Polokalama ʼo Te Fono Gāue
Vāhaʼa ʼo te ʼaho 14 ʼo ʼOketopeli
Katiko 103
10 min: Te ʼu logo ʼo te kokelekasio. Te ʼu Tonu. ʼAki te ʼu manatu ʼi te pasina 8, fai he ʼu faʼifaʼitaki e lua moʼo fakahā Te Tule Leʼo ʼo te ʼaho 1 ʼo ʼOketopeli pea mo te Réveillez-vous ! ʼo te ʼaho 8 ʼo ʼOketopeli. ʼI te ʼu faʼifaʼitaki ʼaia e lua, fakahā he ʼu tali kehekehe ki he tahi ʼe ina ʼui atu: “ ʼE ʼau ʼiloʼi lelei takotou gāue.”—Vakaʼi te kiʼi kaupepa Te ʼu Tokoni Ki Te ʼu Fai Palalau Faka Tohi-Tapu, pasina 15.
15 min: Ko he akonaki ʼe ʼaoga ki te kokelekasio.
20 min: “ ʼE Tokaga Te ʼu Tēhina Taupau ʼo Te ʼu Ako Tohi Ki Te Hahaʼi Takitokotahi.” Ko he fai palalau ʼaki he ʼu fehuʼi pea mo he ʼu tali ʼe fai e he tēhina taupau ʼo te ako tohi. ʼI te ʼu ʼuluaki palalau, fakamahino fakanounou pe neʼe kamata feafeaʼi te fakatuʼutuʼu ke fai he ako tohi. (jv pasina 237, palakalafe 4) Fakalavelave fakatomuʼa ki he toko lua peʼe ko he toko tolu kau fai faka mafola, ke nātou fakahā pe neʼe ʼaoga feafeaʼi kia nātou te tokaga ʼaē neʼe fakahā kia nātou takitokotahi ʼi tanatou Ako Tohi.
Katiko 65 pea mo te faikole fakaʼosi.
Vāhaʼa ʼo te ʼaho 21 ʼo ʼOketopeli
Katiko 16
10 min: Te ʼu logo. Lau ʼo te falā.
35 min: “Ke ʼAoga Lahi Kia Tatou Te Fakatahi Faka Tisitilike ‘Te Kau Fai Faka Mafola Faiva ʼo Te Puleʼaga.’ ” ʼE fai e te tēhina takitaki ʼo te Ako ʼo Te Tule Leʼo. Hili te minuta e tahi ki te ʼu ʼuluaki palalau, fai palalau mo te kokelekasio ʼo ʼuhiga mo te polokalama ʼo te fakatahi faka tisitilike, ʼo fakaʼaogaʼi te ʼu fehuʼi ʼo te alatike. Vaevae lelei tokotou temi. ʼE feala ke fai he ʼu palalau nounou moʼo fakamanatuʼi ki te kokelekasio te ʼu puani tāfito. Kapau ʼe feala, pea koutou fehuʼi ki te kokelekasio peʼe feafeaʼi tanatou maʼuliʼi te ʼu meʼa neʼe nātou ako, pea koteā te ʼu lelei neʼe nātou maʼu mai ai.
Katiko 165 pea mo te faikole fakaʼosi.
Vāhaʼa ʼo te ʼaho 28 ʼo ʼOketopeli
Katiko 110
12 min: Te ʼu logo. Fakaloto mālohiʼi te kokelekasio ke nātou toe vakaʼi tanatou ʼu kiʼi nota ʼo te polokalama ʼo te fakatahi ʼo te ʼaho makehe fakamuli, moʼo teuteuʼi te fai palalau ʼo te Fono Gāue ʼi te vāhaʼa ka haʼu. Fakamanatuʼi ke ʼaumai te ʼu kiʼi pepa tānaki gāue ʼo ʼOketopeli. ʼAki te ʼu manatu ʼi te pasina 8, ʼe fakahā e he tuagaʼane Te Tule Leʼo ʼo te ʼaho 15 ʼo ʼOketopeli, pea fakahā e he tēhina te Réveillez-vous ! ʼo te ʼaho 22 ʼo ʼOketopeli. ʼI te hili ʼo te ʼu faʼifaʼitaki takitahi ʼaia, fakahā he faʼahi lelei ʼo te fai palalau. Talanoa ki te ʼu fakatuʼutuʼu makehe ka fai ki te faka mafola ʼi te ʼaho 1 ʼo Novepeli.
15 min: Fai He ʼu Fakamatala. Fakaafe te kokelekasio ke nātou fakamatala he ʼu meʼa neʼe hoko ʼi tanatou ʼolo pea mo tanatou toe liliu mai te fakatahi faka tisitilike, lolotoga te fakatahi, peʼe ko te fagonogono faigamālie ʼi te gāue, ʼi te faleako, ʼi tanatou fai fakatau, pea ʼi te tahi atu faʼahi.
18 min: “Tou Tala Te Logo Lelei ʼAki He Lototoʼa Pea Mo He Aga Fakaʼeteʼete.” Ko he fai palalau ʼaki he ʼu fehuʼi pea mo he ʼu tali. Fai he faʼifaʼitaki e tahi ʼo te palakalafe 3, ʼo fakaʼaogaʼi te tohi Comment raisonner.
Katiko 41 pea mo te faikole fakaʼosi.
Vāhaʼa ʼo te ʼaho 4 ʼo Novepeli
Katiko 66
10 min: Te ʼu logo. Vakaʼi fakanounou te ʼu manatu ʼo te pepa ʼe ʼalutahi mo Te Minisitelio ʼo Te Puleʼaga ʼo Sanualio 2002, moʼo fakahā te kaupepa lahi Fakamaʼua pea mo te tohi Te ʼAtamai Mālama. Fai he faʼifaʼitaki. Talanoa ki te ʼu fakatuʼutuʼu makehe ka fai ki te faka mafola ʼi te ʼaho 11 ʼo Novepeli.
13 min: Mole Tou Ufiufi ʼi Te Logo Lelei. (Loma 1:16) ʼE fakaōvi he tūpulaga ki tana tāmai heʼe ʼi ai tona fihifihia. ʼE mole loto e te tūpulaga ke ʼiloʼi ko ia ko te Fakamoʼoni ʼa Sehova heʼe mataku naʼa vāʼi ia ia e tona ʼu kaumeʼa. ʼE fakamālo te tāmai ki te palalau fakahagatonu ʼa te tūpulaga ki te faʼahi ʼaia. ʼE ina fakamatala te meʼa neʼe fai e Petelo ʼi tana mataku ki te hahaʼi. (Mat. 26:69-74) ʼE tokoni fēnei te tāmai: ʼE mole tonu ke tou ufiufi ʼi totatou ʼuhiga Kilisitiano. (Mko. 8:38) ʼE lelei age kia koe te ʼiloʼi ʼaē ko koe ko he Fakamoʼoni ʼa Sehova ʼi te faleako. Ka ʼiloʼi te faʼahi ʼaia, pea tokolahi te kau hahaʼi faiako ʼe nātou fakaʼapaʼapa anai ki tau tui, pea ʼe mole nātou fakakau anai koe ki he ʼu gāue ʼe mole feala hau kau kiai. ʼE mole fakaneke anai koe e te kau tūpulaga agakovi ke ke fai he meʼa ʼe kovi. ʼE mahino gafua anai ki ʼihi ʼo tau kalasi pe koʼe ʼe mole ke fia fakatahi mo he taʼahine (peʼe ko he tama), mole ke fia kau ki te ʼu faigaoʼi ʼi tuʼa ʼo te faleako, peʼe mole ke fia kau mo nātou ki he ʼu meʼa ʼe nātou fai ʼi te hili ʼo te ako. Kapau ʼe maʼu he temi, ʼe fai palalau te tāmai pea mo te tūpulaga ki te ʼu puani ʼi te tohi Les jeunes sʼinterrogent — Réponses pratiques, ʼi te pasina 315 ki te 318, ʼi te kupu “Koutou Fakahā ʼe Koutou Kaumeʼa Mo Te ʼAtua.” ʼE fakamālo te tūpulaga ki te ʼu tokoni lelei ʼaia.
22 min: Koutou Fakalogo Ki Te ʼAtua—Koutou Fakafeagai Ki Te Tevolo. (Skp. 4:7) ʼAki te ʼu fehuʼi ʼaē ʼe tuʼu ʼi henī, ʼe fai palalau te tagata ʼāfea mo te kokelekasio ʼo ʼuhiga mo te polokalama ʼo te fakatahi makehe ʼaho tahi ʼaē neʼe fai ʼi te taʼu ʼaenī kua hili. Fakaafe te kokelekasio ke nātou fakamatala pe neʼe lava feafeaʼi hanatou maʼuliʼi te ʼu meʼa ʼaē neʼe nātou ako. (ʼE feala ke teuteuʼi fakatomuʼa te faʼahi ʼaia.) Fakahā lelei te ʼu faʼahi ʼaenī ʼo te polokalama: (1) “Ko Te Fakalogo Ki Te ʼAtua ʼi He Mālama ʼe Fakapōpulaʼi.” He koʼe ʼe tonu ke tou tokaga ʼo tekeʼi te ʼu hele ʼo te mālama? (2) “Tou Fakahā Tatatou Fakalogo ʼi Te Famili.” He koʼe ʼe ʼaoga ʼaupito ʼi te kautahi ʼa Sehova ke fakamālohi te ʼu felogoi ʼi te famili? ʼE tou lava fakahoko feafeaʼi te faʼahi ʼaia? (3) “Tou Tokoni Ki Te ʼu Tisipulo Foʼou Ke Nātou Lagolago Mālohi Kia Sehova.” ʼE tou lava tokoni feafeaʼi ki te hahaʼi foʼou ke nātou tauʼi te ʼu ʼahiʼahi ʼo tanatou tui. (4) “Te Faka ʼUhiga ʼo Te Fakafeagai Ki Te Tevolo.” Koteā te puleʼaki ke tou lava tauʼi te Tevolo? ʼE lava puipui feafeaʼi tatou e te teu tau fakalaumālie ʼaē ʼe tuʼu ia Efeso 6:11-18? (wF92 15/5, p. 21-23) (5) “Te Kau Tūpulaga ʼAē ʼe Nātou Lava Tauʼi Ia Ia ʼe Agakovi” pea mo “Te Kau Tūpulaga ʼAē ʼe Fua Lelei Kia Nātou Te Fakalogo Fakaʼatua.” Koteā ʼihi ʼu kākā ʼa Satana ʼe tonu ke tokakaga kiai te kau tūpulaga? ʼE fakapale feafeaʼi te kau tūpulaga ʼaē ʼe nātou fakalogo kia Sehova? (wF90 1/8, p. 13-14, pal. 15-17) (6) “Te ʼu Lelei Mai te Fakalogo Fakaʼatua.” Fakamahino peʼe fakahā feafeaʼi e te kau Kilisitiano tanatou fakalogo ki te ʼu puleʼaga, ki tanatou ʼu patolo, ʼi te famili, pea ʼi te kokelekasio. Koteā te ʼu kalitate ka tokoni mai anai ke tou fai feiā?
Katiko 185 pea mo te faikole fakaʼosi.