Neʼe Tokaga Ia Sehova Kia Mātou ʼi Te Temi Neʼe Tapuʼi Ai Te Gāue—Faʼahi 3

NEʼE ko te ʼaho 14 ʼo malesio 1990. ʼI te ʼaho maʼuhiga ʼaia, neʼe ʼau kau ʼi te nofo ʼi te temi ʼaē neʼe haga ai te tagata lahi ʼo te puleʼaga ʼi te ʼu pilo ʼo te minisi ʼaē ʼe taupau ki te ʼu Meʼa faka lotu, ʼi Berlin ʼo te potu Hahake, ʼo tuku te fakagafua faka puleʼaga ki te kau Fakamoʼoni ʼa Sehova ʼi te fenua ʼaia ʼaē neʼe fakahigoaʼi ko te Lepupilika temokalitike fakasiamani, pe ʼe ko te Siamani ʼo te potu Hahake. Lolotoga ʼo te fai ʼo te meʼa ʼaē neʼe hoko ʼi ai, neʼe ʼau toe fakamanatu te temi ʼaē neʼe ʼau liliu ai ko he Fakamoʼoni ʼa Sehova pea neʼe ʼau fakakaukau ki te ʼu temi faigataʼa ʼaē neʼe tau mo mātou.

ʼI te vaelua ʼo te ʼu taʼu 50, neʼe ko Margarete, ko te fafine neʼe ma gāue fakatahi pea neʼe ko he Fakamoʼoni ʼa Sehova, neʼe ʼuluaki palalau mai kia ʼau ʼo ʼuhiga mo tana tui ʼaē ʼe fakatafito ki te Tohi-Tapu, pea neʼe ko te temi ʼaia neʼe kovi ʼosi te gaohi ʼa te kau Fakamoʼoni ʼa Sehova ʼi Siamani ʼi te potu Hahake. Pea hili ʼaia, neʼe fetogi gāue leva ia Margarete pea neʼe kamata taku ako te Tohi-Tapu mo te tahi Fakamoʼoni. Neʼe ʼau papitema ʼi te 1956, pea ko Margarete pea mo ʼau neʼe ma ʼohoana pe ʼi te taʼu ʼaia. Neʼe ma kau ki te kokelekasio ʼo Lichtenberg ʼi Berlin. ʼI ai neʼe ko te kau faka mafola ʼo te Puleʼaga e 60 neʼe nātou fevaevaeʼaki te gāue ʼaē ko te fagonogono.

Hili taʼu e lua ki toku papitema, ko te ʼu tagata gāue ʼo te takitaki faka puleʼaga neʼe nātou ʼolo ki te ʼapi ʼo te tēhina ʼaē neʼe ina takitaki tomatou kokelekasio. Neʼe nātou talitali ai moʼo fakatūʼa ia ia, ka neʼe gāue ia ʼi Berlin ʼo te potu Hihifo. Pea ko tona famili neʼe nātou fakatokaga age ki ai ke nofo maʼu ai, pea hili ki ai ni ʼu māhina neʼe nātou ʼolo ki ai ʼi te potu Hihifo. ʼI te temi ʼaia neʼe ʼau taʼu 24, pea neʼe tuku mai kia ʼau te ʼu takitaki mamafa ʼi te kokelekasio. ʼE ʼau fakamālo kia Sehova ʼi tana tuku mai te poto pea mo te mālohi feʼauga moʼo fakahoko ʼo te ʼu gāue ʼaia. — 2 Kolonito 4:7.

Ko te foaki ʼo te meʼa kai fakalaumālie

ʼI te temi ʼaē neʼe fakatuʼu ai te kaupā ʼo Berlin ʼi ʼaukusito 1961, ko te kau Fakamoʼoni ʼa Sehova ʼo te potu Hahake neʼe nātou to ʼāteaina mai tonatou ʼu tēhina ʼo te potu Hihifo. ʼI te temi ʼaia neʼe kamata ai tamatou ta ʼo fakaliuliuga tamatou ʼu tohi, ʼo kamata ʼaki te masini faitohi, pea hoko ʼaki leva te masini ta liuliuga. Talu mai te taʼu 1963, neʼe taʼu lua taku faʼu ʼi tomatou loto fale te fūfūʼaga moʼo fai te gāue ʼaia. ʼE ʼau gāue ʼaho ki taku gāue faʼu meʼa gāue pea ʼe ʼau fakaʼaoga te afiafi ki te fai ʼo he ʼu hiki ʼo Te Tule Leʼo ʼaki te tokoni ʼo te tahi ʼu tēhina e tokolua. Ko te ʼu tagata gāue ʼo te puleʼaga neʼe kua nātou fakatotonu ke nātou ʼiloʼi tamatou fakaʼaluʼalu ʼo te ta tohi, kae ko Sehova neʼe tokaga ai pe ke hoko tuʼumaʼu te hā ʼo te meʼa ʼaē ʼe mātou higoaʼi ko te meʼa kai.

Ko te ta fakaliuliuga ʼo tamatou ʼu tohi neʼe maʼua ke lahi te pepa, pea ko te faigaʼi ʼo te ʼu pepa ʼaia neʼe mole ko he meʼa faigafua. Pea kapau neʼe mātou toʼo fakalahi te ʼu pepa, neʼe feala pe ke fakatokagaʼi e te kau gāue ʼo te puleʼaga. Koia neʼe tahi toʼo e te kau Fakamoʼoni tana ʼu pepa pea nātou ʼaumai ki tamatou ako tohi. Pea ʼi ai leva, neʼe mātou toʼo te ʼu tuʼuga pepa ʼaia ʼo ʼave ki te koga meʼa ʼaē ʼe ta ai te ʼu tohi. Pea ko ʼihi Fakamoʼoni ʼe nātou tufa leva te ʼu nusipepa ʼaē kua ʼosi ta.

ʼI te mahalohalo ʼa te kau gāue ʼo te Puleʼaga kia ʼau, ʼe ʼau kau ʼi te ta tohi, neʼe nātou lama ʼau. ʼI te ʼosi ʼo te taʼu 1965, neʼe ʼau fakatokagaʼi tanatou muliʼi ʼau ʼo laka age leva ia ʼi te māhani pea neʼe ʼau mahalohalo pe ʼe nātou teuteuʼi te meʼa. Pea neʼe hoko fakapuna’maʼuli ia ʼi te tahi uhu.

Neʼe ʼau hāo tautonu

Ko te uhu ʼaia neʼe ko he ʼaho nive ia, pea neʼe ʼau ʼalu ki taku gāue. Neʼe mole heʼeki hopo te laʼā ia, pea neʼe ʼau faigaʼi te kātakiʼi ʼo te momoko. ʼI taku ʼalu ʼaia, neʼe ʼau fakatokagaʼi te foʼi tokofā ʼi te fuga ā. Ko te ʼu hahaʼi ʼaia neʼe nātou afe mai ʼo ʼomai ki toku ala. Pea neʼe ʼau fakatokagaʼi ia nātou ko te ʼu hahaʼi gāue ʼo te puleʼaga. Koteā anai he meʼa ke ʼau fai?

Ko te nive neʼe keli ki te ʼu tafaʼaki moʼo fakaʼātea he kiʼi ala. Neʼe hoko ai pe taku ʼalu, pea mo faigaʼi aipe ke haga tuʼumaʼu taku sio ki toku ala. Pea neʼe ʼau foimo fai taku kiʼi kole fakavilivili. Kua fakaōviōvi mai te ʼu hahaʼi. Kua nātou ʼiloʼi ʼapē ʼau? ʼI tamatou ʼolo fakaʼatuʼatu ʼi te kiʼi ala fāveliveli ʼaia, neʼe faigataʼa taku tui ki te meʼa ʼaē ʼe hoko kia ʼau. Neʼe hoko atu pe taku haʼele ʼo ʼau taulaka. Pea neʼe kalaga te tahi ia nātou, “ ʼE, ko ia. Tuʼu mai!” Pea neʼe ʼau lele fakatavilivili. Ko taku lele ʼaia ʼo fakalaka ʼi te tuliki ʼo te ala pea neʼe ʼau mahiki ʼi te ā ʼo toku vaʼe fale ʼo to ai ki te loto ā ʼo toku ʼapi. Pea ʼau hu ai ki fale ʼo lokaʼi te matapā. Neʼe ʼau kalaga “koutou tutuʼu he koʼeni ʼe nātou ʼomai ʼo kumi ʼau”.

Ko Margerete neʼe foimo hifo aipe ʼi te tuʼuga ʼo ʼalu ʼo tuʼu ʼi te matapā. Pea ʼau lele ʼaia ki te lalo fale ʼo fakahokohoko te afi. Pea ko te ʼu pepa fuli ʼo te kokelekasio ʼaē neʼe ʼau nofo mo ia neʼe ʼau laku ki te afi.

“Avahi! ko te kalaga ʼaia ʼa te ʼu tagata. Avahi te matapā! Ko te polokilea ʼo te lepupilika.”

Ko Margarete neʼe mole ina avahi te matapā, kau lolotoga tutu te meʼa fuli ʼe feala ke ʼiloʼi ai he tahi. Hili ʼaia pea ʼau ʼalu kia Margarete pea mo fakatotonu age ke ina avahi te matapā. Ko te ʼu hahaʼi neʼe nātou feʼohofi mai ki te loto fale.

“Koʼe neʼe ke hola koe?” ko tanatou fehuʼi mai ʼaia.

Neʼe mole faʼa fualoa mo te tau mai ʼo tonatou ʼu tokoni, pea neʼe nātou hue te ʼapi. Ko te meʼa neʼe ʼau hoha tāfito ki ai neʼe ko te tukuʼaga ʼo te ʼu masini ta tohi pea mo te ʼu laupepa e 40 000. Kae ki te uluʼaga ki te fūfūʼaga ʼaia neʼe mole maʼu ia. Ko te fai fehuʼi neʼe loaloaga, kae ko Sehova neʼe tokoni mai aipe ke ia ʼau te fakatokatoka. Ko te meʼa ʼaē neʼe hoko neʼe ina fakaōviōvi ia mātou ki tamatou Tāmai ʼofa ʼaē ʼe ʼi selo pea neʼe ko he fakamālohiʼi ʼo mātou ke hoko ai pe tamatou faʼa kātaki.

Logope te pilisoniʼi kae ʼāteaina

ʼI te fakaʼosi ʼo te ʼu taʼu 60, neʼe mai toku pepa ki te hu solia. ʼI taku mole fia hu ʼaē ki te solia, neʼe maʼua leva ia ke ʼau ʼalu ʼo māhina fitu ʼi te fale pilisoni. ʼI te fale pilisoni ʼo Cottbus, ʼi te potu toga-hahake ʼo Berlin, neʼe mātou toko 15 Fakamoʼoni. Ko mātou fuli ʼaia neʼe ʼave ia mātou ki ai ʼuhi ko tamatou fakafisi ki te hu solia (Isaia 2:2-4; Soane 17:16). Ko tamatou gāue neʼe loaloaga pea faigataʼa. Neʼe mātou ʼaʼala ʼi te mafoatā ʼi te 4 h 15 pea ʼave ia mātou ki tuʼa ʼi te fale pilisoni ʼo gāue ʼi te ʼu ala ʼo te ʼu saliote afi. Lolotoga tamatou nonofo pilisoni neʼe maʼu tomatou ʼu faigamalie ke mātou palalau ai ki ʼihi ʼo ʼuhiga mo te Puleʼaga ʼo Sehova.

Ohage la ko te meʼa ʼaenī neʼe hoko, neʼe ʼi ai te foʼi tokolua ʼe faifakakikite neʼe mātou kauga nonofo ʼi Cottbus. Hoko te tahi ʼaho neʼe ʼau logoʼi ko ia ʼaē ʼe veliveli neʼe fia palalau mo ʼau. Koteā pe ʼaē ʼe loto ki ai? Neʼe ina fakahā mai te meʼa ʼaē neʼe ʼi tona loto. Neʼe ko tana kui fafine neʼe faifakakikite, pea neʼe ko ia neʼe ina toe maʼu te mālohi ʼaia ʼi tana ʼosi lau te ʼu tohi ʼo tana kui. Ko te tagata ʼaia neʼe fia ʼāteaina mai te ʼu mālohi ʼaē ʼe ina haga ʼo puleʼi ia ia, ka neʼe mataku naʼa hoko he ʼu meʼa kia ia. Pea neʼe mole tuku tana tagi. Kae koteā koa te tupuʼaga ʼo taku kau ʼi te ʼu meʼa fuli ʼaia?

Lolotoga tama palalau, neʼe ina fakahā mai ko tona mālohi ʼaē ko te faifakakikite ʼe vaivai mokā fakatahi mo te kau Fakamoʼoni ʼa Sehova. Neʼe ʼau fakamahino age ʼe ʼi ai te ʼu ʼaselo kovi, ko te kau temonio, pea mo te ʼu ʼaselo lelei ʼaē ko te ʼu ʼaselo agatonu. ʼO ʼau talanoa age ki ai ʼo ʼuhiga mo te faʼifaʼitaki lelei ʼa te ʼu hahaʼi neʼe maʼuʼuli ʼi te kolo ʼāfea ʼo Efese ʼaē neʼe nātou liliu ko he ʼu kilisitiano, neʼe ʼau fakahā age ki ai te ʼaoga ʼaē ʼo te līaki ʼo te ʼu meʼa fuli ʼe kau ki te faifakakikite pe ko he fai ʼo he tahi ʼu meʼa fakamanamana age (Gāue 19:17-20). “Pea ka ʼosi, pea ke ʼalu ki te kau Fakamoʼoni, ko taku tala age ʼaia ki ai. Ko te kau Fakamoʼoni ʼe maʼu ʼi te potu fuli pe.”

Hili ki ai te ʼu ʼaho, neʼe mavae te tagata tūpulaga ʼaia ʼi te nofoʼaga, pea neʼe talu ai taku mole toe logo ki he palalau ki te tagata ʼaia. Ko te meʼa ʼaia neʼe hoko ʼo ʼuhiga mo te tūpuluga ʼaia neʼe mataku likoliko pea neʼe mole feala hona fakapelepeleʼi, ʼaē neʼe holi mo tona loto katoa ki te ʼāteaina neʼe ina ʼāsili fakaloloto toku ʼofa kia Sehova. Ko mātou kau Fakamoʼoni ʼaē e 15, neʼe mātou ʼi te fale pilisoni ʼuhi ko tamatou tui, ka neʼe mātou ʼāteaina mātou ʼi te fahaʼi fakalaumālie. Kae ko te tūpulaga ʼaia kua ʼāteaina ʼi te fale pilisoni, kae ʼe hoko atu aipe tana popula ki he “ ʼatua” ʼe ina haga ʼo fakamatakuʼi ia ia (2 Kolonito 4:4). Koia, ko tatou kau Fakamoʼoni ʼe tonu ke tou manako ki totatou ʼāteaina fakalaumālie!

Ko tamā ʼu tamaliki neʼe ʼahiʼahiʼi

Neʼe mole gata ʼaki pe te hahaʼi lalahi ʼaē neʼe tonu ke nātou fakahā tanatou tui kae neʼe hoko atu ai foki mo nātou veliveli. Neʼe fakahoko age foki kia nātou te ʼu ʼahiʼahi ʼi te fale ako feiā mo te gāue. Ko tamā ʼu tamaliki ʼaē e fā neʼe nātou fakahā tanatou tui.

ʼI te monite fuli ʼi te fale ako ʼe fai te fakatahi ʼo ʼuhiga mo te fakaʼapaʼapa ke fai ki te fuka. Ko te kau ako ʼe nātou ʼolo ki te malaʼe ʼo te fale ako, ʼo fai ai te hiva, pea nātou fai te meʼa ʼe fakahigoaʼi ko te fakaʼapaʼapa faka Thälmann, ʼi te temi ʼaē ʼe hiki ai te fuka. Ko Ernst Thälmann neʼe ko he tagata siamani kominisi neʼe matehi e te kau SS nasi ʼi te 1944. Hili te Lua Tau faka malamanei, ko Thälmann neʼe liliu ko he tagata logologona ʼi Siamani ʼi te potu Hahake. ʼAki te akonaki faka tohi-tapu ʼaē ʼe ina fakahā mai ko Sehova ʼAtua tokotahi pe ʼe tonu ke kita fai ki ai he tauhi tapu, ko toku ʼohoana pea mo ʼau neʼe ma akoʼi tamā ʼu tamaliki ke nātou tutuʼu ʼo aga fakaʼapaʼapa ki te ʼu fakatahi ʼaia kae ke ʼaua naʼa nātou kau ai.

Neʼe akoʼi age foki ki te kau tamaliki ako te ʼu hiva faka kominisi. Ko Margarete pea mo ʼau neʼe ma ʼolo ki te fale ako ʼo tamā ʼu tamaliki ʼo fakamahino age te tupuʼaga ʼo te mole hiva ʼe nātou te ʼu hiva faka politike. Neʼe ma fakahāhā age ʼe feala pe tanatou akoʼi niʼihi ʼu hiva. Koia talu mai tanatou kei veliveli, ko tamā ʼu tamaliki neʼe nātou ako aipe te lagolago mālohi ki tanatou tui pea ke nātou kehekehe ʼi tonatou kau ako.

ʼI te fakaʼosiʼosi ʼo te ʼu taʼu 70, ko tamā taʼahine lahi neʼe fia ako gāue pilo. Kae neʼe faka ʼui ki te kau ako ʼaia ke nātou fai ia ʼaho e 14 ʼo he ako teuteu faka solia. Kae ko Renate foki neʼe mole ina tali ke kau ki te ʼu fahaʼi ʼaia, koia neʼe ina fakahā tona ʼuhiga pea neʼe tali ia, ʼo mole kau ia ʼi te faʼahiga ako ʼaia.

Lolotoga tana ako, neʼe ʼalu ia Renate ki te kalasi neʼe kumi age ki ai ke ʼalu ʼo kau ki te ako fai fana. “Renate, ʼe ke haʼu anai ʼo kau ʼi te ako fai fana ʼaia”, ko te ʼui ʼaia ʼa te tagata faiako. Neʼe mole ina fia logo ia ki te ʼu meʼa ʼe fakahāhā age e Renate. “ ʼE mole ke fai fana anai koe”, ko tana fakapapau age ʼaia. “Ko taʼau pe tokaga ki te meʼa ʼinu.”

ʼI te afiafi pe ʼo te ʼaho ʼaia, neʼe mātou palalau faka famili. Neʼe mātou fakahā age kia Renate ko tana mamata ki te ʼu ako fai fana ʼaia ʼe kovi, logope tana mole kau ai. Ko tamatou palalau ʼaia pea mo te faikole neʼe ina fakamālohiʼi ia ia, pea neʼe mole ina tali ke toe hoko age he meʼa feiā. Ko he meʼa fakaloto mālohi kia māua tamā sio ki tamā taʼahine tana fakahā tana lagolago ai pe ki te ʼu lekula faitotonu!

Ko te ʼāsili ʼo tamatou gāue faka mafola

ʼI te fakamalūlū ʼo te fakafeagai ki tamatou gāue ʼi te fakaʼosiʼosi ʼo te ʼu taʼu 70, neʼe lahi te ʼu tohi faka kilisitiano neʼe kamata fetuku mai te potu Hihifo. Neʼe ko he gāue fakatupu tuʼutāmaki ia, kae ko te ʼu tēhina lotomālohi neʼe nātou fai te gāue ʼaia. Neʼe mātou leleiʼia ʼaupito te ʼu meʼa ʼaē neʼe fetuku mai mo te faiga ʼa te ʼu tēhina ʼaē neʼe nātou faka fealagia te fahaʼi ʼaia. ʼI te ʼāsili ʼo te fakataga ʼi te ʼu ʼuluaki taʼu ʼo te tapu, ko te gāue faka mafola ʼi te ʼu ʼapi neʼe faigataʼa ʼaupito. ʼAki te fai ʼaia ʼa te puleʼaga, ko ʼihi neʼe nātou tuku tanatou gāue faka mafola. Kae ʼaki te temi ko tamatou gāue faka mafola neʼe haʼele ʼaupito. ʼI te ʼu taʼu 1960, neʼe ko te toko 25 ki te 100 ʼi te kau faka mafola ʼo te Puleʼaga neʼe fai hoholo tanatou gāue faka mafola ʼi te ʼu ʼapi. Kae ʼaki te temi neʼe hakehake mamalie pe te hahaʼi ʼo te kau fai faka mafola ʼi te ʼu ʼapi ʼo aʼu ki te toko 66 ki te 100 ʼi te fakaʼosi ʼo te ʼu taʼu 1980! Ko te puleʼaga neʼe mole kei lahi leva tana tokaga ki tamatou gāue faka mafola.

ʼI te tahi lakaga, ko te tēhina ʼaē neʼe ma gāue fakatahi ʼi te minisitelio neʼe ina ʼave mo māua tana kiʼi toe fafine. Neʼe ʼi ai te fafine kua matuʼa neʼe mātou palalau pea neʼe puna’maʼuli ʼi tana sio ki te kiʼi toe fafine pea neʼe ina fakaafe mātou ki tona loto fale. Neʼe ina leleiʼia tamatou fai palalau ʼaē neʼe fakatafito ki te Tohi-Tapu pea neʼe ina tali leleiʼi ke mātou toe ʼomai ʼo fai palalau mo ia. Neʼe ʼau tuku ki toku ʼohoana ke ʼalu ʼo toe aʼahi te fafine ʼaia, pea neʼe kamata atu aipe tana ako faka tohi-tapu mo te fafine ʼaia. Logope tona kua matuʼa pea mo tona kua mahamahaki, ko te fafine ʼaia neʼe liliu ko tamatou tuagaʼane pea ʼe kei hoko atu pe nei tana gāue kia Sehova.

Ko he ʼu fakatonutonu ʼuhi kua fakaōvi mai tamatou ʼāteaina

Ko Sehova neʼe ina teuteuʼi mātou ki te temi ʼaē ka lahi ai anai tamatou maʼu te ʼāteaina. Ohage la ko te ʼu meʼa ʼaenī: ʼi muʼa ʼo te fakagafua ʼo tamatou gāue, neʼe tokoniʼi mātou ke fetogi tamatou faʼahiga palalau ki he tahi lolotoga te ʼu fono. ʼUhi ko te ʼu fakatuʼutuʼu moʼo hāofaki mātou, neʼe mātou fetoʼoʼaki pe ʼomātou ʼu kiʼi higoa veliveli. Tokolahi ia nātou ʼaē kua fualoa tanatou feʼiloʼiʼaki ʼe mole nātou feʼiloʼiʼaki ʼi tonatou ʼu matuʼa higoa takitahi. Ko he teuteu ke mātou tali lelei te ʼu hahaʼi ʼe fia ʼomai ki te ʼu fono neʼe tokoniʼi mātou ke mātou fetoʼoʼaki ʼomātou ʼu matuʼa higoa. Ki ʼihi ʼe nātou mata noaʼia, ka ko nātou ʼaē neʼe mulimuli ki te tokoni ʼaia neʼe faigafua kia nātou tanatou fakamahani ki te ʼaluʼaga ʼo tamatou nonofo ʼo kaku ai ki te ʼāteaina.

Neʼe toe fakaʼui mai foki ke kamata ʼamatou ʼu fono ʼaki he hiva ʼo he katiko. ʼAki tona fai ʼaia neʼe mātou fakamamahani ai ki te ʼu fakatuʼutuʼu ʼe mulimuli ki ai te ʼu kokelekasio ʼaē ʼi te ʼu fenua fuli. Ko te tahi tokoni neʼe ʼui mai kia mātou ko te fakafuafua ʼo te hahaʼi ʼo te ʼu ako tohi. Neʼe kamata ʼaki te foʼi toko fā pea haʼu ai ki te ʼu taʼu 50 kua toko 8. Pea hiki ʼaia ki te toko 10 ʼo aʼu ʼaia ki te 12. Pea neʼe fai te sivi ki te faiʼaga ʼo te ʼu fono ʼo te ʼu kokelekasio takitahi ke feʼauga tona tuʼulaga mo te tokolahi ʼo te hahaʼi ʼe kau ai.

ʼAki te temi neʼe feala tamatou sio ʼe mole ko he ʼu fakatonutonu neʼe hoko fai noa, ʼi tamatou ʼosi fakahoko te ʼu fakatotonu ʼaia. Koia ko Sehova neʼe ina fakahā totonu pe ko Ia ko te Tāmai poto pea tokaga! ʼO fakaʼaluʼalu mamalie pe, neʼe tokoni kia mātou ke mātou haʼele ʼo ʼalu tahi mo te toe ʼo tana kautahi fakakelekele, pea neʼe hage ai leva kia mātou ʼe mātou kau ʼi te famili lahi ʼaē ko tana hahaʼi. ʼE mahino papau ia ko Sehova ʼAtua ʼaki tona ʼofa, neʼe ina haga hāofaki aipe tana hahaʼi lolotoga taʼu ʼaia e 40 ʼaē neʼe tapuʼi ai tamatou gāue ʼi Siamani ʼo te potu Hahake. Kua lahi tomatou fiafia ʼi te kua tuku mai ʼo te fakagafua faka puleʼaga!

ʼI te temi nei, kua laka ʼi te toko 22 000 ia te kau Fakamoʼoni ʼa Sehova ʼi te potu ʼaē neʼe higoa ʼāfea ko te Siamani ʼo te potu Hahake. Ko te fakamoʼoni ʼaia ʼo te takitaki poto pea mo te tokaga ʼa Sehova ʼAtua ʼaki tona ʼofa. Ko tana tokoni ʼaē kia mātou lolotoga ʼo te ʼu taʼu ʼaē neʼe mātou nonofo ai ʼi te tapu ʼe fakahā ai ko Sehova ʼe feala ke ina fakaʼaluʼalu te ʼu meʼa. Mole he fakafeagai ki tana hahaʼi ʼe aʼu ʼo lava. Ko Sehova ʼe tokaga lelei pe kia nātou ʼaē ʼe tuku tanatou falala kia te ia. — Isaia 54:17; Selemia 17:7, 8. — Ko te fakamatala ʼa Horst Schleussner.

[Paki ʼo te pasina 25]

Ko Horst pea mo Margarete Schleussner ʼi te ʼu pilo ʼo te Sosiete ʼi Berlin ʼi te potu Hahake.