Ko Te ʼu Fono Gāue ʼo Novepeli
Vāhaʼa ʼo te ʼaho 2 ʼo Novepeli
Katiko 38
10 min: Te ʼu logo ki te kokelekasio. Te ʼu Tonu. Koutou talanoa ki te tānaki gāue ʼo te fenua pea mo te kokelekasio ʼi te māhina ʼo ʼAukusito. Fakahā te ʼu fakatuʼutuʼu makehe ʼaē ka fai anai ʼo ʼuhiga mo te fai faka mafola ʼi te ʼaho 11 ʼo Novepeli.
15 min: “Ko Te Hahaʼi Fuli ʼe Tonu Ke Nātou ‘Tali Te Folafola ʼAki Tonatou Loto Katoa’!” ʼO fai ʼaki he ʼu fehuʼi pea mo he ʼu tali. Koutou fai mo he ʼu tokoni ʼe toʼo mai te pepa ʼaē ʼe ʼalutahi mo Te Minisitelio ʼo Te Puleʼaga ʼo Sūnio 1996, ʼi te palakalafe 21.
20 min: “ ʼE ʼau fia kamata he ako Tohi-Tapu!” Ko he fai palalau mo nātou ʼaē ʼe ʼi te fono, ʼe takitaki e te tagata taupau ki te gāue. Koutou fakahā peʼe fakatuʼutuʼu feafeaʼi anai te gāue ʼi takotou kokelekasio moʼo fai te ʼu ʼaʼahi. Kapau ʼe feala, pea ʼe lelei ke gāue te kau fai faka mafola faiva pea mo nātou ʼaē ʼe foʼofoʼou. ʼE mole tonu anai ke hahaʼi fau te kau fai faka mafola ʼi te motokā pe e tahi, ke lahi age te ʼu ʼaʼahi ʼaē ʼe feala ke fai e he toko lua. Koutou fakamanatu te ʼu tokoni ʼaē ʼe tuku mai ʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo ʼApelili 1998, ʼi te pasina 12 ki te 15. Kole age ki he fai faka mafola faiva ke ina fakahā peʼe feafeaʼi te kamata ʼo he ako Tohi-Tapu mokā fai te ʼaʼahi. Fakaloto mālohiʼi nātou fuli ʼaē ʼe ʼi te fono, ke nātou faiga mālohi ke nātou kamata he ako Tohi-Tapu foʼou.
Katiko 35 pea mo te faikole fakaʼosi.
Vāhaʼa ʼo te ʼaho 9 ʼo Novepeli
Katiko 146
13 min: Te ʼu logo ki te kokelekasio. Lau ʼo te falā. Vakaʼi te talanoa Te Tali Ki ʼAkotou ʼu Fehuʼi.
15 min: Te ʼu logo ʼaē ʼe ʼaoga ki te kokelekasio.
17 min: “Tou Fefakaloto Mālohiʼaki ʼo Tou Fai He ʼu Tali ʼi Te ʼu Fono.” ʼO fai ʼaki he ʼu fehuʼi pea mo he ʼu tali. Fakamahino peʼe tokoni feafeaʼi te ʼu tali ki tatatou tuputupu ʼi te faʼahi fakalaumālie. (Vakaʼi te Manuel pour l’École, ʼi te ako 38, te palakalafe 4.) Fakaafe ʼihi ʼi te fono ke nātou fakamatala pe neʼe feafeaʼi tanatou lava tauʼi tanatou mataku ʼaē ke nātou fai he ʼu tali, pea koteā te ʼu tapuakina ʼaē neʼe nātou maʼu ʼi tanatou fai he ʼu tali ʼi te ʼu fono.
Katiko 51 pea mo te faikole fakaʼosi.
Vāhaʼa ʼo te ʼaho 16 ʼo Novepeli
Katiko 158
8 min: Te ʼu logo ki te kokelekasio.
20 min: “Te ʼu Tagata Taupau ʼe Ko He ʼu Faʼifaʼitaki—Te Tagata Taupau Ki Te Ako Faka Minisitelio Faka Teokalatike.” Ko te akonaki ʼe fai e te tēhina taupau ki te ako. Fakamanatu te ʼu puani ʼo te Manuel pour l’École, ʼi te pasina 10 mo te 11, ʼi te palakalafe 6 ki te 12.
17 min: “Koutou Faiva ʼi Tokotou Minisitelio.” Vakaʼi te ʼu palakalafe 1 ki te 7 ʼo te pepa ʼaē ʼe ʼalutahi mo Te Minisitelio, ʼo fai ʼaki he ʼu fehuʼi pea mo he ʼu tali. Faka maʼuhigaʼi te ʼu puani ʼaē ʼe feala ke ʼaoga tāfito ki te telituale ʼo te kokelekasio.
Katiko 212 pea mo te faikole fakaʼosi.
Vāhaʼa ʼo te ʼaho 23 ʼo Novepeli
Katiko 86
8 min: Te ʼu logo ki te kokelekasio. Fakamatala te ʼu hisitolia neʼe hā ʼi te pasina fakaʼosi ʼo te Réveillez-vous! ʼo te ʼaho 8 ʼo ʼAukusito 1998, ʼo ʼuhiga mo te lave mālohi ʼo te tohi Te Tagata ʼaē ʼe lahi tokotahi ki te hahaʼi. Ko te kau fai faka mafola fuli, ʼe tonu ke nātou teuteuʼi ke nātou fakahā te tohi ʼaia mo kapau ʼe ʼaoga.
17 min: “Koutou Faiva ʼi Tokotou Minisitelio.” Vakaʼi te ʼu palakalafe 8 ki te 21 ʼo te pepa ʼaē ʼe ʼalutahi mo Te Minisitelio, ʼo fai ʼaki he ʼu fehuʼi pea mo he ʼu tali. Talanoa tāfito ki te ʼu puani ʼaē ʼe feala ke ʼaoga ki te telituale ʼo te kokelekasio.
20 min: Ko He ʼu Tokoni Ke Lelei Takotou Lau Te Tohi-Tapu. Ko te akonaki ʼe fakatafito ki Te Tule Leʼo ʼo te ʼaho 1 ʼo Maio 1995, ʼi te pasina 16 ki te 17. Faka maʼuhigaʼi te ʼu fua lelei ʼaē ʼe kita maʼu ʼi te faʼahi fakalaumālie mokā kita lau te Tohi-Tapu ʼi te ʼaho fuli. Fakamanatuʼi te ʼu puani ʼaē ʼe tuku mai e te alatike, pea fakahā peʼe feafeaʼi tonatou fakaʼaogaʼi. Kole age ki he ʼu fai faka mafola e toko lua peʼe toko tolu ke nātou fakamatala pe koteā te ʼu fua lelei ʼaē ʼe nātou maʼu ʼi tanatou lau te Folafola ʼa te ʼAtua ʼi te ʼaho fuli.
Katiko 46 pea mo te faikole fakaʼosi.
Vāhaʼa ʼo te ʼaho 30 ʼo Novepeli
Katiko 98
15 min: Te ʼu logo ki te kokelekasio. Fakamanatuʼi ki te kau fai faka mafola fuli ke nātou foaki tanatou ʼu pepa tānaki. Fakaloto mālohiʼi ia nātou fuli ʼaē neʼe mole nātou lava kamata he ako Tohi-Tapu ʼi Novepeli, ke nātou hoko atu tanatou faiga ʼi te māhina ʼo Tesepeli, heʼe tufa ai anai te tohi Te ʼAtamai Mālama pea mo te Tohi-Tapu Traduction du monde nouveau. Kole age ki he kaugā fai faka mafola faiva ke ina fakahā peʼe feafeaʼi te fai ʼo te ʼaʼahi, ʼo ina fakaʼaogaʼi te kiʼi talanoa ʼi te pasina 19 ʼo te tohi Te ʼAtamai Mālama; pea fakamahino leva e te kaugā fagona peʼe feafeaʼi takita fakaʼaogaʼi te tohi ke kita mālama ki te ʼu akonaki tāfito ʼo te Tohi-Tapu, pea ʼe ina kamata he ako Tohi-Tapu.
15 min: Tou Fakaʼaogaʼi Fakalelei Te Kaletalio ʼa Te Kau Fakamoʼoni ʼa Sehova ʼo Te Taʼu 1999. Ko te akonaki ʼe fakamanatuʼi ai te ʼu faʼahi lelei ʼo te kaletalio: (1) ko te ʼu paki matalelei ʼaē ʼe hā ai te ʼu meʼa maʼuhiga ʼaē ʼe fakamatala ʼi te Tohi-Tapu pea mo tana ʼu akonaki, (2) ko te polokalama lautohi ʼo te Tohi-Tapu ʼi te vāhaʼa fuli ki te Ako Faka Minisitelio Faka Teokalatike, (3) ko te polokalama lautohi ʼaē ʼe tonu ke fai ʼi te vāhaʼa ia muʼa ʼo te ʼAho Fakamanatu, (4) te ʼu kiʼi nota ʼaē ʼe nātou fakahā mai peʼe fai ʼafea te ʼu fakamanatu, pea mo (5) te ʼu fakamanatu ke tou kau tuʼumaʼu ki te tufa ʼo te ʼu nusipepa. Fakahā peʼe lava fakaʼaogaʼi feafeaʼi te ʼu faʼahi ʼaē ʼe hina ke tohi ai te polokalama ʼo tatatou fai faka mafola ʼi te vāhaʼa, mo te ʼu hola ʼaē neʼe tou fai pea mo te ʼu fakatuʼutuʼu neʼe tou fai mo ʼihi, mo te ʼaho ʼo te ʼu akonaki ʼaē neʼe hinoʼi mai, ʼo feiā mo te ʼu ʼaho ʼaē ka fai ai te vāhaʼa makehe pea mo te ʼu fakatahi. Kapau ʼe tou tau te kaletalio ʼi he faʼahi ʼe tou sio lelei kiai ʼi totatou ʼapi peʼe ʼi te potu ʼaē ʼe tou gāue ai, pea ʼe lagi feala anai ke tou kamata he ʼu fai palalau ʼo ʼuhiga mo te Tohi-Tapu. Fakahā te fakamatala ʼaē ʼe maʼu ʼi te Annuaire ʼo te taʼu 1988, ʼi te pasina 8.
15 min: Te ʼAoga ʼo Te Kaupepa Foʼou, Koteā ʼAē ʼe Hoko Kia Tatou Mokā Tou Mamate? Fakamanatu tona ʼu puani tāfito. ʼE fakamatala ai peʼe haʼu maifea te akonaki ʼo te maʼuli tuputupua ʼo te nefesi, pea ʼe ina fakamahino pe neʼe mafola feafeaʼi te akonaki ʼaia ki te teitei lotu fuli ʼo te malamanei. ʼE ina fakahā lelei pe koteā te ʼui ʼa te Tohi-Tapu ʼo ʼuhiga mo te nefesi, pe koʼe ʼe tou mamate, koteā te ʼaluʼaga ʼa te kau mate, koteā te ʼamanaki ki te maʼuli ʼi te hili ʼo te mate, pea he koʼe ʼe tonu ke tou ʼiloʼi te moʼoni ʼo ʼuhiga mo te ʼu faʼahi ʼaia. ʼE tonu ke tou lau fuli te kaupepa ʼaia. Fakahā he ʼu paki ʼi te ʼu paki e 40 ʼo te kaupepa, pea mo te ʼu palalau ʼaē ʼe fai ʼi te kamata ʼo te ʼu kapite fuli, ʼaē ʼe feala ke tou fakaʼaogaʼi moʼo fakatupu te fia logo ʼa te hahaʼi. Fakahā peʼe lava fakaʼaogaʼi feafeaʼi te kapite fakaʼosi moʼo kamata ʼaki he ako Tohi-Tapu. Kole age kia nātou ʼaē ʼe ʼi te fono ke nātou fakahā pe koteā te fakatuʼutuʼu ʼaē neʼe nātou fai moʼo fakaʼaogaʼi te kaupepa foʼou ʼaia ʼi te minisitelio.
Katiko 121 pea mo te faikole fakaʼosi.