ʼE Kovi Te ʼu Meʼa Fakatemonio Pea Mo Te Faifakalauʼakau

ʼE loto e Satana ke koutou fai te ʼu meʼa fakatemono. Ko te tokolahi ʼe nātou fai te ʼu sakilifisio ki tanatou ʼu kui ʼaē kua mamate, pe ko te ʼu laumālie, moʼo puipui nātou mai te ʼu meʼa kovi. ʼE nātou fai te ʼu meʼa ʼaia heʼe nātou matataku ki te mālohi ʼo te ʼu laumālie. ʼE nātou ʼai te ʼu mama pea mo he ʼu vesa moʼo puipui nātou. ʼE nātou ʼinu peʼe nātou vali ki tonatou sino “te ʼu faitoʼo” moʼo puipui ʼo nātou. ʼI tonatou ʼapi peʼe ʼi te kele, ʼe fufū e ʼihi hahaʼi he ʼu meʼa ʼe ʼui ʼe feala ai ke puipui nātou. Ko ʼihi ʼe nātou fakaʼaogaʼi “te ʼu faitoʼo” fakatemonio, heʼe nātou faka tui ʼe feala anai ke lava lelei ai tanatou gāue, tanatou ʼu sivi ʼi te ako, pe ko tonatou lafi.

Ko tokotou puipuiʼaga ʼaē ʼe lelei tokotahi moʼo fakafeagai kia Satana, ʼe ko takotou fakakaumeʼa mo Sehova. ʼE mālohi age ia Sehova ʼAtua mo tana kau ʼaselo, ia Satana mo tana kau temonio. (Sakopo 2:19; Apokalipesi 12:9) Kua loto ʼaupito e Sehova ke ina fakaʼaogaʼi tona mālohi moʼo hāofaki tona ʼu kaumeʼa—ia nātou ʼaē ʼe nātou agatonu kia te ia ʼaki he loto katoa.—2 Fakamatala 16:9.

ʼE ʼui fēnei e te Folafola ʼa te ʼAtua: “ ʼAua naʼa koutou fai he ʼu meʼa fakatemonio.” ʼE tauteaʼi e Sehova te gaohi meʼa fakatemonio pea mo te faifakalauʼakau, he kapau ʼe tou fai te ʼu meʼa ʼaia, pea ʼe puleʼi totonu tatou e te mālohi ʼa Satana te Tevolo.—Levitike 19:26.