Ono Talatuku: ʼE Tali e Te ʼAtua Ia Te Fakaʼaogaʼi ʼo Te ʼu Pāki Pea Mo Te ʼu Kihiʼi Fakatātā ʼi Te Tauhi
ʼE haʼu maifea ia te talatuku ʼaia? “Neʼe mole fakaʼaogaʼi e te kau Kilisitiano ʼo te ʼuluaki sēkulō ia te ʼu pāki ʼi tanatou tauhi . . . Ko te fakaʼaogaʼi ʼo te ʼu pāki e te ʼēkelesia ʼi te fā pea mo te nima sēkulō, neʼe fakatafito ki te manatu ʼaē ʼe lelei age ki te hahaʼi ʼaē ʼe mole popoto hanatou ako te hisitolia ʼo te Lotu Fakakilisitiano ʼaki he ʼu pāki ʼi he ʼu faiakonaki peʼe ko he ʼu tohi.”—Cyclopedia of Biblical, Theological, and Ecclesiastical Literature, neʼe tohi e McClintock pea mo Strong, Tohi 4, pāsina 503-504.
Koteā te manatu ʼi te Tohi-Tapu? “ ʼE mole ke fai anai he pāki togi, he meʼa ʼe fakatatau ki he meʼa ʼi te lagi, ʼi ʼoluga, peʼe ʼi te kele, ʼi lalo nei, peʼe ʼi te vai, ʼi lalo ʼo te kele. ʼE mole ke tulolo anai ʼi muʼa ʼo te ʼu ʼatua ʼaia pea mo tauhi kiā nātou.” (Ekesote 20:4, 5, Bible de Jérusalem) Neʼe faitohi fēnei ia te ʼapositolo ko Soane ki te kau Kilisitiano ʼo te ʼuluaki sēkulō: “ ʼU kiʼi fānau, kotou fakamamaʼo mai te ʼu tamapua.”—1 Soane 5:21.
Ohagē ko tona ʼui e te ʼu ʼēkelesia, ʼe fakaʼaogaʼi pē koa ia te ʼu pāki moʼo fakaovi pea mo fakamaʼuhigaʼi ia nātou ʼaē ʼe fakafofoga e te ʼu pāki ʼaia? ʼE ʼui fēnei ʼi te tohi The Encyclopedia of Religion: “ ʼI te kamata, neʼe lagi fakaʼaogaʼi tāfito ia te ʼu pāki moʼo akoʼi [faiakonaki] pea mo fakateuteu he fale ke matalelei; neʼe ko he faʼahiga takuʼaki ʼaia moʼo fakamahino ia tonatou fakaʼaogaʼi. Kae mole tuai kiai, neʼe liliu ʼo ʼatolasioʼi te ʼu pāki ʼaia. Pea neʼe moʼoni tāfito te faʼahi ʼaia ʼo ʼuhiga mo te ʼu kihiʼi fakatātā ʼaē neʼe liliu ko he koga maʼuhiga ʼo te Lotu Orthodoxe ʼo te Potu ʼEsitē.” Kae ko te polofetā ko Isaia neʼe ina fai fakahagatonu ia te fehuʼi ʼaenī: “Ko ai ʼaē ke fakatatau kiai te ʼAtua, pea ko te pāki fea ʼaē ʼe kotou lava fai ki te faʼahi ʼai?”—Isaia 40:18, Bible de Jérusalem.
Vakaʼi ia te ʼu vaega Fakatohi-tapu ʼaenī: Isaia 44:13-19; Gāue 10:25, 26; 17:29; 2 Kolonito 5:7
TE MANATU ʼAĒ ʼE MOʼONI:
ʼE mole tali e te ʼAtua ia te fakaʼaogaʼi ʼaē ʼo te ʼu pāki pea mo te ʼu kihiʼi fakatātā
[Talanoa ʼo te pasina 9]
TOU LIʼAKI IA TE ʼU TALATUKU, KAE TOU PIPIKI MAʼU KI TE MOʼONI
Koteā ʼaē ʼe feala ke tou ʼui ki te ʼu talatuku ʼaenī neʼe tou vakaʼi fakanounou, pea kei akoʼi pē e te ʼu tuʼuga ʼēkelesia? Ko “te ʼu fāgana [Keleka, muthos] matalelei ʼaia” ʼe mamaʼo ʼosi mo te ʼu moʼoni faigafua pea mo fakalotofimālie ʼo te Tohi-Tapu.—2 Petelo 1:16, Bible de Jérusalem.
Koia ʼaki he ʼu manatu ʼe lelei, kotou fakatatau ia te ʼu talatuku ʼaia pea mo te Folafola ʼa te ʼAtua ia te matapuna ʼo te moʼoni ʼaē neʼe akoʼi atu. (Soane 17:17) Koia ʼe kotou mahino ai anai ki te moʼoni ʼo te faʼahi ʼaenī: “ ʼE kotou ʼiloʼi ai anai te moʼoni, pea ko te moʼoni ʼe ina fakaʼāteaina anai koutou.”—Soane 8:32.
[Haʼuʼaga ʼo te paki pasina 9]
Pictorial Archive (Near Eastern History) Est.