Tou Fefakaloto Mālohiʼaki ʼo Tou Fai He ʼu Tali ʼi Te ʼu Fono
1 ʼE tokoni mai ia Hepeleo 10:24 ke tou ‘uga ia tatou ki te ʼofa pea mo te ʼu gāue matalelei.’ Ko te ʼu gāue ʼaia, ʼe kau kiai te fakaloto mālohiʼi ʼo te ʼu tēhina mo tuagaʼane ʼaki tatatou tali lelei ʼi te ʼu fono ʼo te kokelekasio. He koʼe koa ʼe tonu ke tou fai he ʼu tali? ʼE lava feafeaʼi hatatou fai te faʼahi ʼaia? ʼE fua lelei kia ai te ʼu tali ʼaia?
2 Koutou fakakaukauʼi te ʼu lelei fuli ʼaē ʼe koutou maʼu ʼi te temi fuli ʼaē ʼe fai ai e te ʼu tēhina mo tuagaʼane hanatou tali ʼe mahino lelei pea mo faigafua moʼo fakaloto mālohiʼi ʼo koutou ʼi te faʼahi fakalaumālie. ʼE koutou maʼu mo koutou te pilivilesio ʼaia. Ka koutou fai he ʼu tali, pea ʼe koutou fakahā takotou loto ʼaē ke koutou ‘foaki he meʼa ʼofa fakalaumālie,’ moʼo fakaloto mālohiʼi ia nātou fuli ʼaē ʼe kau ki te fono.—Loma 1:11, 12.
3 E Feafeaʼi Te Fai ʼo He ʼu Tali Lelei: ʼAua naʼa koutou fai he ʼu tali ʼe loaloa fau, ʼo talanoa ki te ʼu puani fuli ʼo te palakalafe. Ko te ʼu tali ʼaē ʼe loaloa, ʼi te agamāhani ʼe puli ai te manatu tāfito ʼaē ʼe tonu ke fakahā, pea ʼe lagi lotovaivai anai ʼihi ʼaē neʼe fia tali. Ko te ʼuluaki tali ʼo te palakalafe ʼe tonu ke nounou, pea ke tali fakahagatonu ki te fehuʼi ʼo te alatike. Ko nātou ʼaē ʼe nātou fai he tahi ʼu tali, ʼe feala ke nātou fakahā peʼe feafeaʼi te maʼuliʼi ʼo te ʼu tokoni ʼaia peʼe nātou fakamahino pe koteā te pikipikiga ʼo te ʼu vaega faka Tohi-Tapu pea mo te manatu ʼaia. Koutou vakaʼi te Manuel pour l’École, ʼi te pasina 90 ki te 92.
4 Kapau ʼe koutou matataku ʼi te fai ʼo he tali, koutou teuteuʼi fakatomuʼa hakotou tali ʼe nounou, pea koutou kole age ki te tēhina ʼaē ʼe ina fai te ako ke ina hinoʼi koutou mokā fai anai te fehuʼi ʼo te palakalafe. ʼI takotou ʼosi fai te faʼahi ʼaia lolotoga he kiʼi temi, pea fakahaʼuhaʼu anai ʼo faigafua takotou fai he ʼu tali. Koutou manatuʼi, neʼe tuʼania ia Moisese pea mo Selemia, naʼa mole feala hanā palalau ki te hahaʼi. (Ek. 4:10; Sel. 1:6, kiʼi nota ʼi te lalo pasina.) Kae neʼe tokoni ia Sehova kia nāua ke nā palalau maʼa ia, pea ʼo toe feiā pe, ʼe tokoni anai kia koutou.
5 ʼE Fua Lelei Kia Ai Takotou ʼu Tali? ʼE koutou maʼu e koutou totonu he ʼu fua lelei ʼi takotou fai he ʼu tali, heʼe fakahū ʼo loloto te moʼoni ki tokotou ʼatamai pea mo tokotou loto, ʼo faigafua ai takotou manatuʼi te ʼu puani ʼaia ki muli age. Tahi ʼaē meʼa, ʼe ʼaoga ki ʼihi te ʼu palalau ʼaē ʼe koutou fai. ʼE ko he fakaloto mālohi kia tatou mokā tou faiga fuli ke tou fakahā tatatou tui ʼi te ʼu fono ʼo te kokelekasio, tatau aipe peʼe kua lahi te ʼu meʼa ʼaē ʼe tou ʼiloʼi, peʼe tou tūpulaga, peʼe tou umiuminoa, peʼe tou foʼofoʼou ʼi te moʼoni.
6 ʼE tou ʼiloʼi papau, ‘ko te fai ʼo he ʼu palalau ʼi tona temi totonu ʼe ko he meʼa lelei’ anai, mo kapau ʼe tou fakaʼaogaʼi te ʼu palalau ʼaia moʼo fefakaloto mālohiʼaki ʼo tatou ʼi te ʼu fono!—Taag. 15:23.