Ako 11
Te ʼu Akonaki Pea Mo Te ʼu Agaʼi Fenua ʼAē ʼe Mole Leleiʼia e Te ʼAtua
Koteā te ʼu faʼahiga akonaki pea mo agaʼi fenua ʼaē ʼe kovi? (1)
ʼE tonu koa ke tui te kau Kilisitiano ko te ʼAtua ʼe ko he Tahitolu? (2)
He koʼe ʼe mole fai e te kau Kilisitiano moʼoni te Po Tapu, te Pāsikate, peʼe ko te ʼu ʼaho tupu? (3, 4)
ʼE feala koa ki te kau mate ke nātou fai he ʼu meʼa ʼe kovi ki te kau maʼuʼuli? (5) Neʼe mate koa ia Sesu ʼi he koluse? (6)
ʼE maʼuhiga koa peʼe kailoa ke fakafiafiaʼi ia te ʼAtua? (7)
1. ʼE mole kovi fuli te ʼu akonaki pea mo te ʼu agaʼi fenua. Kae ʼe mole leleiʼia e te ʼAtua te ʼu meʼa ʼaia mo kapau ʼe toʼo mai he lotu hala peʼe fakafeagai ki te ʼu akonaki ʼo te Tohi-Tapu.—Mateo 15:6.
2. Te Tahitolu: Ko Sehova ʼe ko he Tahitolu koa—ko he ʼAtua koa e tahi ia ʼipotasi e tolu? Kailoa! Ko Sehova, te Tāmai, ʼe ko te “ ʼAtua moʼoni pe e tahi.” (Soane 17:3; Maleko 12:29) Ko Sesu ʼe ko Tona ʼuluaki Foha, pea ʼe fakalogo ia ki te ʼAtua. (1 Kolonito 11:3) Ko te Tāmai ʼe lahi age ia ʼi te ʼAlo. (Soane 14:28) Ko te laumālie maʼoniʼoni ʼe mole ko he ʼipotasi ia, kae ʼe ko te mālohi gāue ʼo te ʼAtua.—Senesi 1:2; Gāue 2:18.
3. Te Po Tapu Pea Mo Te Pāsikate: Neʼe mole tupu Sesu ʼi te ʼaho 25 ʼo Tesepeli. Neʼe lagi tupu ʼi te ʼaho 1 ʼo ʼOketopeli, ʼi te temi ʼaē neʼe leʼoleʼo pōʼuli ai e te ʼu tagata tauhi ōvi tanatou ʼu faga ōvi ʼi tuʼa. (Luka 2:8-12) Neʼe mole he temi neʼe fakatotonu ai e Sesu ke fakamanatuʼi tona ʼaho tupu. Kae, neʼe ina ʼui age ki tana kau tisipulo ke nātou fakamanatu tona mate. (Luka 22:19, 20) Ko te Po Tapu pea mo tona ʼu aga ʼe fai ai, ʼe haʼu ia mai te ʼu lotu hala ʼāfea. ʼE toe moʼoni foki te faʼahi ʼaia ʼo ʼuhiga mo te ʼu aga ʼe fai ai te Pāsikate, ohage ko te fakaʼaogaʼi ʼo he ʼu foʼi moa pea mo he ʼu lapino. Ko te kau ʼuluaki Kilisitiano neʼe mole nātou fai te Po Tapu peʼe ko te Pāsikate, ʼo toe feiā pe mo te kau Kilisitiano moʼoni ʼo te temi nei.
4. Te Fakamanatu ʼo Te ʼAho Tupu: ʼE talanoa te Tohi-Tapu ki te fakamanatu ʼo te ʼu ʼaho tupu e lua, pea neʼe fai e te hahaʼi neʼe mole tauhi kia Sehova. (Senesi 40:20-22; Maleko 6:21, 22, 24-27) Ko te kau ʼuluaki Kilisitiano neʼe mole nātou fakamanatu te ʼu ʼaho tupu. Ko te aga māhani ʼaē ko te fakamanatu ʼo te ʼu ʼaho tupu ʼe haʼu ia mai te ʼu lotu hala ʼāfea. ʼE foaki e te kau Kilisitiano moʼoni he ʼu meʼa ʼofa pea mo nātou fakafiafia fakatahi ʼi he tahi age ʼu lakaga ʼo te taʼu.
5. Te Mataku Ki Te Kau Mate: Ko te kau mate ʼe mole feala ke nātou fai he meʼa peʼe nātou logoʼi he meʼa. ʼE mole feala ke tou tokoni kia nātou, pea ʼe mole feala ke nātou fakamamahiʼi tatou. (Pesalemo 146:4; Tagata Tānaki 9:5, 10) ʼE mate te nefesi; ʼe mole toe hoko atu tona maʼuli mokā mate. (Esekiele 18:4) Kae, ʼi ʼihi temi, ko te kau ʼaselo agakovi, ʼaē ʼe higoa ko te kau temonio, ʼe nātou loiʼi te hahaʼi ʼe ko nātou te ʼu laumālie ʼo te kau mate. Ko te ʼu agaʼi fenua fuli ʼaē ʼe maʼu ai te mataku ki te kau mate peʼe ko te tauhi ki te kau mate ʼe hala ia.—Isaia 8:19.
6. Te Koluse: Neʼe mole mate Sesu ʼi he koluse, kae neʼe mate ia ʼi te pou ʼakau. Ko te kupu faka Keleka ʼaē neʼe fakaliliu ʼaki te kupu “koluse” ʼi te ʼatu ʼu Tohi-Tapu, ʼe faka ʼuhiga pe ia ki he kogaʼi ʼakau e tahi. Ko te fakatātā ʼo te koluse ʼe haʼu ia mai te ʼu lotu hala ʼāfea. Neʼe mole fakaʼaogaʼi pea neʼe mole tauhi te ʼu ʼuluaki Kilisitiano ki te koluse. Koia, ʼi takotou manatu ʼe tonu koa ke fakaʼaogaʼi he koluse ʼi te tauhi ʼaē ki te ʼAtua?—Teutalonome 7:26; 1 Kolonito 10:14.
7. ʼE lagi faigataʼa ʼaupito ki ʼihi hahaʼi te līaki ʼo te ʼu akonaki ʼaia pea mo te ʼu agaʼi fenua ʼaia. ʼE lagi faigaʼi anai e tokotou ʼu kāiga pea mo tokotou ʼu kaumeʼa ke ʼaua naʼa koutou līaki te ʼu akonaki ʼaia. Kae ko te leleiʼia ʼo tatou e Sehova ʼe maʼuhiga age ia ʼi te leleiʼia ʼo tatou e te tagata.—Tāʼaga Lea 29:25; Mateo 10:36, 37.
[Paki ʼo te pasina 22]
Ko te ʼAtua ʼe mole ko he Tahitolu
[Paki ʼo te pasina 23]
Ko te Po Tapu pea mo te Pāsikate ʼe haʼu ia mai te ʼu lotu hala ʼāfea
[Paki ʼo te pasina 23]
ʼE mole tonu ke tou tauhi ki te kau mate pea mo tuʼania ia nātou