Te Tali Ki ʼAkotou ʼu Fehuʼi

◼ ʼE tonu koa ki te ʼu mātuʼa ke nā lau ia te temi ʼaē ʼe fai tuʼumaʼu ai ia te ako fakafāmili?

Logolā ko te maʼua tāfito ʼo te ʼu tamai ʼe ko te foaki ʼo “te akonaki pea mo te ʼu fakatokaga ʼa Sehova,” kae ko te taumātuʼa ʼaē ʼe tonu ke nā akoʼi fakatahi ia tanā fānau. (Efe. 6:4) ʼE fakalotomālohiʼi fēnei ʼi te Tohi-Tapu ia te fānau: “Fakalogo, Ê toku foha, ki te akonaki ʼo tau tamai, pea ʼaua naʼa ke liʼaki te lao ʼo tau faʼē.” (Taag. 1:8) Ko te faʼahi maʼuhiga ʼo te ako ʼaē ʼe foaki e te ʼu mātuʼa ki tanatou fānau ʼe ko te ako Tohi-Tapu fakafāmili.

Ki muʼa atu, tatau aipē pe neʼe ko te taumātuʼa ʼaē neʼe nā kau fakatahi ki te fai ʼo te ako fakafāmili, kae neʼe ko te tamai pē ʼaē neʼe ina takitaki ia te ako fakafāmili ʼo tanā fānau ʼaē neʼe heʼeki papitema, pea neʼe ko ia pē ʼaē neʼe ina tohi tona temi. Kae kua fetogi leva. Kapau ʼi te ako fakafāmili ʼe ko nāua ʼaē ʼe nā fai fakatahi ia te ako ʼo tanā fānau, pea ʼe feala anai ke nā tohi ʼi tanā ʼu pepa tānaki gāue takitahi ia te hola kātoa ʼi te vāhaʼa ohagē ko tona fai ʼi te gāue fai fakamafola. ʼE mahino ia, ʼi te agamāhani ʼe laka age ia te fai ʼo te ako ʼi te hola kātoa ʼi te vāhaʼa, heʼe ko te akoʼi ʼo te fānau ʼe ko he gāue ʼe tonu ke fai tuʼumaʼu e te ʼu mātuʼa. (Teu. 6:6-9) Kae ʼi te pepa tānaki gāue ʼo te māhina fuli ʼe tonu tāfito ke tohi kiai tonā ʼu hola ʼaē neʼe nā fai ʼi tanā gāue fai fakamafola. Koia, ʼe tonu aipē ke nā tohi ia te hola kātoa, tatau aipē peʼe fakalaka ia te ako ʼi te hola kātoa, pe neʼe tuʼa lahi tona fai ʼi te vāhaʼa, pe neʼe fai kehekehe ia te ʼu ako ʼa te fānau. ʼE gata pē anai ki he tokotahi ʼi te taumātuʼa ʼe feala ke ina tohi ia te ako Tohi-Tapu fakafāmili pea mo lau ko tana ʼaʼahi ʼi te vāhaʼa fuli ʼaē neʼe fai ai ia te ako.