ʼE Fua Lelei Feafeaʼi Ia Te ʼu Lao ʼa Te ʼAtua Kiā Tātou?

1. He koʼē ʼe ʼaoga ke takitaki ia te tagata?

Ko totatou Tupuʼaga ʼe poto age ia iā tātou. Pea ʼe tokaga kiā tātou ohagē ko he Tamai ʼofa. Neʼe mole ina fakatuʼutuʼu ke tou māʼuʼuli ʼo ʼāteaina mai ia te ia. (Selemia 10:23) Ohagē pē ko te ʼaoga ʼaē ki he kiʼi tamasiʼi ke takitaki e ʼana mātuʼa, ʼe toe ʼaoga foki kiā tātou fuli ia te takitaki fakaʼatua. (Esaia 48:17, 18) Ko te ʼu lao Fakatohi-tapu ʼe ko he meʼa ʼofa ia ʼe foaki mai e te ʼAtua.​—Lau ia 2 Timoteo 3:16.

ʼE akoʼi mai e te ʼu lao ʼa te ʼAtua kiā tātou ia te faʼahiga maʼuli ʼaē ʼe lelei tokotahi pea mo fakahā mai kiā tātou peʼe tou lava maʼu feafeaʼi ia te ʼu tapuakina heʼegata ʼi te kā haʼu. Mai tona ʼaluʼaga ʼaē neʼe fakatupu tātou e te ʼAtua, ʼe tonu ke tou tali lelei tana takitaki ʼaki he loto fakafetaʼi.​—Lau ia Pesalemo 19:8, 12; Apokalipisi 4:11.

2. ʼE takitaki feafeaʼi tātou e te Folafola ʼa te ʼAtua?

ʼE takitaki tātou e te ʼu manatu Fakatohi-tapu ke tou ʼiloʼi ia te ʼu meʼa ʼaē ʼe loto e te ʼAtua ke tou fai ʼi te ʼu ʼaluʼaga kehekehe. Pea ʼe ʼi ai te ʼu lao ʼe natou fakahā fakahagatonu mai ia te meʼa ʼaē ʼe tonu ke tou fai. (Tetelonome 22:8) ʼE tonu ke tou fakakaukauʼi ia te ʼu manatu Fakatohi-tapu ke tou mahino pe koteā te meʼa ʼaē ʼe tonu ke tou fai. (Taaga Lea 2:10-12) Ohagē lā ʼe akoʼi mai ʼi te Tohi-Tapu ko te maʼuli e ko he meʼa ʼofa ʼe foaki mai e te ʼAtua. ʼE feala ki te manatu ʼaia ke ina takitaki tātou ʼi tatatou gāue, ʼi totatou loto fale peʼe ko ʼatatou feʼoloʼaki motokā ʼi te ala. ʼE ina takitaki ia tātou ke tou fai he ʼu puleʼaki moʼo puipui ʼo tātou mai te ʼu tuʼutāmaki.​—Lau ia Gaue 17:28.

3. Koteā te ʼu lao e lua ʼaē ʼe maʼuhiga tāfito?

Neʼe talanoa ia Sesu ki te ʼu lao e lua ʼe maʼuhiga tāfito. Ko te ʼuluaki ʼe ina fakahā ia te ʼuhiga moʼoni ʼo te maʼuli ʼo te tagata, ʼaē ko te ʼiloʼi ʼo te ʼAtua, te ʼofa pea mo te tauhi agatonu ʼaē kiā te ia. ʼE tonu ke takitaki tātou e te ʼuluaki lao ʼaia mokā tou fai he ʼu tonu. (Taaga Lea 3:6) Ko nātou ʼaē ʼe natou maʼuliʼi ia te lao ʼaia ʼe natou maʼu he ʼu felōgoi lelei mo te ʼAtua, mo te fiafia moʼoni pea ki muli age ia te maʼuli heʼegata.​—Lau ia Mateo 22:36-38.

Ko te lua lao ʼe ina takitaki tātou ke tou felōgoi lelei mo te hahaʼi. (1 Kolinito 13:4-7) ʼE tonu ke tou faʼifaʼitakiʼi te aga ʼa te ʼAtua ki te hahaʼi mo kapau ʼe tou fia maʼuliʼi ia te lua lao ʼaia.​—Lau ia Mateo 7:12; Luka 10:27; Mateo 22:40.

4. ʼE fua lelei feafeaʼi ia te ʼu lao ʼa te ʼAtua kiā tātou?

Ko te ʼu lao ʼa Sehova ʼe natou akoʼi te ʼu fāmili ke natou feʼofaʼaki pea mo logotahi. (Efeso 4:32; Kolose 3:12, 14) Ko te Folafola ʼa te ʼAtua ʼe ina puipui te maʼuli fakafāmili ʼaki tana akoʼi kiā nātou ia te manatu ʼaē ko te ʼohoana ʼe tonu ke tologa.​—Lau ia Senesi 2:24.

Kapau ʼe tou mulimuli ki te ʼu akonaki Fakatohi-tapu, ʼe feala ke tou lotofīmālie pea mo lelei totatou maʼuli ʼi te faʼahi fakakoloa. Ohagē lā ko he pātolō ʼe ina leleiʼia age he tahi ʼe ina maʼuliʼi ia te ʼu lēkula Fakatohi-tapu ʼo ʼuhiga mo te agatonu pea mo te faʼa gāue. (Taaga Lea 10:4, 26; Hepeleo 13:18) Ko te Folafola ʼa te ʼAtua ʼe ina toe akoʼi mai ke tou maʼuli fakafeʼauga ʼo ʼuhiga mo te ʼu meʼa ʼaē ʼe ʼaoga kiā tātou pea mo tou fakamuʼamuʼa tatatou felōgoi ʼaē mo te ʼAtua ʼi te ʼu koloa fakamālama.​—Lau ia Mateo 6:24, 25, 33; 1 Timoteo 6:8-10.

Ko te maʼuliʼi ʼo te ʼu lao Fakaʼatua ʼe natou puipui totatou mālōlō fakasino. (Taaga Lea 14:30; 22:24, 25) Ohagē lā ko te maʼuliʼi ʼo te lao ʼa te ʼAtua ʼaē ki te tapuʼi ʼo te ʼinu kava fakavalevale ʼe ina puipui tātou mai te ʼu mahaki kovi pea mo te ʼu tuʼutāmaki. (Taaga Lea 23:20) ʼE fakagafua e Sehova ke tou ʼinu he moʼi kava, kae ʼe tonu ke tou ʼinu fakapotopoto. (Pesalemo 104:15; 1 Kolinito 6:10) Ko te Folafola ʼa te ʼAtua ʼe fua lelei kiā tātou heʼe ina akoʼi mai ke tou tōkakaga ki ʼatatou aga pea mo ʼatatou manatu. (Pesalemo 119:97-100) Ko te kau Kilisitiano moʼoni ʼe mole natou fakaʼapaʼapa ki te ʼu lao Fakaʼatua ʼuhi pē ko te ʼu lelei ʼaē ʼe nātou maʼu ai, kae ʼe natou fai ia te faʼahi ʼaia heʼe natou fia fakamaʼuhigaʼi ia Sehova.​—Lau ia Mateo 5:14-16.