AKO 4

Fakaha Fakalelei Te ʼu Vaega

Mateo 22:41-45

TE MANATU ʼAE KE TAʼOFI: Tokoni fakatomuʼa ki te hahaʼi ke natou mahino ki te vaega Tohi-Tapu ʼae ka ke lau.

Fakakaukau pe koʼe ʼe ke lau te vaega Tohi-Tapu. Fakaha te ʼu vaega fuli ke tokagaʼi ai e natou ʼae ʼe fagono atu ia te manatu tafito ʼae ʼe ke fia fakaha age.

Tokagaʼi te ʼu aluʼaga ʼe talanoa ki ai te ʼu vaega ki muʼa atu pea ki muli mai. Pea ke ke iloʼi lelei pe ko ai ʼae ʼe palalau, peʼe ko ai ʼae neʼe ina tohi ia te tohi ʼo te Tohi-Tapu.
Fakatafito ʼau palalau ki te Tohi-Tapu. Ka ke palalau mo he tahi ʼe tui ki te ʼAtua, ke ke fakaha age ko te Tohi-Tapu ʼe ko te Folafola ʼa te ʼAtua, pea ʼe ko te matapuna lelei ʼaia ʼo te poto.
Fakatupu te fia mahino ki te vaega. Lagaʼi he fehuʼi ʼe tali ki ai te vaega, peʼe palalau ki he faigataʼaʼia ʼe feala ke tokoni te vaega ki tona fakatokatoka, peʼe ke fakaha he ako ʼe feala ke taʼofi mai he fakamatala Fakatohi-tapu.

Tokagaʼi te meʼa ʼae kua mahino ki ai te hahaʼi ʼae ʼe fagono atu ʼo ʼuhiga mo te vaega ʼaia, ʼo feia mo te manatu ʼae ʼe tonu ke fakamahino. Fakaha he vaega ke fia logo ki ai te hahaʼi, pea ke hage kia natou ko he manatu foʼou ʼae ʼe natou logo ki ai, tatau aipe pe ʼe ko he vaega kua natou logo mahani ki ai.