Ko Ai Ia Sesu?

Ko Sesu neʼe ko he tahi neʼe iloa. Tokolahi ʼe natou iloʼi tona higoa kae ʼe mole natou iloʼi lelei ia ia. Pea ʼe mole tatau te ʼu manatu ʼa ihi ʼo ʼuhiga mo Sesu. Kae kotea ʼe ui ʼi te Tohi-Tapu ʼo ʼuhiga mo ia?

1. Ko ai ia Sesu?

ʼE ko he laumalie malohi ʼe maʼuli ʼi selo. Neʼe ko te ʼuluaki fakatupu ʼaia ʼa Sehova. Koia ʼae ʼe ui ai ʼe ko “te ʼuluaki tupu ʼo meʼa fuli ʼae neʼe fakatupu.” (Kolose 1:15) ʼE ui ʼi te Tohi-Tapu ʼe ko te ‘ʼAlo ʼulu tokotahi ʼo te ʼAtua’ he ʼe ko ia tokotahi pe ʼae neʼe fakatupu fakahagatonu e Sehova. (Soane 3:16) Neʼe tokoni ia Sesu kia Sehova, tana tamai ki te fakatupu ʼo meʼa fuli. (Lau ia Taʼaga Lea 8:30.) Neʼe fakatahi tuʼumaʼu ia Sesu mo Sehova. ʼE ui ko ia ko “te Folafola” he ʼe ina fakaha te ʼu logo mo te ʼu fakatotonu ʼa te ʼAtua.—Soane 1:14.

2. He koʼe neʼe hifo mai ki te kele?

Kua hili nei ki ai teitei taʼu ʼe 2000, neʼe fai e Sehova he milakulo. Neʼe ina tuku ifo te maʼuli ʼo Sesu ki te fatu ʼo he taʼahine taupoʼou ʼe higoa ko Malia, ʼo tupu tagata ai. (Lau ia Luka 1:34, 35.) Neʼe haʼu Sesu ki te kele ke liliu ko te Mesia ʼae neʼe fakapapauʼi mai peʼe ko Kilisito pea mo haofaki te tagata.a Neʼe fakahoko e Sesu te ʼu lea fakapolofeta fuli ʼo ʼuhiga mo te Mesia. Pea neʼe feala ai ke iloʼi e te hahaʼi neʼe “ko Kilisito, te ʼAlo ʼo te ʼAtua maʼuli.”—Mateo 16:16.

3. ʼE nofo nei ʼifea ia Sesu?

Hili te mate ʼo Sesu, neʼe fakatuʼuake ko he laumalie pea neʼe toe liliu ki selo. Pea ‘neʼe hikihiki ai ia ia e te ʼAtua ki he tuʼulaga maʼoluga.’ (Filipe 2:9) Ia ʼaho nei, ʼe maʼu e Sesu he pule ʼe lahi. Pea ʼe ko ia ʼae ʼe lahi tokotahi ʼi te ʼatulaulau pea mo hoa atu kia Sehova.

4. ʼE mole ko Sesu te ʼAtua mafimafi

ʼE ui ʼi te Tohi-Tapu ʼe fakalogo pe ia Sesu ki tona ʼAtua mo tana Tamai ko Sehova logo la ko he laumalie malohi ʼi selo. He koʼe ʼe feala ke tou ui te faʼahi ʼaia? Vakaʼi te ʼATA VITEO pe kotea ʼe ui ʼi te Tohi-Tapu ʼo ʼuhiga mo te tuʼulaga ʼo Sesu moka fakatatau ki te ʼAtua mafimafi.

ʼATA VITEO: Ko Sesu Koa Te ʼAtua? (3:22)

ʼE tokoni mai te ʼu vaega ka hoa mai ke ta mahino kia Sehova mo Sesu. Lau te ʼu vaega pea mo fai te ʼu fehuʼi ʼae ʼe hoa mai ki ai.

Lau ia Luka 1:30-32.

• Ohage ko tona ui e te ʼaselo, ko ai ia Sesu?

Lau ia Mateo 3:16, 17.

• ʼI te papitemaʼi ʼo Sesu, kotea neʼe ui e te leʼo mai te lagi?

• Kia koe la, ko ai ʼae neʼe palalau?

Lau ia Soane 14:28.

• Ko ai ʼae ʼe lahi age ʼi he tamai mo hona foha? Pea ko ai ʼe pule ia naua?

• Neʼe ui e Sesu kia Sehova Tamai. Kotea ʼae ʼe ha mai ai?

Lau ia Soane 12:49.

• Neʼe manatu koa ia Sesu ʼe tatau mo tana Tamai? Kae kotea tau ia manatu?

5. He ʼu fakamoʼoni ko Sesu te Mesia

ʼATA VITEO: Neʼe Fakahoko e Sesu Te ʼu Lea Fakapolofeta (3:03)

Lau te ʼu lea fakapolofeta ʼaeni pea fai te ʼu fehuʼi ʼae ʼe hoa mai:

Lau ia Mikea 5:2 ke iloʼi ai pe neʼe tonu ke tupu ʼifea ia te Mesia.b

• Neʼe hoko moʼoni koa te lea fakapolofeta ʼaia?—Mateo 2:1.

Lau ia Pesalemo 34:20 pea mo Sakalia 12:10 ke iloʼi ai te ʼu lea fakapolofeta ʼe lua ʼo ʼuhiga mo te mate ʼa te Mesia.

• Neʼe hoko moʼoni koa te ʼu lea fakapolofeta ʼaia?—Soane 19:33-37.

• ʼI tau manatu la, neʼe lava fai koa e Sesu he meʼa ke hoko te ʼu lea fakapolofeta ʼaia?

• Kotea ʼae ʼe ha mai ai ʼo ʼuhiga mo Sesu?

MANATU TAFITO

Ko Sesu ʼe ko he laumalie. ʼE ko te ʼAlo ʼo te ʼAtua pea mo te Mesia.

Fehuʼi Fakamanatu

• He koʼe ʼe ui ko Sesu ʼe ko “te ʼuluaki tupu ʼo meʼa fuli ʼae neʼe fakatupu?”

• Kotea neʼe fai e Sesu ʼi muʼa ʼo tana haʼu ki te kele?

• ʼE tou iloʼi feafeaʼi ko Sesu ʼe ko te Mesia?

TE TAHI ʼU MANATU

He tahi ʼu manatu ʼo ʼuhiga mo te tuʼulaga ʼo Sesu ʼi tona ʼuhiga Mesia.

“ʼE Ha Koa ʼi Te ʼu Lea Fakapolofeta Ko Sesu Neʼe Ko Te Mesia?” (Alatike ʼi te jw.org)

ʼE ui ʼi te Tohi-Tapu ko te ʼAtua ko te tamai ʼa Sesu he neʼe ina fakatupu fakahagatonu ia ia. Kae ʼe mole hage tona faʼahiga fakatupu ko te fakatupu ʼo he kiʼi tamasiʼi.

“He Koʼe ʼe Ui Ko Sesu ʼe Ko Te ʼAlo ʼo Te ʼAtua?” (Alatike ʼi te jw.org)

He koʼe ʼe mole talanoa ʼi te Tohi-Tapu ki te Tahitolutapu?

“Jésus est-il Dieu?” (Ko Te Tule Leʼo (Fakafalani) ʼaho 1 ʼo Apelili 2009)

Neʼe fetogi te maʼuli ʼa he fafine ʼi tana ako te meʼa ʼae ʼe ui ʼi te Tohi-Tapu ʼo ʼuhiga mo Sesu.

“Une femme juive explique pourquoi elle a remis sa foi en question” (Réveillez-vous !, mai 2013)