He Ko ’e ’e Mole Fakamanatu e Te Kau Fakamo’oni ’a Sehova Te Pasikate?
Te manatu hala ’a te tokolahi
Manatu hala: Ko te tupu’aga ’o te mole fakamanatu e te kau Fakamo’oni ’a Sehova te Pasikate he’e mole natou tui kia Sesu.
Tona mo’oni: ’E matou tui ko Sesu Kilisito ’e ko tomatou Haofaki’aga pea ’e tonu ke matou mulimuli agatonu ki “ona lakaaga.”—1 Petelo 2:21; Luka 2:11.
Manatu hala: ’E mole kotou tui ne’e fakatu’uake ia Sesu mai te mate.
Tona mo’oni: ’E matou tui ki te fakatu’uake ’o Sesu, ’e matou tui ’e ko ia te tafito’aga ’o te tui Fakakilisitiano pea mo tamatou faifakamafola.—1 Kolinito 15:3, 4, 12-15.
Manatu hala: ’E mole kotou loto ke fiafia takotou fanau ’i te ’u fakafiafia ’o te Pasikate.
Tona mo’oni: ’E matou ’o’ofa ’i ’amatou fanau, pea ’e matou fai ia me’a fuli mo’o ako’i pea mo tokoni kia natou ke natou ma’u ia te fiafia.—Tito 2:4.
He ko ’e ’e mole fakamanatu e te kau Fakamo’oni ’a Sehova te Pasikate?
’E mole fakatafito ia te fakamanatu ’o te Pasikate ki te Tohi-Tapu.
Ne’e kole mai e Sesu ke tou fakamanatu ia tona mate, ka’e mole ko tona fakatu’uake. ’E matou fakamanatu tona mate ’i te ta’u fuli ’o mulimuli ki te kaletalio Fakatohi-tapu.—Luka 22:19, 20.
’E matou ilo’i, ’e mole tali e te ’Atua ia te ’u to’oto’oga ’o te Pasikate kote’uhi ’e ha’u mai te ’u to’oto’oga faka’afeā ’o ’uhiga mo te fanaunau. ’E fakama’ua mai e te ’Atua ke tou foaki age he pipiki ’ateaina kia te ia pea ’e lotomamahi ’o ’uhiga mo te fa’ahiga tauhi ’ae ’e tou fai age ’aki te ’u to’oto’oga ’ae ’e fehi’a ki ai.—Ekesote 20:5; 1 Hau 18:21.
’E matou tui papau, ko te tonu ’ae ne’e matou to’o ke ’aua na’a matou fakamanatu te Pasikate, ’e fakatafito ia ki te Tohi-Tapu, ’ae ’e ina fakalotomalohi’i matou ke matou faka’aoga’i ia “te poto mo te fakakaukau” ’i hamatou mulimuli ’i he ’u manatu fakatagata. (Taaga Lea 3:21; Mateo 15:3) Logope la ’e matou vaevae te ’u manatu ’e matou tui ki ai ’o ’uhiga mo te Pasikate mo ’ihi ’e natou fakalavelave mai, ka’e ’e matou toe faka’apa’apa ki te manatu ’a te tagata takitokotahi ’e ina filifili ia te me’a ’ae ’e loto ki ai.—1 Petelo 3:15.