Manuʼia Ia Koutou Neʼe ʼOmai Ki Te ʼu Fakatahi Faka Tisitilike ʼa Te “Kau ʼAve Logo ʼo Te Mālama”
KO TE ʼuluaki ʼaho ʼaē neʼe fakatupu, neʼe toe fakatupu ai foki te mālama ki te kele. ʼE tou lau neʼe ʼui ʼe Sehova ʼAtua: “Ke ʼi ai he mālama!” Pea “neʼe ʼi ai te mālama.” (Senesi 1:3). ʼO ʼuhiga mo te faʼahi ʼaia neʼe toe tohi e te ʼapositolo ko Soane: “Ko te ʼAtua ʼe mālama pea ( . . . ) ʼe mole maʼu he faʼahi fakapōʼuli ʼi te fakatahi mo ia.” — 1 Soane 1:5.
ʼI te felogoʼi tahi ʼa te ʼAlo ʼo te ʼAtua mo tana Tāmai, ʼe mole fakapuna’maʼuli foki te ʼui ʼaē ʼa Sesu: “Ko ʼau ko te mālama ʼo te kele.” (Soane 9:5). ʼE feala ke tou mavae mai te fakapōʼuli ʼo hu ki te mālama mokā ʼe tou haga tui kia Sehova ʼAtua pea mo tona ʼAlo. Neʼe toe fakahā e Sesu: “Neʼe ʼau haʼu ohage ko he mālama ki te kele, koteʼuhi ko ʼaē ka tui kia te ʼau ʼe mole nofo ia ʼi te fakapōʼuli.” (Soane 12:46). Ko ia ʼaē, neʼe feala ai te ʼui ʼa Sesu Kilisito ki tana kau tisipulo moʼoni: “Ko koutou ko te mālama ʼo te malamanei. ( . . . ) Ke mu feiā aipe tokotou mālama ʼi muʼa ʼo te hahaʼi, koteʼuhi ke natou sio ki ʼa kotou ʼu gāue lelei pea mo fakavikiviki leva ki takotou Tāmai ʼaē ʼi selo.” — Mateo 5:14, 16.
Ko he tapuakina foki te maʼu ʼo te moʼoni, te mahino ki te Folafola ʼo te ʼAtua ʼaē ʼe ʼiloga lelei mai “te tagata kaugana agatonu mo poto”! (Mateo 24:45-47). ʼE mole kei tou mahalohalo ki te akonaki ʼo te ʼIpotasi; ʼe mole kei faigataʼa te mahino ʼaē ʼo te tupuʼaga ʼo te tuku ʼaē e te ʼAtua māfimāfi pea mo ʼofa te ʼu tau pea mo te ʼu aga mālohi; ʼe mole kei tou tuʼaniaʼi te ʼaluʼaga ʼo te mate. Ko te mālama neʼe ina foaki mai kia tatou te falala, ko te falala ʼaia ki te Puleʼaga. Neʼe ina toe fakahā mai foki kia tatou ko te ʼAtua ko te Tupuʼaga taulekaleka. Ko te mālama ki te moʼoni neʼe ina toe foaki ki totatou maʼuli hona ʼuhiga: ke tou faka kolōlia totatou Tupuʼaga, ia Sehova ʼAtua, koteʼuhi he neʼe fakatupu tatou ki te faʼahi ʼaia. ʼE tou fai ānai te faʼahi ʼaia, mokā ʼe tou kavelogo te mālama. Ko te liliu ko he kavelogo ʼo te mālama, ko te fakaʼapaʼapa pea mo he fahu maʼoluga, kae ʼe ko he toe maʼua foki. Ke tou fai fakalelei te faʼahi ʼaia, ʼe tonu ke tou fakaʼaoga katoa te tokoni ʼe foaki mai e Sehova kia tatou. Ko ia ʼaē ko ʼatatou ʼu fakatahi faka tisitilike ʼi te taʼu 1992 neʼe higoa ai ko te “Kau kavelogo ʼo te mālama”!
Ko ia ʼaē, ko te faka faigafua ʼatatou ʼu faiga pea mo tatatou leleiʼia tatatou gāue ʼaē ko te ʼu kau kavelogo ʼo te mālama, ʼe tou fia kau ānai ki he fakatahi ʼo te ʼu fakatahi ʼaia faka tisitilike, ʼi hatatou kau ki te kamata ʼo te ʼuluaki katiko ʼo aʼu ki te faikole fakaʼosi. ʼE tou toe fia fakalogo fakalelei foki ki te ʼu meʼa fuli ʼaē ʼe talanoa mai ki ai, pe ʼe ko he ʼu akonaki, pe ʼe ko he ʼu fai fehufehuʼi, pe ʼe ko he ʼu fakamatala ʼo he ʼu meʼa neʼe hoko, pe ʼe ko he kiʼi gaoʼi moʼo fakatā he faʼahiga maʼuli. Ko tatatou tohi te ʼu meʼa fuli ʼaē neʼe talanoa ki ai ʼe lelei kia tatou ki ʼa muli, kae ʼe toe lelei pe foki la kia tatou ʼi te temi pe ʼaia, he faiga lelei ai hatatou ʼave fuli tatatou fakakaukau ki ai. ʼIo, ʼi te lolotoga ʼo te polokalama katoa ʼo te fakatahi, ʼe tou fia loto ānai ke tou ‘fakatokaga fakalelei ki tatatou faʼahiga fakalogo’. — Luka 8:18.