼoni, pea koutou fakaloto mālohi ia ia ke kau tuʼumaʼu ʼi te ʼu fono.—Hep. 10:25.
5 Tou fakatuʼutuʼu ke malave ki tona loto tatatou fai ako. ʼE tou fiafia anai ʼi tatatou uga te ʼu hahaʼi foʼou ʼaia ke nātou tali te folafola ʼa te ʼAtua ʼaki tonatou loto katoa pea ke nātou papitema!—1 Tes. 2:13.