Ko He Mālama ʼe Lelei Age—Ko He Misi Pe Koa Ia?

KA NApau la neʼe ko koutou ko he ʼu tisipulo ʼa Mazdaism ohage ko tona faka mafola e te polofeta Iranien ko Zoroaster, neʼe lagi feala ke koutou fakatalitali ki te ʼaho ʼaē ʼe toe liliu ai anai te kele ki tona ʼuluaki faʼufaʼu matalelei. Ka na pau la neʼe koutou maʼuʼuli ʼi te Keleka ʼāfea, neʼe lagi feala ke koutou fakaʼamu ke koutou aʼu ki te ʼu Motu Manuʼia matalelei peʼe ke koutou sisio ki te Taʼu Aulo neʼe fakamatalatala e te tagata fai tuketuke ko Hesiod ʼi te valu sēkulō ʼo totatou temi. Ko te Initia Guaraní ʼi te Potu Toga ʼo Amelika e gali kei fetolo pe ʼi te kumi ʼo te Fenua ʼaē ʼe Mole Toe maʼu ai anai Te Kovi. ʼI takotou lolotoga maʼuʼuli ʼi te temi nei, e lagi koutou falala ko te malamanei ʼe haʼele pe anai ia ki muʼa ʼuhi ko he ʼu faʼahiga manatu faka politike peʼe tupu mai te poto ʼo he ʼu manatu faka ekolosike ʼo te temi nei.

Ko te Taʼu Aulo, ko te ʼu Motu Manuʼia, ko te Fenua ʼaē ʼe Mole Toe maʼu ai anai te Kovi—ko he ʼu higoa ʼaia ʼi te ʼu tuʼuga higoa ʼaē neʼe fakaʼaogaʼi moʼo fakahā pe te holi mālohi e tahi, ko te fakaʼamu ʼaē ki he mālama ʼe lelei age.

Ko te mālama ʼaenī, totatou mālama, ʼe mahino papau ia ʼe mole ko te koga meʼa lelei ʼaupito ia. Kua ʼāʼāsili age te ʼu fakapō tupu mai te agamālohi, te ʼu tau fakatautehina kua mālohi faikehe ʼosi, te ʼu fai fakapō, te fakaʼaoʼaoganoa ki te ʼu mamahi ʼo ʼihi, te mole he gāue pea mo te mole ʼi ai ʼo he fetokoniʼaki, te ʼu fihifihia faka ekolosike, te ʼu mahaki ʼaē mole honatou ʼu faitoʼo ʼaē felāveʼi mo te toko miliona hahaʼi—ko te lisi ʼo te ʼu malaʼia ʼaenī ʼe hage ʼe mole ʼi ai hona gataʼaga. Koutou fakakaukauʼi age muʼa te ʼu tau ʼaē ʼe kei lolotoga hoko pe nei, neʼe ʼui e te tagata sulunalisi Italia fēnei: “ ʼE mahino ko te puani ʼaē ʼe malaga mai, ko te logo pe la te fefihiʼaki ʼaia ʼe mole ko te holi ʼaia ʼaē ʼe mālohi age ʼi totatou temi.” ʼI takotou fakasiosio ʼaē te ʼu ʼaluʼaga ʼo te maʼuli, ʼe ko he meʼa fakamalotoloto koa te fakaʼamu ʼaē ki he meʼa ʼe makehe age, he meʼa ʼe lelei age? Peʼe ko te taʼi fakaʼamu ʼaia ko he faʼahiga holi pe ia ki he Meʼa ʼe Mole Moʼoni ia, ko he misi ʼe mole hoko papau anai ia? ʼE tou lolotoga maʼuʼuli koa ʼi te mālama ʼaē ʼe lelei age ʼosi ʼi te ʼu mālama fuli ʼaē ʼe feala ke maʼu?

Ko te ʼu meʼa ʼaia ʼe mole ko he ʼu faiga foʼou ia. ʼI te lolotoga ʼo te ʼu sēkulō ko te tagata neʼe misi ki he mālama ʼe maʼu ai te felogoi tahi, te faitotonu, te mahu ʼo te ʼu koloā, pea mo te ʼofa. ʼI te fakaʼaluʼalu pe ʼo te temi, ko te kau filosofia neʼe nātou fakamahinohino lelei mai tanatou ʼu manatu ʼo ʼuhiga mo te ʼu Puleʼaga lelei age, te ʼu mālama ʼe lelei age. Kae, meʼa fakaʼofaʼofa, neʼe mole feala pe la kia nātou hanatou fakamatalatala peʼe feafeaʼi foki te fakahoko ʼo te ʼu manatu ʼaia.

Ko te lisi ʼo te ʼu misi, pea mo te ʼu holi feiā ki te ʼu fakaʼamu ʼa te tagata ki he sosiete ʼe lelei age, ʼi te ʼu sēkulō kua hili, ʼe ʼi ai koa hona ʼaoga kia tatou?

[Paki ʼo te pasina 3]

ʼE ko te mālama lelei age koa ʼaenī ʼi te ʼu mālama fuli pe?