Ko Te ʼu Fakatātā ʼe Natou Fakaōvi Koa Tatou Ki Te ʼAtua?

ʼE TOKOLAHI te ʼu fakatātā ʼa te kau Esipito, ʼa te kau Papilone, pea mo te kau Keleka ʼe fonu nei ʼi te ʼu fale tānaki meʼa ʼāfea. Ko te ʼu fakatātā ʼaia neʼe ko te ʼu meʼa neʼe ʼatolasioʼi fakamalotoloto pea kua liliu ʼi te temi nei ohage ko he ʼu gāue ʼo he faka mātaga ʼāfea. Ko tonatou ʼu mālohi neʼe gata ʼaki pe ia ʼi te ʼu fakakaukau ʼonatou ʼaē neʼe ʼatolasio kia natou. Pea ʼaki te kua mamate ʼo te ʼu hahaʼi ʼaē neʼe natou ʼatolasioʼi te ʼu fakatātā ʼaia, ko te mālohi ʼaē neʼe ʼui neʼe nofo mo te ʼu fakatātā kua puli noa ia. ʼI te fakatuʼu ʼo te ʼu fakatātā ʼe mole honatou mālohi — pea neʼe mole ʼi ai māhani pe ia honatou mālohi — heʼe ko he ʼu koga papa, ko he ʼu koga maka, pe ʼe ko he ʼu koga ukamea ʼe mole maʼuʼuli ia.

ʼO ʼuhiga mo te ʼu fakatātā, ko te ʼu fakatātā fea koa neʼe fakaʼapaʼapaʼi pea mo ʼatolasioʼi e te hahaʼi ʼi te temi nei? Ko te ʼu fakatātā ʼaia ʼe natou mālohi age koa natou ʼi te ʼu fakatātā ʼāfea ʼaē ʼi Esipito, ʼi Papilone, pea mo Keleka? Neʼe natou tokoni moʼoni koa ki te tagata ki he fakaōvi ki te ʼAtua?

ʼI te hōloga ʼo te atu taʼiake, neʼe ʼiloga ki te malamanei katoa tana kua mamaʼo mai te ʼAtua. Pea ʼo ʼuhiga mo te ʼu fakatātā ʼi te malamanei, koteā koa te meʼa ke natou fai moʼo tauʼi te faʼahi ʼaia? Kapau neʼe mole lavaʼi ʼe natou tonatou taupau, pea kua natou maeveeve pea mo ukaukamea pea mo popo, ʼe mole feala hanatou tokaga kia natou totonu, ʼo mole toe feala foki hanatou fai he meʼa maʼa te tagata. Kae, ʼe maʼuhiga age pe, te fakahā ʼaē ʼa te Tohi-Tapu ʼo ʼuhiga mo te faʼahi ʼaia?

Totogi kovi, pea mo teuteuʼi, kae ʼe mole hona ʼuhiga

ʼE mole fakapuna’maʼuli foki, te fakahā ʼaē e te Tohi-Tapu ko te ʼu fakatātā ʼe mole maʼuhiga pea ʼe mole feala hanatou tokoniʼi tanatou kau ʼatolasio ke fakaōvi ki te ʼAtua. Māʼia aipe pe la ko te ʼu fakatātā faka lotu ʼe totogi kovi tuʼumaʼu pe pea mo teuteuʼi, kae ʼe fakahā e te Tohi-Tapu tonatou ʼu ʼaluʼaga moʼoni ʼi tana ʼui ʼaē: “Ko tanatou ʼu tamapua ko te siliva pea mo te aulo, gāue ʼo te ʼu nima ʼo te tagata ʼo te kele. ʼE ʼi ai ʼonatou gutu, kae ʼe mole natou palalau; ʼe ʼi ai ʼonatou ʼu mata, kae ʼe mole natou sio; ʼe ʼi ai ʼonatou ʼu taliga kae ʼe mole natou logo. ʼE ʼi ai ʼonatou ʼu ihu, kae ʼe mole feala hanatou fakamamanu. ʼE ʼi ai ʼonatou ʼu nima, kae ʼe mole natou feala fāfā. Ko te ʼu vaʼe ʼanatou, kae ʼe mole natou poto ʼi te haʼele; ʼe mole ʼi ai he leʼo mai tonatou kia. Ko natou ʼaē ʼe natou faʼu ia natou ʼe liliu ānai natou ohage ko natou.” — Pesalemo 115:4-8.

ʼĀsia la te fakahā ʼaē e te Tohi-Tapu ko te ʼu tamapua ʼe hage ko he ʼu meʼa noa, kae ʼe ina toe tauteaʼi foki, ia natou ʼaē ʼe ʼatolasio ki ai: “ ʼE natou hage ko he ʼakau tuʼu tonu ʼi he ʼoloto komukomu, pea ʼe mole natou gū. Ei, ʼe fata natou, heʼe mole fealagia tanatou haʼele. ʼAua naʼa koutou manavahe ʼuhi ko natou, heʼe mole natou faʼa fai he meʼa ʼe kovi pea ʼe mole ia natou te mālohi ʼaē ki te fai ʼo he meʼa ʼe lelei. Ko te tagata fuli pe neʼe ina fakahā tona vale ʼi tana mole ʼiloʼi he meʼa. ʼE mahino papau, ko te ʼu tagata faiva ʼi te tufugaʼi ʼo te sila ʼe natou ufiufi ānai ki te fakatātā togi; he ko tona fakatātā ukamea faʼu ko te loʼi, pea ʼe mole he ʼatamai ia natou. Ko natou ko te ʼu vaʼiga, gāue fakanukinuki.” — Selemia 10:5, 14, 15.

Te manatu ʼa te kau katolika

Tokolahi, ʼe moʼoni, ʼe natou tuʼutuli, pea mo faikole pea mo tutu sela, pea mo ʼumaʼi te ʼu fakatātā faka lotu, ʼe mole natou ʼui ko natou ko te kau ʼatolasio pe ʼe ko he ʼu kau tauhi ki he ʼu fakatātā. Ohage la, ko te kau katolika ʼe natou ʼui ʼe natou fakaʼapaʼapa ki te ʼu fakatātā ʼo Sesu pea mo Malia, ʼo mole natou ʼui ko te ʼu fakatātā ʼe natou maʼu he mālohi fakaʼatua, kae he ko te ʼu fakatātā ʼe natou fakafofoga nāua. Ko te tohi The World Book Encyclopedia neʼe ina ʼui ʼi te “ ’Ēkelesia katolika Loma, ko te ʼu fakatātā neʼe fakaʼapaʼapaʼi ai ohage ko he ʼu fakafofoga ʼo te ʼu hahaʼi ʼaē ʼe fakatātā ki ai.” Ko te kau takitaki katolika neʼe natou fagonogono natou, ʼe lelei pe te fakaʼapaʼapa ki te ʼu fakatātā mokā ko te fakaʼapaʼapa ʼaia ʼe mole maʼuhiga age ʼi totatou ʼatolasioʼi ki te ʼAtua totonu.

Kae, ko tona pe fakanounou, ko te ʼu fakatātā ʼaia neʼe fakaʼapaʼapaʼi ia. Neʼe toe fakamoʼoni pe ki ai te Nouvelle Encyclopédie catholique (angl.), ko te faʼahiga fakaʼapaʼapa ʼaia “ko te faʼahiga tauhi ia.” Ko ia ʼaē, neʼe fakafeagai ai Sesu ki te fakaʼaoga ʼaē ʼo te ʼu fakatātā ohage ko he tokoni moʼo fakaōvi ki te ʼAtua, ʼi tana ʼui ʼaē: “ ʼE mole he tahi ʼe haʼu ki te Tāmai mo kapau ʼe mole ala ia te ʼau.” (Soane 14:6). ʼE mole toe fakapuna’maʼuli foki, te haga ʼaē ʼa te kau kilisitiano ʼi te ʼuluaki sekulo ʼo tauteaʼi te fakaʼaoga ʼo te ʼu fakatātā ki te tauhi.

Kae, ʼi te temi nei, ko te ʼu lotu ʼaē ʼa te keletiate ʼe natou tuʼu ki muʼa ʼi te ʼu lotu fuli ʼo ʼuhiga mo te tuʼuga ʼo te ʼu fakatātā. ʼE moʼoni, logo aipe te ʼu ʼaluʼaga faka hisitolia pea mo te ʼu meʼa fuli neʼe hoko ʼe ʼiloga ai ʼe kovi te fakaʼapaʼapa ki te ʼu fakatātā, ko te kau kilisitiano ʼi te malamanei katoa ʼe natou hoko atu aipe tanatou tuʼutuli pea mo faikole ʼi muʼa ʼo te fakatātā ʼi tanatou fia kumi fakamalotoloto te ʼAtua. Koteā tona tupuʼaga?

Loʼiaki e te fili

Ko te polofeta ko Isaia, neʼe ina fakahā ko te kau ʼatolasio ki te ʼu fakatātā ʼo tona temi, neʼe to ki te agavale ʼo tanatou ʼu aga, heʼe ko ʼonatou ʼu mata neʼe “pani ke ʼaua naʼa natou toe sio, pea mo ʼonatou ʼu loto ke ʼaua naʼa natou toe sio tonu.” (Isaia 44:18). Ko ai koa ʼaē ʼe feala hana halaʼi mālohi te ʼu tagata fuli? Ko te fono ʼa te kau ikonokalasitike ʼi te taʼu 754 ʼo totatou temi neʼe natou fakahā ai ko te fakaʼapaʼapa ki te ʼu fakatātā neʼe fakahu e Satana heʼe ko tana fakatuʼutuʼu moʼo fakaheʼi te fakakaukau ʼa te tagata mai te moʼoni ʼo te ʼAtua. Koteā tona fakanounou totonu?

ʼIo, ʼe felogoʼi tahi mo te Tohi-Tapu ʼa te ʼAtua, ʼaē neʼe ina fakahā ʼi te ʼu ʼuluaki sekulo, ko te pule fili ʼo te ʼAtua, ko Satana te Tevolo, ʼaē neʼe ina “ fakakiviʼi te ʼatamai” ʼo te hahaʼi ke mole feala hanatou sio “ki te mālama ʼo te moʼoni.” (2 Kolonito 4:4). Ko ia ʼaē ka tou fakaʼapaʼapa ai ki he fakatātā, ʼe mole tou fakaōvi tatou ki te ʼAtua, heʼe tou kaugana tatou ʼi te temi ʼaia ki te ʼu faʼahi gāue ʼa te ʼu temonio. — 1 Kolonito 10:19, 20.

Tou fakaōvi ki te ʼAtua

Ko te ʼu fakatātā ʼe mole feala hanatou tokoni kia tatou ke tou fakaōvi ki te ʼAtua. Ko Sehova ʼAtua te Tupuʼaga Lahi, ʼe fehiʼa ki te fakaʼapaʼapaʼi ʼo te ʼu fakatātā (Teutalonome 7:25). ʼE ʼui ia Naomi 1:2: “Ko Sehova ko te ʼAtua ʼe ina loto ki he noʼo katoa”. Neʼe ina ʼui: “Ko ʼau ia Sehova. Ko toku huafa ʼaia; pea ʼe mole ʼau foaki ānai toku kolōlia ki he tahi, pe ʼe ko toku fakavikiviki ki he ʼu fakatātā neʼe faʼu.” (Isaia 42:8). Ko ia ʼaē, ʼe fakatokaga ai te Tohi-Tapu kia natou ʼaē ʼe natou fakaʼapaʼapa ki te ʼu fakatātā “ ʼe mole natou maʼu ānai te puleʼaga ʼo te ʼAtua.” — Kalate 5:19-21.

Kae, ko Sehova foki ʼe toe loto fakamolemole pea ko te ʼAtua loto manavaʼofa. ʼE palalau foki te Tohi-Tapu ʼo ʼuhiga mo natou ʼaē kua maliu mai tanatou ʼu tamapua ki te ʼAtua pea kua fakanofo natou ko he ʼu kau agatonu ʼi tanatou kua situʼa mai tanatou aga ʼaia (1 Kolonito 6:9-11; 1 Tesalonika 1:9). Neʼe natou fakatokagaʼi te ʼu palalau ʼaenī ʼa Sesu: “Ko te ʼAtua ʼe laumālie, pea ko natou ʼaē ʼe natou ʼatolasioʼi, ʼe tonu ke natou ʼatolasioʼi ʼaki te ʼatamai pea mo te moʼoni.” — Soane 4:24.

Ko he ako fakamalotoloto ʼo te Tohi-Tapu, ʼe ʼiloga ai ānai ʼe mole faigataʼa te fakaōvi ki te ʼAtua (Gāue 17:26-28). He ko ia ko te ʼAtua ʼe loto ʼofa, ʼe faigafua te fakaōvi ki ai, pea ʼe ina fakaafe tatou pea mo loto foki ke tou haga faiga ʼo tofa ni ʼotatou vahaʼa mo ia. — Isaia 1:18.

Ko te kau Fakamoʼoni ʼa Sehova ʼe natou fakaafe koutou ke koutou kumi te Tāmai ʼaē ʼe ʼi selo ohage ko he Tahi ʼe maʼuli moʼoni, ke koutou akoʼi tona huafa, ʼaē ko Sehova, pea mo mahino ki tona ʼu kalitate pea mo tona ʼu meʼa ʼofa ki te malamanei katoa. ʼI te ʼu faʼahi fuli ʼo te ʼu pasina ʼo tana Folafola, ʼaē ko te Tohi-Tapu, ʼe koutou mahino ai ānai he koʼe ʼe mole maʼuhiga te sio, ohage ko te sio ki te ʼu fakatātā pea mo te ʼu paki moʼo fakaōvi ai ki te ʼAtua. ʼIo, “koutou fakaōvi ki te ʼAtua, pea ʼe toe fakaōvi pe mo ia ānai kia koutou.” — Sake 4:8.

[Talanoa ʼo te pasina 6]

Neʼe fakatokagaʼi e te ʼu tagata fai hisitolia te meʼa ʼaenī . . .

◻ “Kua ʼiloʼi māhani pe ko te kau Putisi, neʼe fakatuʼu ʼi te ono sekulo ʼi muʼa ʼo Sesu, kae neʼe mole ʼi ai he paki e tahi ʼo te ʼu tupuʼaga ʼo te lotu ʼaia ʼo aʼu mai ki te ʼuluaki sekulo ʼo totatou temi.”

“Lolotoga ʼo te ʼu sekulo, ko te kau talatisio Initia ʼe mole ʼi ai hanatou ʼu tamapua pe ʼe ko he ʼu fakatātā.”

“Ko te kau Initoisi pea mo te kau Putusi neʼe mole natou tauhi māhani ki te ʼu fakatātā kae neʼe natou tali mai leva ki ʼa muli te ʼu fakatātā ʼi tanatou tauhi. ʼO toe faʼifaʼitaki ki ai te kau kilisitiano.” — LʼEncyclopédie des religions (angl.), ia Mircea Eliade.

◻ “Ko te ʼu faʼahiga fakamatala kehekehe faka tohi-topu ʼe ʼiloga mai ko te tauhi moʼoni ki te ʼAtua neʼe mole natou fakaʼaoga te ʼu fakatātā ( . . . ). ʼI te Tohi ʼo te Tauhi Foʼou, ko te tauhi ki te ʼu ʼatua kehe pea mo te ʼu tamapua neʼe tapuʼi.” — Nouvelle Encyclopédie catholique (angl.).

◻ “Ko te ʼu fakatātā neʼe mole ʼiloa ʼi te tauhi ʼa te kau ʼuluaki kilisitiano.” — Cyclopedia of Biblical, Theological, and Ecclesiastical Literature, ia McClintock pea mo Strong.

◻ “ ʼO toe feiā aipe mo te Tohi ʼo te Tauhi Foʼou, pe ʼe ko te ʼu tohi ʼiloa ʼi te ʼuluaki sekulo ʼo te kau kilisitiano, neʼe mole maʼu ai he fakaʼaoga ʼo he fakatātā pe ʼe ko he paki ʼi te tauhi ʼa te kau kilisitiano, logo aipe pe ʼe neʼe hā ki te kauga mālie pe ʼe neʼe ʼufia.” — A Concise Cyclopedia of Religious Knowledge, ia Elias Benjamin Sanford.

◻ “Lagi neʼe fehiʼa fai mate te kau ʼuluaki kilisitiano ki te ʼui ʼaē ke fakaʼaogaʼi ʼi te ʼu ʼēkelesia he ʼu fakatātā, pea lagi neʼe natou toe fakatokagaʼi foki te tuʼutuli pea mo te faikole kia natou ohage pe ko he ʼatolasio.” — Histoire de lʼEglise chrétienne (angl.), ia John Fletcher Hurst.

◻ “ ʼI te ʼuluaki ’Ēkelesia, ko te fakaʼapaʼapa ʼaē ki te paki ʼo Sesu pea mo te ʼu sagato neʼe fakafihiʼi ʼaupito.” — Nouvelle Encyclopédie britannique.

◻ “Logo aipe te mole fakafeagai ʼa te ʼuluaki ’Ēkelesia ki te ʼu faka mātaga faiva, kae neʼe mole pe maʼu ʼi ai he fakatātā ʼo Sesu.” — Schaff-Herzog Encyclopedia of Religious Knowledge.

[Paki ʼo te pasina 7]

Neʼe fakaʼiloga e Sesu ko te ʼAtua ʼe ina kumi ia natou ʼaē ʼe “tauhi ki te Tāmai ʼaki te laumālie pea mo te moʼoni.”