Kua Fakamahino Te Tohi ʼo Taniela!

KO TE hahaʼi ʼaē neʼe kau ki te fakatahi neʼe kua nātou loto ke nātou foimo toʼo te tohi foʼou Prêtons attention à la prophétie de Daniel ! ʼaē ko ʼona pasina e 320. Neʼe koteā tanatou manatu ki te tohi ʼaia? Tou vakaʼi te ʼu palalau ʼaē neʼe fai e ʼihi.

“Ohage ko te tokolahi ʼo te kau tūpulaga, ʼe faigataʼa kia ʼau te ako ʼo te hisitolia ʼāfea. Koia ʼi taku maʼu taku tohi foʼou Prêtons attention à la prophétie de Daniel !, neʼe mole ʼau fia lau, kae neʼe ʼau ʼaʼahi muʼa. Neʼe ʼau faihala! ʼE lelei age te tohi ʼaia ʼi te ʼu tohi ʼaē kua ʼau ʼosi lau. Neʼe mole ʼau fia tuku taku lautohi! Maʼaku neʼe hage neʼe mole ko he hisitolia neʼe hoko kua hili kiai te ʼu taʼu ʼe lauʼi afe. Kua ʼau hoki mahino leva ki te meʼa ʼaē neʼe logoʼi e Taniela ʼi tana tō kehe mai tona famili, mo tona ʼave ki te fenua mamaʼo, pea mo te ʼatu ʼahiʼahi ʼaē neʼe hoko ki ai. ʼE ʼau fia fakamālo atu ki te tohi ʼaia.”​—Anya.

“Ko te meʼa ʼaē ʼe tokoni ʼaupito mai he ko te tohi ʼaia ʼe ina fia fakahā mai ʼe tokaga Sehova ki te ʼu meʼa fuli ʼaē ʼe hoko ki tana hahaʼi. ʼAki te ʼu moemisi ʼaē neʼe fai e Taniela pea mo te ʼu meʼa ʼaē neʼe sio kiai, pea mo tana fakamahino te ʼu moemisi ʼa te tahi ʼu hahaʼi, ʼe hā lelei mai ko totatou ʼAtua ʼe mole ina tuku anai he meʼa ke ina tāʼofi tana fakatuʼutuʼu. Ko te faʼahi ʼaia ʼe ina fakaloto mālohiʼi tatatou falala ki te ʼu lea faka polofeta ʼo te Tohi-Tapu ʼo ʼuhiga mo te mālama foʼou ʼaē ka ina fakatuʼu anai.”​—Chester.

“Neʼe ʼau leleiʼia ʼaupito takotou faʼahiga fakamatala te hisitolia ʼo Taniela. Kua ʼau mālama lelei kia ia he neʼe koutou fakahā tona ʼu mamahi pea mo te ʼu meʼa ʼaē neʼe tuʼania kiai. Neʼe ʼau mahino lelei ai pe koʼe neʼe leleiʼia ia ia e Sehova. ʼI te ʼu ʼahiʼahi pea mo te ʼu fakataga ʼaē neʼe hoko kia ia, neʼe mole tuʼania ʼo ʼuhiga mo ia totonu. Kae neʼe tuʼania tāfito ʼo ʼuhiga mo Sehova pea mo Tona huafa taulekaleka. Mālo, ʼu tuagaʼane, ki takotou fakamahino lelei mai te ʼu puani ʼaia.”​—Joy.

“Neʼe mātou talitali kiai! Ki muʼa atu neʼe mole heʼeki fakahā feiā mai ko te tohi ʼo Taniela ʼe ʼaoga kia tatou takitokotahi. ʼI taku ʼosi lau te teitei tohi katoa ʼaia ʼi te afiafi ʼaē neʼe ʼau toʼo ai, neʼe ʼau faikole ai kia Sehova moʼo fakamālo kia te ia.”​—Mark.

“Neʼe ma punamaʼuli he neʼe malave te tohi ʼaia ki te loto ʼo tamā ʼu tamaliki. ʼE nā taʼu nima pea mo taʼu tolu. . . . Ko te ʼu hisitolia ʼo Taniela, mo Hanania, mo Misaele pea mo Asalia ʼe ko te ʼu hisitolia ʼaē ʼe nā leleiʼia tāfito ʼi te Recueil d’histoires bibliques, kae ko te faʼahiga fakamatala ʼa te tohi Prêtons attention à la prophétie de Daniel ! neʼe malave mālohi kia nāua. Logope la tanā kei liliki, kae ʼe nā fia hoko ki te ʼu tūpulaga faitotonu ʼaia. ʼE ko he ʼu faʼifaʼitaki lelei ʼaupito maʼa tatatou ʼu fānau! ʼE ko he tohi taulekaleka ʼaē neʼe koutou foaki mai! Mālo siʼi ʼofa!”​—Bethel.

“Neʼe hage neʼe ʼau kau mo te kau tūpulaga Hepeleo ʼaia ʼi te ʼu ʼahiʼahi ʼaē neʼe hoko ki tanatou tui; pea ko te faʼahi ʼaia neʼe ina ʼekenaki ʼau ke ʼau vakaʼi peʼe feafeaʼi taku tui. ʼAki te ʼu fehuʼi fakamanatu ʼo te fakaʼosi “Koteā ʼAē Neʼe Koutou Ako?” ʼe ina fakahū ki totatou loto te ʼu manatu ʼo te ʼu kapite. ʼE mātou toe fakamālo atu ki te tohi lelei ʼaupito ʼaia.”​—Lydia.