Ko Taliusi—Ko He Hau Faitotonu

ʼO ʼUHIGA mo te laga fale ʼaē neʼe ina fakatuʼutuʼu ke ina fai, neʼe laupisi fēnei te hau ʼiloa: “Moʼo ʼatakai ʼo Papiloni, neʼe ʼau laga te ʼā ko te kaupā mātolu ʼi te potu hahake. Neʼe ʼau keli he luo . . . ʼAki te kolota pea mo te ʼu piliki neʼe ʼau laga he kaupā mālohi, pea ohage ko he moʼuga, ʼe mole feala ke fakagaūgaūe.” Ei, ko te Hau ʼo Papiloni ko Nepukanesa, neʼe ina fai te toe polokalama laga fale totogi kovi, pea neʼe gāue kinakina moʼo fai ke mālohi te kolo muʼa ʼo tona puleʼaga. Kae neʼe mole feala ke ʼui e mole lava ʼohofiʼi anai ʼi he ʼaho te kolo ʼo Papiloni, ohage ko te manatu ʼa te hau.

Neʼe fakamoʼoni kiai te meʼa ʼaē neʼe hoko ʼi te ʼaho 5 ʼo ʼOketopeli 539 ʼi muʼa ʼo totatou temi. ʼAki te kautau ʼo Metia, ko te hau ʼo Pelesia ko Siliusi 2 neʼe ina ʼohofi ia Papiloni pea mo ina matehi tana hau ko Pelesasā, te Kalitia. Ko ai leva ʼi te temi ʼaia ka liliu anai ko te ʼuluaki hau ʼo te kolo ʼaē neʼe ʼohofiʼi? Neʼe tohi fēnei e te polofeta ʼa te ʼAtua, ʼaē neʼe nofo ʼi te kolo ʼi te temi ʼaē neʼe ʼohofiʼi ai: “Ko Taliusi te Metia, neʼe ina maʼu te puleʼaga, ʼi tona lagi taʼu onogofulu-ma-lua.”​—Taniela 5:​30, 31.

Neʼe ko ai koa ia Taliusi? Neʼe feafeaʼi koa tona temi pule? Neʼe ina gaohi feafeaʼi koa te polofeta ko Taniela, ʼaē neʼe ʼaunofo ʼi Papiloni talu mai taʼu e 70 tupu?

ʼE MOLE LAHI TE ʼU FAKAMATALA ʼO ʼUHIGA MO TE HAU

ʼE mole lahi te ʼu fakamatala faka hisitolia ʼo ʼuhiga mo Taliusi te Metia. Neʼe mole lahi te ʼu tohi neʼe talanoa ʼo ʼuhiga mo te kau Metia. Tahi ʼaē meʼa, ko te ʼu tohi ʼe lauʼi teau afe ʼo te temi muʼa ʼaē neʼe maʼu ʼi te Moyen Orient, ʼe mole katoa ai te ʼu hisitolia pea ʼe ʼi ai mo te ʼu fakamatala kua puli. ʼE kei maʼu pe te tahi ʼu tohi ʼāfea kae ʼe mole lahi, pea neʼe tohi kua hili kiai te sēkulō e tahi peʼe laka atu ʼi te temi hau ʼo Taliusi.

Kae ʼe ʼi ai te ʼu fakamoʼoni ʼe hā ai, ʼi te ʼosi ʼohofi ʼo Ecbatana, te kolo muʼa ʼo Metia, neʼe lagolago agatonu te kau Metia ki te hau Pelesia ko Siliusi 2. Ki muli age, neʼe fakatahi te kau Metia pea mo te kau Pelesia ʼi te ʼu tau ʼo nātou fakalogo ki te pule ʼo Siliusi. ʼO ʼuhiga mo tanatou felogoi ʼaia, ʼe ʼui e Robert Collins ʼaē neʼe ina tohi te The Medes and Persians: “Neʼe tokalelei te kau Metia pea mo te kau Pelesia, ʼo tatau tanatou tuʼulaga. Neʼe tautau hinoʼi nātou ki he gāue maʼuhiga ʼi te puleʼaga pea mo nātou takitaki te kautau ʼo Pelesia. Neʼe talanoa te kau matāpule ki te kau Metia pea mo te kau Pelesia ʼo mole nātou fakakeheʼi ia nātou ʼaē neʼe nātou fai te tau pea mo nātou ʼaē neʼe mālo.” Koia, neʼe fakatahi te kau Metia pea mo te kau Pelesia ʼo nātou faʼu ai te Puleʼaga fakatahi ʼo Metia pea mo Pelesia.​—Taniela 5:​28; 8:​3, 4, 20.

ʼE mahino papau ia neʼe maʼuhiga te gāue ʼaē neʼe fai e te kau Metia ʼi te ʼohofiʼi ʼo Papiloni. ʼE talanoa te Tohi-Tapu ʼo ʼuhiga mo “Taliusi te foha ʼo Asuelusi ʼo te hāko ʼo te kau Metia” neʼe ko te ʼuluaki hau ʼaia ʼo te Puleʼaga fakatahi ʼo Metia pea mo Pelesia ʼaē neʼe pule ki Papiloni. (Taniela 9:1) ʼI tona ʼuhiga hau neʼe feala ke ina fakatuʼu he ʼu lao “ ʼo mulimuli ki te lao ʼa te kau Metia pea mo te kau Pelesia, ʼaē ʼe mole molehi.” (Taniela 6:8) Ko te meʼa ʼaē ʼe ʼui mai e te Tohi-Tapu ʼo ʼuhiga mo Taliusi, ʼe toe hā ai tona agaaga pea mo te tupuʼaga ʼaē ʼo te mole lahi ʼo te ʼu fakamatala ʼo ʼuhiga mo ia.

NEʼE INA LELEIʼIA IA TANIELA

ʼI te hili pe ʼo tona fakanofo pule ʼi Papiloni, ʼe ʼui e te Tohi-Tapu neʼe fakanofo e Taliusi te toko “teau ʼuafulu kau kovana, ke nātou pule ki te puleʼaga katoa, pea neʼe takitaki nātou e te ʼu tagata takitaki maʼuhiga e tolu, pea neʼe kau ai ia Taniela.” (Taniela 6:​1, 2) Kae neʼe fehiʼa ʼaupito te tahi ʼu tagata takitaki ki te tuʼulaga māʼoluga ʼo Taniela. ʼE mahino papau ia, ʼi tana agatonu ki te lao, neʼe ina tāʼofi ai te aga fakahehema, ʼo lagi tupu ai tona fehiʼaʼinaʼi. Neʼe lagi toe maheka te kau tagata takitaki, he neʼe leleiʼia e te hau ia Taniela, pea neʼe ina fakatuʼutuʼu ke ina fakanofo ia ia ko te ʼuluaki minisi.

ʼI tanatou loto ʼaē ke mole hoko te faʼahi ʼaia, ko te ʼu tagata takitaki e toko lua pea mo te kau kovana neʼe nātou fai te lao neʼe ko he fakatuʼutuʼu fakakākā. Neʼe nātou ʼolo ki te hau pea mo nātou fakahā age te lao neʼe tonu ke ina sinie, neʼe ko he fakatotonu ke mole “faikole he tahi ki he ʼatua peʼe ki he tagata” lolotoga ʼaho e 30, kae faikole pe kia Taliusi. Neʼe nātou ʼui ko ia ʼaē ka ina maumauʼi te lao ʼaia ʼe tonu ke lī ki te luo ʼo te ʼu laione. Neʼe manatu ai e Taliusi neʼe tali fuli e te kau tagata takitaki te lao ʼaia, pea neʼe hage ia ko he fakahā ʼaia ʼo tanatou agatonu ki te hau.​—Taniela 6:​1-3, 6-8.

Neʼe sinie e Taliusi te lao ʼaia pea mole tuai pea sio ai ki tona ʼu fua. Neʼe ko Taniela ʼaē neʼe ina ʼuluaki maumauʼi te lao, he neʼe hoko pe tana faikole kia Sehova ʼAtua. (Vakaʼi ia Gāue 5:​29.) Ko te tagata agatonu ko Taniela neʼe lī ki te luo ʼo te ʼu laione, logope la te faiga fakamalotoloto ʼa te hau ke ina maʼu he takuʼaki ke mole fakahoko te lao ʼaia ʼaē neʼe mole feala ke fetogi. Neʼe fakahā e Taliusi tana falala ʼaē ko te ʼAtua mālohi ʼo Taniela ʼe ina hāofaki anai te polofeta.​—Taniela 6:​9-​17.

Hili te po ʼaē neʼe mole mamoe ai pea neʼe ʼaukai ai, neʼe lele ia Taliusi ki te luo ʼo te ʼu laione. Neʼe fiafia lahi ʼi tana maʼu atu ia Taniela ʼe kei maʼuli pea neʼe mole hona lavea! Neʼe fakahoko ai e te hau te faitotonu, ʼo ina fakatotonu ke lī ki te luo ʼo te ʼu laione te ʼu hahaʼi ʼaē neʼe nātou tukugakoviʼi ia Taniela pea mo tanatou ʼu famili. Neʼe ina toe fai te fakatotonu ʼaenī ‘ ʼi tona puleʼaga katoa, ʼe tonu ke tetetete pea mo manavasiʼi [te hahaʼi] ia muʼa ʼo te ʼAtua ʼo Taniela.’​—Taniela 6:​18-​27.

ʼE hā lelei mai, neʼe fakaʼapaʼapa ia Taliusi ki te ʼAtua pea mo te lotu ʼo Taniela, pea neʼe ina fia fakahoko te faitotonu. Kae ʼi tana tauteaʼi ia nātou ʼaē neʼe nātou tukugakoviʼi ia Taniela, neʼe lagi tupu ai te lotokovi ʼo te tahi ʼu tagata takitaki. Pea tahi ʼaē, ko te fakatotonu ʼaē neʼe fai e Taliusi ki te puleʼaga katoa ke ‘manavasiʼi ia muʼa ʼo te ʼAtua ʼo Taniela,’ ʼe mahino ia neʼe tupu ʼaki ai tona fehiʼaʼinaʼi e te kau takitaki lotu mālohi ʼo Papiloni. Mai tona ʼaluʼaga ʼaē neʼe mole leleiʼia te faʼahi ʼaia e te kau sikalaipe, koia ʼe mole tou punamaʼuli ai ki te mole katoa ʼo te ʼu fakamatala he neʼe nātou faiga ke mole maʼu he talanoa ʼo ʼuhiga mo Taliusi. Kae ko te fakamatala nounou ʼo te tohi ʼo Taniela, ʼe ina fakahā mai ko Taliusi neʼe ko he hau neʼe mole fakapalatahi pea neʼe faitotonu.